2. டா²னஸுத்தம்

192. ‘‘சத்தாரிமானி, பி⁴க்க²வே, டா²னானி சதூஹி டா²னேஹி வேதி³தப்³பா³னி. கதமானி சத்தாரி? ஸம்வாஸேன, பி⁴க்க²வே, ஸீலம் வேதி³தப்³ப³ம், தஞ்ச கோ² தீ³கே⁴ன அத்³து⁴னா, ந இத்தரம்; மனஸிகரோதா, நோ அமனஸிகரோதா; பஞ்ஞவதா, நோ து³ப்பஞ்ஞேன. ஸம்வோஹாரேன, பி⁴க்க²வே, ஸோசேய்யம் வேதி³தப்³ப³ம், தஞ்ச கோ² தீ³கே⁴ன அத்³து⁴னா, ந இத்தரம்; மனஸிகரோதா, நோ அமனஸிகரோதா; பஞ்ஞவதா, நோ து³ப்பஞ்ஞேன. ஆபதா³ஸு, பி⁴க்க²வே, தா²மோ வேதி³தப்³போ³, ஸோ ச கோ² தீ³கே⁴ன அத்³து⁴னா, ந இத்தரம்; மனஸிகரோதா, நோ அமனஸிகரோதா; பஞ்ஞவதா, நோ து³ப்பஞ்ஞேன. ஸாகச்சா²ய, பி⁴க்க²வே, பஞ்ஞா வேதி³தப்³பா³, ஸா ச கோ² தீ³கே⁴ன அத்³து⁴னா, ந இத்தரம்; மனஸிகரோதா, நோ அமனஸிகரோதா; பஞ்ஞவதா, நோ து³ப்பஞ்ஞேனாதி.

[ஸம். நி. 1.122] ‘‘‘ஸம்வாஸேன, பி⁴க்க²வே, ஸீலம் வேதி³தப்³ப³ம், தஞ்ச கோ² தீ³கே⁴ன அத்³து⁴னா, ந இத்தரம்; மனஸிகரோதா, நோ அமனஸிகரோதா; பஞ்ஞவதா, நோ து³ப்பஞ்ஞேனா’தி, இதி கோ² பனேதம் வுத்தம். கிஞ்சேதம் படிச்ச வுத்தம்? இத⁴, பி⁴க்க²வே, புக்³க³லோ புக்³க³லேன ஸத்³தி⁴ம் ஸம்வஸமானோ ஏவம் ஜானாதி – ‘தீ³க⁴ரத்தம் கோ² அயமாயஸ்மா க²ண்ட³காரீ சி²த்³த³காரீ ஸப³லகாரீ கம்மாஸகாரீ, ந ஸந்ததகாரீ ந ஸந்ததவுத்தி [ஸததவுத்தி (ஸ்யா. கம்.)]; ஸீலேஸு து³ஸ்ஸீலோ அயமாயஸ்மா, நாயமாயஸ்மா ஸீலவா’’’தி.

‘‘‘இத⁴ பன, பி⁴க்க²வே, புக்³க³லோ புக்³க³லேன ஸத்³தி⁴ம் ஸம்வஸமானோ ஏவம் ஜானாதி – ‘தீ³க⁴ரத்தம் கோ² அயமாயஸ்மா அக²ண்ட³காரீ அச்சி²த்³த³காரீ அஸப³லகாரீ அகம்மாஸகாரீ ஸந்ததகாரீ ஸந்ததவுத்தி; ஸீலேஸு ஸீலவா அயமாயஸ்மா, நாயமாயஸ்மா து³ஸ்ஸீலோ’தி. ‘ஸம்வாஸேன, பி⁴க்க²வே, ஸீலம் வேதி³தப்³ப³ம், தஞ்ச கோ² தீ³கே⁴ன அத்³து⁴னா, ந இத்தரம்; மனஸிகரோதா, நோ அமனஸிகரோதா; பஞ்ஞவதா, நோ து³ப்பஞ்ஞேனா’தி, இதி யம் தம் வுத்தம் இத³மேதம் படிச்ச வுத்தம்.

‘‘‘ஸம்வோஹாரேன, பி⁴க்க²வே, ஸோசேய்யம் வேதி³தப்³ப³ம், தஞ்ச கோ² தீ³கே⁴ன அத்³து⁴னா, ந இத்தரம்; மனஸிகரோதா, நோ அமனஸிகரோதா; பஞ்ஞவதா, நோ து³ப்பஞ்ஞேனா’தி, இதி கோ² பனேதம் வுத்தம். கிஞ்சேதம் படிச்ச வுத்தம்? இத⁴, பி⁴க்க²வே, புக்³க³லோ புக்³க³லேன ஸத்³தி⁴ம் ஸம்வோஹரமானோ ஏவம் ஜானாதி – ‘அஞ்ஞதா² கோ² அயமாயஸ்மா ஏகேன ஏகோ வோஹரதி, அஞ்ஞதா² த்³வீஹி, அஞ்ஞதா² தீஹி, அஞ்ஞதா² ஸம்ப³ஹுலேஹி; வோக்கமதி அயமாயஸ்மா புரிமவோஹாரா பச்சி²மவோஹாரம்; அபரிஸுத்³த⁴வோஹாரோ அயமாயஸ்மா, நாயமாயஸ்மா பரிஸுத்³த⁴வோஹாரோ’’’தி.

