2. ப³லவக்³கோ³

1. அனனுஸ்ஸுதஸுத்தம்

11. ‘‘புப்³பா³ஹம், பி⁴க்க²வே, அனனுஸ்ஸுதேஸு த⁴ம்மேஸு அபி⁴ஞ்ஞாவோஸானபாரமிப்பத்தோ படிஜானாமி. பஞ்சிமானி, பி⁴க்க²வே, ததா²க³தஸ்ஸ ததா²க³தப³லானி, யேஹி ப³லேஹி ஸமன்னாக³தோ ததா²க³தோ ஆஸப⁴ம் டா²னம் படிஜானாதி, பரிஸாஸு ஸீஹனாத³ம் நத³தி, ப்³ரஹ்மசக்கம் பவத்தேதி. கதமானி பஞ்ச? ஸத்³தா⁴ப³லம், ஹிரீப³லம், ஓத்தப்பப³லம், வீரியப³லம், பஞ்ஞாப³லம் – இமானி கோ², பி⁴க்க²வே, பஞ்ச ததா²க³தஸ்ஸ ததா²க³தப³லானி யேஹி ப³லேஹி ஸமன்னாக³தோ ததா²க³தோ ஆஸப⁴ம் டா²னம் படிஜானாதி, பரிஸாஸு ஸீஹனாத³ம் நத³தி, ப்³ரஹ்மசக்கம் பவத்தேதீ’’தி. பட²மம்.

2. கூடஸுத்தம்

12. ‘‘பஞ்சிமானி, பி⁴க்க²வே, ஸேக²ப³லானி. கதமானி பஞ்ச? ஸத்³தா⁴ப³லம், ஹிரீப³லம், ஓத்தப்பப³லம், வீரியப³லம், பஞ்ஞாப³லம் – இமானி கோ², பி⁴க்க²வே, பஞ்ச ஸேக²ப³லானி. இமேஸம் கோ², பி⁴க்க²வே, பஞ்சன்னம் ஸேக²ப³லானம் ஏதம் அக்³க³ம் ஏதம் ஸங்கா³ஹிகம் ஏதம் ஸங்கா⁴தனியம், யதி³த³ம் பஞ்ஞாப³லம்.

‘‘ஸேய்யதா²பி, பி⁴க்க²வே, கூடாகா³ரஸ்ஸ ஏதம் அக்³க³ம் ஏதம் ஸங்கா³ஹிகம் ஏதம் ஸங்கா⁴தனியம், யதி³த³ம் கூடம். ஏவமேவம் கோ², பி⁴க்க²வே, இமேஸம் பஞ்சன்னம் ஸேக²ப³லானம் ஏதம் அக்³க³ம் ஏதம் ஸங்கா³ஹிகம் ஏதம் ஸங்கா⁴தனியம், யதி³த³ம் பஞ்ஞாப³லம்.

‘‘தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘ஸத்³தா⁴ப³லேன ஸமன்னாக³தா ப⁴விஸ்ஸாம ஸேக²ப³லேன, ஹிரீப³லேன… ஓத்தப்பப³லேன… வீரியப³லேன… பஞ்ஞாப³லேன ஸமன்னாக³தா ப⁴விஸ்ஸாம ஸேக²ப³லேனா’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. து³தியம்.

3. ஸம்கி²த்தஸுத்தம்

13. ‘‘பஞ்சிமானி, பி⁴க்க²வே, ப³லானி. கதமானி பஞ்ச? ஸத்³தா⁴ப³லம், வீரியப³லம், ஸதிப³லம், ஸமாதி⁴ப³லம், பஞ்ஞாப³லம் – இமானி கோ², பி⁴க்க²வே, பஞ்ச ப³லானீ’’தி. ததியம்.

4. வித்த²தஸுத்தம்

14. ‘‘பஞ்சிமானி, பி⁴க்க²வே, ப³லானி. கதமானி பஞ்ச? ஸத்³தா⁴ப³லம், வீரியப³லம், ஸதிப³லம், ஸமாதி⁴ப³லம், பஞ்ஞாப³லம்.

