(17) 2. படிபதா³வக்³கோ³

1. ஸம்கி²த்தஸுத்தம்

161. ‘‘சதஸ்ஸோ இமா, பி⁴க்க²வே, படிபதா³. கதமா சதஸ்ஸோ? து³க்கா² படிபதா³ த³ந்தா⁴பி⁴ஞ்ஞா, து³க்கா² படிபதா³ கி²ப்பாபி⁴ஞ்ஞா, ஸுகா² படிபதா³ த³ந்தா⁴பி⁴ஞ்ஞா, ஸுகா² படிபதா³ கி²ப்பாபி⁴ஞ்ஞா – இமா கோ², பி⁴க்க²வே, சதஸ்ஸோ படிபதா³’’தி. பட²மம்.

2. வித்தா²ரஸுத்தம்

162. ‘‘சதஸ்ஸோ இமா, பி⁴க்க²வே, படிபதா³. கதமா சதஸ்ஸோ? து³க்கா² படிபதா³ த³ந்தா⁴பி⁴ஞ்ஞா, து³க்கா² படிபதா³ கி²ப்பாபி⁴ஞ்ஞா, ஸுகா² படிபதா³ த³ந்தா⁴பி⁴ஞ்ஞா, ஸுகா² படிபதா³ கி²ப்பாபி⁴ஞ்ஞா.

‘‘கதமா ச, பி⁴க்க²வே, து³க்கா² படிபதா³ த³ந்தா⁴பி⁴ஞ்ஞா? இத⁴, பி⁴க்க²வே, ஏகச்சோ பகதியாபி திப்³ப³ராக³ஜாதிகோ ஹோதி, அபி⁴க்க²ணம் ராக³ஜம் து³க்க²ம் தோ³மனஸ்ஸம் படிஸம்வேதே³தி. பகதியாபி திப்³ப³தோ³ஸஜாதிகோ ஹோதி, அபி⁴க்க²ணம் தோ³ஸஜம் து³க்க²ம் தோ³மனஸ்ஸம் படிஸம்வேதே³தி. பகதியாபி திப்³ப³மோஹஜாதிகோ ஹோதி, அபி⁴க்க²ணம் மோஹஜம் து³க்க²ம் தோ³மனஸ்ஸம் படிஸம்வேதே³தி. தஸ்ஸிமானி பஞ்சிந்த்³ரியானி முதூ³னி பாதுப⁴வந்தி – ஸத்³தி⁴ந்த்³ரியம், வீரியிந்த்³ரியம், ஸதிந்த்³ரியம், ஸமாதி⁴ந்த்³ரியம், பஞ்ஞிந்த்³ரியம். ஸோ இமேஸம் பஞ்சன்னம் இந்த்³ரியானம் முது³த்தா த³ந்த⁴ம் ஆனந்தரியம் பாபுணாதி ஆஸவானம் க²யாய. அயம் வுச்சதி, பி⁴க்க²வே, து³க்கா² படிபதா³ த³ந்தா⁴பி⁴ஞ்ஞா.

‘‘கதமா ச, பி⁴க்க²வே, து³க்கா² படிபதா³ கி²ப்பாபி⁴ஞ்ஞா? இத⁴, பி⁴க்க²வே, ஏகச்சோ பகதியாபி திப்³ப³ராக³ஜாதிகோ ஹோதி, அபி⁴க்க²ணம் ராக³ஜம் து³க்க²ம் தோ³மனஸ்ஸம் படிஸம்வேதே³தி. பகதியாபி திப்³ப³தோ³ஸஜாதிகோ ஹோதி, அபி⁴க்க²ணம் தோ³ஸஜம் து³க்க²ம் தோ³மனஸ்ஸம் படிஸம்வேதே³தி. பகதியாபி திப்³ப³மோஹஜாதிகோ ஹோதி, அபி⁴க்க²ணம் மோஹஜம் து³க்க²ம் தோ³மனஸ்ஸம் படிஸம்வேதே³தி. தஸ்ஸிமானி பஞ்சிந்த்³ரியானி அதி⁴மத்தானி பாதுப⁴வந்தி – ஸத்³தி⁴ந்த்³ரியம், வீரியிந்த்³ரியம், ஸதிந்த்³ரியம், ஸமாதி⁴ந்த்³ரியம், பஞ்ஞிந்த்³ரியம். ஸோ இமேஸம் பஞ்சன்னம் இந்த்³ரியானம் அதி⁴மத்தத்தா கி²ப்பம் ஆனந்தரியம் பாபுணாதி ஆஸவானம் க²யாய. அயம் வுச்சதி, பி⁴க்க²வே, து³க்கா² படிபதா³ கி²ப்பாபி⁴ஞ்ஞா.

‘‘கதமா ச, பி⁴க்க²வே, ஸுகா² படிபதா³ த³ந்தா⁴பி⁴ஞ்ஞா? இத⁴, பி⁴க்க²வே, ஏகச்சோ பகதியாபி ந திப்³ப³ராக³ஜாதிகோ ஹோதி, நாபி⁴க்க²ணம் ராக³ஜம் து³க்க²ம் தோ³மனஸ்ஸம் படிஸம்வேதே³தி. பகதியாபி ந திப்³ப³தோ³ஸஜாதிகோ ஹோதி, நாபி⁴க்க²ணம் தோ³ஸஜம் து³க்க²ம் தோ³மனஸ்ஸம் படிஸம்வேதே³தி. பகதியாபி ந திப்³ப³மோஹஜாதிகோ ஹோதி, நாபி⁴க்க²ணம் மோஹஜம் து³க்க²ம் தோ³மனஸ்ஸம் படிஸம்வேதே³தி. தஸ்ஸிமானி பஞ்சிந்த்³ரியானி முதூ³னி பாதுப⁴வந்தி – ஸத்³தி⁴ந்த்³ரியம்…பே… பஞ்ஞிந்த்³ரியம். ஸோ இமேஸம் பஞ்சன்னம் இந்த்³ரியானம் முது³த்தா த³ந்த⁴ம் ஆனந்தரியம் பாபுணாதி ஆஸவானம் க²யாய. அயம் வுச்சதி, பி⁴க்க²வே, ஸுகா² படிபதா³ த³ந்தா⁴பி⁴ஞ்ஞா.

