(8) 3. யோதா⁴ஜீவவக்³கோ³

1. பட²மசேதோவிமுத்திப²லஸுத்தம்

71. ‘‘பஞ்சிமே, பி⁴க்க²வே, த⁴ம்மா பா⁴விதா ப³ஹுலீகதா சேதோவிமுத்திப²லா ச ஹோந்தி சேதோவிமுத்திப²லானிஸம்ஸா ச, பஞ்ஞாவிமுத்திப²லா ச ஹோந்தி பஞ்ஞாவிமுத்திப²லானிஸம்ஸா ச.

‘‘கதமே பஞ்ச? இத⁴, பி⁴க்க²வே, பி⁴க்கு² அஸுபா⁴னுபஸ்ஸீ காயே விஹரதி, ஆஹாரே படிகூலஸஞ்ஞீ [படிக்கூலஸஞ்ஞீ (ஸீ. ஸ்யா. கம். பீ.)], ஸப்³ப³லோகே அனபி⁴ரதஸஞ்ஞீ, ஸப்³ப³ஸங்கா²ரேஸு அனிச்சானுபஸ்ஸீ, மரணஸஞ்ஞா கோ² பனஸ்ஸ அஜ்ஜ²த்தம் ஸூபட்டி²தா ஹோதி. இமே கோ², பி⁴க்க²வே, பஞ்ச த⁴ம்மா பா⁴விதா ப³ஹுலீகதா சேதோவிமுத்திப²லா ச ஹோந்தி சேதோவிமுத்திப²லானிஸம்ஸா ச, பஞ்ஞாவிமுத்திப²லா ச ஹோந்தி பஞ்ஞாவிமுத்திப²லானிஸம்ஸா ச. யதோ கோ², பி⁴க்க²வே, பி⁴க்கு² சேதோவிமுத்தோ ச ஹோதி பஞ்ஞாவிமுத்தோ ச ஹோதி – அயம் வுச்சதி, பி⁴க்க²வே, ‘பி⁴க்கு² உக்கி²த்தபலிகோ⁴ இதிபி, ஸம்கிண்ணபரிகோ² [ஸம்கிண்ணபரிக்கோ² (ஸ்யா. கம்.)] இதிபி, அப்³பூ³ள்ஹேஸிகோ இதிபி, நிரக்³க³ளோ இதிபி, அரியோ பன்னத்³த⁴ஜோ பன்னபா⁴ரோ விஸம்யுத்தோ இதிபி’’’.

‘‘கத²ஞ்ச, பி⁴க்க²வே, பி⁴க்கு² உக்கி²த்தபலிகோ⁴ ஹோதி? இத⁴, பி⁴க்க²வே, பி⁴க்கு²னோ அவிஜ்ஜா பஹீனா ஹோதி உச்சி²ன்னமூலா தாலாவத்து²கதா அனபா⁴வம்கதா ஆயதிம் அனுப்பாத³த⁴ம்மா. ஏவம் கோ², பி⁴க்க²வே, பி⁴க்கு² உக்கி²த்தபலிகோ⁴ ஹோதி.

‘‘கத²ஞ்ச, பி⁴க்க²வே, பி⁴க்கு² ஸம்கிண்ணபரிகோ² ஹோதி? இத⁴, பி⁴க்க²வே, பி⁴க்கு²னோ போனோப⁴விகோ [போனோப்³ப⁴விகோ (ஸ்யா. க.)] ஜாதிஸம்ஸாரோ பஹீனோ ஹோதி உச்சி²ன்னமூலோ தாலாவத்து²கதோ அனபா⁴வம்கதோ ஆயதிம் அனுப்பாத³த⁴ம்மோ. ஏவம் கோ², பி⁴க்க²வே, பி⁴க்கு² ஸம்கிண்ணபரிகோ² ஹோதி.

‘‘கத²ஞ்ச, பி⁴க்க²வே, பி⁴க்கு² அப்³பூ³ள்ஹேஸிகோ ஹோதி? இத⁴, பி⁴க்க²வே, பி⁴க்கு²னோ தண்ஹா பஹீனா ஹோதி உச்சி²ன்னமூலா தாலாவத்து²கதா அனபா⁴வம்கதா ஆயதிம் அனுப்பாத³த⁴ம்மா. ஏவம் கோ², பி⁴க்க²வே, பி⁴க்கு² அப்³பூ³ள்ஹேஸிகோ ஹோதி.

‘‘கத²ஞ்ச, பி⁴க்க²வே, பி⁴க்கு² நிரக்³க³ளோ ஹோதி? இத⁴, பி⁴க்க²வே, பி⁴க்கு²னோ பஞ்சோரம்பா⁴கி³யானி ஸம்யோஜனானி பஹீனானி ஹோந்தி உச்சி²ன்னமூலானி தாலாவத்து²கதானி அனபா⁴வம்கதானி ஆயதிம் அனுப்பாத³த⁴ம்மானி. ஏவம் கோ², பி⁴க்க²வே, பி⁴க்கு² நிரக்³க³ளோ ஹோதி.

‘‘கத²ஞ்ச, பி⁴க்க²வே, பி⁴க்கு² அரியோ பன்னத்³த⁴ஜோ பன்னபா⁴ரோ விஸம்யுத்தோ ஹோதி? இத⁴, பி⁴க்க²வே, பி⁴க்கு²னோ அஸ்மிமானோ பஹீனோ ஹோதி உச்சி²ன்னமூலோ தாலாவத்து²கதோ அனபா⁴வம்கதோ ஆயதிம் அனுப்பாத³த⁴ம்மோ. ஏவம் கோ², பி⁴க்க²வே, பி⁴க்கு² அரியோ பன்னத்³த⁴ஜோ பன்னபா⁴ரோ விஸம்யுத்தோ ஹோதீ’’தி. பட²மம்.

2. து³தியசேதோவிமுத்திப²லஸுத்தம்

72. ‘‘பஞ்சிமே, பி⁴க்க²வே, த⁴ம்மா பா⁴விதா ப³ஹுலீகதா சேதோவிமுத்திப²லா ச ஹோந்தி சேதோவிமுத்திப²லானிஸம்ஸா ச, பஞ்ஞாவிமுத்திப²லா ச ஹோந்தி பஞ்ஞாவிமுத்திப²லானிஸம்ஸா ச. கதமே பஞ்ச? அனிச்சஸஞ்ஞா, அனிச்சே து³க்க²ஸஞ்ஞா, து³க்கே² அனத்தஸஞ்ஞா, பஹானஸஞ்ஞா, விராக³ஸஞ்ஞா – இமே கோ², பி⁴க்க²வே, பஞ்ச த⁴ம்மா பா⁴விதா ப³ஹுலீகதா சேதோவிமுத்திப²லா ச ஹோந்தி சேதோவிமுத்திப²லானிஸம்ஸா ச, பஞ்ஞாவிமுத்திப²லா ச ஹோந்தி பஞ்ஞாவிமுத்திப²லானிஸம்ஸா ச. யதோ கோ², பி⁴க்க²வே, பி⁴க்கு² சேதோவிமுத்தோ ச ஹோதி பஞ்ஞாவிமுத்தோ ச – அயம் வுச்சதி, பி⁴க்க²வே, ‘பி⁴க்கு² உக்கி²த்தபலிகோ⁴ இதிபி, ஸம்கிண்ணபரிகோ² இதிபி, அப்³பூ³ள்ஹேஸிகோ இதிபி, நிரக்³க³ளோ இதிபி, அரியோ பன்னத்³த⁴ஜோ பன்னபா⁴ரோ விஸம்யுத்தோ இதிபி’’’.

‘‘கத²ஞ்ச, பி⁴க்க²வே, பி⁴க்கு² ஸம்கிண்ணபரிகோ² ஹோதி? இத⁴, பி⁴க்க²வே, பி⁴க்கு²னோ போனோப⁴விகோ ஜாதிஸம்ஸாரோ பஹீனோ ஹோதி உச்சி²ன்னமூலோ தாலாவத்து²கதோ அனபா⁴வம்கதோ ஆயதிம் அனுப்பாத³த⁴ம்மோ. ஏவம் கோ², பி⁴க்க²வே, பி⁴க்கு² ஸம்கிண்ணபரிகோ² ஹோதி.

3. பட²மத⁴ம்மவிஹாரீஸுத்தம்

73. அத² கோ² அஞ்ஞதரோ பி⁴க்கு² யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஸோ பி⁴க்கு² ப⁴க³வந்தம் ஏதத³வோச – ‘‘‘த⁴ம்மவிஹாரீ, த⁴ம்மவிஹாரீ’தி, ப⁴ந்தே, வுச்சதி. கித்தாவதா நு கோ², ப⁴ந்தே, பி⁴க்கு² த⁴ம்மவிஹாரீ ஹோதீ’’தி?

‘‘இத⁴, பி⁴க்கு², பி⁴க்கு² த⁴ம்மம் பரியாபுணாதி – ஸுத்தம், கே³ய்யம், வேய்யாகரணம், கா³த²ம், உதா³னம், இதிவுத்தகம், ஜாதகம், அப்³பு⁴தத⁴ம்மம், வேத³ல்லம். ஸோ தாய த⁴ம்மபரியத்தியா தி³வஸம் அதினாமேதி, ரிஞ்சதி படிஸல்லானம், நானுயுஞ்ஜதி அஜ்ஜ²த்தம் சேதோஸமத²ம். அயம் வுச்சதி, பி⁴க்கு² – ‘பி⁴க்கு² பரியத்திப³ஹுலோ, நோ த⁴ம்மவிஹாரீ’’’.

‘‘புன சபரம், பி⁴க்கு², பி⁴க்கு² யதா²ஸுதம் யதா²பரியத்தம் த⁴ம்மம் வித்தா²ரேன பரேஸம் தே³ஸேதி. ஸோ தாய த⁴ம்மபஞ்ஞத்தியா தி³வஸம் அதினாமேதி, ரிஞ்சதி படிஸல்லானம், நானுயுஞ்ஜதி அஜ்ஜ²த்தம் சேதோஸமத²ம். அயம் வுச்சதி, பி⁴க்கு² – ‘பி⁴க்கு² பஞ்ஞத்திப³ஹுலோ, நோ த⁴ம்மவிஹாரீ’’’.

‘‘புன சபரம், பி⁴க்கு², பி⁴க்கு² யதா²ஸுதம் யதா²பரியத்தம் த⁴ம்மம் வித்தா²ரேன ஸஜ்ஜா²யம் கரோதி. ஸோ தேன ஸஜ்ஜா²யேன தி³வஸம் அதினாமேதி, ரிஞ்சதி படிஸல்லானம், நானுயுஞ்ஜதி அஜ்ஜ²த்தம் சேதோஸமத²ம். அயம் வுச்சதி, பி⁴க்கு² – ‘பி⁴க்கு² ஸஜ்ஜா²யப³ஹுலோ, நோ த⁴ம்மவிஹாரீ’’’.

‘‘புன சபரம், பி⁴க்கு², பி⁴க்கு² யதா²ஸுதம் யதா²பரியத்தம் த⁴ம்மம் சேதஸா அனுவிதக்கேதி அனுவிசாரேதி மனஸானுபேக்க²தி. ஸோ தேஹி த⁴ம்மவிதக்கேஹி தி³வஸம் அதினாமேதி, ரிஞ்சதி படிஸல்லானம், நானுயுஞ்ஜதி அஜ்ஜ²த்தம் சேதோஸமத²ம். அயம் வுச்சதி, பி⁴க்கு² – ‘பி⁴க்கு² விதக்கப³ஹுலோ, நோ த⁴ம்மவிஹாரீ’’’.

‘‘இத⁴, பி⁴க்கு², பி⁴க்கு² த⁴ம்மம் பரியாபுணாதி – ஸுத்தம், கே³ய்யம், வேய்யாகரணம், கா³த²ம், உதா³னம், இதிவுத்தகம், ஜாதகம், அப்³பு⁴தத⁴ம்மம், வேத³ல்லம். ஸோ தாய த⁴ம்மபரியத்தியா ந தி³வஸம் அதினாமேதி, நாபி ரிஞ்சதி படிஸல்லானம், அனுயுஞ்ஜதி அஜ்ஜ²த்தம் சேதோஸமத²ம். ஏவம் கோ², பி⁴க்கு², பி⁴க்கு² த⁴ம்மவிஹாரீ ஹோதி.