‘‘கதமஞ்ச, பி⁴க்க²வே, ஸத்³தா⁴ப³லம்? இத⁴, பி⁴க்க²வே, அரியஸாவகோ ஸத்³தோ⁴ ஹோதி, ஸத்³த³ஹதி ததா²க³தஸ்ஸ போ³தி⁴ம் – ‘இதிபி ஸோ ப⁴க³வா அரஹம் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானம் பு³த்³தோ⁴ ப⁴க³வா’தி. இத³ம் வுச்சதி, பி⁴க்க²வே, ஸத்³தா⁴ப³லம்.

‘‘கதமஞ்ச, பி⁴க்க²வே, வீரியப³லம்? இத⁴, பி⁴க்க²வே, அரியஸாவகோ ஆரத்³த⁴வீரியோ விஹரதி அகுஸலானம் த⁴ம்மானம் பஹானாய, குஸலானம் த⁴ம்மானம் உபஸம்பதா³ய தா²மவா த³ள்ஹபரக்கமோ அனிக்கி²த்தது⁴ரோ குஸலேஸு த⁴ம்மேஸு. இத³ம் வுச்சதி, பி⁴க்க²வே, வீரியப³லம்.

‘‘கதமஞ்ச, பி⁴க்க²வே, ஸதிப³லம்? இத⁴, பி⁴க்க²வே, அரியஸாவகோ ஸதிமா ஹோதி பரமேன ஸதினேபக்கேன ஸமன்னாக³தோ, சிரகதம்பி சிரபா⁴ஸிதம்பி ஸரிதா அனுஸ்ஸரிதா. இத³ம் வுச்சதி, பி⁴க்க²வே, ஸதிப³லம்.

‘‘கதமஞ்ச, பி⁴க்க²வே, ஸமாதி⁴ப³லம்? இத⁴, பி⁴க்க²வே, அரியஸாவகோ விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹரதி; விதக்கவிசாரானம் வூபஸமா அஜ்ஜ²த்தம் ஸம்பஸாத³னம் சேதஸோ ஏகோதி³பா⁴வம் அவிதக்கம் அவிசாரம் ஸமாதி⁴ஜம் பீதிஸுக²ம் து³தியம் ஜா²னம் உபஸம்பஜ்ஜ விஹரதி; பீதியா ச விராகா³ உபேக்க²கோ ச விஹரதி ஸதோ ச ஸம்பஜானோ ஸுக²ஞ்ச காயேன படிஸம்வேதே³தி யம் தம் அரியா ஆசிக்க²ந்தி – ‘உபேக்க²கோ ஸதிமா ஸுக²விஹாரீ’தி ததியம் ஜா²னம் உபஸம்பஜ்ஜ விஹரதி; ஸுக²ஸ்ஸ ச பஹானா து³க்க²ஸ்ஸ ச பஹானா புப்³பே³வ ஸோமனஸ்ஸதோ³மனஸ்ஸானம் அத்த²ங்க³மா அது³க்க²மஸுக²ம் உபேக்கா²ஸதிபாரிஸுத்³தி⁴ம் சதுத்த²ம் ஜா²னம் உபஸம்பஜ்ஜ விஹரதி. இத³ம் வுச்சதி, பி⁴க்க²வே, ஸமாதி⁴ப³லம்.

‘‘கதமஞ்ச, பி⁴க்க²வே, பஞ்ஞாப³லம்? இத⁴, பி⁴க்க²வே, அரியஸாவகோ பஞ்ஞவா ஹோதி உத³யத்த²கா³மினியா பஞ்ஞாய ஸமன்னாக³தோ அரியாய நிப்³பே³தி⁴காய ஸம்மா து³க்க²க்க²யகா³மினியா. இத³ம் வுச்சதி, பி⁴க்க²வே, பஞ்ஞாப³லம். இமானி கோ², பி⁴க்க²வே, பஞ்ச ப³லானீ’’தி. சதுத்த²ம்.

