6. து³தியயோதா⁴ஜீவஸுத்தம்

76. ‘‘பஞ்சிமே, பி⁴க்க²வே, யோதா⁴ஜீவா ஸந்தோ ஸம்விஜ்ஜமானா லோகஸ்மிம். கதமே பஞ்ச? இத⁴, பி⁴க்க²வே, ஏகச்சோ யோதா⁴ஜீவோ அஸிசம்மம் க³ஹேத்வா த⁴னுகலாபம் ஸன்னய்ஹித்வா வியூள்ஹம் ஸங்கா³மம் ஓதரதி. ஸோ தஸ்மிம் ஸங்கா³மே உஸ்ஸஹதி வாயமதி. தமேனம் உஸ்ஸஹந்தம் வாயமந்தம் பரே ஹனந்தி பரியாபாதே³ந்தி. ஏவரூபோபி, பி⁴க்க²வே, இதே⁴கச்சோ யோதா⁴ஜீவோ ஹோதி. அயம், பி⁴க்க²வே, பட²மோ யோதா⁴ஜீவோ ஸந்தோ ஸம்விஜ்ஜமானோ லோகஸ்மிம்.

‘‘புன சபரம், பி⁴க்க²வே, இதே⁴கச்சோ யோதா⁴ஜீவோ அஸிசம்மம் க³ஹேத்வா த⁴னுகலாபம் ஸன்னய்ஹித்வா வியூள்ஹம் ஸங்கா³மம் ஓதரதி. ஸோ தஸ்மிம் ஸங்கா³மே உஸ்ஸஹதி வாயமதி. தமேனம் உஸ்ஸஹந்தம் வாயமந்தம் பரே உபலிக்க²ந்தி [உபலிக²ந்தி (க.)], தமேனம் அபனேந்தி; அபனேத்வா ஞாதகானம் நேந்தி. ஸோ ஞாதகேஹி நீயமானோ அப்பத்வாவ ஞாதகே அந்தராமக்³கே³ காலம் கரோதி. ஏவரூபோபி, பி⁴க்க²வே, இதே⁴கச்சோ யோதா⁴ஜீவோ ஹோதி. அயம், பி⁴க்க²வே, து³தியோ யோதா⁴ஜீவோ ஸந்தோ ஸம்விஜ்ஜமானோ லோகஸ்மிம்.

‘‘புன சபரம், பி⁴க்க²வே, இதே⁴கச்சோ யோதா⁴ஜீவோ அஸிசம்மம் க³ஹேத்வா த⁴னுகலாபம் ஸன்னய்ஹித்வா வியூள்ஹம் ஸங்கா³மம் ஓதரதி. ஸோ தஸ்மிம் ஸங்கா³மே உஸ்ஸஹதி வாயமதி. தமேனம் உஸ்ஸஹந்தம் வாயமந்தம் பரே உபலிக்க²ந்தி, தமேனம் அபனேந்தி; அபனேத்வா ஞாதகானம் நேந்தி. தமேனம் ஞாதகா உபட்ட²ஹந்தி பரிசரந்தி. ஸோ ஞாதகேஹி உபட்ட²ஹியமானோ பரிசரியமானோ தேனேவ ஆபா³தே⁴ன காலம் கரோதி. ஏவரூபோபி, பி⁴க்க²வே, இதே⁴கச்சோ யோதா⁴ஜீவோ ஹோதி. அயம், பி⁴க்க²வே, ததியோ யோதா⁴ஜீவோ ஸந்தோ ஸம்விஜ்ஜமானோ லோகஸ்மிம்.