‘‘இதி கோ², பி⁴க்கு², தே³ஸிதோ மயா பரியத்திப³ஹுலோ, தே³ஸிதோ பஞ்ஞத்திப³ஹுலோ, தே³ஸிதோ ஸஜ்ஜா²யப³ஹுலோ, தே³ஸிதோ விதக்கப³ஹுலோ, தே³ஸிதோ த⁴ம்மவிஹாரீ. யம் கோ², பி⁴க்கு² [யம் பி⁴க்கு² (ஸ்யா. கம். பீ.)], ஸத்தா²ரா கரணீயம் ஸாவகானம் ஹிதேஸினா அனுகம்பகேன அனுகம்பம் உபாதா³ய, கதம் வோ தம் மயா. ஏதானி, பி⁴க்கு², ருக்க²மூலானி, ஏதானி ஸுஞ்ஞாகா³ரானி. ஜா²யத², பி⁴க்கு², மா பமாத³த்த², மா பச்சா² விப்படிஸாரினோ அஹுவத்த². அயம் வோ அம்ஹாகம் அனுஸாஸனீ’’தி. ததியம்.

4. து³தியத⁴ம்மவிஹாரீஸுத்தம்

74. அத² கோ² அஞ்ஞதரோ பி⁴க்கு² யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஸோ பி⁴க்கு² ப⁴க³வந்தம் ஏதத³வோச – ‘‘‘த⁴ம்மவிஹாரீ த⁴ம்மவிஹாரீ’தி, ப⁴ந்தே, வுச்சதி. கித்தாவதா நு கோ², ப⁴ந்தே, பி⁴க்கு² த⁴ம்மவிஹாரீ ஹோதீ’’தி?

‘‘இத⁴, பி⁴க்கு², பி⁴க்கு² த⁴ம்மம் பரியாபுணாதி – ஸுத்தம், கே³ய்யம், வேய்யாகரணம், கா³த²ம், உதா³னம், இதிவுத்தகம், ஜாதகம், அப்³பு⁴தத⁴ம்மம், வேத³ல்லம்; உத்தரி [உத்தரிம் (ஸீ. ஸ்யா. கம். பீ.)] சஸ்ஸ பஞ்ஞாய அத்த²ம் நப்பஜானாதி. அயம் வுச்சதி, பி⁴க்கு² – ‘பி⁴க்கு² பரியத்திப³ஹுலோ, நோ த⁴ம்மவிஹாரீ’’’.

‘‘புன சபரம், பி⁴க்கு², பி⁴க்கு² யதா²ஸுதம் யதா²பரியத்தம் த⁴ம்மம் வித்தா²ரேன பரேஸம் தே³ஸேதி, உத்தரி சஸ்ஸ பஞ்ஞாய அத்த²ம் நப்பஜானாதி. அயம் வுச்சதி, பி⁴க்கு² – ‘பி⁴க்கு² பஞ்ஞத்திப³ஹுலோ, நோ த⁴ம்மவிஹாரீ’’’.

‘‘புன சபரம், பி⁴க்கு², பி⁴க்கு² யதா²ஸுதம் யதா²பரியத்தம் த⁴ம்மம் வித்தா²ரேன ஸஜ்ஜா²யம் கரோதி, உத்தரி சஸ்ஸ பஞ்ஞாய அத்த²ம் நப்பஜானாதி. அயம் வுச்சதி, பி⁴க்கு² – ‘பி⁴க்கு² ஸஜ்ஜா²யப³ஹுலோ, நோ த⁴ம்மவிஹாரீ’’’.

‘‘புன சபரம், பி⁴க்கு², பி⁴க்கு² யதா²ஸுதம் யதா²பரியத்தம் த⁴ம்மம் சேதஸா அனுவிதக்கேதி அனுவிசாரேதி மனஸானுபேக்க²தி, உத்தரி சஸ்ஸ பஞ்ஞாய அத்த²ம் நப்பஜானாதி. அயம் வுச்சதி, பி⁴க்கு² – ‘பி⁴க்கு² விதக்கப³ஹுலோ, நோ த⁴ம்மவிஹாரீ’’’.

‘‘இத⁴, பி⁴க்கு², பி⁴க்கு² த⁴ம்மம் பரியாபுணாதி – ஸுத்தம், கே³ய்யம், வேய்யாகரணம், கா³த²ம், உதா³னம், இதிவுத்தகம், ஜாதகம், அப்³பு⁴தத⁴ம்மம், வேத³ல்லம்; உத்தரி சஸ்ஸ பஞ்ஞாய அத்த²ம் பஜானாதி. ஏவம் கோ², பி⁴க்கு², பி⁴க்கு² த⁴ம்மவிஹாரீ ஹோதி.

‘‘இதி கோ², பி⁴க்கு², தே³ஸிதோ மயா பரியத்திப³ஹுலோ, தே³ஸிதோ பஞ்ஞத்திப³ஹுலோ, தே³ஸிதோ ஸஜ்ஜா²யப³ஹுலோ, தே³ஸிதோ விதக்கப³ஹுலோ, தே³ஸிதோ த⁴ம்மவிஹாரீ. யம் கோ², பி⁴க்கு², ஸத்தா²ரா கரணீயம் ஸாவகானம் ஹிதேஸினா அனுகம்பகேன அனுகம்பம் உபாதா³ய, கதம் வோ தம் மயா. ஏதானி, பி⁴க்கு², ருக்க²மூலானி, ஏதானி ஸுஞ்ஞாகா³ரானி. ஜா²யத² பி⁴க்கு², மா பமாத³த்த², மா பச்சா² விப்படிஸாரினோ அஹுவத்த². அயம் வோ அம்ஹாகம் அனுஸாஸனீ’’தி. சதுத்த²ம்.

5. பட²மயோதா⁴ஜீவஸுத்தம்

75. ‘‘பஞ்சிமே, பி⁴க்க²வே, யோதா⁴ஜீவா ஸந்தோ ஸம்விஜ்ஜமானா லோகஸ்மிம். கதமே பஞ்ச? இத⁴, பி⁴க்க²வே, ஏகச்சோ யோதா⁴ஜீவோ ரஜக்³க³ஞ்ஞேவ தி³ஸ்வா ஸம்ஸீத³தி விஸீத³தி ந ஸந்த²ம்ப⁴தி ந ஸக்கோதி ஸங்கா³மம் ஓதரிதும். ஏவரூபோபி [ஏவரூபோ (ஸீ.) பு. ப. 193], பி⁴க்க²வே, இதே⁴கச்சோ [ஏகச்சோ (ஸீ.)] யோதா⁴ஜீவோ ஹோதி. அயம், பி⁴க்க²வே, பட²மோ யோதா⁴ஜீவோ ஸந்தோ ஸம்விஜ்ஜமானோ லோகஸ்மிம்.

‘‘புன சபரம், பி⁴க்க²வே, இதே⁴கச்சோ யோதா⁴ஜீவோ ஸஹதி ரஜக்³க³ம்; அபி ச கோ² த⁴ஜக்³க³ஞ்ஞேவ தி³ஸ்வா ஸம்ஸீத³தி விஸீத³தி, ந ஸந்த²ம்ப⁴தி, ந ஸக்கோதி ஸங்கா³மம் ஓதரிதும். ஏவரூபோபி, பி⁴க்க²வே, இதே⁴கச்சோ யோதா⁴ஜீவோ ஹோதி. அயம், பி⁴க்க²வே, து³தியோ யோதா⁴ஜீவோ ஸந்தோ ஸம்விஜ்ஜமானோ லோகஸ்மிம்.

‘‘புன சபரம், பி⁴க்க²வே, இதே⁴கச்சோ யோதா⁴ஜீவோ ஸஹதி ரஜக்³க³ம் ஸஹதி த⁴ஜக்³க³ம்; அபி ச கோ² உஸ்ஸாரணஞ்ஞேவ [உஸ்ஸாத³னம்யேவ (ஸீ. பீ.)] ஸுத்வா ஸம்ஸீத³தி விஸீத³தி, ந ஸந்த²ம்ப⁴தி, ந ஸக்கோதி ஸங்கா³மம் ஓதரிதும். ஏவரூபோபி, பி⁴க்க²வே, இதே⁴கச்சோ யோதா⁴ஜீவோ ஹோதி. அயம், பி⁴க்க²வே, ததியோ யோதா⁴ஜீவோ ஸந்தோ ஸம்விஜ்ஜமானோ லோகஸ்மிம்.

‘‘புன சபரம், பி⁴க்க²வே, இதே⁴கச்சோ யோதா⁴ஜீவோ ஸஹதி ரஜக்³க³ம், ஸஹதி த⁴ஜக்³க³ம், ஸஹதி உஸ்ஸாரணம்; அபி ச கோ² ஸம்பஹாரே ஹஞ்ஞதி [ஆஹஞ்ஞதி (ஸீ.)] ப்³யாபஜ்ஜதி. ஏவரூபோபி, பி⁴க்க²வே, இதே⁴கச்சோ யோதா⁴ஜீவோ ஹோதி. அயம், பி⁴க்க²வே, சதுத்தோ² யோதா⁴ஜீவோ ஸந்தோ ஸம்விஜ்ஜமானோ லோகஸ்மிம்.

‘‘புன சபரம், பி⁴க்க²வே, இதே⁴கச்சோ யோதா⁴ஜீவோ ஸஹதி ரஜக்³க³ம், ஸஹதி த⁴ஜக்³க³ம், ஸஹதி உஸ்ஸாரணம், ஸஹதி ஸம்பஹாரம். ஸோ தம் ஸங்கா³மம் அபி⁴விஜினித்வா விஜிதஸங்கா³மோ தமேவ ஸங்கா³மஸீஸம் அஜ்ஜா²வஸதி. ஏவரூபோபி, பி⁴க்க²வே, இதே⁴கச்சோ யோதா⁴ஜீவோ ஹோதி. அயம், பி⁴க்க²வே, பஞ்சமோ யோதா⁴ஜீவோ ஸந்தோ ஸம்விஜ்ஜமானோ லோகஸ்மிம். இமே கோ², பி⁴க்க²வே, பஞ்ச யோதா⁴ஜீவா ஸந்தோ ஸம்விஜ்ஜமானா லோகஸ்மிம்.

‘‘ஏவமேவம் கோ², பி⁴க்க²வே, பஞ்சிமே யோதா⁴ஜீவூபமா புக்³க³லா ஸந்தோ ஸம்விஜ்ஜமானா பி⁴க்கூ²ஸு. கதமே பஞ்ச? இத⁴, பி⁴க்க²வே, பி⁴க்கு² ரஜக்³க³ஞ்ஞேவ தி³ஸ்வா ஸம்ஸீத³தி விஸீத³தி, ந ஸந்த²ம்ப⁴தி, ந ஸக்கோதி ப்³ரஹ்மசரியம் ஸந்தா⁴ரேதும் [ஸந்தானேதும் (ஸீ. ஸ்யா. கம். பீ.)]. ஸிக்கா²து³ப்³ப³ல்யம் ஆவிகத்வா ஸிக்க²ம் பச்சக்கா²ய ஹீனாயாவத்ததி. கிமஸ்ஸ ரஜக்³க³ஸ்மிம்? இத⁴, பி⁴க்க²வே, பி⁴க்கு² ஸுணாதி – ‘அமுகஸ்மிம் நாம கா³மே வா நிக³மே வா இத்தீ² வா குமாரீ வா அபி⁴ரூபா த³ஸ்ஸனீயா பாஸாதி³கா பரமாய வண்ணபோக்க²ரதாய ஸமன்னாக³தா’தி. ஸோ தம் ஸுத்வா ஸம்ஸீத³தி விஸீத³தி, ந ஸந்த²ம்ப⁴தி, ந ஸக்கோதி ப்³ரஹ்மசரியம் ஸந்தா⁴ரேதும். ஸிக்கா²து³ப்³ப³ல்யம் ஆவிகத்வா ஸிக்க²ம் பச்சக்கா²ய ஹீனாயாவத்ததி. இத³மஸ்ஸ ரஜக்³க³ஸ்மிம்.

‘‘ஸேய்யதா²பி ஸோ, பி⁴க்க²வே, யோதா⁴ஜீவோ ரஜக்³க³ஞ்ஞேவ தி³ஸ்வா ஸம்ஸீத³தி விஸீத³தி, ந ஸந்த²ம்ப⁴தி, ந ஸக்கோதி ஸங்கா³மம் ஓதரிதும்; ததூ²பமாஹம், பி⁴க்க²வே, இமம் புக்³க³லம் வதா³மி. ஏவரூபோபி, பி⁴க்க²வே, இதே⁴கச்சோ புக்³க³லோ ஹோதி. அயம், பி⁴க்க²வே, பட²மோ யோதா⁴ஜீவூபமோ புக்³க³லோ ஸந்தோ ஸம்விஜ்ஜமானோ பி⁴க்கூ²ஸு.

