(10) 5. ககுத⁴வக்³கோ³

1. பட²மஸம்பதா³ஸுத்தம்

91. ‘‘பஞ்சிமா, பி⁴க்க²வே, ஸம்பதா³. கதமா பஞ்ச? ஸத்³தா⁴ஸம்பதா³, ஸீலஸம்பதா³, ஸுதஸம்பதா³, சாக³ஸம்பதா³, பஞ்ஞாஸம்பதா³ – இமா கோ², பி⁴க்க²வே, பஞ்ச ஸம்பதா³’’தி. பட²மம்.

2. து³தியஸம்பதா³ஸுத்தம்

92. ‘‘பஞ்சிமா, பி⁴க்க²வே, ஸம்பதா³. கதமா பஞ்ச? ஸீலஸம்பதா³, ஸமாதி⁴ஸம்பதா³, பஞ்ஞாஸம்பதா³, விமுத்திஸம்பதா³, விமுத்திஞாணத³ஸ்ஸனஸம்பதா³ – இமா கோ², பி⁴க்க²வே, பஞ்ச ஸம்பதா³’’தி. து³தியம்.

3. ப்³யாகரணஸுத்தம்

93. ‘‘பஞ்சிமானி, பி⁴க்க²வே, அஞ்ஞாப்³யாகரணானி. கதமானி பஞ்ச? மந்த³த்தா மோமூஹத்தா அஞ்ஞம் ப்³யாகரோதி; பாபிச்சோ² இச்சா²பகதோ அஞ்ஞம் ப்³யாகரோதி; உம்மாதா³ சித்தக்கே²பா அஞ்ஞம் ப்³யாகரோதி; அதி⁴மானேன அஞ்ஞம் ப்³யாகரோதி; ஸம்மதே³வ அஞ்ஞம் ப்³யாகரோதி. இமானி கோ², பி⁴க்க²வே, பஞ்ச அஞ்ஞாப்³யாகரணானீ’’தி. ததியம்.

4. பா²ஸுவிஹாரஸுத்தம்

94. ‘‘பஞ்சிமே, பி⁴க்க²வே, பா²ஸுவிஹாரா. கதமே பஞ்ச? இத⁴, பி⁴க்க²வே, பி⁴க்கு² விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹரதி; விதக்கவிசாரானம் வூபஸமா…பே… து³தியம் ஜா²னம்… ததியம் ஜா²னம்… சதுத்த²ம் ஜா²னம் உபஸம்பஜ்ஜ விஹரதி; ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. இமே கோ², பி⁴க்க²வே, பஞ்ச பா²ஸுவிஹாரா’’தி. சதுத்த²ம்.

5. அகுப்பஸுத்தம்

95. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² நசிரஸ்ஸேவ அகுப்பம் படிவிஜ்ஜ²தி. கதமேஹி பஞ்சஹி? இத⁴, பி⁴க்க²வே, பி⁴க்கு² அத்த²படிஸம்பி⁴தா³பத்தோ ஹோதி, த⁴ம்மபடிஸம்பி⁴தா³பத்தோ ஹோதி, நிருத்திபடிஸம்பி⁴தா³பத்தோ ஹோதி, படிபா⁴னபடிஸம்பி⁴தா³பத்தோ ஹோதி, யதா²விமுத்தம் சித்தம் பச்சவேக்க²தி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² நசிரஸ்ஸேவ அகுப்பம் படிவிஜ்ஜ²தீ’’தி. பஞ்சமம்.

