1. ஸேக²ப³லவக்³கோ³

1. ஸம்கி²த்தஸுத்தம்

1. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘பஞ்சிமானி, பி⁴க்க²வே, ஸேக²ப³லானி [ஸேக்க²ப³லானி (க.)]. கதமானி பஞ்ச? ஸத்³தா⁴ப³லம், ஹிரீப³லம் [ஹிரிப³லம் (ஸீ. பீ.)], ஓத்தப்பப³லம், வீரியப³லம் [விரியப³லம் (ஸீ. ஸ்யா. கம். பீ.)], பஞ்ஞாப³லம் – இமானி கோ², பி⁴க்க²வே, பஞ்ச ஸேக²ப³லானி.

‘‘தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘ஸத்³தா⁴ப³லேன ஸமன்னாக³தா ப⁴விஸ்ஸாம ஸேக²ப³லேன, ஹிரீப³லேன ஸமன்னாக³தா ப⁴விஸ்ஸாம ஸேக²ப³லேன, ஓத்தப்பப³லேன ஸமன்னாக³தா ப⁴விஸ்ஸாம ஸேக²ப³லேன, வீரியப³லேன ஸமன்னாக³தா ப⁴விஸ்ஸாம ஸேக²ப³லேன, பஞ்ஞாப³லேன ஸமன்னாக³தா ப⁴விஸ்ஸாம ஸேக²ப³லேனா’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதம் அபி⁴னந்து³ந்தி. பட²மம்.

2. வித்த²தஸுத்தம்

2. ‘‘பஞ்சிமானி, பி⁴க்க²வே, ஸேக²ப³லானி. கதமானி பஞ்ச? ஸத்³தா⁴ப³லம், ஹிரீப³லம், ஓத்தப்பப³லம், வீரியப³லம், பஞ்ஞாப³லம். கதமஞ்ச, பி⁴க்க²வே, ஸத்³தா⁴ப³லம்? இத⁴, பி⁴க்க²வே, அரியஸாவகோ ஸத்³தோ⁴ ஹோதி, ஸத்³த³ஹதி ததா²க³தஸ்ஸ போ³தி⁴ம் – ‘இதிபி ஸோ ப⁴க³வா அரஹம் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானம் பு³த்³தோ⁴ ப⁴க³வா’தி. இத³ம் வுச்சதி, பி⁴க்க²வே, ஸத்³தா⁴ப³லம்.

‘‘கதமஞ்ச, பி⁴க்க²வே, ஹிரீப³லம்? இத⁴, பி⁴க்க²வே, அரியஸாவகோ ஹிரிமா ஹோதி, ஹிரீயதி காயது³ச்சரிதேன வசீது³ச்சரிதேன மனோது³ச்சரிதேன, ஹிரீயதி பாபகானம் அகுஸலானம் த⁴ம்மானம் ஸமாபத்தியா. இத³ம் வுச்சதி, பி⁴க்க²வே, ஹிரீப³லம்.

‘‘கதமஞ்ச, பி⁴க்க²வே, ஓத்தப்பப³லம்? இத⁴, பி⁴க்க²வே, அரியஸாவகோ ஓத்தப்பீ ஹோதி, ஓத்தப்பதி காயது³ச்சரிதேன வசீது³ச்சரிதேன மனோது³ச்சரிதேன, ஓத்தப்பதி பாபகானம் அகுஸலானம் த⁴ம்மானம் ஸமாபத்தியா. இத³ம் வுச்சதி, பி⁴க்க²வே, ஓத்தப்பப³லம்.

‘‘கதமஞ்ச, பி⁴க்க²வே, வீரியப³லம்? இத⁴, பி⁴க்க²வே, அரியஸாவகோ ஆரத்³த⁴வீரியோ விஹரதி அகுஸலானம் த⁴ம்மானம் பஹானாய, குஸலானம் த⁴ம்மானம் உபஸம்பதா³ய, தா²மவா த³ள்ஹபரக்கமோ அனிக்கி²த்தது⁴ரோ குஸலேஸு த⁴ம்மேஸு. இத³ம் வுச்சதி, பி⁴க்க²வே, வீரியப³லம்.