‘‘புன சபரம், பி⁴க்க²வே, பி⁴க்கு² ஸஹதி ரஜக்³க³ம்; அபி ச கோ² த⁴ஜக்³க³ஞ்ஞேவ தி³ஸ்வா ஸம்ஸீத³தி விஸீத³தி, ந ஸந்த²ம்ப⁴தி, ந ஸக்கோதி ப்³ரஹ்மசரியம் ஸந்தா⁴ரேதும். ஸிக்கா²து³ப்³ப³ல்யம் ஆவிகத்வா ஸிக்க²ம் பச்சக்கா²ய ஹீனாயாவத்ததி. கிமஸ்ஸ த⁴ஜக்³க³ஸ்மிம்? இத⁴, பி⁴க்க²வே, பி⁴க்கு² ந ஹேவ கோ² ஸுணாதி – ‘அமுகஸ்மிம் நாம கா³மே வா நிக³மே வா இத்தீ² வா குமாரீ வா அபி⁴ரூபா த³ஸ்ஸனீயா பாஸாதி³கா பரமாய வண்ணபோக்க²ரதாய ஸமன்னாக³தா’தி; அபி ச கோ² ஸாமம் பஸ்ஸதி இத்தி²ம் வா குமாரிம் வா அபி⁴ரூபம் த³ஸ்ஸனீயம் பாஸாதி³கம் பரமாய வண்ணபோக்க²ரதாய ஸமன்னாக³தம். ஸோ தம் தி³ஸ்வா ஸம்ஸீத³தி விஸீத³தி, ந ஸந்த²ம்ப⁴தி, ந ஸக்கோதி ப்³ரஹ்மசரியம் ஸந்தா⁴ரேதும். ஸிக்கா²து³ப்³ப³ல்யம் ஆவிகத்வா ஸிக்க²ம் பச்சக்கா²ய ஹீனாயாவத்ததி. இத³மஸ்ஸ த⁴ஜக்³க³ஸ்மிம்.

‘‘ஸேய்யதா²பி ஸோ, பி⁴க்க²வே, யோதா⁴ஜீவோ ஸஹதி ரஜக்³க³ம்; அபி ச கோ² த⁴ஜக்³க³ஞ்ஞேவ தி³ஸ்வா ஸம்ஸீத³தி விஸீத³தி, ந ஸந்த²ம்ப⁴தி, ந ஸக்கோதி ஸங்கா³மம் ஓதரிதும்; ததூ²பமாஹம், பி⁴க்க²வே, இமம் புக்³க³லம் வதா³மி. ஏவரூபோபி, பி⁴க்க²வே, இதே⁴கச்சோ புக்³க³லோ ஹோதி. அயம், பி⁴க்க²வே, து³தியோ யோதா⁴ஜீவூபமோ புக்³க³லோ ஸந்தோ ஸம்விஜ்ஜமானோ பி⁴க்கூ²ஸு.

‘‘புன சபரம், பி⁴க்க²வே, பி⁴க்கு² ஸஹதி ரஜக்³க³ம், ஸஹதி த⁴ஜக்³க³ம்; அபி ச கோ² உஸ்ஸாரணஞ்ஞேவ ஸுத்வா ஸம்ஸீத³தி விஸீத³தி, ந ஸந்த²ம்ப⁴தி, ந ஸக்கோதி ப்³ரஹ்மசரியம் ஸந்தா⁴ரேதும். ஸிக்கா²து³ப்³ப³ல்யம் ஆவிகத்வா ஸிக்க²ம் பச்சக்கா²ய ஹீனாயாவத்ததி. கிமஸ்ஸ உஸ்ஸாரணாய? இத⁴, பி⁴க்க²வே, பி⁴க்கு²ம் அரஞ்ஞக³தம் வா ருக்க²மூலக³தம் வா ஸுஞ்ஞாகா³ரக³தம் வா மாதுகா³மோ உபஸங்கமித்வா ஊஹஸதி [உஹஸதி (க.), ஓஹஸதி (ஸ்யா. கம்.) பு. ப. 196] உல்லபதி உஜ்ஜக்³க⁴தி உப்பண்டே³தி. ஸோ மாதுகா³மேன ஊஹஸியமானோ உல்லபியமானோ உஜ்ஜக்³கி⁴யமானோ உப்பண்டி³யமானோ ஸம்ஸீத³தி விஸீத³தி, ந ஸந்த²ம்ப⁴தி, ந ஸக்கோதி ப்³ரஹ்மசரியம் ஸந்தா⁴ரேதும். ஸிக்கா²து³ப்³ப³ல்யம் ஆவிகத்வா ஸிக்க²ம் பச்சக்கா²ய ஹீனாயாவத்ததி. இத³மஸ்ஸ உஸ்ஸாரணாய.

‘‘ஸேய்யதா²பி ஸோ, பி⁴க்க²வே, யோதா⁴ஜீவோ ஸஹதி ரஜக்³க³ம், ஸஹதி த⁴ஜக்³க³ம்; அபி ச கோ² உஸ்ஸாரணஞ்ஞேவ ஸுத்வா ஸம்ஸீத³தி விஸீத³தி, ந ஸந்த²ம்ப⁴தி, ந ஸக்கோதி ஸங்கா³மம் ஓதரிதும்; ததூ²பமாஹம், பி⁴க்க²வே, இமம் புக்³க³லம் வதா³மி. ஏவரூபோபி, பி⁴க்க²வே, இதே⁴கச்சோ புக்³க³லோ ஹோதி. அயம், பி⁴க்க²வே, ததியோ யோதா⁴ஜீவூபமோ புக்³க³லோ ஸந்தோ ஸம்விஜ்ஜமானோ பி⁴க்கூ²ஸு.

‘‘புன சபரம், பி⁴க்க²வே, பி⁴க்கு² ஸஹதி ரஜக்³க³ம், ஸஹதி த⁴ஜக்³க³ம், ஸஹதி உஸ்ஸாரணம்; அபி ச கோ² ஸம்பஹாரே ஹஞ்ஞதி ப்³யாபஜ்ஜதி. கிமஸ்ஸ ஸம்பஹாரஸ்மிம்? இத⁴, பி⁴க்க²வே, பி⁴க்கு²ம் அரஞ்ஞக³தம் வா ருக்க²மூலக³தம் வா ஸுஞ்ஞாகா³ரக³தம் வா மாதுகா³மோ உபஸங்கமித்வா அபி⁴னிஸீத³தி அபி⁴னிபஜ்ஜதி அஜ்ஜோ²த்த²ரதி. ஸோ மாதுகா³மேன அபி⁴னிஸீதி³யமானோ அபி⁴னிபஜ்ஜியமானோ அஜ்ஜோ²த்த²ரியமானோ ஸிக்க²ம் அபச்சக்கா²ய து³ப்³ப³ல்யம் அனாவிகத்வா மேது²னம் த⁴ம்மம் படிஸேவதி. இத³மஸ்ஸ ஸம்பஹாரஸ்மிம்.

‘‘ஸேய்யதா²பி ஸோ, பி⁴க்க²வே, யோதா⁴ஜீவோ ஸஹதி ரஜக்³க³ம், ஸஹதி த⁴ஜக்³க³ம், ஸஹதி உஸ்ஸாரணம், அபி ச கோ² ஸம்பஹாரே ஹஞ்ஞதி ப்³யாபஜ்ஜதி; ததூ²பமாஹம், பி⁴க்க²வே, இமம் புக்³க³லம் வதா³மி. ஏவரூபோபி, பி⁴க்க²வே, இதே⁴கச்சோ புக்³க³லோ ஹோதி. அயம், பி⁴க்க²வே, சதுத்தோ² யோதா⁴ஜீவூபமோ புக்³க³லோ ஸந்தோ ஸம்விஜ்ஜமானோ பி⁴க்கூ²ஸு.

‘‘புன சபரம், பி⁴க்க²வே, பி⁴க்கு² ஸஹதி ரஜக்³க³ம், ஸஹதி த⁴ஜக்³க³ம், ஸஹதி உஸ்ஸாரணம், ஸஹதி ஸம்பஹாரம், ஸோ தம் ஸங்கா³மம் அபி⁴விஜினித்வா விஜிதஸங்கா³மோ தமேவ ஸங்கா³மஸீஸம் அஜ்ஜா²வஸதி. கிமஸ்ஸ ஸங்கா³மவிஜயஸ்மிம்? இத⁴, பி⁴க்க²வே, பி⁴க்கு² அரஞ்ஞக³தம் வா ருக்க²மூலக³தம் வா ஸுஞ்ஞாகா³ரக³தம் வா மாதுகா³மோ உபஸங்கமித்வா அபி⁴னிஸீத³தி அபி⁴னிபஜ்ஜதி அஜ்ஜோ²த்த²ரதி. ஸோ மாதுகா³மேன அபி⁴னிஸீதி³யமானோ அபி⁴னிபஜ்ஜியமானோ அஜ்ஜோ²த்த²ரியமானோ வினிவேடே²த்வா வினிமோசேத்வா யேன காமம் பக்கமதி. ஸோ விவித்தம் ஸேனாஸனம் ப⁴ஜதி அரஞ்ஞம் ருக்க²மூலம் பப்³ப³தம் கந்த³ரம் கி³ரிகு³ஹம் ஸுஸானம் வனபத்த²ம் அப்³போ⁴காஸம் பலாலபுஞ்ஜம்.

‘‘ஸோ அரஞ்ஞக³தோ வா ருக்க²மூலக³தோ வா ஸுஞ்ஞாகா³ரக³தோ வா நிஸீத³தி பல்லங்கம் ஆபு⁴ஜித்வா உஜும் காயம் பணிதா⁴ய பரிமுக²ம் ஸதிம் உபட்ட²பேத்வா. ஸோ அபி⁴ஜ்ஜ²ம் லோகே பஹாய விக³தாபி⁴ஜ்ஜே²ன சேதஸா விஹரதி, அபி⁴ஜ்ஜா²ய சித்தம் பரிஸோதே⁴தி; ப்³யாபாத³பதோ³ஸம் பஹாய அப்³யாபன்னசித்தோ விஹரதி, ஸப்³ப³பாணபூ⁴தஹிதானுகம்பீ ப்³யாபாத³பதோ³ஸா சித்தம் பரிஸோதே⁴தி; தி²னமித்³த⁴ம் பஹாய விக³ததி²னமித்³தோ⁴ விஹரதி ஆலோகஸஞ்ஞீ ஸதோ ஸம்பஜானோ, தி²னமித்³தா⁴ சித்தம் பரிஸோதே⁴தி; உத்³த⁴ச்சகுக்குச்சம் பஹாய அனுத்³த⁴தோ விஹரதி அஜ்ஜ²த்தம் வூபஸந்தசித்தோ, உத்³த⁴ச்சகுக்குச்சா சித்தம் பரிஸோதே⁴தி; விசிகிச்ச²ம் பஹாய திண்ணவிசிகிச்சோ² விஹரதி அகத²ம்கதீ² குஸலேஸு த⁴ம்மேஸு, விசிகிச்சா²ய சித்தம் பரிஸோதே⁴தி. ஸோ இமே பஞ்ச நீவரணே பஹாய சேதஸோ உபக்கிலேஸே பஞ்ஞாய து³ப்³ப³லீகரணே விவிச்சேவ காமேஹி…பே… பீதியா ச விராகா³ உபேக்க²கோ ச விஹரதி ஸதோ ஸம்பஜானோ, ஸுக²ஞ்ச காயேன படிஸம்வேதே³தி யம் தம் அரியா ஆசிக்க²ந்தி – ‘உபேக்க²கோ ஸதிமா ஸுக²விஹாரீ’தி ததியம் ஜா²னம் உபஸம்பஜ்ஜ விஹரதி. ஸுக²ஸ்ஸ ச பஹானா து³க்க²ஸ்ஸ ச பஹானா, புப்³பே³வ ஸோமனஸ்ஸதோ³மனஸ்ஸானம் அத்த²ங்க³மா அது³க்க²மஸுக²ம் உபேக்கா²ஸதிபாரிஸுத்³தி⁴ம் சதுத்த²ம் ஜா²னம் உபஸம்பஜ்ஜ விஹரதி.

‘‘ஸோ ஏவம் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே ஆஸவானம் க²யஞாணாய சித்தம் அபி⁴னின்னாமேதி. ஸோ ‘இத³ம் து³க்க²’ந்தி யதா²பூ⁴தம் பஜானாதி, ‘அயம் து³க்க²ஸமுத³யோ’தி யதா²பூ⁴தம் பஜானாதி, ‘அயம் து³க்க²னிரோதோ⁴’தி யதா²பூ⁴தம் பஜானாதி, ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானாதி, ‘இமே ஆஸவா’தி யதா²பூ⁴தம் பஜானாதி, ‘அயம் ஆஸவஸமுத³யோ’தி யதா²பூ⁴தம் பஜானாதி, ‘அயம் ஆஸவனிரோதோ⁴’தி யதா²பூ⁴தம் பஜானாதி, ‘அயம் ஆஸவனிரோத⁴கா³மினீ படிபதா³’தி யதா²பூ⁴தம் பஜானாதி. தஸ்ஸ ஏவம் ஜானதோ ஏவம் பஸ்ஸதோ காமாஸவாபி சித்தம் விமுச்சதி, ப⁴வாஸவாபி சித்தம் விமுச்சதி, அவிஜ்ஜாஸவாபி சித்தம் விமுச்சதி, விமுத்தஸ்மிம் விமுத்தமிதி ஞாணம் ஹோதி. ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி பஜானாதி. இத³மஸ்ஸ ஸங்கா³மவிஜயஸ்மிம்.

