(15) 5. ஆபா⁴வக்³கோ³

1. ஆபா⁴ஸுத்தம்

141. ‘‘சதஸ்ஸோ இமா, பி⁴க்க²வே, ஆபா⁴. கதமா சதஸ்ஸோ? சந்தா³பா⁴, ஸூரியாபா⁴, அக்³கா³பா⁴, பஞ்ஞாபா⁴ – இமா கோ², பி⁴க்க²வே, சதஸ்ஸோ ஆபா⁴. ஏதத³க்³க³ம், பி⁴க்க²வே, இமாஸம் சதுன்னம் [சதஸ்ஸன்னம் (ஸ்யா. கம்.) ஸத்³த³னீதிபத³மாலா பஸ்ஸிதப்³பா³] ஆபா⁴னம் யதி³த³ம் பஞ்ஞாபா⁴’’தி. பட²மம்.

2. பபா⁴ஸுத்தம்

142. ‘‘சதஸ்ஸோ இமா, பி⁴க்க²வே, பபா⁴. கதமா சதஸ்ஸோ? சந்த³ப்பபா⁴, ஸூரியப்பபா⁴, அக்³கி³ப்பபா⁴, பஞ்ஞாபபா⁴ – இமா கோ², பி⁴க்க²வே, சதஸ்ஸோ பபா⁴. ஏதத³க்³க³ம், பி⁴க்க²வே, இமாஸம் சதுன்னம் பபா⁴னம் யதி³த³ம் பஞ்ஞாபபா⁴’’தி. து³தியம்.

3. ஆலோகஸுத்தம்

143. ‘‘சத்தாரோமே, பி⁴க்க²வே, ஆலோகா. கதமே சத்தாரோ? சந்தா³லோகோ, ஸூரியாலோகோ, அக்³கா³லோகோ, பஞ்ஞாலோகோ – இமே கோ², பி⁴க்க²வே, சத்தாரோ ஆலோகா. ஏதத³க்³க³ம், பி⁴க்க²வே, இமேஸம் சதுன்னம் ஆலோகானம் யதி³த³ம் பஞ்ஞாலோகோ’’தி. ததியம்.

4. ஓபா⁴ஸஸுத்தம்

144. ‘‘சத்தாரோமே, பி⁴க்க²வே, ஓபா⁴ஸா. கதமே சத்தாரோ? சந்தோ³பா⁴ஸோ, ஸூரியோபா⁴ஸோ, அக்³கோ³பா⁴ஸோ, பஞ்ஞோபா⁴ஸோ – இமே கோ², பி⁴க்க²வே, சத்தாரோ ஓபா⁴ஸா. ஏதத³க்³க³ம், பி⁴க்க²வே, இமேஸம் சதுன்னம் ஓபா⁴ஸானம் யதி³த³ம் பஞ்ஞோபா⁴ஸோ’’தி. சதுத்த²ம்.

5. பஜ்ஜோதஸுத்தம்

145. ‘‘சத்தாரோமே, பி⁴க்க²வே, பஜ்ஜோதா. கதமே சத்தாரோ? சந்த³பஜ்ஜோதோ, ஸூரியபஜ்ஜோதோ, அக்³கி³பஜ்ஜோதோ, பஞ்ஞாபஜ்ஜோதோ – இமே கோ², பி⁴க்க²வே, சத்தாரோ பஜ்ஜோதா. ஏதத³க்³க³ம், பி⁴க்க²வே, இமேஸம் சதுன்னம் பஜ்ஜோதானம் யதி³த³ம் பஞ்ஞாபஜ்ஜோதோ’’தி. பஞ்சமம்.

6. பட²மகாலஸுத்தம்

146. ‘‘சத்தாரோமே, பி⁴க்க²வே, காலா. கதமே சத்தாரோ? காலேன த⁴ம்மஸ்ஸவனம், காலேன த⁴ம்மஸாகச்சா², காலேன ஸம்மஸனா [காலேன ஸமதோ² (ஸீ. ஸ்யா. கம். பீ.)], காலேன விபஸ்ஸனா – இமே கோ², பி⁴க்க²வே, சத்தாரோ காலா’’தி. ச²ட்ட²ம்.

