9. பி⁴க்கு²னீஸுத்தம்

159. ஏவம் மே ஸுதம் – ஏகம் ஸமயம் ஆயஸ்மா ஆனந்தோ³ கோஸம்பி³யம் விஹரதி கோ⁴ஸிதாராமே. அத² கோ² அஞ்ஞதரா பி⁴க்கு²னீ அஞ்ஞதரம் புரிஸம் ஆமந்தேஸி – ‘‘ஏஹி த்வம், அம்போ⁴ புரிஸ, யேனய்யோ ஆனந்தோ³ தேனுபஸங்கம; உபஸங்கமித்வா மம வசனேன அய்யஸ்ஸ ஆனந்த³ஸ்ஸ பாதே³ ஸிரஸா வந்த³ – ‘இத்த²ன்னாமா, ப⁴ந்தே, பி⁴க்கு²னீ ஆபா³தி⁴கினீ து³க்கி²தா பா³ள்ஹகி³லானா. ஸா அய்யஸ்ஸ ஆனந்த³ஸ்ஸ பாதே³ ஸிரஸா வந்த³தீ’தி. ஏவஞ்ச வதே³ஹி – ‘ஸாது⁴ கிர, ப⁴ந்தே, அய்யோ ஆனந்தோ³ யேன பி⁴க்கு²னுபஸ்ஸயோ யேன ஸா பி⁴க்கு²னீ தேனுபஸங்கமது அனுகம்பம் உபாதா³யா’’’தி. ‘‘ஏவம், அய்யே’’தி கோ² ஸோ புரிஸோ தஸ்ஸா பி⁴க்கு²னியா படிஸ்ஸுத்வா யேனாயஸ்மா ஆனந்தோ³ தேனுபஸங்கமி; உபஸங்கமித்வா ஆயஸ்மந்தம் ஆனந்த³ம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஸோ புரிஸோ ஆயஸ்மந்தம் ஆனந்த³ம் ஏதத³வோச –

‘‘இத்த²ன்னாமா, ப⁴ந்தே, பி⁴க்கு²னீ ஆபா³தி⁴கினீ து³க்கி²தா பா³ள்ஹகி³லானா. ஸா ஆயஸ்மதோ ஆனந்த³ஸ்ஸ பாதே³ ஸிரஸா வந்த³தி, ஏவஞ்ச வதே³தி – ‘ஸாது⁴ கிர, ப⁴ந்தே, ஆயஸ்மா ஆனந்தோ³ யேன பி⁴க்கு²னுபஸ்ஸயோ யேன ஸா பி⁴க்கு²னீ தேனுபஸங்கமது அனுகம்பம் உபாதா³யா’’’தி. அதி⁴வாஸேஸி கோ² ஆயஸ்மா ஆனந்தோ³ துண்ஹீபா⁴வேன.

அத² கோ² ஆயஸ்மா ஆனந்தோ³ நிவாஸேத்வா பத்தசீவரமாதா³ய யேன பி⁴க்கு²னுபஸ்ஸயோ யேன ஸா பி⁴க்கு²னீ தேனுபஸங்கமி. அத்³த³ஸா கோ² ஸா பி⁴க்கு²னீ ஆயஸ்மந்தம் ஆனந்த³ம் தூ³ரதோவ ஆக³ச்ச²ந்தம். தி³ஸ்வா ஸஸீஸம் பாருபித்வா மஞ்சகே நிபஜ்ஜி. அத² கோ² ஆயஸ்மா ஆனந்தோ³ யேன ஸா பி⁴க்கு²னீ தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. நிஸஜ்ஜ கோ² ஆயஸ்மா ஆனந்தோ³ தம் பி⁴க்கு²னிம் ஏதத³வோச –

‘‘ஆஹாரஸம்பூ⁴தோ அயம், ப⁴கி³னி, காயோ ஆஹாரம் நிஸ்ஸாய. ஆஹாரோ பஹாதப்³போ³. தண்ஹாஸம்பூ⁴தோ அயம், ப⁴கி³னி, காயோ தண்ஹம் நிஸ்ஸாய. தண்ஹா பஹாதப்³பா³. மானஸம்பூ⁴தோ அயம், ப⁴கி³னி, காயோ மானம் நிஸ்ஸாய. மானோ பஹாதப்³போ³. மேது²னஸம்பூ⁴தோ அயம், ப⁴கி³னி, காயோ. மேது²னே ச ஸேதுகா⁴தோ வுத்தோ ப⁴க³வதா.

