8. அலப்³ப⁴னீயடா²னஸுத்தம்

48. ‘‘பஞ்சிமானி, பி⁴க்க²வே, அலப்³ப⁴னீயானி டா²னானி ஸமணேன வா ப்³ராஹ்மணேன வா தே³வேன வா மாரேன வா ப்³ரஹ்முனா வா கேனசி வா லோகஸ்மிம். கதமானி பஞ்ச? ‘ஜராத⁴ம்மம் மா ஜீரீ’தி அலப்³ப⁴னீயம் டா²னம் ஸமணேன வா ப்³ராஹ்மணேன வா தே³வேன வா மாரேன வா ப்³ரஹ்முனா வா கேனசி வா லோகஸ்மிம். ‘ப்³யாதி⁴த⁴ம்மம் மா ப்³யாதீ⁴யீ’தி [வ்யாதி⁴த⁴ம்மம் ‘‘மா வ்யாதீ⁴யீ’’தி (ஸீ. பீ.)] …பே… ‘மரணத⁴ம்மம் மா மீயீ’தி… ‘க²யத⁴ம்மம் மா கீ²யீ’தி… ‘நஸ்ஸனத⁴ம்மம் மா நஸ்ஸீ’தி அலப்³ப⁴னீயம் டா²னம் ஸமணேன வா ப்³ராஹ்மணேன வா தே³வேன வா மாரேன வா ப்³ரஹ்முனா வா கேனசி வா லோகஸ்மிம்.

‘‘அஸ்ஸுதவதோ, பி⁴க்க²வே, புது²ஜ்ஜனஸ்ஸ ஜராத⁴ம்மம் ஜீரதி. ஸோ ஜராத⁴ம்மே ஜிண்ணே ந இதி படிஸஞ்சிக்க²தி – ‘ந கோ² மய்ஹேவேகஸ்ஸ [மய்ஹமேவேகஸ்ஸ (ஸீ.)] ஜராத⁴ம்மம் ஜீரதி, அத² கோ² யாவதா ஸத்தானம் ஆக³தி க³தி சுதி உபபத்தி ஸப்³பே³ஸம் ஸத்தானம் ஜராத⁴ம்மம் ஜீரதி. அஹஞ்சேவ [அஹஞ்சே (?)] கோ² பன ஜராத⁴ம்மே ஜிண்ணே ஸோசேய்யம் கிலமேய்யம் பரிதே³வேய்யம், உரத்தாளிம் கந்தே³ய்யம், ஸம்மோஹம் ஆபஜ்ஜேய்யம், ப⁴த்தம்பி மே நச்சா²தே³ய்ய, காயேபி து³ப்³ப³ண்ணியம் ஓக்கமேய்ய, கம்மந்தாபி நப்பவத்தேய்யும் [கம்மந்தோபி நப்பவத்தேய்ய (க.)], அமித்தாபி அத்தமனா அஸ்ஸு, மித்தாபி து³ம்மனா அஸ்ஸூ’தி. ஸோ ஜராத⁴ம்மே ஜிண்ணே ஸோசதி கிலமதி பரிதே³வதி, உரத்தாளிம் கந்த³தி, ஸம்மோஹம் ஆபஜ்ஜதி. அயம் வுச்சதி, பி⁴க்க²வே – ‘அஸ்ஸுதவா புது²ஜ்ஜனோ வித்³தோ⁴ ஸவிஸேன ஸோகஸல்லேன அத்தானம்யேவ பரிதாபேதி’’’.