‘‘கதமா ச, பி⁴க்க²வே, ஸுகா² படிபதா³ கி²ப்பாபி⁴ஞ்ஞா? இத⁴, பி⁴க்க²வே, ஏகச்சோ பகதியாபி ந திப்³ப³ராக³ஜாதிகோ ஹோதி, நாபி⁴க்க²ணம் ராக³ஜம் து³க்க²ம் தோ³மனஸ்ஸம் படிஸம்வேதே³தி. பகதியாபி ந திப்³ப³தோ³ஸஜாதிகோ ஹோதி, நாபி⁴க்க²ணம் தோ³ஸஜம் து³க்க²ம் தோ³மனஸ்ஸம் படிஸம்வேதே³தி. பகதியாபி ந திப்³ப³மோஹஜாதிகோ ஹோதி, நாபி⁴க்க²ணம் மோஹஜம் து³க்க²ம் தோ³மனஸ்ஸம் படிஸம்வேதே³தி. தஸ்ஸிமானி பஞ்சிந்த்³ரியானி அதி⁴மத்தானி பாதுப⁴வந்தி – ஸத்³தி⁴ந்த்³ரியம், வீரியிந்த்³ரியம், ஸதிந்த்³ரியம், ஸமாதி⁴ந்த்³ரியம், பஞ்ஞிந்த்³ரியம். ஸோ இமேஸம் பஞ்சன்னம் இந்த்³ரியானம் அதி⁴மத்தத்தா கி²ப்பம் ஆனந்தரியம் பாபுணாதி ஆஸவானம் க²யாய. அயம் வுச்சதி, பி⁴க்க²வே, ஸுகா² படிபதா³ கி²ப்பாபி⁴ஞ்ஞா. இமா கோ², பி⁴க்க²வே, சதஸ்ஸோ படிபதா³’’தி. து³தியம்.

3. அஸுப⁴ஸுத்தம்

163. ‘‘சதஸ்ஸோ இமா, பி⁴க்க²வே, படிபதா³. கதமா சதஸ்ஸோ? து³க்கா² படிபதா³ த³ந்தா⁴பி⁴ஞ்ஞா, து³க்கா² படிபதா³ கி²ப்பாபி⁴ஞ்ஞா, ஸுகா² படிபதா³ த³ந்தா⁴பி⁴ஞ்ஞா, ஸுகா² படிபதா³ கி²ப்பாபி⁴ஞ்ஞா.

‘‘கதமா ச, பி⁴க்க²வே, து³க்கா² படிபதா³ த³ந்தா⁴பி⁴ஞ்ஞா? இத⁴, பி⁴க்க²வே, பி⁴க்கு² அஸுபா⁴னுபஸ்ஸீ காயே விஹரதி, ஆஹாரே படிகூலஸஞ்ஞீ [படிக்கூலஸஞ்ஞீ (ஸீ. ஸ்யா. கம். பீ.)], ஸப்³ப³லோகே அனபி⁴ரதிஸஞ்ஞீ [அனபி⁴ரதஸஞ்ஞீ (ஸீ. ஸ்யா. கம். பீ.)], ஸப்³ப³ஸங்கா²ரேஸு அனிச்சானுபஸ்ஸீ; மரணஸஞ்ஞா கோ² பனஸ்ஸ அஜ்ஜ²த்தம் ஸூபட்டி²தா ஹோதி. ஸோ இமானி பஞ்ச ஸேக²ப³லானி [ஸேக்க²ப³லானி (ஸ்யா. கம்.)] உபனிஸ்ஸாய விஹரதி – ஸத்³தா⁴ப³லம், ஹிரிப³லம், ஓத்தப்பப³லம், வீரியப³லம், பஞ்ஞாப³லம். தஸ்ஸிமானி பஞ்சிந்த்³ரியானி முதூ³னி பாதுப⁴வந்தி – ஸத்³தி⁴ந்த்³ரியம், வீரியிந்த்³ரியம், ஸதிந்த்³ரியம், ஸமாதி⁴ந்த்³ரியம், பஞ்ஞிந்த்³ரியம். ஸோ இமேஸம் பஞ்சன்னம் இந்த்³ரியானம் முது³த்தா த³ந்த⁴ம் ஆனந்தரியம் பாபுணாதி ஆஸவானம் க²யாய. அயம் வுச்சதி, பி⁴க்க²வே, து³க்கா² படிபதா³ த³ந்தா⁴பி⁴ஞ்ஞா.

