(16) 1. இந்த்³ரியவக்³கோ³

1. இந்த்³ரியஸுத்தம்

151. ‘‘சத்தாரிமானி, பி⁴க்க²வே, இந்த்³ரியானி. கதமானி சத்தாரி? ஸத்³தி⁴ந்த்³ரியம், வீரியிந்த்³ரியம், ஸதிந்த்³ரியம், ஸமாதி⁴ந்த்³ரியம் – இமானி கோ², பி⁴க்க²வே, சத்தாரி இந்த்³ரியானீ’’தி. பட²மம்.

2. ஸத்³தா⁴ப³லஸுத்தம்

152. ‘‘சத்தாரிமானி, பி⁴க்க²வே, ப³லானி. கதமானி சத்தாரி? ஸத்³தா⁴ப³லம், வீரியப³லம், ஸதிப³லம், ஸமாதி⁴ப³லம் – இமானி கோ², பி⁴க்க²வே, சத்தாரி ப³லானீ’’தி. து³தியம்.

3. பஞ்ஞாப³லஸுத்தம்

153. ‘‘சத்தாரிமானி, பி⁴க்க²வே, ப³லானி. கதமானி சத்தாரி? பஞ்ஞாப³லம், வீரியப³லம், அனவஜ்ஜப³லம், ஸங்க³ஹப³லம் [ஸங்கா³ஹப³லம் (ஸீ. ஸ்யா. கம். பீ.)] – இமானி கோ², பி⁴க்க²வே, சத்தாரி ப³லானீ’’தி. ததியம்.

4. ஸதிப³லஸுத்தம்

154. ‘‘சத்தாரிமானி, பி⁴க்க²வே, ப³லானி. கதமானி சத்தாரி? ஸதிப³லம், ஸமாதி⁴ப³லம், அனவஜ்ஜப³லம், ஸங்க³ஹப³லம் – இமானி கோ², பி⁴க்க²வே, சத்தாரி ப³லானீ’’தி. சதுத்த²ம்.

5. படிஸங்கா²னப³லஸுத்தம்

155. ‘‘சத்தாரிமானி, பி⁴க்க²வே, ப³லானி. கதமானி சத்தாரி? படிஸங்கா²னப³லம், பா⁴வனாப³லம், அனவஜ்ஜப³லம், ஸங்க³ஹப³லம் – இமானி கோ², பி⁴க்க²வே, சத்தாரி ப³லானீ’’தி. பஞ்சமம்.

6. கப்பஸுத்தம்

156. ‘‘சத்தாரிமானி, பி⁴க்க²வே, கப்பஸ்ஸ அஸங்க்²யேய்யானி. கதமானி சத்தாரி? யதா³, பி⁴க்க²வே, கப்போ ஸம்வட்டதி, தம் ந ஸுகரம் ஸங்கா²தும் – ஏத்தகானி வஸ்ஸானீதி வா, ஏத்தகானி வஸ்ஸஸதானீதி வா, ஏத்தகானி வஸ்ஸஸஹஸ்ஸானீதி வா, ஏத்தகானி வஸ்ஸஸதஸஹஸ்ஸானீதி வா.

‘‘யதா³, பி⁴க்க²வே, கப்போ ஸம்வட்டோ திட்ட²தி, தம் ந ஸுகரம் ஸங்கா²தும் – ஏத்தகானி வஸ்ஸானீதி வா, ஏத்தகானி வஸ்ஸஸதானீதி வா, ஏத்தகானி வஸ்ஸஸஹஸ்ஸானீதி வா, ஏத்தகானி வஸ்ஸஸதஸஹஸ்ஸானீதி வா.

‘‘யதா³, பி⁴க்க²வே, கப்போ விவட்டதி, தம் ந ஸுகரம் ஸங்கா²தும் – ஏத்தகானி வஸ்ஸானீதி வா, ஏத்தகானி வஸ்ஸஸதானீதி வா, ஏத்தகானி வஸ்ஸஸஹஸ்ஸானீதி வா, ஏத்தகானி வஸ்ஸஸதஸஹஸ்ஸானீதி வா.