6. ஸுதத⁴ரஸுத்தம்

96. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² ஆனாபானஸ்ஸதிம் ஆஸேவந்தோ நசிரஸ்ஸேவ அகுப்பம் படிவிஜ்ஜ²தி. கதமேஹி பஞ்சஹி? இத⁴, பி⁴க்க²வே, பி⁴க்கு² அப்பட்டோ² ஹோதி அப்பகிச்சோ ஸுப⁴ரோ ஸுஸந்தோஸோ ஜீவிதபரிக்கா²ரேஸு; அப்பாஹாரோ ஹோதி அனோத³ரிகத்தம் அனுயுத்தோ; அப்பமித்³தோ⁴ ஹோதி ஜாக³ரியம் அனுயுத்தோ; ப³ஹுஸ்ஸுதோ ஹோதி ஸுதத⁴ரோ ஸுதஸன்னிசயோ, யே தே த⁴ம்மா ஆதி³கல்யாணா மஜ்ஜே²கல்யாணா பரியோஸானகல்யாணா ஸாத்த²ம் ஸப்³யஞ்ஜனம் கேவலபரிபுண்ணம் பரிஸுத்³த⁴ம் ப்³ரஹ்மசரியம் அபி⁴வத³ந்தி, ததா²ரூபாஸ்ஸ த⁴ம்மா ப³ஹுஸ்ஸுதா ஹோந்தி தா⁴தா வசஸா பரிசிதா மனஸானுபேக்கி²தா தி³ட்டி²யா ஸுப்படிவித்³தா⁴; யதா²விமுத்தம் சித்தம் பச்சவேக்க²தி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² ஆனாபானஸ்ஸதிம் ஆஸேவந்தோ நசிரஸ்ஸேவ அகுப்பம் படிவிஜ்ஜ²தீ’’தி. ச²ட்ட²ம்.

7. கதா²ஸுத்தம்

97. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² ஆனாபானஸ்ஸதிம் பா⁴வேந்தோ நசிரஸ்ஸேவ அகுப்பம் படிவிஜ்ஜ²தி. கதமேஹி பஞ்சஹி? இத⁴, பி⁴க்க²வே, பி⁴க்கு² அப்பட்டோ² ஹோதி அப்பகிச்சோ ஸுப⁴ரோ ஸுஸந்தோஸோ ஜீவிதபரிக்கா²ரேஸு; அப்பாஹாரோ ஹோதி அனோத³ரிகத்தம் அனுயுத்தோ; அப்பமித்³தோ⁴ ஹோதி ஜாக³ரியம் அனுயுத்தோ; யாயம் கதா² ஆபி⁴ஸல்லேகி²கா சேதோவிவரணஸப்பாயா, ஸேய்யதி²த³ம் – அப்பிச்ச²கதா²…பே… விமுத்திஞாணத³ஸ்ஸனகதா², ஏவரூபியா கதா²ய நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴; யதா²விமுத்தம் சித்தம் பச்சவேக்க²தி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² ஆனாபானஸ்ஸதிம் பா⁴வேந்தோ நசிரஸ்ஸேவ அகுப்பம் படிவிஜ்ஜ²தீ’’தி. ஸத்தமம்.

8. ஆரஞ்ஞகஸுத்தம்

98. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² ஆனாபானஸ்ஸதிம் ப³ஹுலீகரோந்தோ நசிரஸ்ஸேவ அகுப்பம் படிவிஜ்ஜ²தி. கதமேஹி பஞ்சஹி? இத⁴, பி⁴க்க²வே, பி⁴க்கு² அப்பட்டோ² ஹோதி அப்பகிச்சோ ஸுப⁴ரோ ஸுஸந்தோஸோ ஜீவிதபரிக்கா²ரேஸு; அப்பாஹாரோ ஹோதி அனோத³ரிகத்தம் அனுயுத்தோ; அப்பமித்³தோ⁴ ஹோதி ஜாக³ரியம் அனுயுத்தோ; ஆரஞ்ஞகோ ஹோதி பந்தஸேனாஸனோ; யதா²விமுத்தம் சித்தம் பச்சவேக்க²தி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² ஆனாபானஸ்ஸதிம் ப³ஹுலீகரோந்தோ நசிரஸ்ஸேவ அகுப்பம் படிவிஜ்ஜ²தீ’’தி. அட்ட²மம்.