‘‘புன சபரம், பி⁴க்க²வே, இதே⁴கச்சோ யோதா⁴ஜீவோ அஸிசம்மம் க³ஹேத்வா த⁴னுகலாபம் ஸன்னய்ஹித்வா வியூள்ஹம் ஸங்கா³மம் ஓதரதி. ஸோ தஸ்மிம் ஸங்கா³மே உஸ்ஸஹதி வாயமதி. தமேனம் உஸ்ஸஹந்தம் வாயமந்தம் பரே உபலிக்க²ந்தி, தமேனம் அபனேந்தி; அபனேத்வா ஞாதகானம் நேந்தி. தமேனம் ஞாதகா உபட்ட²ஹந்தி பரிசரந்தி. ஸோ ஞாதகேஹி உபட்ட²ஹியமானோ பரிசரியமானோ வுட்டா²தி தம்ஹா ஆபா³தா⁴. ஏவரூபோபி, பி⁴க்க²வே, இதே⁴கச்சோ யோதா⁴ஜீவோ ஹோதி. அயம், பி⁴க்க²வே, சதுத்தோ² யோதா⁴ஜீவோ ஸந்தோ ஸம்விஜ்ஜமானோ லோகஸ்மிம்.

‘‘புன சபரம், பி⁴க்க²வே, இதே⁴கச்சோ யோதா⁴ஜீவோ அஸிசம்மம் க³ஹேத்வா த⁴னுகலாபம் ஸன்னய்ஹித்வா வியூள்ஹம் ஸங்கா³மம் ஓதரதி. ஸோ தம் ஸங்கா³மம் அபி⁴விஜினித்வா விஜிதஸங்கா³மோ தமேவ ஸங்கா³மஸீஸம் அஜ்ஜா²வஸதி. ஏவரூபோபி, பி⁴க்க²வே, இதே⁴கச்சோ யோதா⁴ஜீவோ ஹோதி. அயம், பி⁴க்க²வே, பஞ்சமோ யோதா⁴ஜீவோ ஸந்தோ ஸம்விஜ்ஜமானோ லோகஸ்மிம். இமே கோ², பி⁴க்க²வே, பஞ்ச யோதா⁴ஜீவா ஸந்தோ ஸம்விஜ்ஜமானா லோகஸ்மிம்.

‘‘ஏவமேவம் கோ², பி⁴க்க²வே, பஞ்சிமே யோதா⁴ஜீவூபமா புக்³க³லா ஸந்தோ ஸம்விஜ்ஜமானா பி⁴க்கூ²ஸு. கதமே பஞ்ச? இத⁴, பி⁴க்க²வே, பி⁴க்கு² அஞ்ஞதரம் கா³மம் வா நிக³மம் வா உபனிஸ்ஸாய விஹரதி. ஸோ புப்³ப³ண்ஹஸமயம் நிவாஸேத்வா பத்தசீவரமாதா³ய தமேவ கா³மம் வா நிக³மம் வா பிண்டா³ய பவிஸதி அரக்கி²தேனேவ காயேன அரக்கி²தாய வாசாய அரக்கி²தேன சித்தேன அனுபட்டி²தாய ஸதியா அஸம்வுதேஹி இந்த்³ரியேஹி. ஸோ தத்த² பஸ்ஸதி மாதுகா³மம் து³ன்னிவத்த²ம் வா து³ப்பாருதம் வா. தஸ்ஸ தம் மாதுகா³மம் தி³ஸ்வா து³ன்னிவத்த²ம் வா து³ப்பாருதம் வா ராகோ³ சித்தம் அனுத்³த⁴ம்ஸேதி. ஸோ ராகா³னுத்³த⁴ம்ஸிதேன சித்தேன ஸிக்க²ம் அபச்சக்கா²ய து³ப்³ப³ல்யம் அனாவிகத்வா மேது²னம் த⁴ம்மம் படிஸேவதி.

‘‘ஸேய்யதா²பி ஸோ, பி⁴க்க²வே, யோதா⁴ஜீவோ அஸிசம்மம் க³ஹேத்வா த⁴னுகலாபம் ஸன்னய்ஹித்வா வியூள்ஹம் ஸங்கா³மம் ஓதரதி, ஸோ தஸ்மிம் ஸங்கா³மே உஸ்ஸஹதி வாயமதி, தமேனம் உஸ்ஸஹந்தம் வாயமந்தம் பரே ஹனந்தி பரியாபாதே³ந்தி; ததூ²பமாஹம், பி⁴க்க²வே, இமம் புக்³க³லம் வதா³மி. ஏவரூபோபி, பி⁴க்க²வே, இதே⁴கச்சோ புக்³க³லோ ஹோதி. அயம், பி⁴க்க²வே, பட²மோ யோதா⁴ஜீவூபமோ புக்³க³லோ ஸந்தோ ஸம்விஜ்ஜமானோ பி⁴க்கூ²ஸு.