‘‘இத⁴ பன, பி⁴க்க²வே, புக்³க³லோ புக்³க³லேன ஸத்³தி⁴ம் ஸம்வோஹரமானோ ஏவம் ஜானாதி – ‘யதே²வ கோ² அயமாயஸ்மா ஏகேன ஏகோ வோஹரதி, ததா² த்³வீஹி, ததா² தீஹி, ததா² ஸம்ப³ஹுலேஹி. நாயமாயஸ்மா வோக்கமதி புரிமவோஹாரா பச்சி²மவோஹாரம்; பரிஸுத்³த⁴வோஹாரோ அயமாயஸ்மா, நாயமாயஸ்மா அபரிஸுத்³த⁴வோஹாரோ’தி. ‘ஸம்வோஹாரேன, பி⁴க்க²வே, ஸோசேய்யம் வேதி³தப்³ப³ம், தஞ்ச கோ² தீ³கே⁴ன அத்³து⁴னா, ந இத்தரம்; மனஸிகரோதா, நோ அமனஸிகரோதா; பஞ்ஞவதா, நோ து³ப்பஞ்ஞேனா’தி, இதி யம் தம் வுத்தம் இத³மேதம் படிச்ச வுத்தம்.

‘‘‘ஆபதா³ஸு, பி⁴க்க²வே, தா²மோ வேதி³தப்³போ³, ஸோ ச கோ² தீ³கே⁴ன அத்³து⁴னா, ந இத்தரம்; மனஸிகரோதா, நோ அமனஸிகரோதா; பஞ்ஞவதா, நோ து³ப்பஞ்ஞேனா’தி, இதி கோ² பனேதம் வுத்தம். கிஞ்சேதம் படிச்ச வுத்தம்? இத⁴, பி⁴க்க²வே, ஏகச்சோ ஞாதிப்³யஸனேன வா பு²ட்டோ² ஸமானோ, போ⁴க³ப்³யஸனேன வா பு²ட்டோ² ஸமானோ, ரோக³ப்³யஸனேன வா பு²ட்டோ² ஸமானோ ந இதி படிஸஞ்சிக்க²தி – ‘ததா²பூ⁴தோ கோ² அயம் லோகஸன்னிவாஸோ ததா²பூ⁴தோ அயம் அத்தபா⁴வபடிலாபோ⁴ யதா²பூ⁴தே லோகஸன்னிவாஸே யதா²பூ⁴தே அத்தபா⁴வபடிலாபே⁴ அட்ட² லோகத⁴ம்மா லோகம் அனுபரிவத்தந்தி லோகோ ச அட்ட² லோகத⁴ம்மே அனுபரிவத்ததி – லாபோ⁴ ச, அலாபோ⁴ ச, யஸோ ச, அயஸோ ச, நிந்தா³ ச, பஸம்ஸா ச, ஸுக²ஞ்ச, து³க்க²ஞ்சா’தி. ஸோ ஞாதிப்³யஸனேன வா பு²ட்டோ² ஸமானோ போ⁴க³ப்³யஸனேன வா பு²ட்டோ² ஸமானோ ரோக³ப்³யஸனேன வா பு²ட்டோ² ஸமானோ ஸோசதி கிலமதி பரிதே³வதி, உரத்தாளிம் கந்த³தி, ஸம்மோஹம் ஆபஜ்ஜதி.

