10. து³தியஸேக²ஸுத்தம்

90. ‘‘பஞ்சிமே, பி⁴க்க²வே, த⁴ம்மா ஸேக²ஸ்ஸ பி⁴க்கு²னோ பரிஹானாய ஸம்வத்தந்தி. கதமே பஞ்ச? இத⁴, பி⁴க்க²வே, ஸேகோ² பி⁴க்கு² ப³ஹுகிச்சோ ஹோதி ப³ஹுகரணீயோ வியத்தோ கிம்கரணீயேஸு; ரிஞ்சதி படிஸல்லானம், நானுயுஞ்ஜதி அஜ்ஜ²த்தம் சேதோஸமத²ம். அயம், பி⁴க்க²வே, பட²மோ த⁴ம்மோ ஸேக²ஸ்ஸ பி⁴க்கு²னோ பரிஹானாய ஸம்வத்ததி.

‘‘புன சபரம், பி⁴க்க²வே, ஸேகோ² பி⁴க்கு² அப்பமத்தகேன கம்மேன தி³வஸம் அதினாமேதி; ரிஞ்சதி படிஸல்லானம், நானுயுஞ்ஜதி அஜ்ஜ²த்தம் சேதோஸமத²ம். அயம், பி⁴க்க²வே, து³தியோ த⁴ம்மோ ஸேக²ஸ்ஸ பி⁴க்கு²னோ பரிஹானாய ஸம்வத்ததி.

‘‘புன சபரம், பி⁴க்க²வே, ஸேகோ² பி⁴க்கு² ஸம்ஸட்டோ² விஹரதி க³ஹட்ட²பப்³ப³ஜிதேஹி அனனுலோமிகேன கி³ஹிஸம்ஸக்³கே³ன; ரிஞ்சதி படிஸல்லானம், நானுயுஞ்ஜதி அஜ்ஜ²த்தம் சேதோஸமத²ம். அயம், பி⁴க்க²வே, ததியோ த⁴ம்மோ ஸேக²ஸ்ஸ பி⁴க்கு²னோ பரிஹானாய ஸம்வத்ததி.

‘‘புன சபரம், பி⁴க்க²வே, ஸேகோ² பி⁴க்கு² அகாலேன கா³மம் பவிஸதி, அதிதி³வா படிக்கமதி; ரிஞ்சதி படிஸல்லானம், நானுயுஞ்ஜதி அஜ்ஜ²த்தம் சேதோஸமத²ம். அயம், பி⁴க்க²வே, சதுத்தோ² த⁴ம்மோ ஸேக²ஸ்ஸ பி⁴க்கு²னோ பரிஹானாய ஸம்வத்ததி.

‘‘புன சபரம், பி⁴க்க²வே, ஸேகோ² பி⁴க்கு² யாயம் கதா² ஆபி⁴ஸல்லேகி²கா சேதோவிவரணஸப்பாயா, ஸேய்யதி²த³ம் – அப்பிச்ச²கதா² ஸந்துட்டி²கதா² பவிவேககதா² அஸம்ஸக்³க³கதா² வீரியாரம்ப⁴கதா² ஸீலகதா² ஸமாதி⁴கதா² பஞ்ஞாகதா² விமுத்திகதா² விமுத்திஞாணத³ஸ்ஸனகதா², ஏவரூபியா கதா²ய ந நிகாமலாபீ⁴ ஹோதி ந அகிச்ச²லாபீ⁴ ந அகஸிரலாபீ⁴ [கிச்ச²லாபீ⁴ கஸிரலாபீ⁴ (ஸீ. ஸ்யா. கம். பீ)]; ரிஞ்சதி படிஸல்லானம், நானுயுஞ்ஜதி அஜ்ஜ²த்தம் சேதோஸமத²ம். அயம், பி⁴க்க²வே, பஞ்சமோ த⁴ம்மோ ஸேக²ஸ்ஸ பி⁴க்கு²னோ பரிஹானாய ஸம்வத்ததி. இமே கோ², பி⁴க்க²வே, பஞ்ச த⁴ம்மா ஸேக²ஸ்ஸ பி⁴க்கு²னோ பரிஹானாய ஸம்வத்தந்தி.