9. ஸீஹஸுத்தம்

99. ‘‘ஸீஹோ, பி⁴க்க²வே, மிக³ராஜா ஸாயன்ஹஸமயம் ஆஸயா நிக்க²மதி; ஆஸயா நிக்க²மித்வா விஜம்ப⁴தி; விஜம்பி⁴த்வா ஸமந்தா சதுத்³தி³ஸம் [சதுத்³தி³ஸா (ஸ்யா. கம். பீ. க.) அ. நி. 4.33; ஸம். நி. 3.78 பஸ்ஸிதப்³ப³ம்] அனுவிலோகேதி; ஸமந்தா சதுத்³தி³ஸம் [சதுத்³தி³ஸா (ஸ்யா. கம். பீ. க.) அ. நி. 4.33; ஸம். நி. 3.78 பஸ்ஸிதப்³ப³ம்] அனுவிலோகேத்வா திக்க²த்தும் ஸீஹனாத³ம் நத³தி; திக்க²த்தும் ஸீஹனாத³ம் நதி³த்வா கோ³சராய பக்கமதி. ஸோ ஹத்தி²ஸ்ஸ சேபி பஹாரம் தே³தி, ஸக்கச்சஞ்ஞேவ பஹாரம் தே³தி, நோ அஸக்கச்சம்; மஹிம்ஸஸ்ஸ [மஹிஸஸ்ஸ (ஸீ. ஸ்யா. கம். பீ.)] சேபி பஹாரம் தே³தி, ஸக்கச்சஞ்ஞேவ பஹாரம் தே³தி, நோ அஸக்கச்சம்; க³வஸ்ஸ சேபி பஹாரம் தே³தி, ஸக்கச்சஞ்ஞேவ பஹாரம் தே³தி, நோ அஸக்கச்சம்; தீ³பிஸ்ஸ சேபி பஹாரம் தே³தி, ஸக்கச்சஞ்ஞேவ பஹாரம் தே³தி, நோ அஸக்கச்சம்; கு²த்³த³கானஞ்சேபி பாணானம் பஹாரம் தே³தி அந்தமஸோ ஸஸபி³ளாரானம்பி [ஸஸபி³ளாரானம் (க.)], ஸக்கச்சஞ்ஞேவ பஹாரம் தே³தி, நோ அஸக்கச்சம். தம் கிஸ்ஸ ஹேது? ‘மா மே யோக்³க³பதோ² நஸ்ஸா’தி.

‘‘ஸீஹோதி கோ², பி⁴க்க²வே, ததா²க³தஸ்ஸேதம் அதி⁴வசனம் அரஹதோ ஸம்மாஸம்பு³த்³த⁴ஸ்ஸ. யம் கோ², பி⁴க்க²வே, ததா²க³தோ பரிஸாய த⁴ம்மம் தே³ஸேதி, இத³மஸ்ஸ ஹோதி ஸீஹனாத³ஸ்மிம். பி⁴க்கூ²னஞ்சேபி, பி⁴க்க²வே, ததா²க³தோ த⁴ம்மம் தே³ஸேதி, ஸக்கச்சஞ்ஞேவ ததா²க³தோ த⁴ம்மம் தே³ஸேதி, நோ அஸக்கச்சம்; பி⁴க்கு²னீனஞ்சேபி, பி⁴க்க²வே, ததா²க³தோ த⁴ம்மம் தே³ஸேதி, ஸக்கச்சஞ்ஞேவ ததா²க³தோ த⁴ம்மம் தே³ஸேதி, நோ அஸக்கச்சம்; உபாஸகானஞ்சேபி, பி⁴க்க²வே, ததா²க³தோ த⁴ம்மம் தே³ஸேதி, ஸக்கச்சஞ்ஞேவ ததா²க³தோ த⁴ம்மம் தே³ஸேதி, நோ அஸக்கச்சம்; உபாஸிகானஞ்சேபி, பி⁴க்க²வே, ததா²க³தோ த⁴ம்மம் தே³ஸேதி, ஸக்கச்சஞ்ஞேவ ததா²க³தோ த⁴ம்மம் தே³ஸேதி, நோ அஸக்கச்சம்; புது²ஜ்ஜனானஞ்சேபி, பி⁴க்க²வே, ததா²க³தோ த⁴ம்மம் தே³ஸேதி அந்தமஸோ அன்னபா⁴ரனேஸாதா³னம்பி [அன்னபா⁴ரனேஸாதா³னம் (க.)], ஸக்கச்சஞ்ஞேவ ததா²க³தோ த⁴ம்மம் தே³ஸேதி, நோ அஸக்கச்சம். தம் கிஸ்ஸ ஹேது? த⁴ம்மக³ரு, பி⁴க்க²வே, ததா²க³தோ த⁴ம்மகா³ரவோ’’தி. நவமம்.