‘‘யதா³, பி⁴க்க²வே, கப்போ விவட்டோ திட்ட²தி, தம் ந ஸுகரம் ஸங்கா²தும் – ஏத்தகானி வஸ்ஸானீதி வா, ஏத்தகானி வஸ்ஸஸதானீதி வா, ஏத்தகானி வஸ்ஸஸஹஸ்ஸானீதி வா, ஏத்தகானி வஸ்ஸஸதஸஹஸ்ஸானீதி வா. இமானி கோ², பி⁴க்க²வே, சத்தாரி கப்பஸ்ஸ அஸங்க்²யேய்யானீ’’தி. ச²ட்ட²ம்.

7. ரோக³ஸுத்தம்

157. ‘‘த்³வேமே, பி⁴க்க²வே, ரோகா³. கதமே த்³வே? காயிகோ ச ரோகோ³ சேதஸிகோ ச ரோகோ³. தி³ஸ்ஸந்தி, பி⁴க்க²வே, ஸத்தா காயிகேன ரோகே³ன ஏகம்பி வஸ்ஸம் ஆரோக்³யம் படிஜானமானா, த்³வேபி வஸ்ஸானி ஆரோக்³யம் படிஜானமானா, தீணிபி வஸ்ஸானி ஆரோக்³யம் படிஜானமானா, சத்தாரிபி வஸ்ஸானி ஆரோக்³யம் படிஜானமானா, பஞ்சபி வஸ்ஸானி ஆரோக்³யம் படிஜானமானா, த³ஸபி வஸ்ஸானி ஆரோக்³யம் படிஜானமானா, வீஸதிபி வஸ்ஸானி ஆரோக்³யம் படிஜானமானா, திம்ஸம்பி வஸ்ஸானி ஆரோக்³யம் படிஜானமானா, சத்தாரீஸம்பி வஸ்ஸானி ஆரோக்³யம் படிஜானமானா, பஞ்ஞாஸம்பி வஸ்ஸானி ஆரோக்³யம் படிஜானமானா, வஸ்ஸஸதம்பி, பி⁴ய்யோபி ஆரோக்³யம் படிஜானமானா. தே, பி⁴க்க²வே, ஸத்தா ஸுது³ல்லபா⁴ [து³ல்லபா⁴ (ஸீ. ஸ்யா. கம். பீ.)] லோகஸ்மிம் யே சேதஸிகேன ரோகே³ன முஹுத்தம்பி ஆரோக்³யம் படிஜானந்தி, அஞ்ஞத்ர கீ²ணாஸவேஹி.

‘‘சத்தாரோமே, பி⁴க்க²வே, பப்³ப³ஜிதஸ்ஸ ரோகா³. கதமே சத்தாரோ? இத⁴, பி⁴க்க²வே, பி⁴க்கு² மஹிச்சோ² ஹோதி விகா⁴தவா அஸந்துட்டோ² இதரீதரசீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேன. ஸோ மஹிச்சோ² ஸமானோ விகா⁴தவா அஸந்துட்டோ² இதரீதரசீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேன பாபிகம் இச்ச²ம் பணித³ஹதி அனவஞ்ஞப்படிலாபா⁴ய லாப⁴ஸக்காரஸிலோகப்படிலாபா⁴ய. ஸோ உட்ட²ஹதி க⁴டதி வாயமதி அனவஞ்ஞப்படிலாபா⁴ய லாப⁴ஸக்காரஸிலோகப்படிலாபா⁴ய. ஸோ ஸங்கா²ய குலானி உபஸங்கமதி, ஸங்கா²ய நிஸீத³தி, ஸங்கா²ய த⁴ம்மம் பா⁴ஸதி, ஸங்கா²ய உச்சாரபஸ்ஸாவம் ஸந்தா⁴ரேதி. இமே கோ², பி⁴க்க²வே, சத்தாரோ பப்³ப³ஜிதஸ்ஸ ரோகா³.

