3. உக்³க³ஹஸுத்தம்

33. ஏகம் ஸமயம் ப⁴க³வா ப⁴த்³தி³யே விஹரதி ஜாதியா வனே. அத² கோ² உக்³க³ஹோ மேண்ட³கனத்தா யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² உக்³க³ஹோ மேண்ட³கனத்தா ப⁴க³வந்தம் ஏதத³வோச –

‘‘அதி⁴வாஸேது மே, ப⁴ந்தே, ப⁴க³வா ஸ்வாதனாய அத்தசதுத்தோ² ப⁴த்த’’ந்தி. அதி⁴வாஸேஸி ப⁴க³வா துண்ஹீபா⁴வேன. அத² கோ² உக்³க³ஹோ மேண்ட³கனத்தா ப⁴க³வதோ அதி⁴வாஸனம் விதி³த்வா உட்டா²யாஸனா ப⁴க³வந்தம் அபி⁴வாதே³த்வா பத³க்கி²ணம் கத்வா பக்காமி.

அத² கோ² ப⁴க³வா தஸ்ஸா ரத்தியா அச்சயேன புப்³ப³ண்ஹஸமயம் நிவாஸேத்வா பத்தசீவரமாதா³ய யேன உக்³க³ஹஸ்ஸ மேண்ட³கனத்துனோ நிவேஸனம் தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. அத² கோ² உக்³க³ஹோ மேண்ட³கனத்தா ப⁴க³வந்தம் பணீதேன கா²த³னீயேன போ⁴ஜனீயேன ஸஹத்தா² ஸந்தப்பேஸி ஸம்பவாரேஸி. அத² கோ² உக்³க³ஹோ மேண்ட³கனத்தா ப⁴க³வந்தம் பு⁴த்தாவிம் ஓனீதபத்தபாணிம் ஏகமந்தம் நிஸீதி³. ஏகமந்தம் நிஸின்னோ கோ² உக்³க³ஹோ மேண்ட³கனத்தா ப⁴க³வந்தம் ஏதத³வோச – ‘‘இமா மே, ப⁴ந்தே, குமாரியோ பதிகுலானி க³மிஸ்ஸந்தி. ஓவத³து தாஸம், ப⁴ந்தே, ப⁴க³வா; அனுஸாஸது தாஸம், ப⁴ந்தே, ப⁴க³வா, யம் தாஸம் அஸ்ஸ தீ³க⁴ரத்தம் ஹிதாய ஸுகா²யா’’தி.

அத² கோ² ப⁴க³வா தா குமாரியோ ஏதத³வோச – ‘‘தஸ்மாதிஹ, குமாரியோ, ஏவம் ஸிக்கி²தப்³ப³ம் – ‘யஸ்ஸ வோ [யஸ்ஸ கோ² (ஸீ. ஸ்யா. கம்.)] மாதாபிதரோ ப⁴த்துனோ த³ஸ்ஸந்தி அத்த²காமா ஹிதேஸினோ அனுகம்பகா அனுகம்பம் உபாதா³ய, தஸ்ஸ ப⁴விஸ்ஸாம புப்³பு³ட்டா²யினியோ பச்சா²னிபாதினியோ கிம்காரபடிஸ்ஸாவினியோ மனாபசாரினியோ பியவாதி³னியோ’தி. ஏவஞ்ஹி வோ, குமாரியோ, ஸிக்கி²தப்³ப³ம்.

‘‘தஸ்மாதிஹ, குமாரியோ, ஏவம் ஸிக்கி²தப்³ப³ம் – ‘யே தே ப⁴த்து க³ருனோ [கு³ருனோ (க.)] ப⁴விஸ்ஸந்தி மாதாதி வா பிதாதி வா ஸமணப்³ராஹ்மணாதி வா, தே ஸக்கரிஸ்ஸாம க³ரும் கரிஸ்ஸாம [க³ருகரிஸ்ஸாம (ஸீ. ஸ்யா. கம். பீ.)] மானேஸ்ஸாம பூஜேஸ்ஸாம அப்³பா⁴க³தே ச ஆஸனோத³கேன படிபூஜேஸ்ஸாமா’தி [பூஜேஸ்ஸாமாதி (ஸீ.)]. ஏவஞ்ஹி வோ, குமாரியோ, ஸிக்கி²தப்³ப³ம்.