10. ககுத⁴தே²ரஸுத்தம்

100. ஏவம் மே ஸுதம் – ஏகம் ஸமயம் ப⁴க³வா கோஸம்பி³யம் விஹரதி கோ⁴ஸிதாராமே. [சூளவ. 333, 341] தேன கோ² பன ஸமயேன ககுதோ⁴ நாம கோலியபுத்தோ [கோளீயபுத்தோ (ஸீ. ஸ்யா. க.)] ஆயஸ்மதோ மஹாமோக்³க³ல்லானஸ்ஸ உபட்டா²கோ அது⁴னாகாலங்கதோ அஞ்ஞதரம் மனோமயம் காயம் உபபன்னோ. தஸ்ஸ ஏவரூபோ அத்தபா⁴வபடிலாபோ⁴ ஹோதி – ஸேய்யதா²பி நாம த்³வே வா தீணி வா மாக³த⁴கானி [மாக³தி⁴கானி (ஸீ. பீ. க.)] கா³மக்கே²த்தானி. ஸோ தேன அத்தபா⁴வபடிலாபே⁴ன நேவ அத்தானம் [நேவத்தானம் ப்³யாபா³தே⁴தி (ஸீ.)] நோ பரம் ப்³யாபா³தே⁴தி.

அத² கோ² ககுதோ⁴ தே³வபுத்தோ யேனாயஸ்மா மஹாமோக்³க³ல்லானோ தேனுபஸங்கமி; உபஸங்கமித்வா ஆயஸ்மந்தம் மஹாமோக்³க³ல்லானம் அபி⁴வாதே³த்வா ஏகமந்தம் அட்டா²ஸி. ஏகமந்தம் டி²தோ கோ² ககுதோ⁴ தே³வபுத்தோ ஆயஸ்மந்தம் மஹாமோக்³க³ல்லானம் ஏதத³வோச – ‘‘தே³வத³த்தஸ்ஸ, ப⁴ந்தே, ஏவரூபம் இச்சா²க³தம் உப்பஜ்ஜி – ‘அஹம் பி⁴க்கு²ஸங்க⁴ம் பரிஹரிஸ்ஸாமீ’தி. ஸஹசித்துப்பாதா³ ச, ப⁴ந்தே, தே³வத³த்தோ தஸ்ஸா இத்³தி⁴யா பரிஹீனோ’’தி. இத³மவோச ககுதோ⁴ தே³வபுத்தோ. இத³ம் வத்வா ஆயஸ்மந்தம் மஹாமோக்³க³ல்லானம் அபி⁴வாதே³த்வா பத³க்கி²ணம் கத்வா தத்தே²வந்தரதா⁴யி.