‘‘தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘ந மஹிச்சா² ப⁴விஸ்ஸாம விகா⁴தவந்தோ அஸந்துட்டா² இதரீதரசீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேன, ந பாபிகம் இச்ச²ம் பணித³ஹிஸ்ஸாம அனவஞ்ஞப்படிலாபா⁴ய லாப⁴ஸக்காரஸிலோகப்படிலாபா⁴ய, ந உட்ட²ஹிஸ்ஸாம ந க⁴டேஸ்ஸாம ந வாயமிஸ்ஸாம அனவஞ்ஞப்படிலாபா⁴ய லாப⁴ஸக்காரஸிலோகப்படிலாபா⁴ய, க²மா ப⁴விஸ்ஸாம ஸீதஸ்ஸ உண்ஹஸ்ஸ ஜிக⁴ச்சா²ய பிபாஸாய ட³ம்ஸமகஸவாதாதபஸரீஸபஸம்ப²ஸ்ஸானம் து³ருத்தானம் து³ராக³தானம் வசனபதா²னம், உப்பன்னானம் ஸாரீரிகானம் வேத³னானம் து³க்கா²னம் திப்³பா³னம் க²ரானம் கடுகானம் அஸாதானம் அமனாபானம் பாணஹரானம் அதி⁴வாஸகஜாதிகா ப⁴விஸ்ஸாமா’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. ஸத்தமம்.

8. பரிஹானிஸுத்தம்

158. தத்ர கோ² ஆயஸ்மா ஸாரிபுத்தோ பி⁴க்கூ² ஆமந்தேஸி – ‘‘ஆவுஸோ பி⁴க்க²வே’’தி. ‘‘ஆவுஸோ’’தி கோ² தே பி⁴க்கூ² ஆயஸ்மதோ ஸாரிபுத்தஸ்ஸ பச்சஸ்ஸோஸும். ஆயஸ்மா ஸாரிபுத்தோ ஏதத³வோச –

‘‘யோ ஹி கோசி, ஆவுஸோ, பி⁴க்கு² வா பி⁴க்கு²னீ வா சத்தாரோ த⁴ம்மே அத்தனி ஸமனுபஸ்ஸதி, நிட்ட²மேத்த² க³ந்தப்³ப³ம் – ‘பரிஹாயாமி குஸலேஹி த⁴ம்மேஹி’. பரிஹானமேதம் வுத்தம் ப⁴க³வதா. கதமே சத்தாரோ? ராக³வேபுல்லத்தம் [ராக³வேபுல்லதம் (ஸீ. ஸ்யா. கம். பீ.)], தோ³ஸவேபுல்லத்தம், மோஹவேபுல்லத்தம், க³ம்பீ⁴ரேஸு கோ² பனஸ்ஸ டா²னாடா²னேஸு பஞ்ஞாசக்கு² ந கமதி. யோ ஹி கோசி, ஆவுஸோ, பி⁴க்கு² வா பி⁴க்கு²னீ வா இமே சத்தாரோ த⁴ம்மே அத்தனி ஸமனுபஸ்ஸதி, நிட்ட²மேத்த² க³ந்தப்³ப³ம் – ‘பரிஹாயாமி குஸலேஹி த⁴ம்மேஹி’. பரிஹானமேதம் வுத்தம் ப⁴க³வதா.

‘‘யோ ஹி கோசி, ஆவுஸோ, பி⁴க்கு² வா பி⁴க்கு²னீ வா சத்தாரோ த⁴ம்மே அத்தனி ஸமனுபஸ்ஸதி, நிட்ட²மேத்த² க³ந்தப்³ப³ம் – ‘ந பரிஹாயாமி குஸலேஹி த⁴ம்மேஹி’. அபரிஹானமேதம் வுத்தம் ப⁴க³வதா. கதமே சத்தாரோ? ராக³தனுத்தம் [ராக³தனுத்தனம் (க.)], தோ³ஸதனுத்தம், மோஹதனுத்தம், க³ம்பீ⁴ரேஸு கோ² பனஸ்ஸ டா²னாடா²னேஸு பஞ்ஞாசக்கு² கமதி. யோ ஹி கோசி, ஆவுஸோ, பி⁴க்கு² வா பி⁴க்கு²னீ வா இமே சத்தாரோ த⁴ம்மே அத்தனி ஸமனுபஸ்ஸதி, நிட்ட²மேத்த² க³ந்தப்³ப³ம் – ‘ந பரிஹாயாமி குஸலேஹி த⁴ம்மேஹி’. அபரிஹானமேதம் வுத்தம் ப⁴க³வதா’’தி. அட்ட²மம்.

