8. நிகட்ட²ஸுத்தம்

138. ‘‘சத்தாரோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? நிகட்ட²காயோ அனிகட்ட²சித்தோ, அனிகட்ட²காயோ நிகட்ட²சித்தோ, அனிகட்ட²காயோ ச அனிகட்ட²சித்தோ ச, நிகட்ட²காயோ ச நிகட்ட²சித்தோ ச.

‘‘கத²ஞ்ச, பி⁴க்க²வே, புக்³க³லோ நிகட்ட²காயோ ஹோதி அனிகட்ட²சித்தோ? இத⁴, பி⁴க்க²வே, ஏகச்சோ புக்³க³லோ அரஞ்ஞவனபத்தா²னி [அரஞ்ஞே வனபத்தா²னி (ஸீ. பீ.)] பந்தானி ஸேனாஸனானி படிஸேவதி. ஸோ தத்த² காமவிதக்கம்பி விதக்கேதி ப்³யாபாத³விதக்கம்பி விதக்கேதி விஹிம்ஸாவிதக்கம்பி விதக்கேதி. ஏவம் கோ², பி⁴க்க²வே, புக்³க³லோ நிகட்ட²காயோ ஹோதி அனிகட்ட²சித்தோ.

‘‘கத²ஞ்ச, பி⁴க்க²வே, புக்³க³லோ அனிகட்ட²காயோ ஹோதி நிகட்ட²சித்தோ? இத⁴, பி⁴க்க²வே, ஏகச்சோ புக்³க³லோ நஹேவ கோ² அரஞ்ஞவனபத்தா²னி பந்தானி ஸேனாஸனானி படிஸேவதி. ஸோ தத்த² நேக்க²ம்மவிதக்கம்பி விதக்கேதி அப்³யாபாத³விதக்கம்பி விதக்கேதி அவிஹிம்ஸாவிதக்கம்பி விதக்கேதி. ஏவம் கோ², பி⁴க்க²வே, புக்³க³லோ அனிகட்ட²காயோ ஹோதி நிகட்ட²சித்தோ.

‘‘கத²ஞ்ச, பி⁴க்க²வே, புக்³க³லோ அனிகட்ட²காயோ ச ஹோதி அனிகட்ட²சித்தோ ச? இத⁴, பி⁴க்க²வே, ஏகச்சோ புக்³க³லோ நஹேவ கோ² அரஞ்ஞவனபத்தா²னி பந்தானி ஸேனாஸனானி படிஸேவதி. ஸோ தத்த² காமவிதக்கம்பி விதக்கேதி ப்³யாபாத³விதக்கம்பி விதக்கேதி விஹிம்ஸாவிதக்கம்பி விதக்கேதி. ஏவம் கோ², பி⁴க்க²வே, புக்³க³லோ அனிகட்ட²காயோ ச ஹோதி அனிகட்ட²சித்தோ ச.

‘‘கத²ஞ்ச, பி⁴க்க²வே, புக்³க³லோ நிகட்ட²காயோ ச ஹோதி நிகட்ட²சித்தோ ச? இத⁴, பி⁴க்க²வே, ஏகச்சோ புக்³க³லோ அரஞ்ஞவனபத்தா²னி பந்தானி ஸேனாஸனானி படிஸேவதி. ஸோ தத்த² நேக்க²ம்மவிதக்கம்பி விதக்கேதி அப்³யாபாத³விதக்கம்பி விதக்கேதி அவிஹிம்ஸாவிதக்கம்பி விதக்கேதி. ஏவம் கோ², பி⁴க்க²வே, புக்³க³லோ நிகட்ட²காயோ ச ஹோதி நிகட்ட²சித்தோ ச. இமே கோ², பி⁴க்க²வே, சத்தாரோ புக்³க³லா ஸந்தோ ஸம்விஜ்ஜமானா லோகஸ்மி’’ந்தி. அட்ட²மம்.