அத² கோ² ஆயஸ்மா மஹாமோக்³க³ல்லானோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா மஹாமோக்³க³ல்லானோ ப⁴க³வந்தம் ஏதத³வோச –

‘‘ககுதோ⁴ நாம, ப⁴ந்தே, கோலியபுத்தோ மமம் உபட்டா²கோ அது⁴னாகாலங்கதோ அஞ்ஞதரம் மனோமயம் காயம் உபபன்னோ ஹோதி. தஸ்ஸ ஏவரூபோ அத்தபா⁴வபடிலாபோ⁴ – ஸேய்யதா²பி நாம த்³வே வா தீணி வா மாக³த⁴கானி கா³மக்கே²த்தானி. ஸோ தேன அத்தபா⁴வபடிலாபே⁴ன நேவ அத்தானம் நோ பரம் ப்³யாபா³தே⁴தி. அத² கோ², ப⁴ந்தே, ககுதோ⁴ தே³வபுத்தோ யேனாஹம் தேனுபஸங்கமி; உபஸங்கமித்வா மம் அபி⁴வாதே³த்வா ஏகமந்தம் அட்டா²ஸி. ஏகமந்தம் டி²தோ கோ², ப⁴ந்தே, ககுதோ⁴ தே³வபுத்தோ மம் ஏதத³வோச – ‘தே³வத³த்தஸ்ஸ, ப⁴ந்தே, ஏவரூபம் இச்சா²க³தம் உப்பஜ்ஜி – அஹம் பி⁴க்கு²ஸங்க⁴ம் பரிஹரிஸ்ஸாமீதி. ஸஹசித்துப்பாதா³ ச, ப⁴ந்தே, தே³வத³த்தோ தஸ்ஸா இத்³தி⁴யா பரிஹீனோ’தி. இத³மவோச, ப⁴ந்தே, ககுதோ⁴ தே³வபுத்தோ. இத³ம் வத்வா மம் அபி⁴வாதே³த்வா பத³க்கி²ணம் கத்வா தத்தே²வந்தரதா⁴யீ’’தி.

‘‘கிம் பன தே, மோக்³க³ல்லான, ககுதோ⁴ தே³வபுத்தோ சேதஸா சேதோ பரிச்ச விதி³தோ – ‘யம் கிஞ்சி ககுதோ⁴ தே³வபுத்தோ பா⁴ஸதி ஸப்³ப³ம் தம் ததே²வ ஹோதி, நோ அஞ்ஞதா²’’’தி? ‘‘சேதஸா சேதோ பரிச்ச விதி³தோ மே, ப⁴ந்தே, ககுதோ⁴ தே³வபுத்தோ – ‘யம் கிஞ்சி ககுதோ⁴ தே³வபுத்தோ பா⁴ஸதி ஸப்³ப³ம் தம் ததே²வ ஹோதி, நோ அஞ்ஞதா²’’’தி. ‘‘ரக்க²ஸ்ஸேதம், மோக்³க³ல்லான, வாசம்! (ரக்க²ஸ்ஸேதம், மோக்³க³ல்லான, வாசம்) [( ) ஸீ. ஸ்யா. கம். பீ. போத்த²கேஸு நத்தி² சூளவ. 333 பன ஸப்³ப³த்த²பி தி³ஸ்ஸதியேவ]! இதா³னி ஸோ மோக⁴புரிஸோ அத்தனாவ அத்தானம் பாதுகரிஸ்ஸதி.