9. பி⁴க்கு²னீஸுத்தம்

159. ஏவம் மே ஸுதம் – ஏகம் ஸமயம் ஆயஸ்மா ஆனந்தோ³ கோஸம்பி³யம் விஹரதி கோ⁴ஸிதாராமே. அத² கோ² அஞ்ஞதரா பி⁴க்கு²னீ அஞ்ஞதரம் புரிஸம் ஆமந்தேஸி – ‘‘ஏஹி த்வம், அம்போ⁴ புரிஸ, யேனய்யோ ஆனந்தோ³ தேனுபஸங்கம; உபஸங்கமித்வா மம வசனேன அய்யஸ்ஸ ஆனந்த³ஸ்ஸ பாதே³ ஸிரஸா வந்த³ – ‘இத்த²ன்னாமா, ப⁴ந்தே, பி⁴க்கு²னீ ஆபா³தி⁴கினீ து³க்கி²தா பா³ள்ஹகி³லானா. ஸா அய்யஸ்ஸ ஆனந்த³ஸ்ஸ பாதே³ ஸிரஸா வந்த³தீ’தி. ஏவஞ்ச வதே³ஹி – ‘ஸாது⁴ கிர, ப⁴ந்தே, அய்யோ ஆனந்தோ³ யேன பி⁴க்கு²னுபஸ்ஸயோ யேன ஸா பி⁴க்கு²னீ தேனுபஸங்கமது அனுகம்பம் உபாதா³யா’’’தி. ‘‘ஏவம், அய்யே’’தி கோ² ஸோ புரிஸோ தஸ்ஸா பி⁴க்கு²னியா படிஸ்ஸுத்வா யேனாயஸ்மா ஆனந்தோ³ தேனுபஸங்கமி; உபஸங்கமித்வா ஆயஸ்மந்தம் ஆனந்த³ம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஸோ புரிஸோ ஆயஸ்மந்தம் ஆனந்த³ம் ஏதத³வோச –

‘‘இத்த²ன்னாமா, ப⁴ந்தே, பி⁴க்கு²னீ ஆபா³தி⁴கினீ து³க்கி²தா பா³ள்ஹகி³லானா. ஸா ஆயஸ்மதோ ஆனந்த³ஸ்ஸ பாதே³ ஸிரஸா வந்த³தி, ஏவஞ்ச வதே³தி – ‘ஸாது⁴ கிர, ப⁴ந்தே, ஆயஸ்மா ஆனந்தோ³ யேன பி⁴க்கு²னுபஸ்ஸயோ யேன ஸா பி⁴க்கு²னீ தேனுபஸங்கமது அனுகம்பம் உபாதா³யா’’’தி. அதி⁴வாஸேஸி கோ² ஆயஸ்மா ஆனந்தோ³ துண்ஹீபா⁴வேன.

அத² கோ² ஆயஸ்மா ஆனந்தோ³ நிவாஸேத்வா பத்தசீவரமாதா³ய யேன பி⁴க்கு²னுபஸ்ஸயோ யேன ஸா பி⁴க்கு²னீ தேனுபஸங்கமி. அத்³த³ஸா கோ² ஸா பி⁴க்கு²னீ ஆயஸ்மந்தம் ஆனந்த³ம் தூ³ரதோவ ஆக³ச்ச²ந்தம். தி³ஸ்வா ஸஸீஸம் பாருபித்வா மஞ்சகே நிபஜ்ஜி. அத² கோ² ஆயஸ்மா ஆனந்தோ³ யேன ஸா பி⁴க்கு²னீ தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. நிஸஜ்ஜ கோ² ஆயஸ்மா ஆனந்தோ³ தம் பி⁴க்கு²னிம் ஏதத³வோச –