‘‘ஸேய்யதா²பி ஸோ, பி⁴க்க²வே, யோதா⁴ஜீவோ ஸஹதி ரஜக்³க³ம், ஸஹதி த⁴ஜக்³க³ம், ஸஹதி உஸ்ஸாரணம், ஸஹதி ஸம்பஹாரம், ஸோ தம் ஸங்கா³மம் அபி⁴விஜினித்வா விஜிதஸங்கா³மோ தமேவ ஸங்கா³மஸீஸம் அஜ்ஜா²வஸதி; ததூ²பமாஹம், பி⁴க்க²வே, இமம் புக்³க³லம் வதா³மி. ஏவரூபோபி, பி⁴க்க²வே, இதே⁴கச்சோ புக்³க³லோ ஹோதி. அயம், பி⁴க்க²வே, பஞ்சமோ யோதா⁴ஜீவூபமோ புக்³க³லோ ஸந்தோ ஸம்விஜ்ஜமானோ பி⁴க்கூ²ஸு. இமே கோ², பி⁴க்க²வே, பஞ்ச யோதா⁴ஜீவூபமா புக்³க³லா ஸந்தோ ஸம்விஜ்ஜமானா பி⁴க்கூ²ஸூ’’தி. பஞ்சமம்.

6. து³தியயோதா⁴ஜீவஸுத்தம்

76. ‘‘பஞ்சிமே, பி⁴க்க²வே, யோதா⁴ஜீவா ஸந்தோ ஸம்விஜ்ஜமானா லோகஸ்மிம். கதமே பஞ்ச? இத⁴, பி⁴க்க²வே, ஏகச்சோ யோதா⁴ஜீவோ அஸிசம்மம் க³ஹேத்வா த⁴னுகலாபம் ஸன்னய்ஹித்வா வியூள்ஹம் ஸங்கா³மம் ஓதரதி. ஸோ தஸ்மிம் ஸங்கா³மே உஸ்ஸஹதி வாயமதி. தமேனம் உஸ்ஸஹந்தம் வாயமந்தம் பரே ஹனந்தி பரியாபாதே³ந்தி. ஏவரூபோபி, பி⁴க்க²வே, இதே⁴கச்சோ யோதா⁴ஜீவோ ஹோதி. அயம், பி⁴க்க²வே, பட²மோ யோதா⁴ஜீவோ ஸந்தோ ஸம்விஜ்ஜமானோ லோகஸ்மிம்.

‘‘புன சபரம், பி⁴க்க²வே, இதே⁴கச்சோ யோதா⁴ஜீவோ அஸிசம்மம் க³ஹேத்வா த⁴னுகலாபம் ஸன்னய்ஹித்வா வியூள்ஹம் ஸங்கா³மம் ஓதரதி. ஸோ தஸ்மிம் ஸங்கா³மே உஸ்ஸஹதி வாயமதி. தமேனம் உஸ்ஸஹந்தம் வாயமந்தம் பரே உபலிக்க²ந்தி [உபலிக²ந்தி (க.)], தமேனம் அபனேந்தி; அபனேத்வா ஞாதகானம் நேந்தி. ஸோ ஞாதகேஹி நீயமானோ அப்பத்வாவ ஞாதகே அந்தராமக்³கே³ காலம் கரோதி. ஏவரூபோபி, பி⁴க்க²வே, இதே⁴கச்சோ யோதா⁴ஜீவோ ஹோதி. அயம், பி⁴க்க²வே, து³தியோ யோதா⁴ஜீவோ ஸந்தோ ஸம்விஜ்ஜமானோ லோகஸ்மிம்.

‘‘புன சபரம், பி⁴க்க²வே, இதே⁴கச்சோ யோதா⁴ஜீவோ அஸிசம்மம் க³ஹேத்வா த⁴னுகலாபம் ஸன்னய்ஹித்வா வியூள்ஹம் ஸங்கா³மம் ஓதரதி. ஸோ தஸ்மிம் ஸங்கா³மே உஸ்ஸஹதி வாயமதி. தமேனம் உஸ்ஸஹந்தம் வாயமந்தம் பரே உபலிக்க²ந்தி, தமேனம் அபனேந்தி; அபனேத்வா ஞாதகானம் நேந்தி. தமேனம் ஞாதகா உபட்ட²ஹந்தி பரிசரந்தி. ஸோ ஞாதகேஹி உபட்ட²ஹியமானோ பரிசரியமானோ தேனேவ ஆபா³தே⁴ன காலம் கரோதி. ஏவரூபோபி, பி⁴க்க²வே, இதே⁴கச்சோ யோதா⁴ஜீவோ ஹோதி. அயம், பி⁴க்க²வே, ததியோ யோதா⁴ஜீவோ ஸந்தோ ஸம்விஜ்ஜமானோ லோகஸ்மிம்.

‘‘புன சபரம், பி⁴க்க²வே, இதே⁴கச்சோ யோதா⁴ஜீவோ அஸிசம்மம் க³ஹேத்வா த⁴னுகலாபம் ஸன்னய்ஹித்வா வியூள்ஹம் ஸங்கா³மம் ஓதரதி. ஸோ தஸ்மிம் ஸங்கா³மே உஸ்ஸஹதி வாயமதி. தமேனம் உஸ்ஸஹந்தம் வாயமந்தம் பரே உபலிக்க²ந்தி, தமேனம் அபனேந்தி; அபனேத்வா ஞாதகானம் நேந்தி. தமேனம் ஞாதகா உபட்ட²ஹந்தி பரிசரந்தி. ஸோ ஞாதகேஹி உபட்ட²ஹியமானோ பரிசரியமானோ வுட்டா²தி தம்ஹா ஆபா³தா⁴. ஏவரூபோபி, பி⁴க்க²வே, இதே⁴கச்சோ யோதா⁴ஜீவோ ஹோதி. அயம், பி⁴க்க²வே, சதுத்தோ² யோதா⁴ஜீவோ ஸந்தோ ஸம்விஜ்ஜமானோ லோகஸ்மிம்.

‘‘புன சபரம், பி⁴க்க²வே, இதே⁴கச்சோ யோதா⁴ஜீவோ அஸிசம்மம் க³ஹேத்வா த⁴னுகலாபம் ஸன்னய்ஹித்வா வியூள்ஹம் ஸங்கா³மம் ஓதரதி. ஸோ தம் ஸங்கா³மம் அபி⁴விஜினித்வா விஜிதஸங்கா³மோ தமேவ ஸங்கா³மஸீஸம் அஜ்ஜா²வஸதி. ஏவரூபோபி, பி⁴க்க²வே, இதே⁴கச்சோ யோதா⁴ஜீவோ ஹோதி. அயம், பி⁴க்க²வே, பஞ்சமோ யோதா⁴ஜீவோ ஸந்தோ ஸம்விஜ்ஜமானோ லோகஸ்மிம். இமே கோ², பி⁴க்க²வே, பஞ்ச யோதா⁴ஜீவா ஸந்தோ ஸம்விஜ்ஜமானா லோகஸ்மிம்.

‘‘ஏவமேவம் கோ², பி⁴க்க²வே, பஞ்சிமே யோதா⁴ஜீவூபமா புக்³க³லா ஸந்தோ ஸம்விஜ்ஜமானா பி⁴க்கூ²ஸு. கதமே பஞ்ச? இத⁴, பி⁴க்க²வே, பி⁴க்கு² அஞ்ஞதரம் கா³மம் வா நிக³மம் வா உபனிஸ்ஸாய விஹரதி. ஸோ புப்³ப³ண்ஹஸமயம் நிவாஸேத்வா பத்தசீவரமாதா³ய தமேவ கா³மம் வா நிக³மம் வா பிண்டா³ய பவிஸதி அரக்கி²தேனேவ காயேன அரக்கி²தாய வாசாய அரக்கி²தேன சித்தேன அனுபட்டி²தாய ஸதியா அஸம்வுதேஹி இந்த்³ரியேஹி. ஸோ தத்த² பஸ்ஸதி மாதுகா³மம் து³ன்னிவத்த²ம் வா து³ப்பாருதம் வா. தஸ்ஸ தம் மாதுகா³மம் தி³ஸ்வா து³ன்னிவத்த²ம் வா து³ப்பாருதம் வா ராகோ³ சித்தம் அனுத்³த⁴ம்ஸேதி. ஸோ ராகா³னுத்³த⁴ம்ஸிதேன சித்தேன ஸிக்க²ம் அபச்சக்கா²ய து³ப்³ப³ல்யம் அனாவிகத்வா மேது²னம் த⁴ம்மம் படிஸேவதி.

‘‘ஸேய்யதா²பி ஸோ, பி⁴க்க²வே, யோதா⁴ஜீவோ அஸிசம்மம் க³ஹேத்வா த⁴னுகலாபம் ஸன்னய்ஹித்வா வியூள்ஹம் ஸங்கா³மம் ஓதரதி, ஸோ தஸ்மிம் ஸங்கா³மே உஸ்ஸஹதி வாயமதி, தமேனம் உஸ்ஸஹந்தம் வாயமந்தம் பரே ஹனந்தி பரியாபாதே³ந்தி; ததூ²பமாஹம், பி⁴க்க²வே, இமம் புக்³க³லம் வதா³மி. ஏவரூபோபி, பி⁴க்க²வே, இதே⁴கச்சோ புக்³க³லோ ஹோதி. அயம், பி⁴க்க²வே, பட²மோ யோதா⁴ஜீவூபமோ புக்³க³லோ ஸந்தோ ஸம்விஜ்ஜமானோ பி⁴க்கூ²ஸு.

‘‘புன சபரம், பி⁴க்க²வே, பி⁴க்கு² அஞ்ஞதரம் கா³மம் வா நிக³மம் வா உபனிஸ்ஸாய விஹரதி. ஸோ புப்³ப³ண்ஹஸமயம் நிவாஸேத்வா பத்தசீவரமாதா³ய தமேவ கா³மம் வா நிக³மம் வா பிண்டா³ய பவிஸதி அரக்கி²தேனேவ காயேன அரக்கி²தாய வாசாய அரக்கி²தேன சித்தேன அனுபட்டி²தாய ஸதியா அஸம்வுதேஹி இந்த்³ரியேஹி. ஸோ தத்த² பஸ்ஸதி மாதுகா³மம் து³ன்னிவத்த²ம் வா து³ப்பாருதம் வா. தஸ்ஸ தம் மாதுகா³மம் தி³ஸ்வா து³ன்னிவத்த²ம் வா து³ப்பாருதம் வா ராகோ³ சித்தம் அனுத்³த⁴ம்ஸேதி. ஸோ ராகா³னுத்³த⁴ம்ஸிதேன சித்தேன பரிட³ய்ஹதேவ காயேன பரிட³ய்ஹதி சேதஸா. தஸ்ஸ ஏவம் ஹோதி – ‘யம்னூனாஹம் ஆராமம் க³ந்த்வா பி⁴க்கூ²னம் ஆரோசேய்யம் – ராக³பரியுட்டி²தோம்ஹி [ராகா³யிதோம்ஹி (ஸீ. ஸ்யா. கம்)], ஆவுஸோ, ராக³பரேதோ, ந ஸக்கோமி ப்³ரஹ்மசரியம் ஸந்தா⁴ரேதும்; ஸிக்கா²து³ப்³ப³ல்யம் ஆவிகத்வா ஸிக்க²ம் பச்சக்கா²ய ஹீனாயாவத்திஸ்ஸாமீ’தி. ஸோ ஆராமம் க³ச்ச²ந்தோ அப்பத்வாவ ஆராமம் அந்தராமக்³கே³ ஸிக்கா²து³ப்³ப³ல்யம் ஆவிகத்வா ஸிக்க²ம் பச்சக்கா²ய ஹீனாயாவத்ததி.

‘‘ஸேய்யதா²பி ஸோ, பி⁴க்க²வே, யோதா⁴ஜீவோ அஸிசம்மம் க³ஹேத்வா த⁴னுகலாபம் ஸன்னய்ஹித்வா வியூள்ஹம் ஸங்கா³மம் ஓதரதி, ஸோ தஸ்மிம் ஸங்கா³மே உஸ்ஸஹதி வாயமதி, தமேனம் உஸ்ஸஹந்தம் வாயமந்தம் பரே உபலிக்க²ந்தி, தமேனம் அபனேந்தி; அபனேத்வா ஞாதகானம் நேந்தி. ஸோ ஞாதகேஹி நீயமானோ அப்பத்வாவ ஞாதகே அந்தராமக்³கே³ காலம் கரோதி; ததூ²பமாஹம், பி⁴க்க²வே, இமம் புக்³க³லம் வதா³மி. ஏவரூபோபி, பி⁴க்க²வே, இதே⁴கச்சோ புக்³க³லோ ஹோதி. அயம், பி⁴க்க²வே, து³தியோ யோதா⁴ஜீவூபமோ புக்³க³லோ ஸந்தோ ஸம்விஜ்ஜமானோ பி⁴க்கூ²ஸு.

