6. ஸாள்ஹஸுத்தம்

196. ஏகம் ஸமயம் ப⁴க³வா வேஸாலியம் விஹரதி மஹாவனே கூடாகா³ரஸாலாயம். அத² கோ² ஸாள்ஹோ ச லிச்ச²வி அப⁴யோ ச லிச்ச²வி யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னோ கோ² ஸாள்ஹோ லிச்ச²வி ப⁴க³வந்தம் ஏதத³வோச –

‘‘ஸந்தி, ப⁴ந்தே, ஏகே ஸமணப்³ராஹ்மணா த்³வயேன ஓக⁴ஸ்ஸ நித்த²ரணம் பஞ்ஞபேந்தி – ஸீலவிஸுத்³தி⁴ஹேது ச தபோஜிகு³ச்சா²ஹேது ச. இத⁴, ப⁴ந்தே, ப⁴க³வா கிமாஹா’’தி?

‘‘ஸீலவிஸுத்³தி⁴ம் கோ² அஹம், ஸாள்ஹ, அஞ்ஞதரம் ஸாமஞ்ஞங்க³ந்தி வதா³மி. யே தே, ஸாள்ஹ, ஸமணப்³ராஹ்மணா தபோஜிகு³ச்சா²வாதா³ தபோஜிகு³ச்சா²ஸாரா தபோஜிகு³ச்சா²அல்லீனா விஹரந்தி, அப⁴ப்³பா³ தே ஓக⁴ஸ்ஸ நித்த²ரணாய. யேபி தே, ஸாள்ஹ, ஸமணப்³ராஹ்மணா அபரிஸுத்³த⁴காயஸமாசாரா அபரிஸுத்³த⁴வசீஸமாசாரா அபரிஸுத்³த⁴மனோஸமாசாரா அபரிஸுத்³தா⁴ஜீவா, அப⁴ப்³பா³ தே ஞாணத³ஸ்ஸனாய அனுத்தராய ஸம்போ³தா⁴ய.

‘‘ஸேய்யதா²பி, ஸாள்ஹ, புரிஸோ நதி³ம் தரிதுகாமோ திண்ஹம் குடா²ரிம் [குதா⁴ரிம் (க.)] ஆதா³ய வனம் பவிஸேய்ய. ஸோ தத்த² பஸ்ஸேய்ய மஹதிம் ஸாலலட்டி²ம் உஜும் நவம் அகுக்குச்சகஜாதம். தமேனம் மூலே சி²ந்தே³ய்ய; மூலே சே²த்வா அக்³கே³ சி²ந்தே³ய்ய; அக்³கே³ சே²த்வா ஸாகா²பலாஸம் ஸுவிஸோதி⁴தம் விஸோதே⁴ய்ய; ஸாகா²பலாஸம் ஸுவிஸோதி⁴தம் விஸோதே⁴த்வா குடா²ரீஹி தச்சே²ய்ய; குடா²ரீஹி தச்சே²த்வா வாஸீஹி தச்சே²ய்ய; வாஸீஹி தச்சே²த்வா லேக²ணியா லிகே²ய்ய; லேக²ணியா லிகி²த்வா பாஸாணகு³ளேன தோ⁴வேய்ய [தோ⁴பேய்ய (ஸீ. ஸ்யா. கம். பீ.)]; பாஸாணகு³ளேன தோ⁴வேத்வா நதி³ம் பதாரேய்ய.

‘‘தம் கிம் மஞ்ஞஸி, ஸாள்ஹ, ப⁴ப்³போ³ நு கோ² ஸோ புரிஸோ நதி³ம் தரிது’’ந்தி? ‘‘நோ ஹேதம், ப⁴ந்தே’’. ‘‘தம் கிஸ்ஸ ஹேது’’? ‘‘அஸு ஹி, ப⁴ந்தே, ஸாலலட்டி² ப³ஹித்³தா⁴ ஸுபரிகம்மகதா அந்தோ அவிஸுத்³தா⁴. தஸ்ஸேதம் பாடிகங்க²ம் – ஸாலலட்டி² ஸம்ஸீதி³ஸ்ஸதி, புரிஸோ அனயப்³யஸனம் ஆபஜ்ஜிஸ்ஸதீ’’தி.