‘‘இத⁴ பன, பி⁴க்க²வே, ஏகச்சோ ஞாதிப்³யஸனேன வா பு²ட்டோ² ஸமானோ போ⁴க³ப்³யஸனேன வா பு²ட்டோ² ஸமானோ ரோக³ப்³யஸனேன வா பு²ட்டோ² ஸமானோ இதி படிஸஞ்சிக்க²தி – ‘ததா²பூ⁴தோ கோ² அயம் லோகஸன்னிவாஸோ ததா²பூ⁴தோ அயம் அத்தபா⁴வபடிலாபோ⁴ யதா²பூ⁴தே லோகஸன்னிவாஸே யதா²பூ⁴தே அத்தபா⁴வபடிலாபே⁴ அட்ட² லோகத⁴ம்மா லோகம் அனுபரிவத்தந்தி லோகோ ச அட்ட² லோகத⁴ம்மே அனுபரிவத்ததி – லாபோ⁴ ச, அலாபோ⁴ ச, யஸோ ச, அயஸோ ச, நிந்தா³ ச, பஸம்ஸா ச, ஸுக²ஞ்ச, து³க்க²ஞ்சா’தி. ஸோ ஞாதிப்³யஸனேன வா பு²ட்டோ² ஸமானோ போ⁴க³ப்³யஸனேன வா பு²ட்டோ² ஸமானோ ரோக³ப்³யஸனேன வா பு²ட்டோ² ஸமானோ ந ஸோசதி ந கிலமதி ந பரிதே³வதி, ந உரத்தாளிம் கந்த³தி, ந ஸம்மோஹம் ஆபஜ்ஜதி. ‘ஆபதா³ஸு, பி⁴க்க²வே, தா²மோ வேதி³தப்³போ³, ஸோ ச கோ² தீ³கே⁴ன அத்³து⁴னா, ந இத்தரம்; மனஸிகரோதா, நோ அமனஸிகரோதா; பஞ்ஞவதா, நோ து³ப்பஞ்ஞேனா’தி, இதி யம் தம் வுத்தம் இத³மேதம் படிச்ச வுத்தம்.

‘‘‘ஸாகச்சா²ய, பி⁴க்க²வே, பஞ்ஞா வேதி³தப்³பா³, ஸா ச கோ² தீ³கே⁴ன அத்³து⁴னா, ந இத்தரம்; மனஸிகரோதா, நோ அமனஸிகரோதா; பஞ்ஞவதா, நோ து³ப்பஞ்ஞேனா’தி, இதி கோ² பனேதம் வுத்தம். கிஞ்சேதம் படிச்ச வுத்தம்? இத⁴, பி⁴க்க²வே, புக்³க³லோ புக்³க³லேன ஸத்³தி⁴ம் ஸாகச்சா²யமானோ ஏவம் ஜானாதி – ‘யதா² கோ² இமஸ்ஸ ஆயஸ்மதோ உம்மக்³கோ³ யதா² ச அபி⁴னீஹாரோ யதா² ச பஞ்ஹாஸமுதா³ஹாரோ, து³ப்பஞ்ஞோ அயமாயஸ்மா, நாயமாயஸ்மா பஞ்ஞவா. தம் கிஸ்ஸ ஹேது? ததா² ஹி அயமாயஸ்மா ந சேவ க³ம்பீ⁴ரம் அத்த²பத³ம் உதா³ஹரதி ஸந்தம் பணீதம் அதக்காவசரம் நிபுணம் பண்டி³தவேத³னீயம். யஞ்ச அயமாயஸ்மா த⁴ம்மம் பா⁴ஸதி தஸ்ஸ ச நப்படிப³லோ ஸம்கி²த்தேன வா வித்தா²ரேன வா அத்த²ம் ஆசிக்கி²தும் தே³ஸேதும் பஞ்ஞாபேதும் பட்ட²பேதும் விவரிதும் விப⁴ஜிதும் உத்தானீகாதும். து³ப்பஞ்ஞோ அயமாயஸ்மா, நாயமாயஸ்மா பஞ்ஞவா’’’தி.

‘‘ஸேய்யதா²பி, பி⁴க்க²வே, சக்கு²மா புரிஸோ உத³கரஹத³ஸ்ஸ தீரே டி²தோ பஸ்ஸேய்ய பரித்தம் மச்ச²ம் உம்முஜ்ஜமானம். தஸ்ஸ ஏவமஸ்ஸ – ‘யதா² கோ² இமஸ்ஸ மச்ச²ஸ்ஸ உம்மக்³கோ³ யதா² ச ஊமிகா⁴தோ யதா² ச வேகா³யிதத்தம், பரித்தோ அயம் மச்சோ², நாயம் மச்சோ² மஹந்தோ’தி. ஏவமேவம் கோ², பி⁴க்க²வே, புக்³க³லோ புக்³க³லேன ஸத்³தி⁴ம் ஸாகச்சா²யமானோ ஏவம் ஜானாதி – ‘யதா² கோ² இமஸ்ஸ ஆயஸ்மதோ உம்மக்³கோ³ யதா² ச அபி⁴னீஹாரோ யதா² ச பஞ்ஹாஸமுதா³ஹாரோ, து³ப்பஞ்ஞோ அயமாயஸ்மா, நாயமாயஸ்மா பஞ்ஞவா. தம் கிஸ்ஸ ஹேது? ததா² ஹி அயமாயஸ்மா ந சேவ க³ம்பீ⁴ரம் அத்த²பத³ம் உதா³ஹரதி ஸந்தம் பணீதம் அதக்காவசரம் நிபுணம் பண்டி³தவேத³னீயம். யஞ்ச அயமாயஸ்மா த⁴ம்மம் பா⁴ஸதி, தஸ்ஸ ச ந படிப³லோ ஸம்கி²த்தேன வா வித்தா²ரேன வா அத்த²ம் ஆசிக்கி²தும் தே³ஸேதும் பஞ்ஞாபேதும் பட்ட²பேதும் விவரிதும் விப⁴ஜிதும் உத்தானீகாதும். து³ப்பஞ்ஞோ அயமாயஸ்மா, நாயமாயஸ்மா பஞ்ஞவா’’’தி.