‘‘புன சபரம், பி⁴க்க²வே, பி⁴க்கு² அஞ்ஞதரம் கா³மம் வா நிக³மம் வா உபனிஸ்ஸாய விஹரதி. ஸோ புப்³ப³ண்ஹஸமயம் நிவாஸேத்வா பத்தசீவரமாதா³ய தமேவ கா³மம் வா நிக³மம் வா பிண்டா³ய பவிஸதி அரக்கி²தேனேவ காயேன அரக்கி²தாய வாசாய அரக்கி²தேன சித்தேன அனுபட்டி²தாய ஸதியா அஸம்வுதேஹி இந்த்³ரியேஹி. ஸோ தத்த² பஸ்ஸதி மாதுகா³மம் து³ன்னிவத்த²ம் வா து³ப்பாருதம் வா. தஸ்ஸ தம் மாதுகா³மம் தி³ஸ்வா து³ன்னிவத்த²ம் வா து³ப்பாருதம் வா ராகோ³ சித்தம் அனுத்³த⁴ம்ஸேதி. ஸோ ராகா³னுத்³த⁴ம்ஸிதேன சித்தேன பரிட³ய்ஹதேவ காயேன பரிட³ய்ஹதி சேதஸா. தஸ்ஸ ஏவம் ஹோதி – ‘யம்னூனாஹம் ஆராமம் க³ந்த்வா பி⁴க்கூ²னம் ஆரோசேய்யம் – ராக³பரியுட்டி²தோம்ஹி, ஆவுஸோ, ராக³பரேதோ, ந ஸக்கோமி ப்³ரஹ்மசரியம் ஸந்தா⁴ரேதும்; ஸிக்கா²து³ப்³ப³ல்யம் ஆவிகத்வா ஸிக்க²ம் பச்சக்கா²ய ஹீனாயாவத்திஸ்ஸாமீ’தி. ஸோ ஆராமம் க³ந்த்வா பி⁴க்கூ²னம் ஆரோசேதி – ‘ராக³பரியுட்டி²தோம்ஹி, ஆவுஸோ, ராக³பரேதோ, ந ஸக்கோமி ப்³ரஹ்மசரியம் ஸந்தா⁴ரேதும்; ஸிக்கா²து³ப்³ப³ல்யம் ஆவிகத்வா ஸிக்க²ம் பச்சக்கா²ய ஹீனாயாவத்திஸ்ஸாமீ’’’தி.

‘‘தமேனம் ஸப்³ரஹ்மசாரீ ஓவத³ந்தி அனுஸாஸந்தி – ‘அப்பஸ்ஸாதா³, ஆவுஸோ, காமா வுத்தா ப⁴க³வதா ப³ஹுது³க்கா² ப³ஹுபாயாஸா [ப³ஹூபாயாஸா (ஸீ. ஸ்யா. கம். பீ.) பாசி. 417; சூளவ. 65; ம. நி. 1.234], ஆதீ³னவோ ஏத்த² பி⁴ய்யோ. அட்டி²கங்கலூபமா காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ. மம்ஸபேஸூபமா காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ. திணுக்கூபமா காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ. அங்கா³ரகாஸூபமா காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ. ஸுபினகூபமா காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ. யாசிதகூபமா காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ. ருக்க²ப²லூபமா காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ. அஸிஸூனூபமா காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ. ஸத்திஸூலூபமா காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ. ஸப்பஸிரூபமா காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ. அபி⁴ரமதாயஸ்மா ப்³ரஹ்மசரியே; மாயஸ்மா ஸிக்கா²து³ப்³ப³ல்யம் ஆவிகத்வா ஸிக்க²ம் பச்சக்கா²ய ஹீனாயாவத்தீ’’’தி.

‘‘ஸோ ஸப்³ரஹ்மசாரீஹி ஏவம் ஓவதி³யமானோ ஏவம் அனுஸாஸியமானோ ஏவமாஹ – ‘கிஞ்சாபி, ஆவுஸோ, அப்பஸ்ஸாதா³ காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ; அத² கோ² நேவாஹம் ஸக்கோமி ப்³ரஹ்மசரியம் ஸந்தா⁴ரேதும், ஸிக்கா²து³ப்³ப³ல்யம் ஆவிகத்வா ஸிக்க²ம் பச்சக்கா²ய ஹீனாயாவத்திஸ்ஸாமீ’’’தி. ஸோ ஸிக்கா²து³ப்³ப³ல்யம் ஆவிகத்வா ஸிக்க²ம் பச்சக்கா²ய ஹீனாயாவத்ததி.

‘‘ஸேய்யதா²பி ஸோ, பி⁴க்க²வே, யோதா⁴ஜீவோ அஸிசம்மம் க³ஹேத்வா த⁴னுகலாபம் ஸன்னய்ஹித்வா வியூள்ஹம் ஸங்கா³மம் ஓதரதி, ஸோ தஸ்மிம் ஸங்கா³மே உஸ்ஸஹதி வாயமதி, தமேனம் உஸ்ஸஹந்தம் வாயமந்தம் பரே உபலிக்க²ந்தி, தமேனம் அபனேந்தி; அபனேத்வா ஞாதகானம் நேந்தி, தமேனம் ஞாதகா உபட்ட²ஹந்தி பரிசரந்தி. ஸோ ஞாதகேஹி உபட்ட²ஹியமானோ பரிசரியமானோ தேனேவ ஆபா³தே⁴ன காலம் கரோதி; ததூ²பமாஹம், பி⁴க்க²வே, இமம் புக்³க³லம் வதா³மி. ஏவரூபோபி, பி⁴க்க²வே, இதே⁴கச்சோ புக்³க³லோ ஹோதி. அயம், பி⁴க்க²வே, ததியோ யோதா⁴ஜீவூபமோ புக்³க³லோ ஸந்தோ ஸம்விஜ்ஜமானோ பி⁴க்கூ²ஸு.

‘‘புன சபரம், பி⁴க்க²வே, பி⁴க்கு² அஞ்ஞதரம் கா³மம் வா நிக³மம் வா உபனிஸ்ஸாய விஹரதி. ஸோ புப்³ப³ண்ஹஸமயம் நிவாஸேத்வா பத்தசீவரமாதா³ய தமேவ கா³மம் வா நிக³மம் வா பிண்டா³ய பவிஸதி அரக்கி²தேனேவ காயேன அரக்கி²தாய வாசாய அரக்கி²தேன சித்தேன அனுபட்டி²தாய ஸதியா அஸம்வுதேஹி இந்த்³ரியேஹி. ஸோ தத்த² பஸ்ஸதி மாதுகா³மம் து³ன்னிவத்த²ம் வா து³ப்பாருதம் வா. தஸ்ஸ தம் மாதுகா³மம் தி³ஸ்வா து³ன்னிவத்த²ம் வா து³ப்பாருதம் வா ராகோ³ சித்தம் அனுத்³த⁴ம்ஸேதி. ஸோ ராகா³னுத்³த⁴ம்ஸிதேன சித்தேன பரிட³ய்ஹதேவ காயேன பரிட³ய்ஹதி சேதஸா. தஸ்ஸ ஏவம் ஹோதி – ‘யம்னூனாஹம் ஆராமம் க³ந்த்வா பி⁴க்கூ²னம் ஆரோசேய்யம் – ராக³பரியுட்டி²தோம்ஹி, ஆவுஸோ, ராக³பரேதோ, ந ஸக்கோமி ப்³ரஹ்மசரியம் ஸந்தா⁴ரேதும்; ஸிக்கா²து³ப்³ப³ல்யம் ஆவிகத்வா ஸிக்க²ம் பச்சக்கா²ய ஹீனாயாவத்திஸ்ஸாமீ’தி. ஸோ ஆராமம் க³ந்த்வா பி⁴க்கூ²னம் ஆரோசேதி – ‘ராக³பரியுட்டி²தோம்ஹி, ஆவுஸோ, ராக³பரேதோ, ந ஸக்கோமி ப்³ரஹ்மசரியம் ஸந்தா⁴ரேதும்; ஸிக்கா²து³ப்³ப³ல்யம் ஆவிகத்வா ஸிக்க²ம் பச்சக்கா²ய ஹீனாயாவத்திஸ்ஸாமீ’’’தி.

‘‘தமேனம் ஸப்³ரஹ்மசாரீ ஓவத³ந்தி அனுஸாஸந்தி – ‘அப்பஸ்ஸாதா³, ஆவுஸோ, காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ. அட்டி²கங்கலூபமா காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ. மம்ஸபேஸூபமா காமா வுத்தா ப⁴க³வதா…பே… திணுக்கூபமா காமா வுத்தா ப⁴க³வதா… அங்கா³ரகாஸூபமா காமா வுத்தா ப⁴க³வதா… ஸுபினகூபமா காமா வுத்தா ப⁴க³வதா… யாசிதகூபமா காமா வுத்தா ப⁴க³வதா… ருக்க²ப²லூபமா காமா வுத்தா ப⁴க³வதா… அஸிஸூனூபமா காமா வுத்தா ப⁴க³வதா… ஸத்திஸூலூபமா காமா வுத்தா ப⁴க³வதா… ஸப்பஸிரூபமா காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோ. அபி⁴ரமதாயஸ்மா ப்³ரஹ்மசரியே; மாயஸ்மா ஸிக்கா²து³ப்³ப³ல்யம் ஆவிகத்வா ஸிக்க²ம் பச்சக்கா²ய ஹீனாயாவத்தீ’’’தி.

‘‘ஸோ ஸப்³ரஹ்மசாரீஹி ஏவம் ஓவதி³யமானோ ஏவம் அனுஸாஸியமானோ ஏவமாஹ – ‘உஸ்ஸஹிஸ்ஸாமி, ஆவுஸோ, வாயமிஸ்ஸாமி, ஆவுஸோ, அபி⁴ரமிஸ்ஸாமி, ஆவுஸோ! ந தா³னாஹம், ஆவுஸோ, ஸிக்கா²து³ப்³ப³ல்யம் ஆவிகத்வா ஸிக்க²ம் பச்சக்கா²ய ஹீனாயாவத்திஸ்ஸாமீ’’’தி.

‘‘ஸேய்யதா²பி ஸோ, பி⁴க்க²வே, யோதா⁴ஜீவோ அஸிசம்மம் க³ஹேத்வா த⁴னுகலாபம் ஸன்னய்ஹித்வா வியூள்ஹம் ஸங்கா³மம் ஓதரதி, ஸோ தஸ்மிம் ஸங்கா³மே உஸ்ஸஹதி வாயமதி, தமேனம் உஸ்ஸஹந்தம் வாயமந்தம் பரே உபலிக்க²ந்தி, தமேனம் அபனேந்தி; அபனேத்வா ஞாதகானம் நேந்தி, தமேனம் ஞாதகா உபட்ட²ஹந்தி பரிசரந்தி. ஸோ ஞாதகேஹி உபட்ட²ஹியமானோ பரிசரியமானோ வுட்டா²தி தம்ஹா ஆபா³தா⁴; ததூ²பமாஹம், பி⁴க்க²வே, இமம் புக்³க³லம் வதா³மி. ஏவரூபோபி, பி⁴க்க²வே, இதே⁴கச்சோ புக்³க³லோ ஹோதி. அயம், பி⁴க்க²வே, சதுத்தோ² யோதா⁴ஜீவூபமோ புக்³க³லோ ஸந்தோ ஸம்விஜ்ஜமானோ பி⁴க்கூ²ஸு.