‘‘புன சபரம், பி⁴க்க²வே, பி⁴க்கு² அஞ்ஞதரம் கா³மம் வா நிக³மம் வா உபனிஸ்ஸாய விஹரதி. ஸோ புப்³ப³ண்ஹஸமயம் நிவாஸேத்வா பத்தசீவரமாதா³ய தமேவ கா³மம் வா நிக³மம் வா பிண்டா³ய பவிஸதி அரக்கி²தேனேவ காயேன அரக்கி²தாய வாசாய அரக்கி²தேன சித்தேன அனுபட்டி²தாய ஸதியா அஸம்வுதேஹி இந்த்³ரியேஹி. ஸோ தத்த² பஸ்ஸதி மாதுகா³மம் து³ன்னிவத்த²ம் வா து³ப்பாருதம் வா. தஸ்ஸ தம் மாதுகா³மம் தி³ஸ்வா து³ன்னிவத்த²ம் வா து³ப்பாருதம் வா ராகோ³ சித்தம் அனுத்³த⁴ம்ஸேதி. ஸோ ராகா³னுத்³த⁴ம்ஸிதேன சித்தேன பரிட³ய்ஹதேவ காயேன பரிட³ய்ஹதி சேதஸா. தஸ்ஸ ஏவம் ஹோதி – ‘யம்னூனாஹம் ஆராமம் க³ந்த்வா பி⁴க்கூ²னம் ஆரோசேய்யம் – ராக³பரியுட்டி²தோம்ஹி [ராகா³யிதோம்ஹி (ஸீ. ஸ்யா. கம்)], ஆவுஸோ, ராக³பரேதோ, ந ஸக்கோமி ப்³ரஹ்மசரியம் ஸந்தா⁴ரேதும்; ஸிக்கா²து³ப்³ப³ல்யம் ஆவிகத்வா ஸிக்க²ம் பச்சக்கா²ய ஹீனாயாவத்திஸ்ஸாமீ’தி. ஸோ ஆராமம் க³ச்ச²ந்தோ அப்பத்வாவ ஆராமம் அந்தராமக்³கே³ ஸிக்கா²து³ப்³ப³ல்யம் ஆவிகத்வா ஸிக்க²ம் பச்சக்கா²ய ஹீனாயாவத்ததி.

‘‘ஸேய்யதா²பி ஸோ, பி⁴க்க²வே, யோதா⁴ஜீவோ அஸிசம்மம் க³ஹேத்வா த⁴னுகலாபம் ஸன்னய்ஹித்வா வியூள்ஹம் ஸங்கா³மம் ஓதரதி, ஸோ தஸ்மிம் ஸங்கா³மே உஸ்ஸஹதி வாயமதி, தமேனம் உஸ்ஸஹந்தம் வாயமந்தம் பரே உபலிக்க²ந்தி, தமேனம் அபனேந்தி; அபனேத்வா ஞாதகானம் நேந்தி. ஸோ ஞாதகேஹி நீயமானோ அப்பத்வாவ ஞாதகே அந்தராமக்³கே³ காலம் கரோதி; ததூ²பமாஹம், பி⁴க்க²வே, இமம் புக்³க³லம் வதா³மி. ஏவரூபோபி, பி⁴க்க²வே, இதே⁴கச்சோ புக்³க³லோ ஹோதி. அயம், பி⁴க்க²வே, து³தியோ யோதா⁴ஜீவூபமோ புக்³க³லோ ஸந்தோ ஸம்விஜ்ஜமானோ பி⁴க்கூ²ஸு.