‘‘ஏவமேவம் கோ², ஸாள்ஹ, யே தே ஸமணப்³ராஹ்மணா தபோஜிகு³ச்சா²வாதா³ தபோஜிகு³ச்சா²ஸாரா தபோஜிகு³ச்சா²அல்லீனா விஹரந்தி, அப⁴ப்³பா³ தே ஓக⁴ஸ்ஸ நித்த²ரணாய. யேபி தே, ஸாள்ஹ, ஸமணப்³ராஹ்மணா அபரிஸுத்³த⁴காயஸமாசாரா அபரிஸுத்³த⁴வசீஸமாசாரா அபரிஸுத்³த⁴மனோஸமாசாரா அபரிஸுத்³தா⁴ஜீவா, அப⁴ப்³பா³ தே ஞாணத³ஸ்ஸனாய அனுத்தராய ஸம்போ³தா⁴ய.

‘‘யே ச கோ² தே, ஸாள்ஹ, ஸமணப்³ராஹ்மணா ந தபோஜிகு³ச்சா²வாதா³ ந தபோஜிகு³ச்சா²ஸாரா ந தபோஜிகு³ச்சா²அல்லீனா விஹரந்தி, ப⁴ப்³பா³ தே ஓக⁴ஸ்ஸ நித்த²ரணாய. யேபி தே, ஸாள்ஹ, ஸமணப்³ராஹ்மணா பரிஸுத்³த⁴காயஸமாசாரா பரிஸுத்³த⁴வசீஸமாசாரா பரிஸுத்³த⁴மனோஸமாசாரா பரிஸுத்³தா⁴ஜீவா, ப⁴ப்³பா³ தே ஞாணத³ஸ்ஸனாய அனுத்தராய ஸம்போ³தா⁴ய.

‘‘ஸேய்யதா²பி, ஸாள்ஹ, புரிஸோ நதி³ம் தரிதுகாமோ திண்ஹம் குடா²ரிம் ஆதா³ய வனம் பவிஸேய்ய. ஸோ தத்த² பஸ்ஸேய்ய மஹதிம் ஸாலலட்டி²ம் உஜும் நவம் அகுக்குச்சகஜாதம். தமேனம் மூலே சி²ந்தே³ய்ய; மூலே சி²ந்தி³த்வா அக்³கே³ சி²ந்தே³ய்ய; அக்³கே³ சி²ந்தி³த்வா ஸாகா²பலாஸம் ஸுவிஸோதி⁴தம் விஸோதே⁴ய்ய; ஸாகா²பலாஸம் ஸுவிஸோதி⁴தம் விஸோதே⁴த்வா குடா²ரீஹி தச்சே²ய்ய; குடா²ரீஹி தச்சே²த்வா வாஸீஹி தச்சே²ய்ய; வாஸீஹி தச்சே²த்வா நிகா²த³னம் ஆதா³ய அந்தோ ஸுவிஸோதி⁴தம் விஸோதே⁴ய்ய; அந்தோ ஸுவிஸோதி⁴தம் விஸோதே⁴த்வா லேக²ணியா லிகே²ய்ய; லேக²ணியா லிகி²த்வா பாஸாணகு³ளேன தோ⁴வேய்ய; பாஸாணகு³ளேன தோ⁴வேத்வா நாவம் கரேய்ய; நாவம் கத்வா பி²யாரித்தம் [பியாரித்தம் (ஸீ. பீ.)] ப³ந்தே⁴ய்ய; பி²யாரித்தம் ப³ந்தி⁴த்வா நதி³ம் பதாரேய்ய.

‘‘தம் கிம் மஞ்ஞஸி, ஸாள்ஹ, ப⁴ப்³போ³ நு கோ² ஸோ புரிஸோ நதி³ம் தரிது’’ந்தி? ‘‘ஏவம், ப⁴ந்தே’’. ‘‘தம் கிஸ்ஸ ஹேது’’? ‘‘அஸு ஹி, ப⁴ந்தே, ஸாலலட்டி² ப³ஹித்³தா⁴ ஸுபரிகம்மகதா, அந்தோ ஸுவிஸுத்³தா⁴ நாவாகதா [ஸுவிஸுத்³த⁴கதா (க.)] பி²யாரித்தப³த்³தா⁴. தஸ்ஸேதம் பாடிகங்க²ம் – ‘நாவா ந ஸம்ஸீதி³ஸ்ஸதி, புரிஸோ ஸோத்தி²னா பாரம் க³மிஸ்ஸதீ’’’தி.