‘‘கதமா ச, பி⁴க்க²வே, து³க்கா² படிபதா³ கி²ப்பாபி⁴ஞ்ஞா? இத⁴, பி⁴க்க²வே, பி⁴க்கு² அஸுபா⁴னுபஸ்ஸீ காயே விஹரதி, ஆஹாரே படிகூலஸஞ்ஞீ, ஸப்³ப³லோகே அனபி⁴ரதிஸஞ்ஞீ, ஸப்³ப³ஸங்கா²ரேஸு அனிச்சானுபஸ்ஸீ; மரணஸஞ்ஞா கோ² பனஸ்ஸ அஜ்ஜ²த்தம் ஸூபட்டி²தா ஹோதி. ஸோ இமானி பஞ்ச ஸேக²ப³லானி உபனிஸ்ஸாய விஹரதி – ஸத்³தா⁴ப³லம்…பே… பஞ்ஞாப³லம். தஸ்ஸிமானி பஞ்சிந்த்³ரியானி அதி⁴மத்தானி பாதுப⁴வந்தி – ஸத்³தி⁴ந்த்³ரியம்…பே… பஞ்ஞிந்த்³ரியம். ஸோ இமேஸம் பஞ்சன்னம் இந்த்³ரியானம் அதி⁴மத்தத்தா கி²ப்பம் ஆனந்தரியம் பாபுணாதி ஆஸவானம் க²யாய. அயம் வுச்சதி, பி⁴க்க²வே, து³க்கா² படிபதா³ கி²ப்பாபி⁴ஞ்ஞா.

‘‘கதமா ச, பி⁴க்க²வே, ஸுகா² படிபதா³ த³ந்தா⁴பி⁴ஞ்ஞா? இத⁴ பி⁴க்க²வே, பி⁴க்கு² விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹரதி; விதக்கவிசாரானம் வூபஸமா அஜ்ஜ²த்தம் ஸம்பஸாத³னம் சேதஸோ ஏகோதி³பா⁴வம் அவிதக்கம் அவிசாரம் ஸமாதி⁴ஜம் பீதிஸுக²ம் து³தியம் ஜா²னம் உபஸம்பஜ்ஜ விஹரதி; பீதியா ச விராகா³ உபேக்க²கோ ச விஹரதி ஸதோ ச ஸம்பஜானோ ஸுக²ஞ்ச காயேன படிஸம்வேதே³தி யம் தம் அரியா ஆசிக்க²ந்தி – ‘உபேக்க²கோ ஸதிமா ஸுக²விஹாரீ’தி ததியம் ஜா²னம் உபஸம்பஜ்ஜ விஹரதி; ஸுக²ஸ்ஸ ச பஹானா து³க்க²ஸ்ஸ ச பஹானா புப்³பே³வ ஸோமனஸ்ஸதோ³மனஸ்ஸானம் அத்த²ங்க³மா அது³க்க²மஸுக²ம் உபேக்கா²ஸதிபாரிஸுத்³தி⁴ம் சதுத்த²ம் ஜா²னம் உபஸம்பஜ்ஜ விஹரதி. ஸோ இமானி பஞ்ச ஸேக²ப³லானி உபனிஸ்ஸாய விஹரதி – ஸத்³தா⁴ப³லம்…பே… பஞ்ஞாப³லம். தஸ்ஸிமானி பஞ்சிந்த்³ரியானி முதூ³னி பாதுப⁴வந்தி – ஸத்³தி⁴ந்த்³ரியம்…பே… பஞ்ஞிந்த்³ரியம். ஸோ இமேஸம் பஞ்சன்னம் இந்த்³ரியானம் முது³த்தா த³ந்த⁴ம் ஆனந்தரியம் பாபுணாதி ஆஸவானம் க²யாய. அயம் வுச்சதி, பி⁴க்க²வே, ஸுகா² படிபதா³ த³ந்தா⁴பி⁴ஞ்ஞா.

‘‘கதமா ச, பி⁴க்க²வே, ஸுகா² படிபதா³ கி²ப்பாபி⁴ஞ்ஞா? [கதா². 815 ஆத³யோ] இத⁴, பி⁴க்க²வே, பி⁴க்கு² விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹரதி…பே… து³தியம் ஜா²னம்…பே… ததியம் ஜா²னம்…பே… சதுத்த²ம் ஜா²னம் உபஸம்பஜ்ஜ விஹரதி. ஸோ இமானி பஞ்ச ஸேக²ப³லானி உபனிஸ்ஸாய விஹரதி – ஸத்³தா⁴ப³லம், ஹிரிப³லம், ஓத்தப்பப³லம், வீரியப³லம், பஞ்ஞாப³லம். தஸ்ஸிமானி பஞ்சிந்த்³ரியானி அதி⁴மத்தானி பாதுப⁴வந்தி – ஸத்³தி⁴ந்த்³ரியம், வீரியிந்த்³ரியம், ஸதிந்த்³ரியம், ஸமாதி⁴ந்த்³ரியம், பஞ்ஞிந்த்³ரியம். ஸோ இமேஸம் பஞ்சன்னம் இந்த்³ரியானம் அதி⁴மத்தத்தா கி²ப்பம் ஆனந்தரியம் பாபுணாதி ஆஸவானம் க²யாய. அயம் வுச்சதி, பி⁴க்க²வே, ஸுகா² படிபதா³ கி²ப்பாபி⁴ஞ்ஞா. இமா கோ², பி⁴க்க²வே, சதஸ்ஸோ படிபதா³’’தி. ததியம்.

4. பட²மக²மஸுத்தம்

164. ‘‘சதஸ்ஸோ இமா, பி⁴க்க²வே, படிபதா³. கதமா சதஸ்ஸோ? அக்க²மா படிபதா³, க²மா படிபதா³, த³மா படிபதா³, ஸமா படிபதா³. கதமா ச, பி⁴க்க²வே, அக்க²மா படிபதா³? இத⁴, பி⁴க்க²வே, ஏகச்சோ [ஏகச்சோ புக்³க³லோ (ஸீ. ஸ்யா. கம்.)] அக்கோஸந்தம் பச்சக்கோஸதி, ரோஸந்தம் படிரோஸதி, ப⁴ண்ட³ந்தம் படிப⁴ண்ட³தி. அயம் வுச்சதி, பி⁴க்க²வே, அக்க²மா படிபதா³.