‘‘புன சபரம், பி⁴க்க²வே, பி⁴க்கு² அஞ்ஞதரம் கா³மம் வா நிக³மம் வா உபனிஸ்ஸாய விஹரதி. ஸோ புப்³ப³ண்ஹஸமயம் நிவாஸேத்வா பத்தசீவரமாதா³ய தமேவ கா³மம் வா நிக³மம் வா பிண்டா³ய பவிஸதி அரக்கி²தேனேவ காயேன அரக்கி²தாய வாசாய அரக்கி²தேன சித்தேன அனுபட்டி²தாய ஸதியா அஸம்வுதேஹி இந்த்³ரியேஹி. ஸோ தத்த² பஸ்ஸதி மாதுகா³மம் து³ன்னிவத்த²ம் வா து³ப்பாருதம் வா. தஸ்ஸ தம் மாதுகா³மம் தி³ஸ்வா து³ன்னிவத்த²ம் வா து³ப்பாருதம் வா ராகோ³ சித்தம் அனுத்³த⁴ம்ஸேதி. ஸோ ராகா³னுத்³த⁴ம்ஸிதேன சித்தேன பரிட³ய்ஹதேவ காயேன பரிட³ய்ஹதி சேதஸா. தஸ்ஸ ஏவம் ஹோதி – ‘யம்னூனாஹம் ஆராமம் க³ந்த்வா பி⁴க்கூ²னம் ஆரோசேய்யம் – ராக³பரியுட்டி²தோம்ஹி, ஆவுஸோ, ராக³பரேதோ, ந ஸக்கோமி ப்³ரஹ்மசரியம் ஸந்தா⁴ரேதும்; ஸிக்கா²து³ப்³ப³ல்யம் ஆவிகத்வா ஸிக்க²ம் பச்சக்கா²ய ஹீனாயாவத்திஸ்ஸாமீ’தி. ஸோ ஆராமம் க³ந்த்வா பி⁴க்கூ²னம் ஆரோசேதி – ‘ராக³பரியுட்டி²தோம்ஹி, ஆவுஸோ, ராக³பரேதோ, ந ஸக்கோமி ப்³ரஹ்மசரியம் ஸந்தா⁴ரேதும்; ஸிக்கா²து³ப்³ப³ல்யம் ஆவிகத்வா ஸிக்க²ம் பச்சக்கா²ய ஹீனாயாவத்திஸ்ஸாமீ’’’தி.

‘‘தமேனம் ஸப்³ரஹ்மசாரீ ஓவத³ந்தி அனுஸாஸந்தி – ‘அப்பஸ்ஸாதா³, ஆவுஸோ, காமா வுத்தா ப⁴க³வதா ப³ஹுது³க்கா² ப³ஹுபாயாஸா [ப³ஹூபாயாஸா (ஸீ. ஸ்யா. கம். பீ.) பாசி. 417; சூளவ. 65; ம. நி. 1.234], ஆதீ³னவோ ஏத்த² பி⁴ய்யோ. அட்டி²கங்கலூபமா காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ. மம்ஸபேஸூபமா காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ. திணுக்கூபமா காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ. அங்கா³ரகாஸூபமா காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ. ஸுபினகூபமா காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ. யாசிதகூபமா காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ. ருக்க²ப²லூபமா காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ. அஸிஸூனூபமா காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ. ஸத்திஸூலூபமா காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ. ஸப்பஸிரூபமா காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ. அபி⁴ரமதாயஸ்மா ப்³ரஹ்மசரியே; மாயஸ்மா ஸிக்கா²து³ப்³ப³ல்யம் ஆவிகத்வா ஸிக்க²ம் பச்சக்கா²ய ஹீனாயாவத்தீ’’’தி.

‘‘ஸோ ஸப்³ரஹ்மசாரீஹி ஏவம் ஓவதி³யமானோ ஏவம் அனுஸாஸியமானோ ஏவமாஹ – ‘கிஞ்சாபி, ஆவுஸோ, அப்பஸ்ஸாதா³ காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ; அத² கோ² நேவாஹம் ஸக்கோமி ப்³ரஹ்மசரியம் ஸந்தா⁴ரேதும், ஸிக்கா²து³ப்³ப³ல்யம் ஆவிகத்வா ஸிக்க²ம் பச்சக்கா²ய ஹீனாயாவத்திஸ்ஸாமீ’’’தி. ஸோ ஸிக்கா²து³ப்³ப³ல்யம் ஆவிகத்வா ஸிக்க²ம் பச்சக்கா²ய ஹீனாயாவத்ததி.