‘‘ஏவமேவம் கோ², ஸாள்ஹ, யே தே ஸமணப்³ராஹ்மணா ந தபோஜிகு³ச்சா²வாதா³ ந தபோஜிகு³ச்சா²ஸாரா ந தபோஜிகு³ச்சா²அல்லீனா விஹரந்தி, ப⁴ப்³பா³ தே ஓக⁴ஸ்ஸ நித்த²ரணாய. யேபி தே, ஸாள்ஹ, ஸமணப்³ராஹ்மணா பரிஸுத்³த⁴காயஸமாசாரா பரிஸுத்³த⁴வசீஸமாசாரா பரிஸுத்³த⁴மனோஸமாசாரா பரிஸுத்³தா⁴ஜீவா, ப⁴ப்³பா³ தே ஞாணத³ஸ்ஸனாய அனுத்தராய ஸம்போ³தா⁴ய. ஸேய்யதா²பி, ஸாள்ஹ, யோதா⁴ஜீவோ ப³ஹூனி சேபி கண்ட³சித்ரகானி ஜானாதி; அத² கோ² ஸோ தீஹி டா²னேஹி ராஜாரஹோ ஹோதி ராஜபோ⁴க்³கோ³, ரஞ்ஞோ அங்க³ந்தேவ ஸங்க²ம் க³ச்ச²தி. கதமேஹி தீஹி? தூ³ரேபாதீ ச, அக்க²ணவேதீ⁴ ச, மஹதோ ச காயஸ்ஸ பதா³லேதா.

‘‘ஸேய்யதா²பி, ஸாள்ஹ, யோதா⁴ஜீவோ தூ³ரேபாதீ; ஏவமேவம் கோ², ஸாள்ஹ, அரியஸாவகோ ஸம்மாஸமாதி⁴ ஹோதி. ஸம்மாஸமாதி⁴, ஸாள்ஹ, அரியஸாவகோ யம் கிஞ்சி ரூபம் அதீதானாக³தபச்சுப்பன்னம் அஜ்ஜ²த்தம் வா ப³ஹித்³தா⁴ வா ஓளாரிகம் வா ஸுகு²மம் வா ஹீனம் வா பணீதம் வா யம் தூ³ரே ஸந்திகே வா ஸப்³ப³ம் ரூபம் ‘நேதம் மம, நேஸோஹமஸ்மி, ந மேஸோ அத்தா’தி ஏவமேதம் யதா²பூ⁴தம் ஸம்மப்பஞ்ஞாய பஸ்ஸதி. யா காசி வேத³னா…பே… யா காசி ஸஞ்ஞா… யே கேசி ஸங்கா²ரா… யம் கிஞ்சி விஞ்ஞாணம் அதீதானாக³தபச்சுப்பன்னம் அஜ்ஜ²த்தம் வா ப³ஹித்³தா⁴ வா ஓளாரிகம் வா ஸுகு²மம் வா ஹீனம் வா பணீதம் வா யம் தூ³ரே ஸந்திகே வா, ஸப்³ப³ம் விஞ்ஞாணம் ‘நேதம் மம, நேஸோஹமஸ்மி, ந மேஸோ அத்தா’தி ஏவமேதம் யதா²பூ⁴தம் ஸம்மப்பஞ்ஞாய பஸ்ஸதி.

‘‘ஸேய்யதா²பி, ஸாள்ஹ, யோதா⁴ஜீவோ அக்க²ணவேதீ⁴; ஏவமேவம் கோ², ஸாள்ஹ, அரியஸாவகோ ஸம்மாதி³ட்டி² ஹோதி. ஸம்மாதி³ட்டி², ஸாள்ஹ, அரியஸாவகோ ‘இத³ம் து³க்க²’ந்தி யதா²பூ⁴தம் பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானாதி.

‘‘ஸேய்யதா²பி, ஸாள்ஹ, யோதா⁴ஜீவோ மஹதோ காயஸ்ஸ பதா³லேதா; ஏவமேவம் கோ², ஸாள்ஹ, அரியஸாவகோ ஸம்மாவிமுத்தி ஹோதி. ஸம்மாவிமுத்தி, ஸாள்ஹ, அரியஸாவகோ மஹந்தம் அவிஜ்ஜாக்க²ந்த⁴ம் பதா³லேதீ’’தி. ச²ட்ட²ம்.