‘‘புன சபரம், பி⁴க்க²வே, பி⁴க்கு² அஞ்ஞதரம் கா³மம் வா நிக³மம் வா உபனிஸ்ஸாய விஹரதி. ஸோ புப்³ப³ண்ஹஸமயம் நிவாஸேத்வா பத்தசீவரமாதா³ய தமேவ கா³மம் வா நிக³மம் வா பிண்டா³ய பவிஸதி ரக்கி²தேனேவ காயேன ரக்கி²தாய வாசாய ரக்கி²தேன சித்தேன உபட்டி²தாய ஸதியா ஸம்வுதேஹி இந்த்³ரியேஹி. ஸோ சக்கு²னா ரூபம் தி³ஸ்வா ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ. யத்வாதி⁴கரணமேனம் சக்கு²ந்த்³ரியம் அஸம்வுதம் விஹரந்தம் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவேய்யும், தஸ்ஸ ஸம்வராய படிபஜ்ஜதி; ரக்க²தி சக்கு²ந்த்³ரியம்; சக்கு²ந்த்³ரியே ஸம்வரம் ஆபஜ்ஜதி. ஸோதேன ஸத்³த³ம் ஸுத்வா… கா⁴னேன க³ந்த⁴ம் கா⁴யித்வா … ஜிவ்ஹாய ரஸம் ஸாயித்வா… காயேன போ²ட்ட²ப்³ப³ம் பு²ஸித்வா… மனஸா த⁴ம்மம் விஞ்ஞாய ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ. யத்வாதி⁴கரணமேனம் மனிந்த்³ரியம் அஸம்வுதம் விஹரந்தம் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவேய்யும், தஸ்ஸ ஸம்வராய படிபஜ்ஜதி; ரக்க²தி மனிந்த்³ரியம்; மனிந்த்³ரியே ஸம்வரம் ஆபஜ்ஜதி. ஸோ பச்சா²ப⁴த்தம் பிண்ட³பாதபடிக்கந்தோ விவித்தம் ஸேனாஸனம் ப⁴ஜதி அரஞ்ஞம் ருக்க²மூலம் பப்³ப³தம் கந்த³ரம் கி³ரிகு³ஹம் ஸுஸானம் வனபத்த²ம் அப்³போ⁴காஸம் பலாலபுஞ்ஜம். ஸோ அரஞ்ஞக³தோ வா ருக்க²மூலக³தோ வா ஸுஞ்ஞாகா³ரக³தோ வா நிஸீத³தி பல்லங்கம் ஆபு⁴ஜித்வா உஜும் காயம் பணிதா⁴ய பரிமுக²ம் ஸதிம் உபட்ட²பேத்வா. ஸோ அபி⁴ஜ்ஜ²ம் லோகே பஹாய…பே… ஸோ இமே பஞ்ச நீவரணே பஹாய சேதஸோ உபக்கிலேஸே பஞ்ஞாய து³ப்³ப³லீகரணே விவிச்சேவ காமேஹி…பே… சதுத்த²ம் ஜா²னம் உபஸம்பஜ்ஜ விஹரதி.

‘‘ஸேய்யதா²பி ஸோ, பி⁴க்க²வே, யோதா⁴ஜீவோ அஸிசம்மம் க³ஹேத்வா த⁴னுகலாபம் ஸன்னய்ஹித்வா வியூள்ஹம் ஸங்கா³மம் ஓதரதி, ஸோ தம் ஸங்கா³மம் அபி⁴விஜினித்வா விஜிதஸங்கா³மோ தமேவ ஸங்கா³மஸீஸம் அஜ்ஜா²வஸதி; ததூ²பமாஹம், பி⁴க்க²வே, இமம் புக்³க³லம் வதா³மி. ஏவரூபோபி, பி⁴க்க²வே, இதே⁴கச்சோ புக்³க³லோ ஹோதி. அயம், பி⁴க்க²வே, பஞ்சமோ யோதா⁴ஜீவூபமோ புக்³க³லோ ஸந்தோ ஸம்விஜ்ஜமானோ பி⁴க்கூ²ஸு. இமே கோ², பி⁴க்க²வே, பஞ்ச யோதா⁴ஜீவூபமா புக்³க³லா ஸந்தோ ஸம்விஜ்ஜமானா பி⁴க்கூ²ஸூ’’தி. ச²ட்ட²ம்.

7. பட²மஅனாக³தப⁴யஸுத்தம்

77. ‘‘பஞ்சிமானி, பி⁴க்க²வே, அனாக³தப⁴யானி ஸம்பஸ்ஸமானேன அலமேவ ஆரஞ்ஞிகேன [ஆரஞ்ஞகேன (ஸப்³ப³த்த² அ. நி. 5.181; பரி. 443)] பி⁴க்கு²னா அப்பமத்தேன ஆதாபினா பஹிதத்தேன விஹரிதும் அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய.

‘‘கதமானி பஞ்ச? இத⁴, பி⁴க்க²வே, ஆரஞ்ஞிகோ பி⁴க்கு² இதி படிஸஞ்சிக்க²தி – ‘அஹம் கோ² ஏதரஹி ஏககோ அரஞ்ஞே விஹராமி. ஏககம் கோ² பன மம் [ஏககம் கோ² பன (ஸ்யா. கம்.)] அரஞ்ஞே விஹரந்தம் அஹி வா மம் ட³ம்ஸேய்ய, விச்சி²கோ [விச்சி²கா (ஸ்யா.)] வா மம் ட³ம்ஸேய்ய, ஸதபதீ³ வா மம் ட³ம்ஸேய்ய, தேன மே அஸ்ஸ காலங்கிரியா, ஸோ மமஸ்ஸ அந்தராயோ; ஹந்தா³ஹம் வீரியம் ஆரபா⁴மி அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாயா’தி. இத³ம், பி⁴க்க²வே, பட²மம் அனாக³தப⁴யம் ஸம்பஸ்ஸமானேன அலமேவ ஆரஞ்ஞிகேன பி⁴க்கு²னா அப்பமத்தேன ஆதாபினா பஹிதத்தேன விஹரிதும் அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய.

‘‘புன சபரம், பி⁴க்க²வே, ஆரஞ்ஞிகோ பி⁴க்கு² இதி படிஸஞ்சிக்க²தி – ‘அஹம் கோ² ஏதரஹி ஏககோ அரஞ்ஞே விஹராமி. ஏககோ கோ² பனாஹம் அரஞ்ஞே விஹரந்தோ உபக்க²லித்வா வா பபதேய்யம், ப⁴த்தம் வா பு⁴த்தம் மே ப்³யாபஜ்ஜேய்ய, பித்தம் வா மே குப்பேய்ய, ஸேம்ஹம் வா மே குப்பேய்ய, ஸத்த²கா வா மே வாதா குப்பேய்யும், தேன மே அஸ்ஸ காலங்கிரியா, ஸோ மமஸ்ஸ அந்தராயோ; ஹந்தா³ஹம் வீரியம் ஆரபா⁴மி அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாயா’தி. இத³ம், பி⁴க்க²வே, து³தியம் அனாக³தப⁴யம் ஸம்பஸ்ஸமானேன அலமேவ ஆரஞ்ஞிகேன பி⁴க்கு²னா அப்பமத்தேன ஆதாபினா பஹிதத்தேன விஹரிதும் அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய.

‘‘புன சபரம், பி⁴க்க²வே, ஆரஞ்ஞிகோ பி⁴க்கு² இதி படிஸஞ்சிக்க²தி – ‘அஹம் கோ² ஏதரஹி ஏககோ அரஞ்ஞே விஹராமி. ஏககோ கோ² பனாஹம் அரஞ்ஞே விஹரந்தோ வாளேஹி ஸமாக³ச்சே²ய்யம், ஸீஹேன வா ப்³யக்³கே⁴ன வா தீ³பினா வா அச்சே²ன வா தரச்சே²ன வா, தே மம் ஜீவிதா வோரோபேய்யும், தேன மே அஸ்ஸ காலங்கிரியா, ஸோ மமஸ்ஸ அந்தராயோ; ஹந்தா³ஹம் வீரியம் ஆரபா⁴மி அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாயா’தி. இத³ம், பி⁴க்க²வே, ததியம் அனாக³தப⁴யம் ஸம்பஸ்ஸமானேன அலமேவ ஆரஞ்ஞிகேன பி⁴க்கு²னா அப்பமத்தேன ஆதாபினா பஹிதத்தேன விஹரிதும் அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய.

‘‘புன சபரம், பி⁴க்க²வே, ஆரஞ்ஞிகோ பி⁴க்கு² இதி படிஸஞ்சிக்க²தி – ‘அஹம் கோ² ஏதரஹி ஏககோ அரஞ்ஞே விஹராமி. ஏககோ கோ² பனாஹம் அரஞ்ஞே விஹரந்தோ மாணவேஹி ஸமாக³ச்சே²ய்யம் கதகம்மேஹி வா அகதகம்மேஹி வா, தே மம் ஜீவிதா வோரோபேய்யும், தேன மே அஸ்ஸ காலங்கிரியா, ஸோ மமஸ்ஸ அந்தராயோ; ஹந்தா³ஹம் வீரியம் ஆரபா⁴மி அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாயா’தி. இத³ம், பி⁴க்க²வே, சதுத்த²ம் அனாக³தப⁴யம் ஸம்பஸ்ஸமானேன அலமேவ ஆரஞ்ஞிகேன பி⁴க்கு²னா அப்பமத்தேன ஆதாபினா பஹிதத்தேன விஹரிதும் அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய.

‘‘புன சபரம், பி⁴க்க²வே, ஆரஞ்ஞிகோ பி⁴க்கு² இதி படிஸஞ்சிக்க²தி – ‘அஹம் கோ² ஏதரஹி ஏககோ அரஞ்ஞே விஹராமி. ஸந்தி கோ² பனாரஞ்ஞே வாளா அமனுஸ்ஸா, தே மம் ஜீவிதா வோரோபேய்யும், தேன மே அஸ்ஸ காலங்கிரியா, ஸோ மமஸ்ஸ அந்தராயோ; ஹந்தா³ஹம் வீரியம் ஆரபா⁴மி அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாயா’தி. இத³ம், பி⁴க்க²வே, பஞ்சமம் அனாக³தப⁴யம் ஸம்பஸ்ஸமானேன அலமேவ ஆரஞ்ஞிகேன பி⁴க்கு²னா அப்பமத்தேன ஆதாபினா பஹிதத்தேன விஹரிதும் அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய.

‘‘இமானி கோ², பி⁴க்க²வே, பஞ்ச அனாக³தப⁴யானி ஸம்பஸ்ஸமானேன அலமேவ ஆரஞ்ஞிகேன பி⁴க்கு²னா அப்பமத்தேன ஆதாபினா பஹிதத்தேன விஹரிதும் அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாயா’’தி. ஸத்தமம்.

8. து³தியஅனாக³தப⁴யஸுத்தம்

78. ‘‘பஞ்சிமானி, பி⁴க்க²வே, அனாக³தப⁴யானி ஸம்பஸ்ஸமானேன அலமேவ பி⁴க்கு²னா அப்பமத்தேன ஆதாபினா பஹிதத்தேன விஹரிதும் அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய. கதமானி பஞ்ச? இத⁴, பி⁴க்க²வே, பி⁴க்கு² இதி படிஸஞ்சிக்க²தி – ‘அஹம் கோ² ஏதரஹி த³ஹரோ யுவா ஸுஸுகாளகேஸோ ப⁴த்³ரேன யோப்³ப³னேன ஸமன்னாக³தோ பட²மேன வயஸா. ஹோதி கோ² பன ஸோ ஸமயோ யம் இமம் காயம் ஜரா பு²ஸதி. ஜிண்ணேன கோ² பன ஜராய அபி⁴பூ⁴தேன ந ஸுகரம் பு³த்³தா⁴னம் ஸாஸனம் மனஸி காதும், ந ஸுகரானி அரஞ்ஞவனபத்தா²னி பந்தானி ஸேனாஸனானி படிஸேவிதும். புரா மம் ஸோ த⁴ம்மோ ஆக³ச்ச²தி அனிட்டோ² அகந்தோ அமனாபோ; ஹந்தா³ஹம் படிகச்சேவ [படிக³ச்சேவ (ஸீ.)] வீரியம் ஆரபா⁴மி அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய, யேனாஹம் த⁴ம்மேன ஸமன்னாக³தோ ஜிண்ணகோபி பா²ஸும் [பா²ஸு (பீ. க.)] விஹரிஸ்ஸாமீ’தி. இத³ம், பி⁴க்க²வே, பட²மம் அனாக³தப⁴யம் ஸம்பஸ்ஸமானேன அலமேவ பி⁴க்கு²னா அப்பமத்தேன ஆதாபினா பஹிதத்தேன விஹரிதும் அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய.

‘‘புன சபரம், பி⁴க்க²வே, பி⁴க்கு² இதி படிஸஞ்சிக்க²தி – ‘அஹம் கோ² ஏதரஹி அப்பாபா³தோ⁴ அப்பாதங்கோ ஸமவேபாகினியா க³ஹணியா ஸமன்னாக³தோ நாதிஸீதாய நாச்சுண்ஹாய மஜ்ஜி²மாய பதா⁴னக்க²மாய. ஹோதி கோ² பன ஸோ ஸமயோ யம் இமம் காயம் ப்³யாதி⁴ பு²ஸதி. ப்³யாதி⁴தேன கோ² பன ப்³யாதி⁴னா அபி⁴பூ⁴தேன [ப்³யாதா⁴பி⁴பூ⁴தேன (ஸீ. பீ. க.)] ந ஸுகரம் பு³த்³தா⁴னம் ஸாஸனம் மனஸி காதும், ந ஸுகரானி அரஞ்ஞவனபத்தா²னி பந்தானி ஸேனாஸனானி படிஸேவிதும். புரா மம் ஸோ த⁴ம்மோ ஆக³ச்ச²தி அனிட்டோ² அகந்தோ அமனாபோ; ஹந்தா³ஹம் படிகச்சேவ வீரியம் ஆரபா⁴மி அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய, யேனாஹம் த⁴ம்மேன ஸமன்னாக³தோ ப்³யாதி⁴தோபி பா²ஸும் விஹரிஸ்ஸாமீ’தி. இத³ம், பி⁴க்க²வே, து³தியம் அனாக³தப⁴யம் ஸம்பஸ்ஸமானேன அலமேவ பி⁴க்கு²னா அப்பமத்தேன ஆதாபினா பஹிதத்தேன விஹரிதும் அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய.