5. த³ட்ட²ப்³ப³ஸுத்தம்

15. ‘‘பஞ்சிமானி, பி⁴க்க²வே, ப³லானி. கதமானி பஞ்ச? ஸத்³தா⁴ப³லம், வீரியப³லம், ஸதிப³லம், ஸமாதி⁴ப³லம், பஞ்ஞாப³லம். கத்த² ச, பி⁴க்க²வே, ஸத்³தா⁴ப³லம் த³ட்ட²ப்³ப³ம்? சதூஸு ஸோதாபத்தியங்கே³ஸு. ஏத்த² ஸத்³தா⁴ப³லம் த³ட்ட²ப்³ப³ம். கத்த² ச, பி⁴க்க²வே, வீரியப³லம் த³ட்ட²ப்³ப³ம்? சதூஸு ஸம்மப்பதா⁴னேஸு. ஏத்த² வீரியப³லம் த³ட்ட²ப்³ப³ம். கத்த² ச, பி⁴க்க²வே, ஸதிப³லம் த³ட்ட²ப்³ப³ம்? சதூஸு ஸதிபட்டா²னேஸு. ஏத்த² ஸதிப³லம் த³ட்ட²ப்³ப³ம். கத்த² ச, பி⁴க்க²வே, ஸமாதி⁴ப³லம் த³ட்ட²ப்³ப³ம்? சதூஸு ஜா²னேஸு. ஏத்த² ஸமாதி⁴ப³லம் த³ட்ட²ப்³ப³ம். கத்த² ச, பி⁴க்க²வே, பஞ்ஞாப³லம் த³ட்ட²ப்³ப³ம்? சதூஸு அரியஸச்சேஸு. ஏத்த² பஞ்ஞாப³லம் த³ட்ட²ப்³ப³ம். இமானி கோ², பி⁴க்க²வே, பஞ்ச ப³லானீ’’தி. பஞ்சமம்.

6. புனகூடஸுத்தம்

16. ‘‘பஞ்சிமானி, பி⁴க்க²வே, ப³லானி. கதமானி பஞ்ச? ஸத்³தா⁴ப³லம், வீரியப³லம், ஸதிப³லம், ஸமாதி⁴ப³லம், பஞ்ஞாப³லம் – இமானி கோ², பி⁴க்க²வே, பஞ்ச ப³லானி. இமேஸம் கோ², பி⁴க்க²வே, பஞ்சன்னம் ப³லானம் ஏதம் அக்³க³ம் ஏதம் ஸங்கா³ஹிகம் ஏதம் ஸங்கா⁴தனியம், யதி³த³ம் பஞ்ஞாப³லம். ஸேய்யதா²பி, பி⁴க்க²வே, கூடாகா³ரஸ்ஸ ஏதம் அக்³க³ம் ஏதம் ஸங்கா³ஹிகம் ஏதம் ஸங்கா⁴தனியம், யதி³த³ம் கூடம். ஏவமேவம் கோ², பி⁴க்க²வே, இமேஸம் பஞ்சன்னம் ப³லானம் ஏதம் அக்³க³ம் ஏதம் ஸங்கா³ஹிகம் ஏதம் ஸங்கா⁴தனியம், யதி³த³ம் பஞ்ஞாப³ல’’ந்தி. ச²ட்ட²ம்.

7. பட²மஹிதஸுத்தம்

17. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² அத்தஹிதாய படிபன்னோ ஹோதி, நோ பரஹிதாய. கதமேஹி பஞ்சஹி? இத⁴, பி⁴க்க²வே, பி⁴க்கு² அத்தனா ஸீலஸம்பன்னோ ஹோதி, நோ பரம் ஸீலஸம்பதா³ய ஸமாத³பேதி; அத்தனா ஸமாதி⁴ஸம்பன்னோ ஹோதி, நோ பரம் ஸமாதி⁴ஸம்பதா³ய ஸமாத³பேதி; அத்தனா பஞ்ஞாஸம்பன்னோ ஹோதி, நோ பரம் பஞ்ஞாஸம்பதா³ய ஸமாத³பேதி; அத்தனா விமுத்திஸம்பன்னோ ஹோதி, நோ பரம் விமுத்திஸம்பதா³ய ஸமாத³பேதி; அத்தனா விமுத்திஞாணத³ஸ்ஸனஸம்பன்னோ ஹோதி, நோ பரம் விமுத்திஞாணத³ஸ்ஸனஸம்பதா³ய ஸமாத³பேதி. இமேஹி கோ², பி⁴க்க²வே, பஞ்சஹி அங்கே³ஹி ஸமன்னாக³தோ பி⁴க்கு² அத்தஹிதாய படிபன்னோ ஹோதி, நோ பரஹிதாயா’’தி. ஸத்தமம்.

