8. லிச்ச²விகுமாரகஸுத்தம்

58. ஏகம் ஸமயம் ப⁴க³வா வேஸாலியம் விஹரதி மஹாவனே கூடாகா³ரஸாலாயம். அத² கோ² ப⁴க³வா புப்³ப³ண்ஹஸமயம் நிவாஸேத்வா பத்தசீவரமாதா³ய வேஸாலிம் பிண்டா³ய பாவிஸி. வேஸாலியம் பிண்டா³ய சரித்வா பச்சா²ப⁴த்தம் பிண்ட³பாதபடிக்கந்தோ மஹாவனம் அஜ்ஜோ²கா³ஹேத்வா அஞ்ஞதரஸ்மிம் ருக்க²மூலே தி³வாவிஹாரம் நிஸீதி³.

தேன கோ² பன ஸமயேன ஸம்ப³ஹுலா லிச்ச²விகுமாரகா ஸஜ்ஜானி த⁴னூனி ஆதா³ய குக்குரஸங்க⁴பரிவுதா மஹாவனே அனுசங்கமமானா அனுவிசரமானா அத்³த³ஸு ப⁴க³வந்தம் அஞ்ஞதரஸ்மிம் ருக்க²மூலே நிஸின்னம்; தி³ஸ்வான ஸஜ்ஜானி த⁴னூனி நிக்கி²பித்வா குக்குரஸங்க⁴ம் ஏகமந்தம் உய்யோஜேத்வா யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் அபி⁴வாதே³த்வா துண்ஹீபூ⁴தா துண்ஹீபூ⁴தா பஞ்ஜலிகா ப⁴க³வந்தம் பயிருபாஸந்தி.

தேன கோ² பன ஸமயேன மஹானாமோ லிச்ச²வி மஹாவனே ஜங்கா⁴விஹாரம் அனுசங்கமமானோ அத்³த³ஸ தே லிச்ச²விகுமாரகே துண்ஹீபூ⁴தே துண்ஹீபூ⁴தே பஞ்ஜலிகே ப⁴க³வந்தம் பயிருபாஸந்தே; தி³ஸ்வா யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² மஹானாமோ லிச்ச²வி உதா³னம் உதா³னேஸி – ‘ப⁴விஸ்ஸந்தி வஜ்ஜீ, ப⁴விஸ்ஸந்தி வஜ்ஜீ’’’தி!

‘‘கிம் பன த்வம், மஹானாம, ஏவம் வதே³ஸி – ‘ப⁴விஸ்ஸந்தி வஜ்ஜீ, ப⁴விஸ்ஸந்தி வஜ்ஜீ’’’தி? ‘‘இமே, ப⁴ந்தே, லிச்ச²விகுமாரகா சண்டா³ ப²ருஸா அபானுபா⁴ [அபஜஹாதி (ஸீ.), அபாடுபா⁴ (ஸ்யா. கம்.), அபஜஹா (பீ.), அபானுதா (கத்த²சி)]. யானிபி தானி குலேஸு பஹேணகானி [பஹீனகானி (ஸீ.), பஹீணகானி (ஸ்யா. கம். பீ.)] பஹீயந்தி, உச்சூ²தி வா ப³த³ராதி வா பூவாதி வா மோத³காதி வா ஸம்குலிகாதி வா [ஸக்க²லிகாதி வா (ஸீ. பீ.)], தானி விலும்பித்வா விலும்பித்வா கா²த³ந்தி; குலித்தீ²னம்பி குலகுமாரீனம்பி பச்சா²லியம் கி²பந்தி. தே தா³னிமே துண்ஹீபூ⁴தா துண்ஹீபூ⁴தா பஞ்ஜலிகா ப⁴க³வந்தம் பயிருபாஸந்தீ’’தி.