‘‘கதமஞ்ச, பி⁴க்க²வே, பஞ்ஞாப³லம்? இத⁴, பி⁴க்க²வே, அரியஸாவகோ பஞ்ஞவா ஹோதி உத³யத்த²கா³மினியா பஞ்ஞாய ஸமன்னாக³தோ அரியாய நிப்³பே³தி⁴காய ஸம்மா து³க்க²க்க²யகா³மினியா. இத³ம் வுச்சதி, பி⁴க்க²வே, பஞ்ஞாப³லம். இமானி கோ², பி⁴க்க²வே, பஞ்ச ஸேக²ப³லானி.

‘‘தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘ஸத்³தா⁴ப³லேன ஸமன்னாக³தா ப⁴விஸ்ஸாம ஸேக²ப³லேன, ஹிரீப³லேன… ஓத்தப்பப³லேன … வீரியப³லேன… பஞ்ஞாப³லேன ஸமன்னாக³தா ப⁴விஸ்ஸாம ஸேக²ப³லேனா’தி. ஏவஞ்ஹி கோ², பி⁴க்க²வே, ஸிக்கி²தப்³ப³’’ந்தி. து³தியம்.

3. து³க்க²ஸுத்தம்

3. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² தி³ட்டே²வ த⁴ம்மே து³க்க²ம் விஹரதி ஸவிகா⁴தம் ஸஉபாயாஸம் ஸபரிளாஹம், காயஸ்ஸ ச பே⁴தா³ பரம் மரணா து³க்³க³தி பாடிகங்கா². கதமேஹி பஞ்சஹி? இத⁴, பி⁴க்க²வே, பி⁴க்கு² அஸ்ஸத்³தோ⁴ ஹோதி, அஹிரிகோ ஹோதி, அனோத்தப்பீ ஹோதி, குஸீதோ ஹோதி, து³ப்பஞ்ஞோ ஹோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² தி³ட்டே²வ த⁴ம்மே து³க்க²ம் விஹரதி ஸவிகா⁴தம் ஸஉபாயாஸம் ஸபரிளாஹம், காயஸ்ஸ ச பே⁴தா³ பரம் மரணா து³க்³க³தி பாடிகங்கா².

‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² தி³ட்டே²வ த⁴ம்மே ஸுக²ம் விஹரதி அவிகா⁴தம் அனுபாயாஸம் அபரிளாஹம், காயஸ்ஸ ச பே⁴தா³ பரம் மரணா ஸுக³தி பாடிகங்கா². கதமேஹி பஞ்சஹி? இத⁴, பி⁴க்க²வே, பி⁴க்கு² ஸத்³தோ⁴ ஹோதி, ஹிரீமா ஹோதி, ஓத்தப்பீ ஹோதி, ஆரத்³த⁴வீரியோ ஹோதி, பஞ்ஞவா ஹோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² தி³ட்டே²வ த⁴ம்மே ஸுக²ம் விஹரதி அவிகா⁴தம் அனுபாயாஸம் அபரிளாஹம், காயஸ்ஸ ச பே⁴தா³ பரம் மரணா ஸுக³தி பாடிகங்கா²’’தி. ததியம்.

4. யதா²ப⁴தஸுத்தம்

4. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² யதா²ப⁴தம் நிக்கி²த்தோ ஏவம் நிரயே. கதமேஹி பஞ்சஹி? இத⁴, பி⁴க்க²வே, பி⁴க்கு² அஸ்ஸத்³தோ⁴ ஹோதி, அஹிரிகோ ஹோதி, அனோத்தப்பீ ஹோதி, குஸீதோ ஹோதி, து³ப்பஞ்ஞோ ஹோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² யதா²ப⁴தம் நிக்கி²த்தோ ஏவம் நிரயே.

‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² யதா²ப⁴தம் நிக்கி²த்தோ ஏவம் ஸக்³கே³. கதமேஹி பஞ்சஹி? இத⁴, பி⁴க்க²வே, பி⁴க்கு² ஸத்³தோ⁴ ஹோதி, ஹிரீமா ஹோதி, ஓத்தப்பீ ஹோதி, ஆரத்³த⁴வீரியோ ஹோதி, பஞ்ஞவா ஹோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² யதா²ப⁴தம் நிக்கி²த்தோ ஏவம் ஸக்³கே³’’தி. சதுத்த²ம்.