7. து³தியகாலஸுத்தம்

147. ‘‘சத்தாரோமே, பி⁴க்க²வே, காலா ஸம்மா பா⁴வியமானா ஸம்மா அனுபரிவத்தியமானா அனுபுப்³பே³ன ஆஸவானம் க²யம் பாபேந்தி. கதமே சத்தாரோ? காலேன த⁴ம்மஸ்ஸவனம், காலேன த⁴ம்மஸாகச்சா², காலேன ஸம்மஸனா, காலேன விபஸ்ஸனா – இமே கோ², பி⁴க்க²வே, சத்தாரோ காலா ஸம்மா பா⁴வியமானா ஸம்மா அனுபரிவத்தியமானா அனுபுப்³பே³ன ஆஸவானம் க²யம் பாபேந்தி.

‘‘ஸேய்யதா²பி, பி⁴க்க²வே, உபரிபப்³ப³தே து²ல்லபு²ஸிதகே தே³வே வஸ்ஸந்தே தம் உத³கம் யதா²னின்னம் பவத்தமானம் பப்³ப³தகந்த³ரபத³ரஸாகா² பரிபூரேதி; பப்³ப³தகந்த³ரபத³ரஸாகா² பரிபூரா குஸோப்³பே⁴ பரிபூரேந்தி; குஸோப்³பா⁴ பரிபூரா மஹாஸோப்³பே⁴ பரிபூரேந்தி; மஹாஸோப்³பா⁴ பரிபூரா குன்னதி³யோ பரிபூரேந்தி; குன்னதி³யோ பரிபூரா மஹானதி³யோ பரிபூரேந்தி; மஹானதி³யோ பரிபூரா ஸமுத்³த³ம் [ஸமுத்³த³ம் ஸாக³ரம் (ஸீ. பீ. க.), ஸமுத்³த³ஸாக³ரம் (ஸ்யா. கம்.)] பரிபூரேந்தி. ஏவமேவம் கோ², பி⁴க்க²வே, இமே சத்தாரோ காலா ஸம்மா பா⁴வியமானா ஸம்மா அனுபரிவத்தியமானா அனுபுப்³பே³ன ஆஸவானம் க²யம் பாபேந்தீ’’தி. ஸத்தமம்.

8. து³ச்சரிதஸுத்தம்

148. ‘‘சத்தாரிமானி, பி⁴க்க²வே, வசீது³ச்சரிதானி. கதமானி சத்தாரி? முஸாவாதோ³, பிஸுணா வாசா, ப²ருஸா வாசா, ஸம்ப²ப்பலாபோ – இமானி கோ², பி⁴க்க²வே, சத்தாரி வசீது³ச்சரிதானீ’’தி. அட்ட²மம்.

9. ஸுசரிதஸுத்தம்

149. ‘‘சத்தாரிமானி, பி⁴க்க²வே, வசீஸுசரிதானி. கதமானி சத்தாரி? ஸச்சவாசா, அபிஸுணா வாசா, ஸண்ஹா வாசா, மந்தபா⁴ஸா – இமானி கோ², பி⁴க்க²வே, சத்தாரி வசீஸுசரிதானீ’’தி. நவமம்.

10. ஸாரஸுத்தம்

150. ‘‘சத்தாரோமே, பி⁴க்க²வே, ஸாரா. கதமே சத்தாரோ? ஸீலஸாரோ, ஸமாதி⁴ஸாரோ, பஞ்ஞாஸாரோ, விமுத்திஸாரோ – இமே கோ², பி⁴க்க²வே, சத்தாரோ ஸாரா’’தி. த³ஸமம்.

ஆபா⁴வக்³கோ³ பஞ்சமோ.