‘‘யஸ்ஸ கஸ்ஸசி, மஹானாம, குலபுத்தஸ்ஸ பஞ்ச த⁴ம்மா ஸம்விஜ்ஜந்தி – யதி³ வா ரஞ்ஞோ க²த்தியஸ்ஸ முத்³தா⁴வஸித்தஸ்ஸ, யதி³ வா ரட்டி²கஸ்ஸ பேத்தனிகஸ்ஸ [முத்³தா⁴பி⁴ஸித்தஸ்ஸ (க.) அ. நி. 5.135, 136 பஸ்ஸிதப்³ப³ம்], யதி³ வா ஸேனாய ஸேனாபதிகஸ்ஸ, யதி³ வா கா³மகா³மணிகஸ்ஸ, யதி³ வா பூக³கா³மணிகஸ்ஸ, யே வா பன குலேஸு பச்சேகாதி⁴பச்சம் காரேந்தி, வுத்³தி⁴யேவ பாடிகங்கா², நோ பரிஹானி.

‘‘கதமே பஞ்ச? இத⁴, மஹானாம, குலபுத்தோ உட்டா²னவீரியாதி⁴க³தேஹி போ⁴கே³ஹி பா³ஹாப³லபரிசிதேஹி ஸேதா³வக்கி²த்தேஹி த⁴ம்மிகேஹி த⁴ம்மலத்³தே⁴ஹி மாதாபிதரோ ஸக்கரோதி க³ரும் கரோதி மானேதி பூஜேதி. தமேனம் மாதாபிதரோ ஸக்கதா க³ருகதா மானிதா பூஜிதா கல்யாணேன மனஸா அனுகம்பந்தி – ‘சிரம் ஜீவ, தீ³க⁴மாயும் பாலேஹீ’தி. மாதாபிதானுகம்பிதஸ்ஸ, மஹானாம, குலபுத்தஸ்ஸ வுத்³தி⁴யேவ பாடிகங்கா², நோ பரிஹானி.

‘‘புன சபரம், மஹானாம, குலபுத்தோ உட்டா²னவீரியாதி⁴க³தேஹி போ⁴கே³ஹி பா³ஹாப³லபரிசிதேஹி ஸேதா³வக்கி²த்தேஹி த⁴ம்மிகேஹி த⁴ம்மலத்³தே⁴ஹி புத்ததா³ரதா³ஸகம்மகரபோரிஸே [… ஸாமந்தஸம்வோஹாரே (ஸீ. பீ.)] ஸக்கரோதி க³ரும் கரோதி மானேதி பூஜேதி. தமேனம் புத்ததா³ரதா³ஸகம்மகரபோரிஸா ஸக்கதா க³ருகதா மானிதா பூஜிதா கல்யாணேன மனஸா அனுகம்பந்தி – ‘சிரம் ஜீவ, தீ³க⁴மாயும் பாலேஹீ’தி. புத்ததா³ரதா³ஸகம்மகரபோரிஸானுகம்பிதஸ்ஸ, மஹானாம, குலபுத்தஸ்ஸ வுத்³தி⁴யேவ பாடிகங்கா², நோ பரிஹானி.

‘‘புன சபரம், மஹானாம, குலபுத்தோ உட்டா²னவீரியாதி⁴க³தேஹி போ⁴கே³ஹி பா³ஹாப³லபரிசிதேஹி ஸேதா³வக்கி²த்தேஹி த⁴ம்மிகேஹி த⁴ம்மலத்³தே⁴ஹி கே²த்தகம்மந்தஸாமந்தஸப்³யோஹாரே ஸக்கரோதி க³ரும் கரோதி மானேதி பூஜேதி. தமேனம் கே²த்தகம்மந்தஸாமந்தஸப்³யோஹாரா ஸக்கதா க³ருகதா மானிதா பூஜிதா கல்யாணேன மனஸா அனுகம்பந்தி – ‘சிரம் ஜீவ, தீ³க⁴மாயும் பாலேஹீ’தி. கே²த்தகம்மந்தஸாமந்தஸப்³யோஹாரானுகம்பிதஸ்ஸ, மஹானாம, குலபுத்தஸ்ஸ வுத்³தி⁴யேவ பாடிகங்கா², நோ பரிஹானி.