‘‘ஆஹாரஸம்பூ⁴தோ அயம், ப⁴கி³னி, காயோ ஆஹாரம் நிஸ்ஸாய. ஆஹாரோ பஹாதப்³போ³. தண்ஹாஸம்பூ⁴தோ அயம், ப⁴கி³னி, காயோ தண்ஹம் நிஸ்ஸாய. தண்ஹா பஹாதப்³பா³. மானஸம்பூ⁴தோ அயம், ப⁴கி³னி, காயோ மானம் நிஸ்ஸாய. மானோ பஹாதப்³போ³. மேது²னஸம்பூ⁴தோ அயம், ப⁴கி³னி, காயோ. மேது²னே ச ஸேதுகா⁴தோ வுத்தோ ப⁴க³வதா.

‘‘‘ஆஹாரஸம்பூ⁴தோ அயம், ப⁴கி³னி, காயோ ஆஹாரம் நிஸ்ஸாய. ஆஹாரோ பஹாதப்³போ³’தி, இதி கோ² பனேதம் வுத்தம். கிஞ்சேதம் படிச்ச வுத்தம்? இத⁴, ப⁴கி³னி, பி⁴க்கு² படிஸங்கா² யோனிஸோ ஆஹாரம் ஆஹாரேதி – ‘நேவ த³வாய ந மதா³ய ந மண்ட³னாய ந விபூ⁴ஸனாய, யாவதே³வ இமஸ்ஸ காயஸ்ஸ டி²தியா யாபனாய விஹிம்ஸூபரதியா ப்³ரஹ்மசரியானுக்³க³ஹாய. இதி புராணஞ்ச வேத³னம் படிஹங்கா²மி, நவஞ்ச வேத³னம் ந உப்பாதே³ஸ்ஸாமி. யாத்ரா ச மே ப⁴விஸ்ஸதி அனவஜ்ஜதா ச பா²ஸுவிஹாரோ சா’தி. ஸோ அபரேன ஸமயேன ஆஹாரம் நிஸ்ஸாய ஆஹாரம் பஜஹதி. ‘ஆஹாரஸம்பூ⁴தோ அயம், ப⁴கி³னி, காயோ ஆஹாரம் நிஸ்ஸாய. ஆஹாரோ பஹாதப்³போ³’தி, இதி யம் தம் வுத்தம் இத³மேதம் படிச்ச வுத்தம்.

‘‘‘தண்ஹாஸம்பூ⁴தோ அயம், ப⁴கி³னி, காயோ தண்ஹம் நிஸ்ஸாய. தண்ஹா பஹாதப்³பா³’தி, இதி கோ² பனேதம் வுத்தம். கிஞ்சேதம் படிச்ச வுத்தம்? இத⁴, ப⁴கி³னி, பி⁴க்கு² ஸுணாதி – ‘இத்த²ன்னாமோ கிர பி⁴க்கு² ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதீ’தி. தஸ்ஸ ஏவம் ஹோதி – ‘குதா³ஸ்ஸு நாம அஹம்பி ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரிஸ்ஸாமீ’தி! ஸோ அபரேன ஸமயேன தண்ஹம் நிஸ்ஸாய தண்ஹம் பஜஹதி. ‘தண்ஹாஸம்பூ⁴தோ அயம், ப⁴கி³னி, காயோ தண்ஹம் நிஸ்ஸாய. தண்ஹா பஹாதப்³பா³’தி, இதி யம் தம் வுத்தம் இத³மேதம் படிச்ச வுத்தம்.