‘‘கதமா ச, பி⁴க்க²வே, க²மா படிபதா³? இத⁴, பி⁴க்க²வே, ஏகச்சோ அக்கோஸந்தம் ந பச்சக்கோஸதி, ரோஸந்தம் ந படிரோஸதி, ப⁴ண்ட³ந்தம் ந படிப⁴ண்ட³தி. அயம் வுச்சதி, பி⁴க்க²வே, க²மா படிபதா³.

‘‘கதமா ச, பி⁴க்க²வே, த³மா படிபதா³? இத⁴, பி⁴க்க²வே, பி⁴க்கு² சக்கு²னா ரூபம் தி³ஸ்வா ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ; யத்வாதி⁴கரணமேனம் சக்கு²ந்த்³ரியம் அஸம்வுதம் விஹரந்தம் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவேய்யும், தஸ்ஸ ஸம்வராய படிபஜ்ஜதி; ரக்க²தி சக்கு²ந்த்³ரியம்; சக்கு²ந்த்³ரியே ஸம்வரம் ஆபஜ்ஜதி. ஸோதேன ஸத்³த³ம் ஸுத்வா… கா⁴னேன க³ந்த⁴ம் கா⁴யித்வா… ஜிவ்ஹாய ரஸம் ஸாயித்வா… காயேன போ²ட்ட²ப்³ப³ம் பு²ஸித்வா… மனஸா த⁴ம்மம் விஞ்ஞாய ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ; யத்வாதி⁴கரணமேனம் மனிந்த்³ரியம் அஸம்வுதம் விஹரந்தம் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவேய்யும், தஸ்ஸ ஸம்வராய படிபஜ்ஜதி; ரக்க²தி மனிந்த்³ரியம்; மனிந்த்³ரியே ஸம்வரம் ஆபஜ்ஜதி. அயம் வுச்சதி, பி⁴க்க²வே, த³மா படிபதா³.

‘‘கதமா ச, பி⁴க்க²வே, ஸமா படிபதா³? இத⁴, பி⁴க்க²வே, பி⁴க்கு² உப்பன்னம் காமவிதக்கம் நாதி⁴வாஸேதி பஜஹதி வினோதே³தி ஸமேதி ப்³யந்தீகரோதி அனபா⁴வம் க³மேதி; உப்பன்னம் ப்³யாபாத³விதக்கம்…பே… உப்பன்னம் விஹிம்ஸாவிதக்கம்… உப்பன்னுப்பன்னே பாபகே அகுஸலே த⁴ம்மே நாதி⁴வாஸேதி பஜஹதி வினோதே³தி ஸமேதி ப்³யந்தீகரோதி அனபா⁴வம் க³மேதி. அயம் வுச்சதி, பி⁴க்க²வே, ஸமா படிபதா³. இமா கோ², பி⁴க்க²வே, சதஸ்ஸோ படிபதா³’’தி. சதுத்த²ம்.

5. து³தியக²மஸுத்தம்

165. ‘‘சதஸ்ஸோ இமா, பி⁴க்க²வே, படிபதா³. கதமா சதஸ்ஸோ? அக்க²மா படிபதா³, க²மா படிபதா³, த³மா படிபதா³, ஸமா படிபதா³.

‘‘கதமா ச, பி⁴க்க²வே, அக்க²மா படிபதா³? இத⁴, பி⁴க்க²வே, ஏகச்சோ அக்க²மோ ஹோதி ஸீதஸ்ஸ உண்ஹஸ்ஸ ஜிக⁴ச்சா²ய பிபாஸாய, ட³ம்ஸமகஸவாதாதபஸரீஸபஸம்ப²ஸ்ஸானம் து³ருத்தானம் து³ராக³தானம் வசனபதா²னம் உப்பன்னானம் ஸாரீரிகானம் வேத³னானம் து³க்கா²னம் திப்³பா³னம் க²ரானம் கடுகானம் அஸாதானம் அமனாபானம் பாணஹரானம் அனதி⁴வாஸகஜாதிகோ ஹோதி. அயம் வுச்சதி, பி⁴க்க²வே, அக்க²மா படிபதா³.

‘‘கதமா ச, பி⁴க்க²வே, க²மா படிபதா³? இத⁴, பி⁴க்க²வே, ஏகச்சோ க²மோ ஹோதி ஸீதஸ்ஸ உண்ஹஸ்ஸ ஜிக⁴ச்சா²ய பிபாஸாய, ட³ம்ஸமகஸவாதாதபஸரீஸபஸம்ப²ஸ்ஸானம் து³ருத்தானம் து³ராக³தானம் வசனபதா²னம் உப்பன்னானம் ஸாரீரிகானம் வேத³னானம் து³க்கா²னம் திப்³பா³னம் க²ரானம் கடுகானம் அஸாதானம் அமனாபானம் பாணஹரானம் அதி⁴வாஸகஜாதிகோ ஹோதி. அயம் வுச்சதி, பி⁴க்க²வே, க²மா படிபதா³.