‘‘பஞ்சிமே, பி⁴க்க²வே, த⁴ம்மா ஸேக²ஸ்ஸ பி⁴க்கு²னோ அபரிஹானாய ஸம்வத்தந்தி. கதமே பஞ்ச? இத⁴, பி⁴க்க²வே, ஸேகோ² பி⁴க்கு² ந ப³ஹுகிச்சோ ஹோதி ந ப³ஹுகரணீயோ வியத்தோ கிம்கரணீயேஸு; ந ரிஞ்சதி படிஸல்லானம், அனுயுஞ்ஜதி அஜ்ஜ²த்தம் சேதோஸமத²ம். அயம், பி⁴க்க²வே, பட²மோ த⁴ம்மோ ஸேக²ஸ்ஸ பி⁴க்கு²னோ அபரிஹானாய ஸம்வத்ததி.

‘‘புன சபரம், பி⁴க்க²வே, ஸேகோ² பி⁴க்கு² ந அப்பமத்தகேன கம்மேன தி³வஸம் அதினாமேதி; ந ரிஞ்சதி படிஸல்லானம், அனுயுஞ்ஜதி அஜ்ஜ²த்தம் சேதோஸமத²ம். அயம், பி⁴க்க²வே, து³தியோ த⁴ம்மோ ஸேக²ஸ்ஸ பி⁴க்கு²னோ அபரிஹானாய ஸம்வத்ததி.

‘‘புன சபரம், பி⁴க்க²வே, ஸேகோ² பி⁴க்கு² அஸம்ஸட்டோ² விஹரதி க³ஹட்ட²பப்³ப³ஜிதேஹி அனனுலோமிகேன கி³ஹிஸம்ஸக்³கே³ன; ந ரிஞ்சதி படிஸல்லானம், அனுயுஞ்ஜதி அஜ்ஜ²த்தம் சேதோஸமத²ம். அயம், பி⁴க்க²வே, ததியோ த⁴ம்மோ ஸேக²ஸ்ஸ பி⁴க்கு²னோ அபரிஹானாய ஸம்வத்ததி.

‘‘புன சபரம், பி⁴க்க²வே, ஸேகோ² பி⁴க்கு² ந அதிகாலேன கா³மம் பவிஸதி, நாதிதி³வா படிக்கமதி; ந ரிஞ்சதி படிஸல்லானம், அனுயுஞ்ஜதி அஜ்ஜ²த்தம் சேதோஸமத²ம். அயம், பி⁴க்க²வே, சதுத்தோ² த⁴ம்மோ ஸேக²ஸ்ஸ பி⁴க்கு²னோ அபரிஹானாய ஸம்வத்ததி.

‘‘புன சபரம், பி⁴க்க²வே, ஸேகோ² பி⁴க்கு² யாயம் கதா² ஆபி⁴ஸல்லேகி²கா சேதோவிவரணஸப்பாயா, ஸேய்யதி²த³ம் – அப்பிச்ச²கதா² ஸந்துட்டி²கதா² பவிவேககதா² அஸம்ஸக்³க³கதா² வீரியாரம்ப⁴கதா² ஸீலகதா² ஸமாதி⁴கதா² பஞ்ஞாகதா² விமுத்திகதா² விமுத்திஞாணத³ஸ்ஸனகதா², ஏவரூபியா கதா²ய நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴; ந ரிஞ்சதி படிஸல்லானம், அனுயுஞ்ஜதி அஜ்ஜ²த்தம் சேதோஸமத²ம். அயம், பி⁴க்க²வே, பஞ்சமோ த⁴ம்மோ ஸேக²ஸ்ஸ பி⁴க்கு²னோ அபரிஹானாய ஸம்வத்ததி. இமே கோ², பி⁴க்க²வே, பஞ்ச த⁴ம்மா ஸேக²ஸ்ஸ பி⁴க்கு²னோ அபரிஹானாய ஸம்வத்தந்தீ’’தி. த³ஸமம்.

தே²ரவக்³கோ³ சதுத்தோ².