‘‘‘மானஸம்பூ⁴தோ அயம், ப⁴கி³னி, காயோ மானம் நிஸ்ஸாய. மானோ பஹாதப்³போ³’தி, இதி கோ² பனேதம் வுத்தம். கிஞ்சேதம் படிச்ச வுத்தம்? இத⁴, ப⁴கி³னி, பி⁴க்கு² ஸுணாதி – ‘இத்த²ன்னாமோ கிர பி⁴க்கு² ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதீ’தி. தஸ்ஸ ஏவம் ஹோதி – ‘ஸோ ஹி நாம ஆயஸ்மா ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரிஸ்ஸதி; கிமங்க³ம் [கிமங்க³ (ஸீ. பீ.) அ. நி. 5.180; சூளவ. 331; ஸம். நி. 5.1020] பனாஹ’ந்தி! ஸோ அபரேன ஸமயேன மானம் நிஸ்ஸாய மானம் பஜஹதி. ‘மானஸம்பூ⁴தோ அயம், ப⁴கி³னி, காயோ மானம் நிஸ்ஸாய. மானோ பஹாதப்³போ³’தி, இதி யம் தம் வுத்தம் இத³மேதம் படிச்ச வுத்தம்.

‘‘மேது²னஸம்பூ⁴தோ அயம், ப⁴கி³னி, காயோ. மேது²னே ச ஸேதுகா⁴தோ வுத்தோ ப⁴க³வதா’’தி.

அத² கோ² ஸா பி⁴க்கு²னீ மஞ்சகா வுட்ட²ஹித்வா ஏகம்ஸம் உத்தராஸங்க³ம் கரித்வா ஆயஸ்மதோ ஆனந்த³ஸ்ஸ பாதே³ஸு ஸிரஸா நிபதித்வா ஆயஸ்மந்தம் ஆனந்த³ம் ஏதத³வோச – ‘‘அச்சயோ மம், ப⁴ந்தே, அச்சக³மா, யதா²பா³லம் யதா²மூள்ஹம் யதா²அகுஸலம், யாஹம் ஏவமகாஸிம். தஸ்ஸா மே, ப⁴ந்தே, அய்யோ ஆனந்தோ³ அச்சயம் அச்சயதோ படிக்³க³ண்ஹாது, ஆயதிம் ஸம்வராயா’’தி. ‘‘தக்³க⁴ தம் [தக்³க⁴ த்வம் (ஸீ. பீ. க.)], ப⁴கி³னி, அச்சயோ அச்சக³மா, யதா²பா³லம் யதா²மூள்ஹம் யதா²அகுஸலம், யா த்வம் ஏவமகாஸி. யதோ ச கோ² த்வம், ப⁴கி³னி, அச்சயம் அச்சயதோ தி³ஸ்வா யதா²த⁴ம்மம் படிகரோஸி, தம் தே மயம் படிக்³க³ண்ஹாம. வுத்³தி⁴ ஹேஸா, ப⁴கி³னி, அரியஸ்ஸ வினயே யோ அச்சயம் அச்சயதோ தி³ஸ்வா யதா²த⁴ம்மம் படிகரோதி ஆயதிம் ஸம்வரம் ஆபஜ்ஜதீ’’தி. நவமம்.

10. ஸுக³தவினயஸுத்தம்

160. ‘‘ஸுக³தோ வா, பி⁴க்க²வே, லோகே திட்ட²மானோ ஸுக³தவினயோ வா தத³ஸ்ஸ ப³ஹுஜனஹிதாய ப³ஹுஜனஸுகா²ய லோகானுகம்பாய அத்தா²ய ஹிதாய ஸுகா²ய தே³வமனுஸ்ஸானம்.

‘‘கதமோ ச, பி⁴க்க²வே, ஸுக³தோ? இத⁴, பி⁴க்க²வே, ததா²க³தோ லோகே உப்பஜ்ஜதி அரஹம் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானம் பு³த்³தோ⁴ ப⁴க³வா. அயம், பி⁴க்க²வே, ஸுக³தோ.