‘‘கதமா ச, பி⁴க்க²வே, த³மா படிபதா³? இத⁴, பி⁴க்க²வே, பி⁴க்கு² சக்கு²னா ரூபம் தி³ஸ்வா ந நிமித்தக்³கா³ஹீ ஹோதி…பே… ஸோதேன ஸத்³த³ம் ஸுத்வா… கா⁴னேன க³ந்த⁴ம் கா⁴யித்வா… ஜிவ்ஹாய ரஸம் ஸாயித்வா… காயேன போ²ட்ட²ப்³ப³ம் பு²ஸித்வா… மனஸா த⁴ம்மம் விஞ்ஞாய ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ; யத்வாதி⁴கரணமேனம் மனிந்த்³ரியம் அஸம்வுதம் விஹரந்தம் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவேய்யும், தஸ்ஸ ஸம்வராய படிபஜ்ஜதி; ரக்க²தி மனிந்த்³ரியம்; மனிந்த்³ரியே ஸம்வரம் ஆபஜ்ஜதி. அயம் வுச்சதி, பி⁴க்க²வே, த³மா படிபதா³.

‘‘கதமா ச, பி⁴க்க²வே, ஸமா படிபதா³? இத⁴, பி⁴க்க²வே, பி⁴க்கு² உப்பன்னம் காமவிதக்கம் நாதி⁴வாஸேதி பஜஹதி வினோதே³தி ஸமேதி ப்³யந்தீகரோதி அனபா⁴வம் க³மேதி, உப்பன்னம் ப்³யாபாத³விதக்கம்…பே… உப்பன்னம் விஹிம்ஸாவிதக்கம்… உப்பன்னுப்பன்னே பாபகே அகுஸலே த⁴ம்மே நாதி⁴வாஸேதி பஜஹதி வினோதே³தி ஸமேதி ப்³யந்தீகரோதி அனபா⁴வம் க³மேதி. அயம் வுச்சதி, பி⁴க்க²வே, ஸமா படிபதா³. இமா கோ², பி⁴க்க²வே, சதஸ்ஸோ படிபதா³’’தி. பஞ்சமம்.

6. உப⁴யஸுத்தம்

166. ‘‘சதஸ்ஸோ இமா, பி⁴க்க²வே, படிபதா³. கதமா சதஸ்ஸோ? து³க்கா² படிபதா³ த³ந்தா⁴பி⁴ஞ்ஞா, து³க்கா² படிபதா³ கி²ப்பாபி⁴ஞ்ஞா, ஸுகா² படிபதா³ த³ந்தா⁴பி⁴ஞ்ஞா, ஸுகா² படிபதா³ கி²ப்பாபி⁴ஞ்ஞா.

‘‘தத்ர, பி⁴க்க²வே, யாயம் படிபதா³ து³க்கா² த³ந்தா⁴பி⁴ஞ்ஞா, அயம், பி⁴க்க²வே, படிபதா³ உப⁴யேனேவ ஹீனா அக்கா²யதி. யம்பாயம் படிபதா³ து³க்கா², இமினாபாயம் ஹீனா அக்கா²யதி; யம்பாயம் படிபதா³ த³ந்தா⁴, இமினாபாயம் ஹீனா அக்கா²யதி. அயம், பி⁴க்க²வே, படிபதா³ உப⁴யேனேவ ஹீனா அக்கா²யதி.

‘‘தத்ர, பி⁴க்க²வே, யாயம் படிபதா³ து³க்கா² கி²ப்பாபி⁴ஞ்ஞா, அயம், பி⁴க்க²வே, படிபதா³ து³க்க²த்தா ஹீனா அக்கா²யதி.

‘‘தத்ர, பி⁴க்க²வே, யாயம் படிபதா³ ஸுகா² த³ந்தா⁴பி⁴ஞ்ஞா, அயம், பி⁴க்க²வே, படிபதா³ த³ந்த⁴த்தா ஹீனா அக்கா²யதி.

‘‘தத்ர, பி⁴க்க²வே, யாயம் படிபதா³ ஸுகா² கி²ப்பாபி⁴ஞ்ஞா, அயம், பி⁴க்க²வே, படிபதா³ உப⁴யேனேவ பணீதா அக்கா²யதி. யம்பாயம் படிபதா³ ஸுகா², இமினாபாயம் பணீதா அக்கா²யதி; யம்பாயம் படிபதா³ கி²ப்பா, இமினாபாயம் பணீதா அக்கா²யதி. அயம், பி⁴க்க²வே, படிபதா³ உப⁴யேனேவ பணீதா அக்கா²யதி. இமா கோ², பி⁴க்க²வே, சதஸ்ஸோ படிபதா³’’தி. ச²ட்ட²ம்.

7. மஹாமோக்³க³ல்லானஸுத்தம்

167. அத² கோ² ஆயஸ்மா ஸாரிபுத்தோ யேனாயஸ்மா மஹாமோக்³க³ல்லானோ தேனுபஸங்கமி; உபஸங்கமித்வா ஆயஸ்மதா மஹாமோக்³க³ல்லானேன ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா ஸாரிபுத்தோ ஆயஸ்மந்தம் மஹாமோக்³க³ல்லானம் ஏதத³வோச –

‘‘சதஸ்ஸோ இமா, ஆவுஸோ மோக்³க³ல்லான, படிபதா³. கதமா சதஸ்ஸோ? து³க்கா² படிபதா³ த³ந்தா⁴பி⁴ஞ்ஞா, து³க்கா² படிபதா³ கி²ப்பாபி⁴ஞ்ஞா, ஸுகா² படிபதா³ த³ந்தா⁴பி⁴ஞ்ஞா, ஸுகா² படிபதா³ கி²ப்பாபி⁴ஞ்ஞா. இமா கோ², ஆவுஸோ, சதஸ்ஸோ படிபதா³. இமாஸம், ஆவுஸோ, சதுன்னம் படிபதா³னம் [சதஸ்ஸன்னம் படிபதா³னம் (ஸீ. ஸ்யா. கம்.)] கதமம் தே படிபத³ம் ஆக³ம்ம அனுபாதா³ய ஆஸவேஹி சித்தம் விமுத்த’’ந்தி?