5. ஸிக்கா²ஸுத்தம்

5. ‘‘யோ ஹி கோசி, பி⁴க்க²வே, பி⁴க்கு² வா பி⁴க்கு²னீ வா ஸிக்க²ம் பச்சக்கா²ய ஹீனாயாவத்ததி, தஸ்ஸ தி³ட்டே²வ [தி³ட்டே² சேவ (ஸீ.)] த⁴ம்மே பஞ்ச ஸஹத⁴ம்மிகா வாதா³னுபாதா [வாதா³னுவாதா³ (அ. நி. 8.12; அ. நி. 3.58)] கா³ரய்ஹா டா²னா ஆக³ச்ச²ந்தி. கதமே பஞ்ச? ஸத்³தா⁴பி நாம தே நாஹோஸி குஸலேஸு த⁴ம்மேஸு, ஹிரீபி நாம தே நாஹோஸி குஸலேஸு த⁴ம்மேஸு, ஓத்தப்பம்பி நாம தே நாஹோஸி குஸலேஸு த⁴ம்மேஸு, வீரியம்பி நாம தே நாஹோஸி குஸலேஸு த⁴ம்மேஸு, பஞ்ஞாபி நாம தே நாஹோஸி குஸலேஸு த⁴ம்மேஸு. யோ ஹி கோசி, பி⁴க்க²வே, பி⁴க்கு² வா பி⁴க்கு²னீ வா ஸிக்க²ம் பச்சக்கா²ய ஹீனாயாவத்ததி, தஸ்ஸ தி³ட்டே²வ த⁴ம்மே இமே பஞ்ச ஸஹத⁴ம்மிகா வாதா³னுபாதா கா³ரய்ஹா டா²னா ஆக³ச்ச²ந்தி.

‘‘யோ ஹி கோசி, பி⁴க்க²வே, பி⁴க்கு² வா பி⁴க்கு²னீ வா ஸஹாபி து³க்கே²ன ஸஹாபி தோ³மனஸ்ஸேன அஸ்ஸுமுகோ² [அஸ்ஸுமுகோ²பி (ஸ்யா.)] ருத³மானோ பரிபுண்ணம் பரிஸுத்³த⁴ம் ப்³ரஹ்மசரியம் சரதி, தஸ்ஸ தி³ட்டே²வ த⁴ம்மே பஞ்ச ஸஹத⁴ம்மிகா பாஸம்ஸா டா²னா [பாஸம்ஸம் டா²னம் (ஸ்யா.)] ஆக³ச்ச²ந்தி. கதமே பஞ்ச? ஸத்³தா⁴பி நாம தே அஹோஸி குஸலேஸு த⁴ம்மேஸு, ஹிரீபி நாம தே அஹோஸி குஸலேஸு த⁴ம்மேஸு, ஓத்தப்பம்பி நாம தே அஹோஸி குஸலேஸு த⁴ம்மேஸு, வீரியம்பி நாம தே அஹோஸி குஸலேஸு த⁴ம்மேஸு, பஞ்ஞாபி நாம தே அஹோஸி குஸலேஸு த⁴ம்மேஸு. யோ ஹி கோசி, பி⁴க்க²வே, பி⁴க்கு² வா பி⁴க்கு²னீ வா ஸஹாபி து³க்கே²ன ஸஹாபி தோ³மனஸ்ஸேன அஸ்ஸுமுகோ² ருத³மானோ பரிபுண்ணம் பரிஸுத்³த⁴ம் ப்³ரஹ்மசரியம் சரதி, தஸ்ஸ தி³ட்டே²வ த⁴ம்மே இமே பஞ்ச ஸஹத⁴ம்மிகா பாஸம்ஸா டா²னா ஆக³ச்ச²ந்தீ’’தி. பஞ்சமம்.

6. ஸமாபத்திஸுத்தம்

6. ‘‘ந தாவ, பி⁴க்க²வே, அகுஸலஸ்ஸ ஸமாபத்தி ஹோதி யாவ ஸத்³தா⁴ பச்சுபட்டி²தா ஹோதி குஸலேஸு த⁴ம்மேஸு. யதோ ச கோ², பி⁴க்க²வே, ஸத்³தா⁴ அந்தரஹிதா ஹோதி, அஸத்³தி⁴யம் பரியுட்டா²ய திட்ட²தி; அத² அகுஸலஸ்ஸ ஸமாபத்தி ஹோதி.