‘‘ஸேய்யதா²பி ஸோ, பி⁴க்க²வே, யோதா⁴ஜீவோ அஸிசம்மம் க³ஹேத்வா த⁴னுகலாபம் ஸன்னய்ஹித்வா வியூள்ஹம் ஸங்கா³மம் ஓதரதி, ஸோ தஸ்மிம் ஸங்கா³மே உஸ்ஸஹதி வாயமதி, தமேனம் உஸ்ஸஹந்தம் வாயமந்தம் பரே உபலிக்க²ந்தி, தமேனம் அபனேந்தி; அபனேத்வா ஞாதகானம் நேந்தி, தமேனம் ஞாதகா உபட்ட²ஹந்தி பரிசரந்தி. ஸோ ஞாதகேஹி உபட்ட²ஹியமானோ பரிசரியமானோ தேனேவ ஆபா³தே⁴ன காலம் கரோதி; ததூ²பமாஹம், பி⁴க்க²வே, இமம் புக்³க³லம் வதா³மி. ஏவரூபோபி, பி⁴க்க²வே, இதே⁴கச்சோ புக்³க³லோ ஹோதி. அயம், பி⁴க்க²வே, ததியோ யோதா⁴ஜீவூபமோ புக்³க³லோ ஸந்தோ ஸம்விஜ்ஜமானோ பி⁴க்கூ²ஸு.

‘‘புன சபரம், பி⁴க்க²வே, பி⁴க்கு² அஞ்ஞதரம் கா³மம் வா நிக³மம் வா உபனிஸ்ஸாய விஹரதி. ஸோ புப்³ப³ண்ஹஸமயம் நிவாஸேத்வா பத்தசீவரமாதா³ய தமேவ கா³மம் வா நிக³மம் வா பிண்டா³ய பவிஸதி அரக்கி²தேனேவ காயேன அரக்கி²தாய வாசாய அரக்கி²தேன சித்தேன அனுபட்டி²தாய ஸதியா அஸம்வுதேஹி இந்த்³ரியேஹி. ஸோ தத்த² பஸ்ஸதி மாதுகா³மம் து³ன்னிவத்த²ம் வா து³ப்பாருதம் வா. தஸ்ஸ தம் மாதுகா³மம் தி³ஸ்வா து³ன்னிவத்த²ம் வா து³ப்பாருதம் வா ராகோ³ சித்தம் அனுத்³த⁴ம்ஸேதி. ஸோ ராகா³னுத்³த⁴ம்ஸிதேன சித்தேன பரிட³ய்ஹதேவ காயேன பரிட³ய்ஹதி சேதஸா. தஸ்ஸ ஏவம் ஹோதி – ‘யம்னூனாஹம் ஆராமம் க³ந்த்வா பி⁴க்கூ²னம் ஆரோசேய்யம் – ராக³பரியுட்டி²தோம்ஹி, ஆவுஸோ, ராக³பரேதோ, ந ஸக்கோமி ப்³ரஹ்மசரியம் ஸந்தா⁴ரேதும்; ஸிக்கா²து³ப்³ப³ல்யம் ஆவிகத்வா ஸிக்க²ம் பச்சக்கா²ய ஹீனாயாவத்திஸ்ஸாமீ’தி. ஸோ ஆராமம் க³ந்த்வா பி⁴க்கூ²னம் ஆரோசேதி – ‘ராக³பரியுட்டி²தோம்ஹி, ஆவுஸோ, ராக³பரேதோ, ந ஸக்கோமி ப்³ரஹ்மசரியம் ஸந்தா⁴ரேதும்; ஸிக்கா²து³ப்³ப³ல்யம் ஆவிகத்வா ஸிக்க²ம் பச்சக்கா²ய ஹீனாயாவத்திஸ்ஸாமீ’’’தி.