‘‘பஞ்சிமே, மோக்³க³ல்லான, ஸத்தா²ரோ ஸந்தோ ஸம்விஜ்ஜமானா லோகஸ்மிம். கதமே பஞ்ச? இத⁴, மோக்³க³ல்லான, ஏகச்சோ ஸத்தா² அபரிஸுத்³த⁴ஸீலோ ஸமானோ ‘பரிஸுத்³த⁴ஸீலோம்ஹீ’தி படிஜானாதி ‘பரிஸுத்³த⁴ம் மே ஸீலம் பரியோதா³தம் அஸம்கிலிட்ட²’ந்தி. தமேனம் ஸாவகா ஏவம் ஜானந்தி – ‘அயம் கோ² ப⁴வம் ஸத்தா² அபரிஸுத்³த⁴ஸீலோ ஸமானோ பரிஸுத்³த⁴ஸீலோம்ஹீ’தி படிஜானாதி ‘பரிஸுத்³த⁴ம் மே ஸீலம் பரியோதா³தம் அஸம்கிலிட்ட²’ந்தி. மயஞ்சேவ கோ² பன கி³ஹீனம் ஆரோசேய்யாம, நாஸ்ஸஸ்ஸ மனாபம். யம் கோ² பனஸ்ஸ அமனாபம், கத²ம் நம் [கத²ம் நு தம் (ஸீ.), கத²ம் நு (ஸ்யா. கம். பீ. க.), கத²ம் தம் (கத்த²சி)] மயம் தேன ஸமுதா³சரேய்யாம – ‘ஸம்மன்னதி கோ² பன சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேன; யம் துமோ கரிஸ்ஸதி துமோவ தேன பஞ்ஞாயிஸ்ஸதீ’தி. ஏவரூபம் கோ², மோக்³க³ல்லான, ஸத்தா²ரம் ஸாவகா ஸீலதோ ரக்க²ந்தி; ஏவரூபோ ச பன ஸத்தா² ஸாவகேஹி ஸீலதோ ரக்க²ம் பச்சாஸீஸதி [பச்சாஸிம்ஸதி (ஸீ. ஸ்யா. கம். பீ.)].

‘‘புன சபரம், மோக்³க³ல்லான, இதே⁴கச்சோ ஸத்தா² அபரிஸுத்³தா⁴ஜீவோ ஸமானோ ‘பரிஸுத்³தா⁴ஜீவோம்ஹீ’தி படிஜானாதி ‘பரிஸுத்³தோ⁴ மே ஆஜீவோ பரியோதா³தோ அஸம்கிலிட்டோ²’தி. தமேனம் ஸாவகா ஏவம் ஜானந்தி – ‘அயம் கோ² ப⁴வம் ஸத்தா² அபரிஸுத்³தா⁴ஜீவோ ஸமானோ பரிஸுத்³தா⁴ஜீவோம்ஹீ’தி படிஜானாதி ‘பரிஸுத்³தோ⁴ மே ஆஜீவோ பரியோதா³தோ அஸம்கிலிட்டோ²’தி. மயஞ்சேவ கோ² பன கி³ஹீனம் ஆரோசேய்யாம, நாஸ்ஸஸ்ஸ மனாபம். யம் கோ² பனஸ்ஸ அமனாபம், கத²ம் நம் மயம் தேன ஸமுதா³சரேய்யாம – ‘ஸம்மன்னதி கோ² பன சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேன; யம் துமோ கரிஸ்ஸதி துமோவ தேன பஞ்ஞாயிஸ்ஸதீ’தி. ஏவரூபம் கோ², மோக்³க³ல்லான, ஸத்தா²ரம் ஸாவகா ஆஜீவதோ ரக்க²ந்தி; ஏவரூபோ ச பன ஸத்தா² ஸாவகேஹி ஆஜீவதோ ரக்க²ம் பச்சாஸீஸதி.

‘‘புன சபரம், மோக்³க³ல்லான, இதே⁴கச்சோ ஸத்தா² அபரிஸுத்³த⁴த⁴ம்மதே³ஸனோ ஸமானோ ‘பரிஸுத்³த⁴த⁴ம்மதே³ஸனோம்ஹீ’தி படிஜானாதி ‘பரிஸுத்³தா⁴ மே த⁴ம்மதே³ஸனா பரியோதா³தா அஸம்கிலிட்டா²’தி. தமேனம் ஸாவகா ஏவம் ஜானந்தி – ‘அயம் கோ² ப⁴வம் ஸத்தா² அபரிஸுத்³த⁴த⁴ம்மதே³ஸனோ ஸமானோ பரிஸுத்³த⁴த⁴ம்மதே³ஸனோம்ஹீ’தி படிஜானாதி ‘பரிஸுத்³தா⁴ மே த⁴ம்மதே³ஸனா பரியோதா³தா அஸம்கிலிட்டா²’தி. மயஞ்சேவ கோ² பன கி³ஹீனம் ஆரோசேய்யாம, நாஸ்ஸஸ்ஸ மனாபம். யம் கோ² பனஸ்ஸ அமனாபம், கத²ம் நம் மயம் தேன ஸமுதா³சரேய்யாம – ‘ஸம்மன்னதி கோ² பன சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேன; யம் துமோ கரிஸ்ஸதி துமோவ தேன பஞ்ஞாயிஸ்ஸதீ’தி. ஏவரூபம் கோ², மோக்³க³ல்லான, ஸத்தா²ரம் ஸாவகா த⁴ம்மதே³ஸனதோ ரக்க²ந்தி; ஏவரூபோ ச பன ஸத்தா² ஸாவகேஹி த⁴ம்மதே³ஸனதோ ரக்க²ம் பச்சாஸீஸதி.