‘‘புன சபரம், பி⁴க்க²வே, அஸ்ஸுதவதோ புது²ஜ்ஜனஸ்ஸ ப்³யாதி⁴த⁴ம்மம் ப்³யாதீ⁴யதி…பே… மரணத⁴ம்மம் மீயதி… க²யத⁴ம்மம் கீ²யதி… நஸ்ஸனத⁴ம்மம் நஸ்ஸதி. ஸோ நஸ்ஸனத⁴ம்மே நட்டே² ந இதி படிஸஞ்சிக்க²தி – ‘ந கோ² மய்ஹேவேகஸ்ஸ நஸ்ஸனத⁴ம்மம் நஸ்ஸதி, அத² கோ² யாவதா ஸத்தானம் ஆக³தி க³தி சுதி உபபத்தி ஸப்³பே³ஸம் ஸத்தானம் நஸ்ஸனத⁴ம்மம் நஸ்ஸதி. அஹஞ்சேவ கோ² பன நஸ்ஸனத⁴ம்மே நட்டே² ஸோசேய்யம் கிலமேய்யம் பரிதே³வேய்யம், உரத்தாளிம் கந்தே³ய்யம், ஸம்மோஹம் ஆபஜ்ஜேய்யம், ப⁴த்தம்பி மே நச்சா²தே³ய்ய, காயேபி து³ப்³ப³ண்ணியம் ஓக்கமேய்ய, கம்மந்தாபி நப்பவத்தேய்யும், அமித்தாபி அத்தமனா அஸ்ஸு, மித்தாபி து³ம்மனா அஸ்ஸூ’தி. ஸோ நஸ்ஸனத⁴ம்மே நட்டே² ஸோசதி கிலமதி பரிதே³வதி, உரத்தாளிம் கந்த³தி, ஸம்மோஹம் ஆபஜ்ஜதி. அயம் வுச்சதி, பி⁴க்க²வே – ‘அஸ்ஸுதவா புது²ஜ்ஜனோ வித்³தோ⁴ ஸவிஸேன ஸோகஸல்லேன அத்தானம்யேவ பரிதாபேதி’’’.

‘‘ஸுதவதோ ச கோ², பி⁴க்க²வே, அரியஸாவகஸ்ஸ ஜராத⁴ம்மம் ஜீரதி. ஸோ ஜராத⁴ம்மே ஜிண்ணே இதி படிஸஞ்சிக்க²தி – ‘ந கோ² மய்ஹேவேகஸ்ஸ ஜராத⁴ம்மம் ஜீரதி, அத² கோ² யாவதா ஸத்தானம் ஆக³தி க³தி சுதி உபபத்தி ஸப்³பே³ஸம் ஸத்தானம் ஜராத⁴ம்மம் ஜீரதி. அஹஞ்சேவ கோ² பன ஜராத⁴ம்மே ஜிண்ணே ஸோசேய்யம் கிலமேய்யம் பரிதே³வேய்யம், உரத்தாளிம் கந்தே³ய்யம், ஸம்மோஹம் ஆபஜ்ஜேய்யம், ப⁴த்தம்பி மே நச்சா²தே³ய்ய, காயேபி து³ப்³ப³ண்ணியம் ஓக்கமேய்ய, கம்மந்தாபி நப்பவத்தேய்யும், அமித்தாபி அத்தமனா அஸ்ஸு, மித்தாபி து³ம்மனா அஸ்ஸூ’தி. ஸோ ஜராத⁴ம்மே ஜிண்ணே ந ஸோசதி ந கிலமதி ந பரிதே³வதி, ந உரத்தாளிம் கந்த³தி, ந ஸம்மோஹம் ஆபஜ்ஜதி. அயம் வுச்சதி, பி⁴க்க²வே – ‘ஸுதவா அரியஸாவகோ அப்³பு³ஹி [அப்³ப³ஹி (ஸீ.)] ஸவிஸம் ஸோகஸல்லம், யேன வித்³தோ⁴ அஸ்ஸுதவா புது²ஜ்ஜனோ அத்தானம்யேவ பரிதாபேதி. அஸோகோ விஸல்லோ அரியஸாவகோ அத்தானம்யேவ பரினிப்³பா³பேதி’’’.