‘‘புன சபரம், மஹானாம, குலபுத்தோ உட்டா²னவீரியாதி⁴க³தேஹி போ⁴கே³ஹி பா³ஹாப³லபரிசிதேஹி ஸேதா³வக்கி²த்தேஹி த⁴ம்மிகேஹி த⁴ம்மலத்³தே⁴ஹி யாவதா ப³லிபடிக்³கா³ஹிகா தே³வதா ஸக்கரோதி க³ரும் கரோதி மானேதி பூஜேதி. தமேனம் ப³லிபடிக்³கா³ஹிகா தே³வதா ஸக்கதா க³ருகதா மானிதா பூஜிதா கல்யாணேன மனஸா அனுகம்பந்தி – ‘சிரம் ஜீவ, தீ³க⁴மாயும் பாலேஹீ’தி. தே³வதானுகம்பிதஸ்ஸ, மஹானாம, குலபுத்தஸ்ஸ வுத்³தி⁴யேவ பாடிகங்கா², நோ பரிஹானி.

‘‘புன சபரம், மஹானாம, குலபுத்தோ உட்டா²னவீரியாதி⁴க³தேஹி போ⁴கே³ஹி பா³ஹாப³லபரிசிதேஹி ஸேதா³வக்கி²த்தேஹி த⁴ம்மிகேஹி த⁴ம்மலத்³தே⁴ஹி ஸமணப்³ராஹ்மணே ஸக்கரோதி க³ரும் கரோதி மானேதி பூஜேதி. தமேனம் ஸமணப்³ராஹ்மணா ஸக்கதா க³ருகதா மானிதா பூஜிதா கல்யாணேன மனஸா அனுகம்பந்தி – ‘சிரம் ஜீவ, தீ³க⁴மாயும் பாலேஹீ’தி. ஸமணப்³ராஹ்மணானுகம்பிதஸ்ஸ, மஹானாம, குலபுத்தஸ்ஸ வுத்³தி⁴யேவ பாடிகங்கா², நோ பரிஹானி.

‘‘யஸ்ஸ கஸ்ஸசி, மஹானாம, குலபுத்தஸ்ஸ இமே பஞ்ச த⁴ம்மா ஸம்விஜ்ஜந்தி – யதி³ வா ரஞ்ஞோ க²த்தியஸ்ஸ முத்³தா⁴வஸித்தஸ்ஸ, யதி³ வா ரட்டி²கஸ்ஸ பேத்தனிகஸ்ஸ, யதி³ வா ஸேனாய ஸேனாபதிகஸ்ஸ, யதி³ வா கா³மகா³மணிகஸ்ஸ, யதி³ வா பூக³கா³மணிகஸ்ஸ, யே வா பன குலேஸு பச்சேகாதி⁴பச்சம் காரேந்தி, வுத்³தி⁴யேவ பாடிகங்கா², நோ பரிஹானீ’’தி.

‘‘மாதாபிதுகிச்சகரோ, புத்ததா³ரஹிதோ ஸதா³;

அந்தோஜனஸ்ஸ அத்தா²ய, யே சஸ்ஸ அனுஜீவினோ.

‘‘உபி⁴ன்னஞ்சேவ அத்தா²ய, வத³ஞ்ஞூ ஹோதி ஸீலவா;

ஞாதீனம் புப்³ப³பேதானம், தி³ட்டே² த⁴ம்மே ச ஜீவதம் [ஜீவினம் (ஸீ.), ஜீவிதம் (ஸ்யா. கம். பீ. க.)].

‘‘ஸமணானம் ப்³ராஹ்மணானம், தே³வதானஞ்ச பண்டி³தோ;

வித்திஸஞ்ஜனனோ ஹோதி, த⁴ம்மேன க⁴ரமாவஸம்.

‘‘ஸோ கரித்வான கல்யாணம், புஜ்ஜோ ஹோதி பஸம்ஸியோ;

இதே⁴வ நம் பஸம்ஸந்தி, பேச்ச ஸக்³கே³ பமோத³தீ’’தி. அட்ட²மம்;