‘‘புன சபரம், பி⁴க்க²வே, பி⁴க்கு² இதி படிஸஞ்சிக்க²தி – ‘ஏதரஹி கோ² ஸுபி⁴க்க²ம் ஸுஸஸ்ஸம் ஸுலப⁴பிண்ட³ம், ஸுகரம் உஞ்சே²ன பக்³க³ஹேன யாபேதும். ஹோதி கோ² பன ஸோ ஸமயோ யம் து³ப்³பி⁴க்க²ம் ஹோதி து³ஸ்ஸஸ்ஸம் து³ல்லப⁴பிண்ட³ம், ந ஸுகரம் உஞ்சே²ன பக்³க³ஹேன யாபேதும். து³ப்³பி⁴க்கே² கோ² பன மனுஸ்ஸா யேன ஸுபி⁴க்க²ம் தேன ஸங்கமந்தி [தேனுபஸங்கமந்தி (க.)]. தத்த² ஸங்க³ணிகவிஹாரோ ஹோதி ஆகிண்ணவிஹாரோ. ஸங்க³ணிகவிஹாரே கோ² பன ஸதி ஆகிண்ணவிஹாரே ந ஸுகரம் பு³த்³தா⁴னம் ஸாஸனம் மனஸி காதும், ந ஸுகரானி அரஞ்ஞவனபத்தா²னி பந்தானி ஸேனாஸனானி படிஸேவிதும். புரா மம் ஸோ த⁴ம்மோ ஆக³ச்ச²தி அனிட்டோ² அகந்தோ அமனாபோ; ஹந்தா³ஹம் படிகச்சேவ வீரியம் ஆரபா⁴மி அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய, யேனாஹம் த⁴ம்மேன ஸமன்னாக³தோ து³ப்³பி⁴க்கே²பி பா²ஸு விஹரிஸ்ஸாமீ’தி. இத³ம், பி⁴க்க²வே, ததியம் அனாக³தப⁴யம் ஸம்பஸ்ஸமானேன அலமேவ பி⁴க்கு²னா அப்பமத்தேன ஆதாபினா பஹிதத்தேன விஹரிதும் அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய.

‘‘புன சபரம், பி⁴க்க²வே, பி⁴க்கு² இதி படிஸஞ்சிக்க²தி – ‘ஏதரஹி கோ² மனுஸ்ஸா ஸமக்³கா³ ஸம்மோத³மானா அவிவத³மானா கீ²ரோத³கீபூ⁴தா அஞ்ஞமஞ்ஞம் பியசக்கூ²ஹி ஸம்பஸ்ஸந்தா விஹரந்தி. ஹோதி கோ² பன ஸோ ஸமயோ யம் ப⁴யம் ஹோதி அடவிஸங்கோபோ, சக்கஸமாரூள்ஹா ஜானபதா³ பரியாயந்தி. ப⁴யே கோ² பன ஸதி மனுஸ்ஸா யேன கே²மம் தேன ஸங்கமந்தி. தத்த² ஸங்க³ணிகவிஹாரோ ஹோதி ஆகிண்ணவிஹாரோ. ஸங்க³ணிகவிஹாரே கோ² பன ஸதி ஆகிண்ணவிஹாரே ந ஸுகரம் பு³த்³தா⁴னம் ஸாஸனம் மனஸி காதும், ந ஸுகரானி அரஞ்ஞவனபத்தா²னி பந்தானி ஸேனாஸனானி படிஸேவிதும். புரா மம் ஸோ த⁴ம்மோ ஆக³ச்ச²தி அனிட்டோ² அகந்தோ அமனாபோ; ஹந்தா³ஹம் படிகச்சேவ வீரியம் ஆரபா⁴மி அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய, யேனாஹம் த⁴ம்மேன ஸமன்னாக³தோ ப⁴யேபி பா²ஸும் விஹரிஸ்ஸாமீ’தி. இத³ம், பி⁴க்க²வே, சதுத்த²ம் அனாக³தப⁴யம் ஸம்பஸ்ஸமானேன அலமேவ பி⁴க்கு²னா அப்பமத்தேன ஆதாபினா பஹிதத்தேன விஹரிதும் அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய.

‘‘புன சபரம், பி⁴க்க²வே, பி⁴க்கு² இதி படிஸஞ்சிக்க²தி – ‘ஏதரஹி கோ² ஸங்கோ⁴ ஸமக்³கோ³ ஸம்மோத³மானோ அவிவத³மானோ ஏகுத்³தே³ஸோ பா²ஸு விஹரதி. ஹோதி கோ² பன ஸோ ஸமயோ யம் ஸங்கோ⁴ பி⁴ஜ்ஜதி. ஸங்கே⁴ கோ² பன பி⁴ன்னே ந ஸுகரம் பு³த்³தா⁴னம் ஸாஸனம் மனஸி காதும், ந ஸுகரானி அரஞ்ஞவனபத்தா²னி பந்தானி ஸேனாஸனானி படிஸேவிதும். புரா மம் ஸோ த⁴ம்மோ ஆக³ச்ச²தி அனிட்டோ² அகந்தோ அமனாபோ; ஹந்தா³ஹம் படிகச்சேவ வீரியம் ஆரபா⁴மி அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய, யேனாஹம் த⁴ம்மேன ஸமன்னாக³தோ பி⁴ன்னேபி ஸங்கே⁴ பா²ஸும் விஹரிஸ்ஸாமீ’தி. இத³ம், பி⁴க்க²வே, பஞ்சமம் அனாக³தப⁴யம் ஸம்பஸ்ஸமானேன அலமேவ பி⁴க்கு²னா அப்பமத்தேன ஆதாபினா பஹிதத்தேன விஹரிதும் அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய.

‘‘இமானி கோ², பி⁴க்க²வே, பஞ்ச அனாக³தப⁴யானி ஸம்பஸ்ஸமானேன அலமேவ பி⁴க்கு²னா அப்பமத்தேன ஆதாபினா பஹிதத்தேன விஹரிதும் அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாயா’’தி. அட்ட²மம்.

9. ததியஅனாக³தப⁴யஸுத்தம்

79. ‘‘பஞ்சிமானி, பி⁴க்க²வே, அனாக³தப⁴யானி ஏதரஹி அஸமுப்பன்னானி ஆயதிம் ஸமுப்பஜ்ஜிஸ்ஸந்தி. தானி வோ [கோ² (கத்த²சி)] படிபு³ஜ்ஜி²தப்³பா³னி; படிபு³ஜ்ஜி²த்வா ச தேஸம் பஹானாய வாயமிதப்³ப³ம்.

‘‘கதமானி பஞ்ச? ப⁴விஸ்ஸந்தி, பி⁴க்க²வே, பி⁴க்கூ² அனாக³தமத்³தா⁴னம் அபா⁴விதகாயா அபா⁴விதஸீலா அபா⁴விதசித்தா அபா⁴விதபஞ்ஞா. தே அபா⁴விதகாயா ஸமானா அபா⁴விதஸீலா அபா⁴விதசித்தா அபா⁴விதபஞ்ஞா அஞ்ஞே உபஸம்பாதே³ஸ்ஸந்தி. தேபி [தே (ஸீ.)] ந ஸக்கி²ஸ்ஸந்தி வினேதும் அதி⁴ஸீலே அதி⁴சித்தே அதி⁴பஞ்ஞாய. தேபி ப⁴விஸ்ஸந்தி அபா⁴விதகாயா அபா⁴விதஸீலா அபா⁴விதசித்தா அபா⁴விதபஞ்ஞா. தே அபா⁴விதகாயா ஸமானா அபா⁴விதஸீலா அபா⁴விதசித்தா அபா⁴விதபஞ்ஞா அஞ்ஞே உபஸம்பாதே³ஸ்ஸந்தி. தேபி [தே (?)] ந ஸக்கி²ஸ்ஸந்தி வினேதும் அதி⁴ஸீலே அதி⁴சித்தே அதி⁴பஞ்ஞாய. தேபி ப⁴விஸ்ஸந்தி அபா⁴விதகாயா அபா⁴விதஸீலா அபா⁴விதசித்தா அபா⁴விதபஞ்ஞா. இதி கோ², பி⁴க்க²வே, த⁴ம்மஸந்தோ³ஸா வினயஸந்தோ³ஸோ; வினயஸந்தோ³ஸா த⁴ம்மஸந்தோ³ஸோ. இத³ம், பி⁴க்க²வே, பட²மம் அனாக³தப⁴யம் ஏதரஹி அஸமுப்பன்னம் ஆயதிம் ஸமுப்பஜ்ஜிஸ்ஸதி. தம் வோ படிபு³ஜ்ஜி²தப்³ப³ம்; படிபு³ஜ்ஜி²த்வா ச தஸ்ஸ பஹானாய வாயமிதப்³ப³ம்.

‘‘புன சபரம், பி⁴க்க²வே, ப⁴விஸ்ஸந்தி பி⁴க்கூ² அனாக³தமத்³தா⁴னம் அபா⁴விதகாயா அபா⁴விதஸீலா அபா⁴விதசித்தா அபா⁴விதபஞ்ஞா. தே அபா⁴விதகாயா ஸமானா அபா⁴விதஸீலா அபா⁴விதசித்தா அபா⁴விதபஞ்ஞா அஞ்ஞேஸம் நிஸ்ஸயம் த³ஸ்ஸந்தி. தேபி ந ஸக்கி²ஸ்ஸந்தி வினேதும் அதி⁴ஸீலே அதி⁴சித்தே அதி⁴பஞ்ஞாய. தேபி ப⁴விஸ்ஸந்தி அபா⁴விதகாயா அபா⁴விதஸீலா அபா⁴விதசித்தா அபா⁴விதபஞ்ஞா. தே அபா⁴விதகாயா ஸமானா அபா⁴விதஸீலா அபா⁴விதசித்தா அபா⁴விதபஞ்ஞா அஞ்ஞேஸம் நிஸ்ஸயம் த³ஸ்ஸந்தி. தேபி ந ஸக்கி²ஸ்ஸந்தி வினேதும் அதி⁴ஸீலே அதி⁴சித்தே அதி⁴பஞ்ஞாய. தேபி ப⁴விஸ்ஸந்தி அபா⁴விதகாயா அபா⁴விதஸீலா அபா⁴விதசித்தா அபா⁴விதபஞ்ஞா. இதி கோ², பி⁴க்க²வே, த⁴ம்மஸந்தோ³ஸா வினயஸந்தோ³ஸோ; வினயஸந்தோ³ஸா த⁴ம்மஸந்தோ³ஸோ. இத³ம், பி⁴க்க²வே, து³தியம் அனாக³தப⁴யம் ஏதரஹி அஸமுப்பன்னம் ஆயதிம் ஸமுப்பஜ்ஜிஸ்ஸதி. தம் வோ படிபு³ஜ்ஜி²தப்³ப³ம்; படிபு³ஜ்ஜி²த்வா ச தஸ்ஸ பஹானாய வாயமிதப்³ப³ம்.

‘‘புன சபரம், பி⁴க்க²வே, ப⁴விஸ்ஸந்தி பி⁴க்கூ² அனாக³தமத்³தா⁴னம் அபா⁴விதகாயா அபா⁴விதஸீலா அபா⁴விதசித்தா அபா⁴விதபஞ்ஞா. தே அபா⁴விதகாயா ஸமானா அபா⁴விதஸீலா அபா⁴விதசித்தா அபா⁴விதபஞ்ஞா அபி⁴த⁴ம்மகத²ம் வேத³ல்லகத²ம் கதே²ந்தா கண்ஹத⁴ம்மம் ஓக்கமமானா ந பு³ஜ்ஜி²ஸ்ஸந்தி. இதி கோ², பி⁴க்க²வே, த⁴ம்மஸந்தோ³ஸா வினயஸந்தோ³ஸோ; வினயஸந்தோ³ஸா த⁴ம்மஸந்தோ³ஸோ. இத³ம், பி⁴க்க²வே, ததியம் அனாக³தப⁴யம் ஏதரஹி அஸமுப்பன்னம் ஆயதிம் ஸமுப்பஜ்ஜிஸ்ஸதி. தம் வோ படிபு³ஜ்ஜி²தப்³ப³ம்; படிபு³ஜ்ஜி²த்வா ச தஸ்ஸ பஹானாய வாயமிதப்³ப³ம்.