‘‘தமேனம் ஸப்³ரஹ்மசாரீ ஓவத³ந்தி அனுஸாஸந்தி – ‘அப்பஸ்ஸாதா³, ஆவுஸோ, காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ. அட்டி²கங்கலூபமா காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ. மம்ஸபேஸூபமா காமா வுத்தா ப⁴க³வதா…பே… திணுக்கூபமா காமா வுத்தா ப⁴க³வதா… அங்கா³ரகாஸூபமா காமா வுத்தா ப⁴க³வதா… ஸுபினகூபமா காமா வுத்தா ப⁴க³வதா… யாசிதகூபமா காமா வுத்தா ப⁴க³வதா… ருக்க²ப²லூபமா காமா வுத்தா ப⁴க³வதா… அஸிஸூனூபமா காமா வுத்தா ப⁴க³வதா… ஸத்திஸூலூபமா காமா வுத்தா ப⁴க³வதா… ஸப்பஸிரூபமா காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ. அபி⁴ரமதாயஸ்மா ப்³ரஹ்மசரியே; மாயஸ்மா ஸிக்கா²து³ப்³ப³ல்யம் ஆவிகத்வா ஸிக்க²ம் பச்சக்கா²ய ஹீனாயாவத்தீ’’’தி.

‘‘ஸோ ஸப்³ரஹ்மசாரீஹி ஏவம் ஓவதி³யமானோ ஏவம் அனுஸாஸியமானோ ஏவமாஹ – ‘உஸ்ஸஹிஸ்ஸாமி, ஆவுஸோ, வாயமிஸ்ஸாமி, ஆவுஸோ, அபி⁴ரமிஸ்ஸாமி, ஆவுஸோ! ந தா³னாஹம், ஆவுஸோ, ஸிக்கா²து³ப்³ப³ல்யம் ஆவிகத்வா ஸிக்க²ம் பச்சக்கா²ய ஹீனாயாவத்திஸ்ஸாமீ’’’தி.

‘‘ஸேய்யதா²பி ஸோ, பி⁴க்க²வே, யோதா⁴ஜீவோ அஸிசம்மம் க³ஹேத்வா த⁴னுகலாபம் ஸன்னய்ஹித்வா வியூள்ஹம் ஸங்கா³மம் ஓதரதி, ஸோ தஸ்மிம் ஸங்கா³மே உஸ்ஸஹதி வாயமதி, தமேனம் உஸ்ஸஹந்தம் வாயமந்தம் பரே உபலிக்க²ந்தி, தமேனம் அபனேந்தி; அபனேத்வா ஞாதகானம் நேந்தி, தமேனம் ஞாதகா உபட்ட²ஹந்தி பரிசரந்தி. ஸோ ஞாதகேஹி உபட்ட²ஹியமானோ பரிசரியமானோ வுட்டா²தி தம்ஹா ஆபா³தா⁴; ததூ²பமாஹம், பி⁴க்க²வே, இமம் புக்³க³லம் வதா³மி. ஏவரூபோபி, பி⁴க்க²வே, இதே⁴கச்சோ புக்³க³லோ ஹோதி. அயம், பி⁴க்க²வே, சதுத்தோ² யோதா⁴ஜீவூபமோ புக்³க³லோ ஸந்தோ ஸம்விஜ்ஜமானோ பி⁴க்கூ²ஸு.