‘‘கதமோ ச, பி⁴க்க²வே, ஸுக³தவினயோ? ஸோ த⁴ம்மம் தே³ஸேதி ஆதி³கல்யாணம் மஜ்ஜே²கல்யாணம் பரியோஸானகல்யாணம் ஸாத்த²ம் ஸப்³யஞ்ஜனம், கேவலபரிபுண்ணம் பரிஸுத்³த⁴ம் ப்³ரஹ்மசரியம் பகாஸேதி. அயம், பி⁴க்க²வே, ஸுக³தவினயோ. ஏவம் ஸுக³தோ வா, பி⁴க்க²வே, லோகே திட்ட²மானோ ஸுக³தவினயோ வா தத³ஸ்ஸ ப³ஹுஜனஹிதாய ப³ஹுஜனஸுகா²ய லோகானுகம்பாய அத்தா²ய ஹிதாய ஸுகா²ய தே³வமனுஸ்ஸானந்தி.

‘‘சத்தாரோமே, பி⁴க்க²வே, த⁴ம்மா ஸத்³த⁴ம்மஸ்ஸ ஸம்மோஸாய அந்தரதா⁴னாய ஸம்வத்தந்தி. கதமே சத்தாரோ? இத⁴, பி⁴க்க²வே, பி⁴க்கூ² து³க்³க³ஹிதம் ஸுத்தந்தம் பரியாபுணந்தி து³ன்னிக்கி²த்தேஹி பத³ப்³யஞ்ஜனேஹி. து³ன்னிக்கி²த்தஸ்ஸ, பி⁴க்க²வே, பத³ப்³யஞ்ஜனஸ்ஸ அத்தோ²பி து³ன்னயோ ஹோதி. அயம், பி⁴க்க²வே, பட²மோ த⁴ம்மோ ஸத்³த⁴ம்மஸ்ஸ ஸம்மோஸாய அந்தரதா⁴னாய ஸம்வத்ததி.

‘‘புன சபரம், பி⁴க்க²வே, பி⁴க்கூ² து³ப்³ப³சா ஹோந்தி தோ³வசஸ்ஸகரணேஹி த⁴ம்மேஹி ஸமன்னாக³தா அக்க²மா அப்பத³க்கி²ணக்³கா³ஹினோ அனுஸாஸனிம். அயம், பி⁴க்க²வே, து³தியோ த⁴ம்மோ ஸத்³த⁴ம்மஸ்ஸ ஸம்மோஸாய அந்தரதா⁴னாய ஸம்வத்ததி.

‘‘புன சபரம், பி⁴க்க²வே, யே தே பி⁴க்கூ² ப³ஹுஸ்ஸுதா ஆக³தாக³மா த⁴ம்மத⁴ரா வினயத⁴ரா மாதிகாத⁴ரா, தே ந ஸக்கச்சம் ஸுத்தந்தம் பரம் வாசேந்தி. தேஸம் அச்சயேன சி²ன்னமூலகோ ஸுத்தந்தோ ஹோதி அப்படிஸரணோ. அயம், பி⁴க்க²வே, ததியோ த⁴ம்மோ ஸத்³த⁴ம்மஸ்ஸ ஸம்மோஸாய அந்தரதா⁴னாய ஸம்வத்ததி.

‘‘புன சபரம், பி⁴க்க²வே, தே²ரா பி⁴க்கூ² பா³ஹுலிகா ஹோந்தி ஸாத²லிகா, ஓக்கமனே புப்³ப³ங்க³மா, பவிவேகே நிக்கி²த்தது⁴ரா, ந வீரியம் ஆரப⁴ந்தி அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய. தேஸம் பச்சி²மா ஜனதா தி³ட்டா²னுக³திம் ஆபஜ்ஜதி. ஸாபி ஹோதி பா³ஹுலிகா ஸாத²லிகா, ஓக்கமனே புப்³ப³ங்க³மா, பவிவேகே நிக்கி²த்தது⁴ரா, ந வீரியம் ஆரப⁴தி அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய. அயம், பி⁴க்க²வே, சதுத்தோ² த⁴ம்மோ ஸத்³த⁴ம்மஸ்ஸ ஸம்மோஸாய அந்தரதா⁴னாய ஸம்வத்ததி. இமே கோ², பி⁴க்க²வே, சத்தாரோ த⁴ம்மா ஸத்³த⁴ம்மஸ்ஸ ஸம்மோஸாய அந்தரதா⁴னாய ஸம்வத்தந்தீ’’தி.