‘‘புன சபரம், மோக்³க³ல்லான, இதே⁴கச்சோ ஸத்தா² அபரிஸுத்³த⁴வேய்யாகரணோ ஸமானோ ‘பரிஸுத்³த⁴வேய்யாகரணோம்ஹீ’தி படிஜானாதி ‘பரிஸுத்³த⁴ம் மே வேய்யாகரணம் பரியோதா³தம் அஸம்கிலிட்ட²’ந்தி. தமேனம் ஸாவகா ஏவம் ஜானந்தி – ‘அயம் கோ² ப⁴வம் ஸத்தா² அபரிஸுத்³த⁴வேய்யாகரணோ ஸமானோ பரிஸுத்³த⁴வேய்யாகரணோம்ஹீ’தி படிஜானாதி ‘பரிஸுத்³த⁴ம் மே வேய்யாகரணம் பரியோதா³தம் அஸம்கிலிட்ட²’ந்தி. மயஞ்சேவ கோ² பன கி³ஹீனம் ஆரோசேய்யாம, நாஸ்ஸஸ்ஸ மனாபம். யம் கோ² பனஸ்ஸ அமனாபம், கத²ம் நம் மயம் தேன ஸமுதா³சரேய்யாம – ‘ஸம்மன்னதி கோ² பன சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேன; யம் துமோ கரிஸ்ஸதி துமோவ தேன பஞ்ஞாயிஸ்ஸதீ’தி. ஏவரூபம் கோ², மோக்³க³ல்லான, ஸத்தா²ரம் ஸாவகா வேய்யாகரணதோ ரக்க²ந்தி; ஏவரூபோ ச பன ஸத்தா² ஸாவகேஹி வேய்யாகரணதோ ரக்க²ம் பச்சாஸீஸதி.

‘‘புன சபரம், மோக்³க³ல்லான, இதே⁴கச்சோ ஸத்தா² அபரிஸுத்³த⁴ஞாணத³ஸ்ஸனோ ஸமானோ ‘பரிஸுத்³த⁴ஞாணத³ஸ்ஸனோம்ஹீ’தி படிஜானாதி ‘பரிஸுத்³த⁴ம் மே ஞாணத³ஸ்ஸனம் பரியோதா³தம் அஸம்கிலிட்ட²’ந்தி. தமேனம் ஸாவகா ஏவம் ஜானந்தி – ‘அயம் கோ² ப⁴வம் ஸத்தா² அபரிஸுத்³த⁴ஞாணத³ஸ்ஸனோ ஸமானோ பரிஸுத்³த⁴ஞாணத³ஸ்ஸனோம்ஹீ’தி படிஜானாதி ‘பரிஸுத்³த⁴ம் மே ஞாணத³ஸ்ஸனம் பரியோதா³தம் அஸம்கிலிட்ட²’ந்தி. மயஞ்சேவ கோ² பன கி³ஹீனம் ஆரோசேய்யாம, நாஸ்ஸஸ்ஸ மனாபம். யம் கோ² பனஸ்ஸ அமனாபம், கத²ம் நம் மயம் தேன ஸமுதா³சரேய்யாம – ‘ஸம்மன்னதி கோ² பன சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேன; யம் துமோ கரிஸ்ஸதி துமோவ தேன பஞ்ஞாயிஸ்ஸதீ’தி. ஏவரூபம் கோ², மோக்³க³ல்லான, ஸத்தா²ரம் ஸாவகா ஞாணத³ஸ்ஸனதோ ரக்க²ந்தி; ஏவரூபோ ச பன ஸத்தா² ஸாவகேஹி ஞாணத³ஸ்ஸனதோ ரக்க²ம் பச்சாஸீஸதி. இமே கோ², மோக்³க³ல்லான, பஞ்ச ஸத்தா²ரோ ஸந்தோ ஸம்விஜ்ஜமானா லோகஸ்மிம்.