‘‘ந தாவ, பி⁴க்க²வே, அகுஸலஸ்ஸ ஸமாபத்தி ஹோதி யாவ ஹிரீ பச்சுபட்டி²தா ஹோதி குஸலேஸு த⁴ம்மேஸு. யதோ ச கோ², பி⁴க்க²வே, ஹிரீ அந்தரஹிதா ஹோதி, அஹிரிகம் பரியுட்டா²ய திட்ட²தி; அத² அகுஸலஸ்ஸ ஸமாபத்தி ஹோதி.

‘‘ந தாவ, பி⁴க்க²வே, அகுஸலஸ்ஸ ஸமாபத்தி ஹோதி யாவ ஓத்தப்பம் பச்சுபட்டி²தம் ஹோதி குஸலேஸு த⁴ம்மேஸு. யதோ ச கோ², பி⁴க்க²வே, ஓத்தப்பம் அந்தரஹிதம் ஹோதி, அனோத்தப்பம் பரியுட்டா²ய திட்ட²தி; அத² அகுஸலஸ்ஸ ஸமாபத்தி ஹோதி.

‘‘ந தாவ, பி⁴க்க²வே, அகுஸலஸ்ஸ ஸமாபத்தி ஹோதி யாவ வீரியம் பச்சுபட்டி²தம் ஹோதி குஸலேஸு த⁴ம்மேஸு. யதோ ச கோ², பி⁴க்க²வே, வீரியம் அந்தரஹிதம் ஹோதி, கோஸஜ்ஜம் பரியுட்டா²ய திட்ட²தி; அத² அகுஸலஸ்ஸ ஸமாபத்தி ஹோதி.

‘‘ந தாவ, பி⁴க்க²வே, அகுஸலஸ்ஸ ஸமாபத்தி ஹோதி யாவ பஞ்ஞா பச்சுபட்டி²தா ஹோதி குஸலேஸு த⁴ம்மேஸு. யதோ ச கோ², பி⁴க்க²வே, பஞ்ஞா அந்தரஹிதா ஹோதி, து³ப்பஞ்ஞா [து³ப்பஞ்ஞம் (க.)] பரியுட்டா²ய திட்ட²தி; அத² அகுஸலஸ்ஸ ஸமாபத்தி ஹோதீ’’தி. ச²ட்ட²ம்.

7. காமஸுத்தம்

7. ‘‘யேபு⁴ய்யேன, பி⁴க்க²வே, ஸத்தா காமேஸு லளிதா [பலாளிதா (ஸீ.)]. அஸிதப்³யாப⁴ங்கி³ம் [அஸிதப்³யாப⁴ங்கி³ சேபி (?)], பி⁴க்க²வே, குலபுத்தோ ஓஹாய அகா³ரஸ்மா அனகா³ரியம் பப்³ப³ஜிதோ ஹோதி, ‘ஸத்³தா⁴பப்³ப³ஜிதோ குலபுத்தோ’தி அலம் வசனாய. தம் கிஸ்ஸ ஹேது? லப்³பா⁴ [லப்³பா⁴ ஹி (ஸ்யா.)], பி⁴க்க²வே, யோப்³ப³னேன காமா தே ச கோ² யாதி³ஸா வா தாதி³ஸா வா. யே ச, பி⁴க்க²வே, ஹீனா காமா யே ச மஜ்ஜி²மா காமா யே ச பணீதா காமா, ஸப்³பே³ காமா ‘காமா’த்வேவ ஸங்க²ம் க³ச்ச²ந்தி. ஸேய்யதா²பி, பி⁴க்க²வே, த³ஹரோ குமாரோ மந்தோ³ உத்தானஸேய்யகோ தா⁴தியா பமாத³மன்வாய கட்ட²ம் வா கட²லம் [கத²லம் (க.)] வா முகே² ஆஹரேய்ய. தமேனம் தா⁴தி ஸீக⁴ம் ஸீக⁴ம் [ஸீக⁴ஸீக⁴ம் (ஸீ.)] மனஸி கரேய்ய; ஸீக⁴ம் ஸீக⁴ம் மனஸி கரித்வா ஸீக⁴ம் ஸீக⁴ம் ஆஹரேய்ய. நோ சே ஸக்குணேய்ய ஸீக⁴ம் ஸீக⁴ம் ஆஹரிதும், வாமேன ஹத்தே²ன ஸீஸம் பரிக்³க³ஹேத்வா த³க்கி²ணேன ஹத்தே²ன வங்கங்கு³லிம் கரித்வா ஸலோஹிதம்பி ஆஹரேய்ய. தம் கிஸ்ஸ ஹேது? ‘அத்தே²ஸா, பி⁴க்க²வே, குமாரஸ்ஸ விஹேஸா; நேஸா நத்தீ²’தி வதா³மி. கரணீயஞ்ச கோ² ஏதம் [ஏவம் (க.)], பி⁴க்க²வே, தா⁴தியா அத்த²காமாய ஹிதேஸினியா அனுகம்பிகாய, அனுகம்பம் உபாதா³ய. யதோ ச கோ², பி⁴க்க²வே, ஸோ குமாரோ வுத்³தோ⁴ ஹோதி அலம்பஞ்ஞோ, அனபேக்கா² தா³னி [அனபேக்கா² பன (ஸீ. ஸ்யா. கம்.)], பி⁴க்க²வே, தா⁴தி தஸ்மிம் குமாரே ஹோதி – ‘அத்தகு³த்தோ தா³னி குமாரோ நாலம் பமாதா³யா’தி.