‘‘இத⁴ பன, பி⁴க்க²வே, புக்³க³லோ புக்³க³லேன ஸத்³தி⁴ம் ஸாகச்சா²யமானோ ஏவம் ஜானாதி – ‘யதா² கோ² இமஸ்ஸ ஆயஸ்மதோ உம்மக்³கோ³ யதா² ச அபி⁴னீஹாரோ யதா² ச பஞ்ஹாஸமுதா³ஹாரோ, பஞ்ஞவா அயமாயஸ்மா, நாயமாயஸ்மா து³ப்பஞ்ஞோ. தம் கிஸ்ஸ ஹேது? ததா² ஹி அயமாயஸ்மா க³ம்பீ⁴ரஞ்சேவ அத்த²பத³ம் உதா³ஹரதி ஸந்தம் பணீதம் அதக்காவசரம் நிபுணம் பண்டி³தவேத³னீயம். யஞ்ச அயமாயஸ்மா த⁴ம்மம் பா⁴ஸதி, தஸ்ஸ ச படிப³லோ ஸம்கி²த்தேன வா வித்தா²ரேன வா அத்த²ம் ஆசிக்கி²தும் தே³ஸேதும் பஞ்ஞாபேதும் பட்ட²பேதும் விவரிதும் விப⁴ஜிதும் உத்தானீகாதும். பஞ்ஞவா அயமாயஸ்மா, நாயமாயஸ்மா து³ப்பஞ்ஞோ’’’தி.

‘‘ஸேய்யதா²பி, பி⁴க்க²வே, சக்கு²மா புரிஸோ உத³கரஹத³ஸ்ஸ தீரே டி²தோ பஸ்ஸேய்ய மஹந்தம் மச்ச²ம் உம்முஜ்ஜமானம். தஸ்ஸ ஏவமஸ்ஸ – ‘யதா² கோ² இமஸ்ஸ மச்ச²ஸ்ஸ உம்மக்³கோ³ யதா² ச ஊமிகா⁴தோ யதா² ச வேகா³யிதத்தம், மஹந்தோ அயம் மச்சோ², நாயம் மச்சோ² பரித்தோ’தி. ஏவமேவம் கோ², பி⁴க்க²வே, புக்³க³லோ புக்³க³லேன ஸத்³தி⁴ம் ஸாகச்சா²யமானோ ஏவம் ஜானாதி – ‘யதா² கோ² இமஸ்ஸ ஆயஸ்மதோ உம்மக்³கோ³ யதா² ச அபி⁴னீஹாரோ யதா² ச பஞ்ஹாஸமுதா³ஹாரோ, பஞ்ஞவா அயமாயஸ்மா, நாயமாயஸ்மா து³ப்பஞ்ஞோ. தம் கிஸ்ஸ ஹேது? ததா² ஹி அயமாயஸ்மா க³ம்பீ⁴ரஞ்சேவ அத்த²பத³ம் உதா³ஹரதி ஸந்தம் பணீதம் அதக்காவசரம் நிபுணம் பண்டி³தவேத³னீயம். யஞ்ச அயமாயஸ்மா த⁴ம்மம் பா⁴ஸதி, தஸ்ஸ ச படிப³லோ ஸம்கி²த்தேன வா வித்தா²ரேன வா அத்த²ம் ஆசிக்கி²தும் தே³ஸேதும் பஞ்ஞாபேதும் பட்ட²பேதும் விவரிதும் விப⁴ஜிதும் உத்தானீகாதும். பஞ்ஞவா அயமாயஸ்மா, நாயமாயஸ்மா து³ப்பஞ்ஞோ’தி.

‘‘‘ஸாகச்சா²ய, பி⁴க்க²வே, பஞ்ஞா வேதி³தப்³பா³, ஸா ச கோ² தீ³கே⁴ன அத்³து⁴னா, ந இத்தரம்; மனஸிகரோதா, நோ அமனஸிகரோதா; பஞ்ஞவதா, நோ து³ப்பஞ்ஞேனா’தி, இதி யம் தம் வுத்தம் இத³மேதம் படிச்ச வுத்தம். இமானி கோ², பி⁴க்க²வே, சத்தாரி டா²னானி இமேஹி சதூஹி டா²னேஹி வேதி³தப்³பா³னீ’’தி. து³தியம்.