‘‘புன சபரம், பி⁴க்க²வே, ஸுதவதோ அரியஸாவகஸ்ஸ ப்³யாதி⁴த⁴ம்மம் ப்³யாதீ⁴யதி…பே… மரணத⁴ம்மம் மீயதி… க²யத⁴ம்மம் கீ²யதி… நஸ்ஸனத⁴ம்மம் நஸ்ஸதி. ஸோ நஸ்ஸனத⁴ம்மே நட்டே² இதி படிஸஞ்சிக்க²தி – ‘ந கோ² மய்ஹேவேகஸ்ஸ நஸ்ஸனத⁴ம்மம் நஸ்ஸதி, அத² கோ² யாவதா ஸத்தானம் ஆக³தி க³தி சுதி உபபத்தி ஸப்³பே³ஸம் ஸத்தானம் நஸ்ஸனத⁴ம்மம் நஸ்ஸதி. அஹஞ்சேவ கோ² பன நஸ்ஸனத⁴ம்மே நட்டே² ஸோசேய்யம் கிலமேய்யம் பரிதே³வேய்யம், உரத்தாளிம் கந்தே³ய்யம், ஸம்மோஹம் ஆபஜ்ஜேய்யம், ப⁴த்தம்பி மே நச்சா²தே³ய்ய, காயேபி து³ப்³ப³ண்ணியம் ஓக்கமேய்ய, கம்மந்தாபி நப்பவத்தேய்யும், அமித்தாபி அத்தமனா அஸ்ஸு, மித்தாபி து³ம்மனா அஸ்ஸூ’தி. ஸோ நஸ்ஸனத⁴ம்மே நட்டே² ந ஸோசதி ந கிலமதி ந பரிதே³வதி, ந உரத்தாளிம் கந்த³தி, ந ஸம்மோஹம் ஆபஜ்ஜதி. அயம் வுச்சதி, பி⁴க்க²வே – ‘ஸுதவா அரியஸாவகோ அப்³பு³ஹி ஸவிஸம் ஸோகஸல்லம், யேன வித்³தோ⁴ அஸ்ஸுதவா புது²ஜ்ஜனோ அத்தானம்யேவ பரிதாபேதி. அஸோகோ விஸல்லோ அரியஸாவகோ அத்தானம்யேவ பரினிப்³பா³பேதீ’’’தி.

‘‘இமானி கோ², பி⁴க்க²வே, பஞ்ச அலப்³ப⁴னீயானி டா²னானி ஸமணேன வா ப்³ராஹ்மணேன வா தே³வேன வா மாரேன வா ப்³ரஹ்முனா வா கேனசி வா லோகஸ்மி’’ந்தி.

[ஜா. 1.5.96 ஜாதகேபி] ‘‘ந ஸோசனாய பரிதே³வனாய,

அத்தோ²த⁴ லப்³பா⁴ [அத்தோ² இத⁴ லப்³ப⁴தி (ஸ்யா.), அத்தோ² இத⁴ லப்³பா⁴ (பீ.)] அபி அப்பகோபி;

ஸோசந்தமேனம் து³கி²தம் விதி³த்வா,

பச்சத்தி²கா அத்தமனா ப⁴வந்தி.

‘‘யதோ ச கோ² பண்டி³தோ ஆபதா³ஸு,

ந வேத⁴தீ அத்த²வினிச்ச²யஞ்ஞூ;

பச்சத்தி²காஸ்ஸ து³கி²தா ப⁴வந்தி,

தி³ஸ்வா முக²ம் அவிகாரம் புராணம்.

‘‘ஜப்பேன மந்தேன ஸுபா⁴ஸிதேன,

அனுப்பதா³னேன பவேணியா வா;

யதா² யதா² யத்த² [யதா² யதா² யத்த² யத்த² (க.)] லபே⁴த² அத்த²ம்,

ததா² ததா² தத்த² பரக்கமேய்ய.

‘‘ஸசே பஜானேய்ய அலப்³ப⁴னேய்யோ,

மயாவ [மயா வா (ஸ்யா. கம். பீ.)] அஞ்ஞேன வா ஏஸ அத்தோ²;

அஸோசமானோ அதி⁴வாஸயேய்ய,

கம்மம் த³ள்ஹம் கிந்தி கரோமி தா³னீ’’தி. அட்ட²மம்;