‘‘சதஸ்ஸோ இமா, ஆவுஸோ ஸாரிபுத்த, படிபதா³. கதமா சதஸ்ஸோ? து³க்கா² படிபதா³ த³ந்தா⁴பி⁴ஞ்ஞா, து³க்கா² படிபதா³ கி²ப்பாபி⁴ஞ்ஞா, ஸுகா² படிபதா³ த³ந்தா⁴பி⁴ஞ்ஞா, ஸுகா² படிபதா³ கி²ப்பாபி⁴ஞ்ஞா. இமா கோ², ஆவுஸோ, சதஸ்ஸோ படிபதா³. இமாஸம், ஆவுஸோ, சதுன்னம் படிபதா³னம் யாயம் படிபதா³ து³க்கா² கி²ப்பாபி⁴ஞ்ஞா, இமம் மே படிபத³ம் ஆக³ம்ம அனுபாதா³ய ஆஸவேஹி சித்தம் விமுத்த’’ந்தி. ஸத்தமம்.

8. ஸாரிபுத்தஸுத்தம்

168. அத² கோ² ஆயஸ்மா மஹாமோக்³க³ல்லானோ யேனாயஸ்மா ஸாரிபுத்தோ தேனுபஸங்கமி; உபஸங்கமித்வா ஆயஸ்மதா ஸாரிபுத்தேன ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா மஹாமோக்³க³ல்லானோ ஆயஸ்மந்தம் ஸாரிபுத்தம் ஏதத³வோச –

‘‘சதஸ்ஸோ இமா, ஆவுஸோ ஸாரிபுத்த, படிபதா³. கதமா சதஸ்ஸோ? து³க்கா² படிபதா³ த³ந்தா⁴பி⁴ஞ்ஞா, து³க்கா² படிபதா³ கி²ப்பாபி⁴ஞ்ஞா, ஸுகா² படிபதா³ த³ந்தா⁴பி⁴ஞ்ஞா, ஸுகா² படிபதா³ கி²ப்பாபி⁴ஞ்ஞா. இமா கோ², ஆவுஸோ, சதஸ்ஸோ படிபதா³. இமாஸம், ஆவுஸோ, சதுன்னம் படிபதா³னம் கதமம் தே படிபத³ம் ஆக³ம்ம அனுபாதா³ய ஆஸவேஹி சித்தம் விமுத்த’’ந்தி?

‘‘சதஸ்ஸோ இமா, ஆவுஸோ மோக்³க³ல்லான, படிபதா³. கதமா சதஸ்ஸோ? து³க்கா² படிபதா³ த³ந்தா⁴பி⁴ஞ்ஞா, து³க்கா² படிபதா³ கி²ப்பாபி⁴ஞ்ஞா, ஸுகா² படிபதா³ த³ந்தா⁴பி⁴ஞ்ஞா, ஸுகா² படிபதா³ கி²ப்பாபி⁴ஞ்ஞா. இமா கோ², ஆவுஸோ, சதஸ்ஸோ படிபதா³. இமாஸம், ஆவுஸோ, சதுன்னம் படிபதா³னம் யாயம் படிபதா³ ஸுகா² கி²ப்பாபி⁴ஞ்ஞா, இமம் மே படிபத³ம் ஆக³ம்ம அனுபாதா³ய ஆஸவேஹி சித்தம் விமுத்த’’ந்தி. அட்ட²மம்.

9. ஸஸங்கா²ரஸுத்தம்

169. ‘‘சத்தாரோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? இத⁴, பி⁴க்க²வே, ஏகச்சோ புக்³க³லோ தி³ட்டே²வ த⁴ம்மே ஸஸங்கா²ரபரினிப்³பா³யீ ஹோதி. இத⁴ பன, பி⁴க்க²வே, ஏகச்சோ புக்³க³லோ காயஸ்ஸ பே⁴தா³ ஸஸங்கா²ரபரினிப்³பா³யீ ஹோதி. இத⁴ பன, பி⁴க்க²வே, ஏகச்சோ புக்³க³லோ தி³ட்டே²வ த⁴ம்மே அஸங்கா²ரபரினிப்³பா³யீ ஹோதி. இத⁴ பன, பி⁴க்க²வே, ஏகச்சோ புக்³க³லோ காயஸ்ஸ பே⁴தா³ அஸங்கா²ரபரினிப்³பா³யீ ஹோதி.