‘‘புன சபரம், பி⁴க்க²வே, ப⁴விஸ்ஸந்தி பி⁴க்கூ² அனாக³தமத்³தா⁴னம் அபா⁴விதகாயா அபா⁴விதஸீலா அபா⁴விதசித்தா அபா⁴விதபஞ்ஞா. தே அபா⁴விதகாயா ஸமானா அபா⁴விதஸீலா அபா⁴விதசித்தா அபா⁴விதபஞ்ஞா யே தே ஸுத்தந்தா ததா²க³தபா⁴ஸிதா க³ம்பீ⁴ரா க³ம்பீ⁴ரத்தா² லோகுத்தரா ஸுஞ்ஞதாப்படிஸம்யுத்தா, தேஸு ப⁴ஞ்ஞமானேஸு ந ஸுஸ்ஸூஸிஸ்ஸந்தி, ந ஸோதம் ஓத³ஹிஸ்ஸந்தி, ந அஞ்ஞா சித்தம் உபட்ட²பேஸ்ஸந்தி, ந ச தே த⁴ம்மே உக்³க³ஹேதப்³ப³ம் பரியாபுணிதப்³ப³ம் மஞ்ஞிஸ்ஸந்தி. யே பன தே ஸுத்தந்தா கவிதா [கவிகதா (ஸீ. ஸ்யா. கம். பீ., ஸம். நி. 2.229) டீகா ஓலோகேதப்³பா³] காவேய்யா சித்தக்க²ரா சித்தப்³யஞ்ஜனா பா³ஹிரகா ஸாவகபா⁴ஸிதா, தேஸு ப⁴ஞ்ஞமானேஸு ஸுஸ்ஸூஸிஸ்ஸந்தி, ஸோதம் ஓத³ஹிஸ்ஸந்தி, அஞ்ஞா சித்தம் உபட்ட²பேஸ்ஸந்தி, தே ச த⁴ம்மே உக்³க³ஹேதப்³ப³ம் பரியாபுணிதப்³ப³ம் மஞ்ஞிஸ்ஸந்தி. இதி கோ², பி⁴க்க²வே, த⁴ம்மஸந்தோ³ஸா வினயஸந்தோ³ஸோ; வினயஸந்தோ³ஸா த⁴ம்மஸந்தோ³ஸோ. இத³ம், பி⁴க்க²வே, சதுத்த²ம் அனாக³தப⁴யம் ஏதரஹி அஸமுப்பன்னம் ஆயதிம் ஸமுப்பஜ்ஜிஸ்ஸதி. தம் வோ படிபு³ஜ்ஜி²தப்³ப³ம்; படிபு³ஜ்ஜி²த்வா ச தஸ்ஸ பஹானாய வாயமிதப்³ப³ம்.

‘‘புன சபரம், பி⁴க்க²வே, ப⁴விஸ்ஸந்தி பி⁴க்கூ² அனாக³தமத்³தா⁴னம் அபா⁴விதகாயா அபா⁴விதஸீலா அபா⁴விதசித்தா அபா⁴விதபஞ்ஞா. தே அபா⁴விதகாயா ஸமானா அபா⁴விதஸீலா அபா⁴விதசித்தா அபா⁴விதபஞ்ஞா தே²ரா பி⁴க்கூ² பா³ஹுலிகா [பா³ஹுல்லிகா (ஸ்யா. கம்.) அ. நி. 2.49; 3.96] ப⁴விஸ்ஸந்தி ஸாத²லிகா ஓக்கமனே புப்³ப³ங்க³மா பவிவேகே நிக்கி²த்தது⁴ரா, ந வீரியம் ஆரபி⁴ஸ்ஸந்தி அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய. தேஸம் பச்சி²மா ஜனதா தி³ட்டா²னுக³திம் ஆபஜ்ஜிஸ்ஸதி. ஸாபி ப⁴விஸ்ஸதி பா³ஹுலிகா ஸாத²லிகா ஓக்கமனே புப்³ப³ங்க³மா பவிவேகே நிக்கி²த்தது⁴ரா, ந வீரியம் ஆரபி⁴ஸ்ஸதி அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய. இதி கோ², பி⁴க்க²வே, த⁴ம்மஸந்தோ³ஸா வினயஸந்தோ³ஸோ; வினயஸந்தோ³ஸா த⁴ம்மஸந்தோ³ஸோ. இத³ம், பி⁴க்க²வே, பஞ்சமம் அனாக³தப⁴யம் ஏதரஹி அஸமுப்பன்னம் ஆயதிம் ஸமுப்பஜ்ஜிஸ்ஸதி. தம் வோ படிபு³ஜ்ஜி²தப்³ப³ம்; படிபு³ஜ்ஜி²த்வா ச தஸ்ஸ பஹானாய வாயமிதப்³ப³ம். ‘‘இமானி கோ², பி⁴க்க²வே, பஞ்ச அனாக³தப⁴யானி ஏதரஹி அஸமுப்பன்னானி ஆயதிம் ஸமுப்பஜ்ஜிஸ்ஸந்தி. தானி வோ படிபு³ஜ்ஜி²தப்³பா³னி; படிபு³ஜ்ஜி²த்வா ச தேஸம் பஹானாய வாயமிதப்³ப³’’ந்தி. நவமம்.

10. சதுத்த²அனாக³தப⁴யஸுத்தம்

80. ‘‘பஞ்சிமானி, பி⁴க்க²வே, அனாக³தப⁴யானி ஏதரஹி அஸமுப்பன்னானி ஆயதிம் ஸமுப்பஜ்ஜிஸ்ஸந்தி. தானி வோ படிபு³ஜ்ஜி²தப்³பா³னி; படிபு³ஜ்ஜி²த்வா ச தேஸம் பஹானாய வாயமிதப்³ப³ம்.

‘‘கதமானி பஞ்ச? ப⁴விஸ்ஸந்தி, பி⁴க்க²வே, பி⁴க்கூ² அனாக³தமத்³தா⁴னம் சீவரே கல்யாணகாமா. தே சீவரே கல்யாணகாமா ஸமானா ரிஞ்சிஸ்ஸந்தி பம்ஸுகூலிகத்தம், ரிஞ்சிஸ்ஸந்தி அரஞ்ஞவனபத்தா²னி பந்தானி ஸேனாஸனானி; கா³மனிக³மராஜதா⁴னீஸு ஓஸரித்வா வாஸம் கப்பேஸ்ஸந்தி, சீவரஹேது ச அனேகவிஹிதம் அனேஸனம் அப்பதிரூபம் ஆபஜ்ஜிஸ்ஸந்தி. இத³ம், பி⁴க்க²வே, பட²மம் அனாக³தப⁴யம் ஏதரஹி அஸமுப்பன்னம் ஆயதிம் ஸமுப்பஜ்ஜிஸ்ஸதி. தம் வோ படிபு³ஜ்ஜி²தப்³ப³ம்; படிபு³ஜ்ஜி²த்வா ச தஸ்ஸ பஹானாய வாயமிதப்³ப³ம்.

‘‘புன சபரம், பி⁴க்க²வே, ப⁴விஸ்ஸந்தி பி⁴க்கூ² அனாக³தமத்³தா⁴னம் பிண்ட³பாதே கல்யாணகாமா. தே பிண்ட³பாதே கல்யாணகாமா ஸமானா ரிஞ்சிஸ்ஸந்தி பிண்ட³பாதிகத்தம், ரிஞ்சிஸ்ஸந்தி அரஞ்ஞவனபத்தா²னி பந்தானி ஸேனாஸனானி; கா³மனிக³மராஜதா⁴னீஸு ஓஸரித்வா வாஸம் கப்பேஸ்ஸந்தி ஜிவ்ஹக்³கே³ன ரஸக்³கா³னி பரியேஸமானா, பிண்ட³பாதஹேது ச அனேகவிஹிதம் அனேஸனம் அப்பதிரூபம் ஆபஜ்ஜிஸ்ஸந்தி. இத³ம், பி⁴க்க²வே, து³தியம் அனாக³தப⁴யம் ஏதரஹி அஸமுப்பன்னம் ஆயதிம் ஸமுப்பஜ்ஜிஸ்ஸதி. தம் வோ படிபு³ஜ்ஜி²தப்³ப³ம்; படிபு³ஜ்ஜி²த்வா ச தஸ்ஸ பஹானாய வாயமிதப்³ப³ம்.

‘‘புன சபரம், பி⁴க்க²வே, ப⁴விஸ்ஸந்தி பி⁴க்கூ² அனாக³தமத்³தா⁴னம் ஸேனாஸனே கல்யாணகாமா. தே ஸேனாஸனே கல்யாணகாமா ஸமானா ரிஞ்சிஸ்ஸந்தி ருக்க²மூலிகத்தம் [ஆரஞ்ஞகத்தம் (ஸ்யா. கம்.)], ரிஞ்சிஸ்ஸந்தி அரஞ்ஞவனபத்தா²னி பந்தானி ஸேனாஸனானி; கா³மனிக³மராஜதா⁴னீஸு ஓஸரித்வா வாஸம் கப்பேஸ்ஸந்தி, ஸேனாஸனஹேது ச அனேகவிஹிதம் அனேஸனம் அப்பதிரூபம் ஆபஜ்ஜிஸ்ஸந்தி. இத³ம், பி⁴க்க²வே, ததியம் அனாக³தப⁴யம் ஏதரஹி அஸமுப்பன்னம் ஆயதிம் ஸமுப்பஜ்ஜிஸ்ஸதி. தம் வோ படிபு³ஜ்ஜி²தப்³ப³ம்; படிபு³ஜ்ஜி²த்வா ச தஸ்ஸ பஹானாய வாயமிதப்³ப³ம்.

‘‘புன சபரம், பி⁴க்க²வே, ப⁴விஸ்ஸந்தி பி⁴க்கூ² அனாக³தமத்³தா⁴னம் பி⁴க்கு²னீஸிக்க²மானாஸமணுத்³தே³ஸேஹி ஸம்ஸட்டா² விஹரிஸ்ஸந்தி. பி⁴க்கு²னீஸிக்க²மானாஸமணுத்³தே³ஸேஹி ஸம்ஸக்³கே³ கோ² பன, பி⁴க்க²வே, ஸதி ஏதம் பாடிகங்க²ம் – ‘அனபி⁴ரதா வா ப்³ரஹ்மசரியம் சரிஸ்ஸந்தி, அஞ்ஞதரம் வா ஸம்கிலிட்ட²ம் ஆபத்திம் ஆபஜ்ஜிஸ்ஸந்தி, ஸிக்க²ம் வா பச்சக்கா²ய ஹீனாயாவத்திஸ்ஸந்தி’. இத³ம், பி⁴க்க²வே, சதுத்த²ம் அனாக³தப⁴யம் ஏதரஹி அஸமுப்பன்னம் ஆயதிம் ஸமுப்பஜ்ஜிஸ்ஸதி. தம் வோ படிபு³ஜ்ஜி²தப்³ப³ம்; படிபு³ஜ்ஜி²த்வா ச தஸ்ஸ பஹானாய வாயமிதப்³ப³ம்.

‘‘புன சபரம், பி⁴க்க²வே, ப⁴விஸ்ஸந்தி பி⁴க்கூ² அனாக³தமத்³தா⁴னம் ஆராமிகஸமணுத்³தே³ஸேஹி ஸம்ஸட்டா² விஹரிஸ்ஸந்தி. ஆராமிகஸமணுத்³தே³ஸேஹி ஸம்ஸக்³கே³ கோ² பன, பி⁴க்க²வே, ஸதி ஏதம் பாடிகங்க²ம் – ‘அனேகவிஹிதம் ஸன்னிதி⁴காரபரிபோ⁴க³ம் அனுயுத்தா விஹரிஸ்ஸந்தி, ஓளாரிகம்பி நிமித்தம் கரிஸ்ஸந்தி, பத²வியாபி ஹரிதக்³கே³பி’. இத³ம், பி⁴க்க²வே, பஞ்சமம் அனாக³தப⁴யம் ஏதரஹி அஸமுப்பன்னம் ஆயதிம் ஸமுப்பஜ்ஜிஸ்ஸதி. தம் வோ படிபு³ஜ்ஜி²தப்³ப³ம்; படிபு³ஜ்ஜி²த்வா ச தஸ்ஸ பஹானாய வாயமிதப்³ப³ம்.

‘‘இமானி கோ², பி⁴க்க²வே, பஞ்ச அனாக³தப⁴யானி ஏதரஹி அஸமுப்பன்னானி ஆயதிம் ஸமுப்பஜ்ஜிஸ்ஸந்தி. தானி வோ படிபு³ஜ்ஜி²தப்³பா³னி; படிபு³ஜ்ஜி²த்வா ச தேஸம் பஹானாய வாயமிதப்³ப³’’ந்தி. த³ஸமம்.

யோதா⁴ஜீவவக்³கோ³ ததியோ.