8. து³தியஹிதஸுத்தம்

18. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² பரஹிதாய படிபன்னோ ஹோதி, நோ அத்தஹிதாய. கதமேஹி பஞ்சஹி? இத⁴, பி⁴க்க²வே, பி⁴க்கு² அத்தனா ந ஸீலஸம்பன்னோ ஹோதி, பரம் ஸீலஸம்பதா³ய ஸமாத³பேதி; அத்தனா ந ஸமாதி⁴ஸம்பன்னோ ஹோதி, பரம் ஸமாதி⁴ஸம்பதா³ய ஸமாத³பேதி; அத்தனா ந பஞ்ஞாஸம்பன்னோ ஹோதி, பரம் பஞ்ஞாஸம்பதா³ய ஸமாத³பேதி; அத்தனா ந விமுத்திஸம்பன்னோ ஹோதி, பரம் விமுத்திஸம்பதா³ய ஸமாத³பேதி; அத்தனா ந விமுத்திஞாணத³ஸ்ஸனஸம்பன்னோ ஹோதி, பரம் விமுத்திஞாணத³ஸ்ஸனஸம்பதா³ய ஸமாத³பேதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² பரஹிதாய படிபன்னோ ஹோதி, நோ அத்தஹிதாயா’’தி. அட்ட²மம்.

9. ததியஹிதஸுத்தம்

19. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² நேவ அத்தஹிதாய படிபன்னோ ஹோதி, நோ பரஹிதாய. கதமேஹி பஞ்சஹி? இத⁴, பி⁴க்க²வே, பி⁴க்கு² அத்தனா ந ஸீலஸம்பன்னோ ஹோதி, நோ பரம் ஸீலஸம்பதா³ய ஸமாத³பேதி; அத்தனா ந ஸமாதி⁴ஸம்பன்னோ ஹோதி, நோ பரம் ஸமாதி⁴ஸம்பதா³ய ஸமாத³பேதி; அத்தனா ந பஞ்ஞாஸம்பன்னோ ஹோதி, நோ பரம் பஞ்ஞாஸம்பதா³ய ஸமாத³பேதி; அத்தனா ந விமுத்திஸம்பன்னோ ஹோதி, நோ பரம் விமுத்திஸம்பதா³ய ஸமாத³பேதி; அத்தனா ந விமுத்திஞாணத³ஸ்ஸனஸம்பன்னோ ஹோதி, நோ பரம் விமுத்திஞாணத³ஸ்ஸனஸம்பதா³ய ஸமாத³பேதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² நேவ அத்தஹிதாய படிபன்னோ ஹோதி, நோ பரஹிதாயா’’தி. நவமம்.

10. சதுத்த²ஹிதஸுத்தம்

20. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² அத்தஹிதாய ச படிபன்னோ ஹோதி பரஹிதாய ச. கதமேஹி பஞ்சஹி? இத⁴, பி⁴க்க²வே, பி⁴க்கு² அத்தனா ச ஸீலஸம்பன்னோ ஹோதி, பரஞ்ச ஸீலஸம்பதா³ய ஸமாத³பேதி; அத்தனா ச ஸமாதி⁴ஸம்பன்னோ ஹோதி, பரஞ்ச ஸமாதி⁴ஸம்பதா³ய ஸமாத³பேதி, அத்தனா ச பஞ்ஞாஸம்பன்னோ ஹோதி, பரஞ்ச பஞ்ஞாஸம்பதா³ய ஸமாத³பேதி; அத்தனா ச விமுத்திஸம்பன்னோ ஹோதி, பரஞ்ச விமுத்திஸம்பதா³ய ஸமாத³பேதி; அத்தனா ச விமுத்திஞாணத³ஸ்ஸனஸம்பன்னோ ஹோதி, பரஞ்ச விமுத்திஞாணத³ஸ்ஸனஸம்பதா³ய ஸமாத³பேதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² அத்தஹிதாய ச படிபன்னோ ஹோதி பரஹிதாய சா’’தி. த³ஸமம்.

ப³லவக்³கோ³ து³தியோ.