‘‘கத²ஞ்ச, பி⁴க்க²வே, புக்³க³லோ தி³ட்டே²வ த⁴ம்மே ஸஸங்கா²ரபரினிப்³பா³யீ ஹோதி? இத⁴, பி⁴க்க²வே, பி⁴க்கு² அஸுபா⁴னுபஸ்ஸீ காயே விஹரதி, ஆஹாரே படிகூலஸஞ்ஞீ, ஸப்³ப³லோகே அனபி⁴ரதிஸஞ்ஞீ, ஸப்³ப³ஸங்கா²ரேஸு அனிச்சானுபஸ்ஸீ. மரணஸஞ்ஞா கோ² பனஸ்ஸ அஜ்ஜ²த்தம் ஸூபட்டி²தா ஹோதி. ஸோ இமானி பஞ்ச ஸேக²ப³லானி உபனிஸ்ஸாய விஹரதி – ஸத்³தா⁴ப³லம், ஹிரிப³லம், ஓத்தப்பப³லம், வீரியப³லம், பஞ்ஞாப³லம். தஸ்ஸிமானி பஞ்சிந்த்³ரியானி அதி⁴மத்தானி பாதுப⁴வந்தி – ஸத்³தி⁴ந்த்³ரியம், வீரியிந்த்³ரியம், ஸதிந்த்³ரியம், ஸமாதி⁴ந்த்³ரியம், பஞ்ஞிந்த்³ரியம். ஸோ இமேஸம் பஞ்சன்னம் இந்த்³ரியானம் அதி⁴மத்தத்தா தி³ட்டே²வ த⁴ம்மே ஸஸங்கா²ரபரினிப்³பா³யீ ஹோதி. ஏவம் கோ², பி⁴க்க²வே, புக்³க³லோ தி³ட்டே²வ த⁴ம்மே ஸஸங்கா²ரபரினிப்³பா³யீ ஹோதி.

‘‘கத²ஞ்ச, பி⁴க்க²வே, புக்³க³லோ காயஸ்ஸ பே⁴தா³ ஸஸங்கா²ரபரினிப்³பா³யீ ஹோதி? இத⁴, பி⁴க்க²வே, பி⁴க்கு² அஸுபா⁴னுபஸ்ஸீ காயே விஹரதி, ஆஹாரே படிகூலஸஞ்ஞீ, ஸப்³ப³லோகே அனபி⁴ரதிஸஞ்ஞீ, ஸப்³ப³ஸங்கா²ரேஸு அனிச்சானுபஸ்ஸீ. மரணஸஞ்ஞா கோ² பனஸ்ஸ அஜ்ஜ²த்தம் ஸூபட்டி²தா ஹோதி. ஸோ இமானி பஞ்ச ஸேக²ப³லானி உபனிஸ்ஸாய விஹரதி – ஸத்³தா⁴ப³லம், ஹிரிப³லம், ஓத்தப்பப³லம், வீரியப³லம், பஞ்ஞாப³லம். தஸ்ஸிமானி பஞ்சிந்த்³ரியானி முதூ³னி பாதுப⁴வந்தி – ஸத்³தி⁴ந்த்³ரியம், வீரியிந்த்³ரியம், ஸதிந்த்³ரியம், ஸமாதி⁴ந்த்³ரியம், பஞ்ஞிந்த்³ரியம். ஸோ இமேஸம் பஞ்சன்னம் இந்த்³ரியானம் முது³த்தா காயஸ்ஸ பே⁴தா³ ஸஸங்கா²ரபரினிப்³பா³யீ ஹோதி. ஏவம் கோ², பி⁴க்க²வே, புக்³க³லோ காயஸ்ஸ பே⁴தா³ ஸஸங்கா²ரபரினிப்³பா³யீ ஹோதி.

‘‘கத²ஞ்ச, பி⁴க்க²வே, புக்³க³லோ தி³ட்டே²வ த⁴ம்மே அஸங்கா²ரபரினிப்³பா³யீ ஹோதி? இத⁴, பி⁴க்க²வே, பி⁴க்கு² விவிச்சேவ காமேஹி…பே… பட²மம் ஜா²னம்…பே… து³தியம் ஜா²னம்…பே… ததியம் ஜா²னம்…பே… சதுத்த²ம் ஜா²னம் உபஸம்பஜ்ஜ விஹரதி. ஸோ இமானி பஞ்ச ஸேக²ப³லானி உபனிஸ்ஸாய விஹரதி – ஸத்³தா⁴ப³லம்…பே… பஞ்ஞாப³லம். தஸ்ஸிமானி பஞ்சிந்த்³ரியானி அதி⁴மத்தானி பாதுப⁴வந்தி – ஸத்³தி⁴ந்த்³ரியம்…பே… பஞ்ஞிந்த்³ரியம். ஸோ இமேஸம் பஞ்சன்னம் இந்த்³ரியானம் அதி⁴மத்தத்தா தி³ட்டே²வ த⁴ம்மே அஸங்கா²ரபரினிப்³பா³யீ ஹோதி. ஏவம் கோ², பி⁴க்க²வே, புக்³க³லோ தி³ட்டே²வ த⁴ம்மே அஸங்கா²ரபரினிப்³பா³யீ ஹோதி.

‘‘கத²ஞ்ச, பி⁴க்க²வே, புக்³க³லோ காயஸ்ஸ பே⁴தா³ அஸங்கா²ரபரினிப்³பா³யீ ஹோதி? இத⁴, பி⁴க்க²வே, பி⁴க்கு² விவிச்சேவ காமேஹி…பே… பட²மம் ஜா²னம்…பே… து³தியம் ஜா²னம்…பே… ததியம் ஜா²னம்…பே… சதுத்த²ம் ஜா²னம் உபஸம்பஜ்ஜ விஹரதி. ஸோ இமானி பஞ்ச ஸேக²ப³லானி உபனிஸ்ஸாய விஹரதி – ஸத்³தா⁴ப³லம், ஹிரிப³லம், ஓத்தப்பப³லம், வீரியப³லம், பஞ்ஞாப³லம். தஸ்ஸிமானி பஞ்சிந்த்³ரியானி…பே… பஞ்ஞிந்த்³ரியம். ஸோ இமேஸம் பஞ்சன்னம் இந்த்³ரியானம் முது³த்தா காயஸ்ஸ பே⁴தா³ அஸங்கா²ரபரினிப்³பா³யீ ஹோதி. ஏவம் கோ², பி⁴க்க²வே, புக்³க³லோ காயஸ்ஸ பே⁴தா³ அஸங்கா²ரபரினிப்³பா³யீ ஹோதி. இமே கோ², பி⁴க்க²வே, சத்தாரோ புக்³க³லா ஸந்தோ ஸம்விஜ்ஜமானா லோகஸ்மி’’ந்தி. நவமம்.