‘‘ஏவமேவம் கோ², பி⁴க்க²வே, யாவகீவஞ்ச பி⁴க்கு²னோ ஸத்³தா⁴ய அகதம் ஹோதி குஸலேஸு த⁴ம்மேஸு, ஹிரியா அகதம் ஹோதி குஸலேஸு த⁴ம்மேஸு, ஓத்தப்பேன அகதம் ஹோதி குஸலேஸு த⁴ம்மேஸு, வீரியேன அகதம் ஹோதி குஸலேஸு த⁴ம்மேஸு, பஞ்ஞாய அகதம் ஹோதி குஸலேஸு த⁴ம்மேஸு, அனுரக்கி²தப்³போ³ தாவ மே ஸோ, பி⁴க்க²வே, பி⁴க்கு² ஹோதி. யதோ ச கோ², பி⁴க்க²வே, பி⁴க்கு²னோ ஸத்³தா⁴ய கதம் ஹோதி குஸலேஸு த⁴ம்மேஸு, ஹிரியா கதம் ஹோதி குஸலேஸு த⁴ம்மேஸு, ஓத்தப்பேன கதம் ஹோதி குஸலேஸு த⁴ம்மேஸு, வீரியேன கதம் ஹோதி குஸலேஸு த⁴ம்மேஸு, பஞ்ஞாய கதம் ஹோதி குஸலேஸு த⁴ம்மேஸு, அனபேக்கோ² தா³னாஹம், பி⁴க்க²வே [பனாஹம் (ஸீ. ஸ்யா. கம்.)], தஸ்மிம் பி⁴க்கு²ஸ்மிம் ஹோமி – ‘அத்தகு³த்தோ தா³னி பி⁴க்கு² நாலம் பமாதா³யா’’’தி. ஸத்தமம்.

8. சவனஸுத்தம்

8. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² சவதி, நப்பதிட்டா²தி ஸத்³த⁴ம்மே. கதமேஹி பஞ்சஹி? அஸத்³தோ⁴, பி⁴க்க²வே, பி⁴க்கு² சவதி, நப்பதிட்டா²தி ஸத்³த⁴ம்மே. அஹிரிகோ, பி⁴க்க²வே, பி⁴க்கு² சவதி, நப்பதிட்டா²தி ஸத்³த⁴ம்மே. அனோத்தப்பீ, பி⁴க்க²வே, பி⁴க்கு² சவதி, நப்பதிட்டா²தி ஸத்³த⁴ம்மே. குஸீதோ, பி⁴க்க²வே, பி⁴க்கு² சவதி, நப்பதிட்டா²தி ஸத்³த⁴ம்மே. து³ப்பஞ்ஞோ, பி⁴க்க²வே, பி⁴க்கு² சவதி, நப்பதிட்டா²தி ஸத்³த⁴ம்மே. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² சவதி, நப்பதிட்டா²தி ஸத்³த⁴ம்மே.

‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² ந சவதி, பதிட்டா²தி ஸத்³த⁴ம்மே. கதமேஹி பஞ்சஹி? ஸத்³தோ⁴, பி⁴க்க²வே, பி⁴க்கு² ந சவதி, பதிட்டா²தி ஸத்³த⁴ம்மே. ஹிரீமா, பி⁴க்க²வே, பி⁴க்கு² ந சவதி, பதிட்டா²தி ஸத்³த⁴ம்மே. ஓத்தப்பீ, பி⁴க்க²வே, பி⁴க்கு² ந சவதி, பதிட்டா²தி ஸத்³த⁴ம்மே. ஆரத்³த⁴வீரியோ, பி⁴க்க²வே, பி⁴க்கு² ந சவதி, பதிட்டா²தி ஸத்³த⁴ம்மே. பஞ்ஞவா, பி⁴க்க²வே, பி⁴க்கு² ந சவதி, பதிட்டா²தி ஸத்³த⁴ம்மே. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² ந சவதி, பதிட்டா²தி ஸத்³த⁴ம்மே’’தி. அட்ட²மம்.

9. பட²மஅகா³ரவஸுத்தம்

9. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² அகா³ரவோ அப்பதிஸ்ஸோ சவதி, நப்பதிட்டா²தி ஸத்³த⁴ம்மே. கதமேஹி பஞ்சஹி? அஸ்ஸத்³தோ⁴, பி⁴க்க²வே, பி⁴க்கு² அகா³ரவோ அப்பதிஸ்ஸோ சவதி, நப்பதிட்டா²தி ஸத்³த⁴ம்மே. அஹிரிகோ, பி⁴க்க²வே, பி⁴க்கு² அகா³ரவோ அப்பதிஸ்ஸோ சவதி, நப்பதிட்டா²தி ஸத்³த⁴ம்மே. அனோத்தப்பீ, பி⁴க்க²வே, பி⁴க்கு² அகா³ரவோ அப்பதிஸ்ஸோ சவதி, நப்பதிட்டா²தி ஸத்³த⁴ம்மே. குஸீதோ, பி⁴க்க²வே, பி⁴க்கு² அகா³ரவோ அப்பதிஸ்ஸோ சவதி, நப்பதிட்டா²தி ஸத்³த⁴ம்மே. து³ப்பஞ்ஞோ, பி⁴க்க²வே, பி⁴க்கு² அகா³ரவோ அப்பதிஸ்ஸோ சவதி, நப்பதிட்டா²தி ஸத்³த⁴ம்மே. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² அகா³ரவோ அப்பதிஸ்ஸோ சவதி, நப்பதிட்டா²தி ஸத்³த⁴ம்மே.

‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² ஸகா³ரவோ ஸப்பதிஸ்ஸோ ந சவதி, பதிட்டா²தி ஸத்³த⁴ம்மே. கதமேஹி பஞ்சஹி? ஸத்³தோ⁴, பி⁴க்க²வே, பி⁴க்கு² ஸகா³ரவோ ஸப்பதிஸ்ஸோ ந சவதி, பதிட்டா²தி ஸத்³த⁴ம்மே. ஹிரிமா, பி⁴க்க²வே, பி⁴க்கு² ஸகா³ரவோ ஸப்பதிஸ்ஸோ ந சவதி, பதிட்டா²தி ஸத்³த⁴ம்மே. ஓத்தப்பீ, பி⁴க்க²வே, பி⁴க்கு² ஸகா³ரவோ ஸப்பதிஸ்ஸோ ந சவதி, பதிட்டா²தி ஸத்³த⁴ம்மே. ஆரத்³த⁴வீரியோ, பி⁴க்க²வே, பி⁴க்கு² ஸகா³ரவோ ஸப்பதிஸ்ஸோ ந சவதி, பதிட்டா²தி ஸத்³த⁴ம்மே. பஞ்ஞவா, பி⁴க்க²வே, பி⁴க்கு² ஸகா³ரவோ ஸப்பதிஸ்ஸோ ந சவதி, பதிட்டா²தி ஸத்³த⁴ம்மே. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² ஸகா³ரவோ ஸப்பதிஸ்ஸோ ந சவதி, பதிட்டா²தி ஸத்³த⁴ம்மே’’தி. நவமம்.