‘‘புன சபரம், பி⁴க்க²வே, பி⁴க்கு² அஞ்ஞதரம் கா³மம் வா நிக³மம் வா உபனிஸ்ஸாய விஹரதி. ஸோ புப்³ப³ண்ஹஸமயம் நிவாஸேத்வா பத்தசீவரமாதா³ய தமேவ கா³மம் வா நிக³மம் வா பிண்டா³ய பவிஸதி ரக்கி²தேனேவ காயேன ரக்கி²தாய வாசாய ரக்கி²தேன சித்தேன உபட்டி²தாய ஸதியா ஸம்வுதேஹி இந்த்³ரியேஹி. ஸோ சக்கு²னா ரூபம் தி³ஸ்வா ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ. யத்வாதி⁴கரணமேனம் சக்கு²ந்த்³ரியம் அஸம்வுதம் விஹரந்தம் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவேய்யும், தஸ்ஸ ஸம்வராய படிபஜ்ஜதி; ரக்க²தி சக்கு²ந்த்³ரியம்; சக்கு²ந்த்³ரியே ஸம்வரம் ஆபஜ்ஜதி. ஸோதேன ஸத்³த³ம் ஸுத்வா… கா⁴னேன க³ந்த⁴ம் கா⁴யித்வா … ஜிவ்ஹாய ரஸம் ஸாயித்வா… காயேன போ²ட்ட²ப்³ப³ம் பு²ஸித்வா… மனஸா த⁴ம்மம் விஞ்ஞாய ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ. யத்வாதி⁴கரணமேனம் மனிந்த்³ரியம் அஸம்வுதம் விஹரந்தம் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவேய்யும், தஸ்ஸ ஸம்வராய படிபஜ்ஜதி; ரக்க²தி மனிந்த்³ரியம்; மனிந்த்³ரியே ஸம்வரம் ஆபஜ்ஜதி. ஸோ பச்சா²ப⁴த்தம் பிண்ட³பாதபடிக்கந்தோ விவித்தம் ஸேனாஸனம் ப⁴ஜதி அரஞ்ஞம் ருக்க²மூலம் பப்³ப³தம் கந்த³ரம் கி³ரிகு³ஹம் ஸுஸானம் வனபத்த²ம் அப்³போ⁴காஸம் பலாலபுஞ்ஜம். ஸோ அரஞ்ஞக³தோ வா ருக்க²மூலக³தோ வா ஸுஞ்ஞாகா³ரக³தோ வா நிஸீத³தி பல்லங்கம் ஆபு⁴ஜித்வா உஜும் காயம் பணிதா⁴ய பரிமுக²ம் ஸதிம் உபட்ட²பேத்வா. ஸோ அபி⁴ஜ்ஜ²ம் லோகே பஹாய…பே… ஸோ இமே பஞ்ச நீவரணே பஹாய சேதஸோ உபக்கிலேஸே பஞ்ஞாய து³ப்³ப³லீகரணே விவிச்சேவ காமேஹி…பே… சதுத்த²ம் ஜா²னம் உபஸம்பஜ்ஜ விஹரதி.

‘‘ஸோ ஏவம் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே ஆஸவானம் க²யஞாணாய சித்தம் அபி⁴னின்னாமேதி. ஸோ ‘இத³ம் து³க்க²’ந்தி யதா²பூ⁴தம் பஜானாதி…பே… நாபரம் இத்த²த்தாயாதி பஜானாதி’’.

‘‘ஸேய்யதா²பி ஸோ, பி⁴க்க²வே, யோதா⁴ஜீவோ அஸிசம்மம் க³ஹேத்வா த⁴னுகலாபம் ஸன்னய்ஹித்வா வியூள்ஹம் ஸங்கா³மம் ஓதரதி, ஸோ தம் ஸங்கா³மம் அபி⁴விஜினித்வா விஜிதஸங்கா³மோ தமேவ ஸங்கா³மஸீஸம் அஜ்ஜா²வஸதி; ததூ²பமாஹம், பி⁴க்க²வே, இமம் புக்³க³லம் வதா³மி. ஏவரூபோபி, பி⁴க்க²வே, இதே⁴கச்சோ புக்³க³லோ ஹோதி. அயம், பி⁴க்க²வே, பஞ்சமோ யோதா⁴ஜீவூபமோ புக்³க³லோ ஸந்தோ ஸம்விஜ்ஜமானோ பி⁴க்கூ²ஸு. இமே கோ², பி⁴க்க²வே, பஞ்ச யோதா⁴ஜீவூபமா புக்³க³லா ஸந்தோ ஸம்விஜ்ஜமானா பி⁴க்கூ²ஸூ’’தி. ச²ட்ட²ம்.