10. யுக³னத்³த⁴ஸுத்தம்

170. ஏவம் மே ஸுதம் – ஏகம் ஸமயம் ஆயஸ்மா ஆனந்தோ³ கோஸம்பி³யம் விஹரதி கோ⁴ஸிதாராமே. தத்ர கோ² ஆயஸ்மா ஆனந்தோ³ பி⁴க்கூ² ஆமந்தேஸி – ‘‘ஆவுஸோ பி⁴க்க²வே’’தி. ‘‘ஆவுஸோ’’தி கோ² தே பி⁴க்கூ² ஆயஸ்மதோ ஆனந்த³ஸ்ஸ பச்சஸ்ஸோஸும். ஆயஸ்மா ஆனந்தோ³ ஏதத³வோச –

‘‘யோ ஹி கோசி, ஆவுஸோ, பி⁴க்கு² வா பி⁴க்கு²னீ வா மம ஸந்திகே அரஹத்தப்பத்திம் [அரஹத்தப்பத்தம் (க.) படி. ம. 2.1 படிஸம்பி⁴தா³மக்³கே³பி] ப்³யாகரோதி, ஸப்³போ³ ஸோ சதூஹி மக்³கே³ஹி, ஏதேஸம் வா அஞ்ஞதரேன.

‘‘கதமேஹி சதூஹி? இத⁴, ஆவுஸோ, பி⁴க்கு² ஸமத²புப்³ப³ங்க³மம் விபஸ்ஸனம் பா⁴வேதி. தஸ்ஸ ஸமத²புப்³ப³ங்க³மம் விபஸ்ஸனம் பா⁴வயதோ மக்³கோ³ ஸஞ்ஜாயதி. ஸோ தம் மக்³க³ம் ஆஸேவதி பா⁴வேதி ப³ஹுலீகரோதி. தஸ்ஸ தம் மக்³க³ம் ஆஸேவதோ பா⁴வயதோ ப³ஹுலீகரோதோ ஸம்யோஜனானி பஹீயந்தி, அனுஸயா ப்³யந்தீஹோந்தி.

‘‘புன சபரம், ஆவுஸோ, பி⁴க்கு² விபஸ்ஸனாபுப்³ப³ங்க³மம் ஸமத²ம் பா⁴வேதி. தஸ்ஸ விபஸ்ஸனாபுப்³ப³ங்க³மம் ஸமத²ம் பா⁴வயதோ மக்³கோ³ ஸஞ்ஜாயதி. ஸோ தம் மக்³க³ம் ஆஸேவதி பா⁴வேதி ப³ஹுலீகரோதி. தஸ்ஸ தம் மக்³க³ம் ஆஸேவதோ பா⁴வயதோ ப³ஹுலீகரோதோ ஸம்யோஜனானி பஹீயந்தி, அனுஸயா ப்³யந்தீஹோந்தி.

‘‘புன சபரம், ஆவுஸோ, பி⁴க்கு² ஸமத²விபஸ்ஸனம் யுக³னத்³த⁴ம் பா⁴வேதி. தஸ்ஸ ஸமத²விபஸ்ஸனம் யுக³னத்³த⁴ம் பா⁴வயதோ மக்³கோ³ ஸஞ்ஜாயதி. ஸோ தம் மக்³க³ம் ஆஸேவதி பா⁴வேதி ப³ஹுலீகரோதி. தஸ்ஸ தம் மக்³க³ம் ஆஸேவதோ பா⁴வயதோ ப³ஹுலீகரோதோ ஸம்யோஜனானி பஹீயந்தி, அனுஸயா ப்³யந்தீஹோந்தி.

‘‘புன சபரம், ஆவுஸோ, பி⁴க்கு²னோ த⁴ம்முத்³த⁴ச்சவிக்³க³ஹிதம் மானஸம் ஹோதி. ஹோதி ஸோ, ஆவுஸோ, ஸமயோ யம் தம் சித்தம் அஜ்ஜ²த்தமேவ ஸந்திட்ட²தி ஸன்னிஸீத³தி ஏகோதி³ ஹோதி ஸமாதி⁴யதி. தஸ்ஸ மக்³கோ³ ஸஞ்ஜாயதி. ஸோ தம் மக்³க³ம் ஆஸேவதி பா⁴வேதி ப³ஹுலீகரோதி. தஸ்ஸ தம் மக்³க³ம் ஆஸேவதோ பா⁴வயதோ ப³ஹுலீகரோதோ ஸம்யோஜனானி பஹீயந்தி, அனுஸயா ப்³யந்தீஹோந்தி.

‘‘யோ ஹி கோசி, ஆவுஸோ, பி⁴க்கு² வா பி⁴க்கு²னீ வா மம ஸந்திகே அரஹத்தப்பத்திம் ப்³யாகரோதி, ஸப்³போ³ ஸோ இமேஹி சதூஹி மக்³கே³ஹி, ஏதேஸம் வா அஞ்ஞதரேனா’’தி. த³ஸமம்.

படிபதா³வக்³கோ³ து³தியோ.