10. து³தியஅகா³ரவஸுத்தம்

10. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² அகா³ரவோ அப்பதிஸ்ஸோ அப⁴ப்³போ³ இமஸ்மிம் த⁴ம்மவினயே வுத்³தி⁴ம் விரூள்ஹிம் வேபுல்லம் ஆபஜ்ஜிதும். கதமேஹி பஞ்சஹி? அஸ்ஸத்³தோ⁴, பி⁴க்க²வே, பி⁴க்கு² அகா³ரவோ அப்பதிஸ்ஸோ அப⁴ப்³போ³ இமஸ்மிம் த⁴ம்மவினயே வுத்³தி⁴ம் விரூள்ஹிம் வேபுல்லம் ஆபஜ்ஜிதும். அஹிரிகோ, பி⁴க்க²வே, பி⁴க்கு² அகா³ரவோ அப்பதிஸ்ஸோ அப⁴ப்³போ³ இமஸ்மிம் த⁴ம்மவினயே வுத்³தி⁴ம் விரூள்ஹிம் வேபுல்லம் ஆபஜ்ஜிதும். அனோத்தப்பீ, பி⁴க்க²வே, பி⁴க்கு² அகா³ரவோ அப்பதிஸ்ஸோ அப⁴ப்³போ³ இமஸ்மிம் த⁴ம்மவினயே வுத்³தி⁴ம் விரூள்ஹிம் வேபுல்லம் ஆபஜ்ஜிதும். குஸீதோ, பி⁴க்க²வே, பி⁴க்கு² அகா³ரவோ அப்பதிஸ்ஸோ அப⁴ப்³போ³ இமஸ்மிம் த⁴ம்மவினயே வுத்³தி⁴ம் விரூள்ஹிம் வேபுல்லம் ஆபஜ்ஜிதும். து³ப்பஞ்ஞோ, பி⁴க்க²வே, பி⁴க்கு² அகா³ரவோ அப்பதிஸ்ஸோ அப⁴ப்³போ³ இமஸ்மிம் த⁴ம்மவினயே வுத்³தி⁴ம் விரூள்ஹிம் வேபுல்லம் ஆபஜ்ஜிதும். இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² அகா³ரவோ அப்பதிஸ்ஸோ அப⁴ப்³போ³ இமஸ்மிம் த⁴ம்மவினயே வுத்³தி⁴ம் விரூள்ஹிம் வேபுல்லம் ஆபஜ்ஜிதும்.

‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² ஸகா³ரவோ ஸப்பதிஸ்ஸோ ப⁴ப்³போ³ இமஸ்மிம் த⁴ம்மவினயே வுத்³தி⁴ம் விரூள்ஹிம் வேபுல்லம் ஆபஜ்ஜிதும். கதமேஹி பஞ்சஹி? ஸத்³தோ⁴, பி⁴க்க²வே, பி⁴க்கு² ஸகா³ரவோ ஸப்பதிஸ்ஸோ ப⁴ப்³போ³ இமஸ்மிம் த⁴ம்மவினயே வுத்³தி⁴ம் விரூள்ஹிம் வேபுல்லம் ஆபஜ்ஜிதும். ஹிரீமா, பி⁴க்க²வே, பி⁴க்கு²…பே… ஓத்தப்பீ, பி⁴க்க²வே, பி⁴க்கு²…பே… ஆரத்³த⁴வீரியோ, பி⁴க்க²வே, பி⁴க்கு²…பே… பஞ்ஞவா, பி⁴க்க²வே, பி⁴க்கு² ஸகா³ரவோ ஸப்பதிஸ்ஸோ ப⁴ப்³போ³ இமஸ்மிம் த⁴ம்மவினயே வுத்³தி⁴ம் விரூள்ஹிம் வேபுல்லம் ஆபஜ்ஜிதும். இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² ஸகா³ரவோ ஸப்பதிஸ்ஸோ ப⁴ப்³போ³ இமஸ்மிம் த⁴ம்மவினயே வுத்³தி⁴ம் விரூள்ஹிம் வேபுல்லம் ஆபஜ்ஜிது’’ந்தி. த³ஸமம்.

ஸேக²ப³லவக்³கோ³ பட²மோ.