‘‘அஹம் கோ² பன, மோக்³க³ல்லான, பரிஸுத்³த⁴ஸீலோ ஸமானோ ‘பரிஸுத்³த⁴ஸீலோம்ஹீ’தி படிஜானாமி ‘பரிஸுத்³த⁴ம் மே ஸீலம் பரியோதா³தம் அஸம்கிலிட்ட²’ந்தி. ந ச மம் ஸாவகா ஸீலதோ ரக்க²ந்தி, ந சாஹம் ஸாவகேஹி ஸீலதோ ரக்க²ம் பச்சாஸீஸாமி. பரிஸுத்³தா⁴ஜீவோ ஸமானோ ‘பரிஸுத்³தா⁴ஜீவோம்ஹீ’தி படிஜானாமி ‘பரிஸுத்³தோ⁴ மே ஆஜீவோ பரியோதா³தோ அஸம்கிலிட்டோ²’தி. ந ச மம் ஸாவகா ஆஜீவதோ ரக்க²ந்தி, ந சாஹம் ஸாவகேஹி ஆஜீவதோ ரக்க²ம் பச்சாஸீஸாமி. பரிஸுத்³த⁴த⁴ம்மதே³ஸனோ ஸமானோ ‘பரிஸுத்³த⁴த⁴ம்மதே³ஸனோம்ஹீ’தி படிஜானாமி ‘பரிஸுத்³தா⁴ மே த⁴ம்மதே³ஸனா பரியோதா³தா அஸம்கிலிட்டா²’தி. ந ச மம் ஸாவகா த⁴ம்மதே³ஸனதோ ரக்க²ந்தி, ந சாஹம் ஸாவகேஹி த⁴ம்மதே³ஸனதோ ரக்க²ம் பச்சாஸீஸாமி. பரிஸுத்³த⁴வேய்யாகரணோ ஸமானோ ‘பரிஸுத்³த⁴வேய்யாகரணோம்ஹீ’தி படிஜானாமி ‘பரிஸுத்³த⁴ம் மே வேய்யாகரணம் பரியோதா³தம் அஸம்கிலிட்ட²’ந்தி. ந ச மம் ஸாவகா வேய்யாகரணதோ ரக்க²ந்தி, ந சாஹம் ஸாவகேஹி வேய்யாகரணதோ ரக்க²ம் பச்சாஸீஸாமி. பரிஸுத்³த⁴ஞாணத³ஸ்ஸனோ ஸமானோ ‘பரிஸுத்³த⁴ஞாணத³ஸ்ஸனோம்ஹீ’தி படிஜானாமி ‘பரிஸுத்³த⁴ம் மே ஞாணத³ஸ்ஸனம் பரியோதா³தம் அஸம்கிலிட்ட²’ந்தி. ந ச மம் ஸாவகா ஞாணத³ஸ்ஸனதோ ரக்க²ந்தி, ந சாஹம் ஸாவகேஹி ஞாணத³ஸ்ஸனதோ ரக்க²ம் பச்சாஸீஸாமீ’’தி. த³ஸமம்.

ககுத⁴வக்³கோ³ பஞ்சமோ.