1. பட²மஅகா³ரவஸுத்தம்

21. ‘‘ஸோ வத, பி⁴க்க²வே, பி⁴க்கு² அகா³ரவோ அப்பதிஸ்ஸோ அஸபா⁴க³வுத்திகோ ‘ஸப்³ரஹ்மசாரீஸு ஆபி⁴ஸமாசாரிகம் த⁴ம்மம் பரிபூரேஸ்ஸதீ’தி நேதம் டா²னம் விஜ்ஜதி. ‘ஆபி⁴ஸமாசாரிகம் த⁴ம்மம் அபரிபூரேத்வா ஸேக²ம் [ஸேக்க²ம் (க.)] த⁴ம்மம் பரிபூரேஸ்ஸதீ’தி நேதம் டா²னம் விஜ்ஜதி. ‘ஸேக²ம் த⁴ம்மம் அபரிபூரேத்வா ஸீலானி பரிபூரேஸ்ஸதீ’தி நேதம் டா²னம் விஜ்ஜதி. ‘ஸீலானி அபரிபூரேத்வா ஸம்மாதி³ட்டி²ம் பரிபூரேஸ்ஸதீ’தி நேதம் டா²னம் விஜ்ஜதி. ‘ஸம்மாதி³ட்டி²ம் அபரிபூரேத்வா ஸம்மாஸமாதி⁴ம் பரிபூரேஸ்ஸதீ’தி நேதம் டா²னம் விஜ்ஜதி.

‘‘ஸோ வத, பி⁴க்க²வே, பி⁴க்கு² ஸகா³ரவோ ஸப்பதிஸ்ஸோ ஸபா⁴க³வுத்திகோ ‘ஸப்³ரஹ்மசாரீஸு ஆபி⁴ஸமாசாரிகம் த⁴ம்மம் பரிபூரேஸ்ஸதீ’தி டா²னமேதம் விஜ்ஜதி. ‘ஆபி⁴ஸமாசாரிகம் த⁴ம்மம் பரிபூரேத்வா ஸேக²ம் த⁴ம்மம் பரிபூரேஸ்ஸதீ’தி டா²னமேதம் விஜ்ஜதி. ‘ஸேக²ம் த⁴ம்மம் பரிபூரேத்வா ஸீலானி பரிபூரேஸ்ஸதீ’தி டா²னமேதம் விஜ்ஜதி. ‘ஸீலானி பரிபூரேத்வா ஸம்மாதி³ட்டி²ம் பரிபூரேஸ்ஸதீ’தி டா²னமேதம் விஜ்ஜதி. ‘ஸம்மாதி³ட்டி²ம் பரிபூரேத்வா ஸம்மாஸமாதி⁴ம் பரிபூரேஸ்ஸதீ’தி டா²னமேதம் விஜ்ஜதீ’’தி. பட²மம்.