‘‘சத்தாரோமே, பி⁴க்க²வே, த⁴ம்மா ஸத்³த⁴ம்மஸ்ஸ டி²தியா அஸம்மோஸாய அனந்தரதா⁴னாய ஸம்வத்தந்தி. கதமே சத்தாரோ? இத⁴, பி⁴க்க²வே, பி⁴க்கூ² ஸுக்³க³ஹிதம் ஸுத்தந்தம் பரியாபுணந்தி ஸுனிக்கி²த்தேஹி பத³ப்³யஞ்ஜனேஹி. ஸுனிக்கி²த்தஸ்ஸ, பி⁴க்க²வே, பத³ப்³யஞ்ஜனஸ்ஸ அத்தோ²பி ஸுனயோ ஹோதி. அயம், பி⁴க்க²வே, பட²மோ த⁴ம்மோ ஸத்³த⁴ம்மஸ்ஸ டி²தியா அஸம்மோஸாய அனந்தரதா⁴னாய ஸம்வத்ததி.

‘‘புன சபரம், பி⁴க்க²வே, பி⁴க்கூ² ஸுவசா ஹோந்தி ஸோவசஸ்ஸகரணேஹி த⁴ம்மேஹி ஸமன்னாக³தா க²மா பத³க்கி²ணக்³கா³ஹினோ அனுஸாஸனிம். அயம், பி⁴க்க²வே, து³தியோ த⁴ம்மோ ஸத்³த⁴ம்மஸ்ஸ டி²தியா அஸம்மோஸாய அனந்தரதா⁴னாய ஸம்வத்ததி.

‘‘புன சபரம், பி⁴க்க²வே, யே தே பி⁴க்கூ² ப³ஹுஸ்ஸுதா ஆக³தாக³மா த⁴ம்மத⁴ரா வினயத⁴ரா மாதிகாத⁴ரா, தே ஸக்கச்சம் ஸுத்தந்தம் பரம் வாசேந்தி. தேஸம் அச்சயேன நச்சி²ன்னமூலகோ [அச்சி²ன்னமூலகோ (ஸ்யா. கம்.) அ. நி. 5.156] ஸுத்தந்தோ ஹோதி ஸப்படிஸரணோ. அயம், பி⁴க்க²வே, ததியோ த⁴ம்மோ ஸத்³த⁴ம்மஸ்ஸ டி²தியா அஸம்மோஸாய அனந்தரதா⁴னாய ஸம்வத்ததி.

‘‘புன சபரம், பி⁴க்க²வே, தே²ரா பி⁴க்கூ² ந பா³ஹுலிகா ஹோந்தி ந ஸாத²லிகா, ஓக்கமனே நிக்கி²த்தது⁴ரா, பவிவேகே புப்³ப³ங்க³மா, வீரியம் ஆரப⁴ந்தி அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய. தேஸம் பச்சி²மா ஜனதா தி³ட்டா²னுக³திம் ஆபஜ்ஜதி. ஸாபி ஹோதி ந பா³ஹுலிகா ந ஸாத²லிகா, ஓக்கமனே நிக்கி²த்தது⁴ரா, பவிவேகே புப்³ப³ங்க³மா, வீரியம் ஆரப⁴தி அப்பத்தஸ்ஸ பத்தியா அனதி⁴க³தஸ்ஸ அதி⁴க³மாய அஸச்சி²கதஸ்ஸ ஸச்சி²கிரியாய. அயம், பி⁴க்க²வே, சதுத்தோ² த⁴ம்மோ ஸத்³த⁴ம்மஸ்ஸ டி²தியா அஸம்மோஸாய அனந்தரதா⁴னாய ஸம்வத்ததி. இமே கோ², பி⁴க்க²வே, சத்தாரோ த⁴ம்மா ஸத்³த⁴ம்மஸ்ஸ டி²தியா அஸம்மோஸாய அனந்தரதா⁴னாய ஸம்வத்தந்தீ’’தி. த³ஸமம்.

இந்த்³ரியவக்³கோ³ பட²மோ.