‘‘‘ஆஹாரஸம்பூ⁴தோ அயம், ப⁴கி³னி, காயோ ஆஹாரம் நிஸ்ஸாய. ஆஹாரோ பஹாதப்³போ³’தி, இதி கோ² பனேதம் வுத்தம். கிஞ்சேதம் படிச்ச வுத்தம்? இத⁴, ப⁴கி³னி, பி⁴க்கு² படிஸங்கா² யோனிஸோ ஆஹாரம் ஆஹாரேதி – ‘நேவ த³வாய ந மதா³ய ந மண்ட³னாய ந விபூ⁴ஸனாய, யாவதே³வ இமஸ்ஸ காயஸ்ஸ டி²தியா யாபனாய விஹிம்ஸூபரதியா ப்³ரஹ்மசரியானுக்³க³ஹாய. இதி புராணஞ்ச வேத³னம் படிஹங்கா²மி, நவஞ்ச வேத³னம் ந உப்பாதே³ஸ்ஸாமி. யாத்ரா ச மே ப⁴விஸ்ஸதி அனவஜ்ஜதா ச பா²ஸுவிஹாரோ சா’தி. ஸோ அபரேன ஸமயேன ஆஹாரம் நிஸ்ஸாய ஆஹாரம் பஜஹதி. ‘ஆஹாரஸம்பூ⁴தோ அயம், ப⁴கி³னி, காயோ ஆஹாரம் நிஸ்ஸாய. ஆஹாரோ பஹாதப்³போ³’தி, இதி யம் தம் வுத்தம் இத³மேதம் படிச்ச வுத்தம்.

‘‘‘தண்ஹாஸம்பூ⁴தோ அயம், ப⁴கி³னி, காயோ தண்ஹம் நிஸ்ஸாய. தண்ஹா பஹாதப்³பா³’தி, இதி கோ² பனேதம் வுத்தம். கிஞ்சேதம் படிச்ச வுத்தம்? இத⁴, ப⁴கி³னி, பி⁴க்கு² ஸுணாதி – ‘இத்த²ன்னாமோ கிர பி⁴க்கு² ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதீ’தி. தஸ்ஸ ஏவம் ஹோதி – ‘குதா³ஸ்ஸு நாம அஹம்பி ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரிஸ்ஸாமீ’தி! ஸோ அபரேன ஸமயேன தண்ஹம் நிஸ்ஸாய தண்ஹம் பஜஹதி. ‘தண்ஹாஸம்பூ⁴தோ அயம், ப⁴கி³னி, காயோ தண்ஹம் நிஸ்ஸாய. தண்ஹா பஹாதப்³பா³’தி, இதி யம் தம் வுத்தம் இத³மேதம் படிச்ச வுத்தம்.

‘‘‘மானஸம்பூ⁴தோ அயம், ப⁴கி³னி, காயோ மானம் நிஸ்ஸாய. மானோ பஹாதப்³போ³’தி, இதி கோ² பனேதம் வுத்தம். கிஞ்சேதம் படிச்ச வுத்தம்? இத⁴, ப⁴கி³னி, பி⁴க்கு² ஸுணாதி – ‘இத்த²ன்னாமோ கிர பி⁴க்கு² ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதீ’தி. தஸ்ஸ ஏவம் ஹோதி – ‘ஸோ ஹி நாம ஆயஸ்மா ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரிஸ்ஸதி; கிமங்க³ம் [கிமங்க³ (ஸீ. பீ.) அ. நி. 5.180; சூளவ. 331; ஸம். நி. 5.1020] பனாஹ’ந்தி! ஸோ அபரேன ஸமயேன மானம் நிஸ்ஸாய மானம் பஜஹதி. ‘மானஸம்பூ⁴தோ அயம், ப⁴கி³னி, காயோ மானம் நிஸ்ஸாய. மானோ பஹாதப்³போ³’தி, இதி யம் தம் வுத்தம் இத³மேதம் படிச்ச வுத்தம்.

‘‘மேது²னஸம்பூ⁴தோ அயம், ப⁴கி³னி, காயோ. மேது²னே ச ஸேதுகா⁴தோ வுத்தோ ப⁴க³வதா’’தி.

அத² கோ² ஸா பி⁴க்கு²னீ மஞ்சகா வுட்ட²ஹித்வா ஏகம்ஸம் உத்தராஸங்க³ம் கரித்வா ஆயஸ்மதோ ஆனந்த³ஸ்ஸ பாதே³ஸு ஸிரஸா நிபதித்வா ஆயஸ்மந்தம் ஆனந்த³ம் ஏதத³வோச – ‘‘அச்சயோ மம், ப⁴ந்தே, அச்சக³மா, யதா²பா³லம் யதா²மூள்ஹம் யதா²அகுஸலம், யாஹம் ஏவமகாஸிம். தஸ்ஸா மே, ப⁴ந்தே, அய்யோ ஆனந்தோ³ அச்சயம் அச்சயதோ படிக்³க³ண்ஹாது, ஆயதிம் ஸம்வராயா’’தி. ‘‘தக்³க⁴ தம் [தக்³க⁴ த்வம் (ஸீ. பீ. க.)], ப⁴கி³னி, அச்சயோ அச்சக³மா, யதா²பா³லம் யதா²மூள்ஹம் யதா²அகுஸலம், யா த்வம் ஏவமகாஸி. யதோ ச கோ² த்வம், ப⁴கி³னி, அச்சயம் அச்சயதோ தி³ஸ்வா யதா²த⁴ம்மம் படிகரோஸி, தம் தே மயம் படிக்³க³ண்ஹாம. வுத்³தி⁴ ஹேஸா, ப⁴கி³னி, அரியஸ்ஸ வினயே யோ அச்சயம் அச்சயதோ தி³ஸ்வா யதா²த⁴ம்மம் படிகரோதி ஆயதிம் ஸம்வரம் ஆபஜ்ஜதீ’’தி. நவமம்.