‘‘தஸ்மாதிஹ, குமாரியோ, ஏவம் ஸிக்கி²தப்³ப³ம் – ‘யே தே ப⁴த்து அப்³ப⁴ந்தரா கம்மந்தா உண்ணாதி வா கப்பாஸாதி வா, தத்த² த³க்கா² ப⁴விஸ்ஸாம அனலஸா, தத்ருபாயாய வீமம்ஸாய ஸமன்னாக³தா, அலம் காதும் அலம் ஸம்விதா⁴து’ந்தி. ஏவஞ்ஹி வோ, குமாரியோ, ஸிக்கி²தப்³ப³ம்.

‘‘தஸ்மாதிஹ, குமாரியோ, ஏவம் ஸிக்கி²தப்³ப³ம் – ‘யோ ஸோ ப⁴த்து அப்³ப⁴ந்தரோ [அப்³ப⁴ந்தரே (க.)] அந்தோஜனோ தா³ஸாதி வா பேஸ்ஸாதி வா கம்மகராதி வா, தேஸம் கதஞ்ச கததோ ஜானிஸ்ஸாம அகதஞ்ச அகததோ ஜானிஸ்ஸாம, கி³லானகானஞ்ச ப³லாப³லம் ஜானிஸ்ஸாம, கா²த³னீயம் போ⁴ஜனீயஞ்சஸ்ஸ பச்சம்ஸேன [பச்சயம் தேன (க. ஸீ.), பச்சயம்ஸேன (ஸ்யா. கம்.), பச்சயம் ஸேனாஸனம் பச்சத்தம்ஸேன (க.) அ. நி. 8.46] ஸம்விப⁴ஜிஸ்ஸாமா’தி [விப⁴ஜிஸ்ஸாமாதி (ஸீ. ஸ்யா. கம்.)]. ஏவஞ்ஹி வோ, குமாரியோ, ஸிக்கி²தப்³ப³ம்.

‘‘தஸ்மாதிஹ, குமாரியோ, ஏவம் ஸிக்கி²தப்³ப³ம் – ‘யம் ப⁴த்தா ஆஹரிஸ்ஸதி த⁴னம் வா த⁴ஞ்ஞம் வா ரஜதம் வா ஜாதரூபம் வா, தம் ஆரக்கே²ன [தம் ஆரக்கா²ய (ஸீ.)] கு³த்தியா ஸம்பாதே³ஸ்ஸாம, தத்த² ச ப⁴விஸ்ஸாம அது⁴த்தீ அதே²னீ அஸோண்டீ³ அவினாஸிகாயோ’தி. ஏவஞ்ஹி வோ, குமாரியோ, ஸிக்கி²தப்³ப³ம். இமேஹி கோ², குமாரியோ, பஞ்சஹி த⁴ம்மேஹி ஸமன்னாக³தோ மாதுகா³மோ காயஸ்ஸ பே⁴தா³ பரம் மரணா மனாபகாயிகானம் தே³வானம் ஸஹப்³யதம் உபபஜ்ஜதீ’’தி.

‘‘யோ நம் ப⁴ரதி ஸப்³ப³தா³, நிச்சம் ஆதாபி உஸ்ஸுகோ;

ஸப்³ப³காமஹரம் போஸம், ப⁴த்தாரம் நாதிமஞ்ஞதி.

‘‘ந சாபி ஸோத்தி² ப⁴த்தாரம், இஸ்ஸாசாரேன [இச்சா²சாரேன (ஸீ.), இஸ்ஸாவாதே³ன (பீ.)] ரோஸயே;

ப⁴த்து ச க³ருனோ ஸப்³பே³, படிபூஜேதி பண்டி³தா.

‘‘உட்டா²ஹிகா [உட்டா²யிகா (ஸ்யா. கம். க.)] அனலஸா, ஸங்க³ஹிதபரிஜ்ஜனா;

ப⁴த்து மனாபம் [மனாபா (ஸீ.)] சரதி, ஸம்ப⁴தம் அனுரக்க²தி.

‘‘யா ஏவம் வத்ததீ நாரீ, ப⁴த்துச²ந்த³வஸானுகா³;

மனாபா நாம தே தே³வா, யத்த² ஸா உபபஜ்ஜதீ’’தி. ததியம்;