(14) 4. புக்³க³லவக்³கோ³

1. ஸம்யோஜனஸுத்தம்

131. ‘‘சத்தாரோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? இத⁴, பி⁴க்க²வே, ஏகச்சஸ்ஸ புக்³க³லஸ்ஸ ஓரம்பா⁴கி³யானி ஸம்யோஜனானி அப்பஹீனானி ஹோந்தி, உபபத்திபடிலாபி⁴யானி ஸம்யோஜனானி அப்பஹீனானி ஹோந்தி, ப⁴வபடிலாபி⁴யானி ஸம்யோஜனானி அப்பஹீனானி ஹோந்தி.

‘‘இத⁴ பன, பி⁴க்க²வே, ஏகச்சஸ்ஸ புக்³க³லஸ்ஸ ஓரம்பா⁴கி³யானி ஸம்யோஜனானி பஹீனானி ஹோந்தி, உபபத்திபடிலாபி⁴யானி ஸம்யோஜனானி அப்பஹீனானி ஹோந்தி, ப⁴வபடிலாபி⁴யானி ஸம்யோஜனானி அப்பஹீனானி ஹோந்தி.

‘‘இத⁴ பன, பி⁴க்க²வே, ஏகச்சஸ்ஸ புக்³க³லஸ்ஸ ஓரம்பா⁴கி³யானி ஸம்யோஜனானி பஹீனானி ஹோந்தி, உபபத்திபடிலாபி⁴யானி ஸம்யோஜனானி பஹீனானி ஹோந்தி, ப⁴வபடிலாபி⁴யானி ஸம்யோஜனானி அப்பஹீனானி ஹோந்தி.

‘‘இத⁴ பன, பி⁴க்க²வே, ஏகச்சஸ்ஸ புக்³க³லஸ்ஸ ஓரம்பா⁴கி³யானி ஸம்யோஜனானி பஹீனானி ஹோந்தி, உபபத்திபடிலாபி⁴யானி ஸம்யோஜனானி பஹீனானி ஹோந்தி, ப⁴வபடிலாபி⁴யானி ஸம்யோஜனானி பஹீனானி ஹோந்தி.

‘‘கதமஸ்ஸ, பி⁴க்க²வே, புக்³க³லஸ்ஸ ஓரம்பா⁴கி³யானி ஸம்யோஜனானி அப்பஹீனானி, உபபத்திபடிலாபி⁴யானி ஸம்யோஜனானி அப்பஹீனானி, ப⁴வபடிலாபி⁴யானி ஸம்யோஜனானி அப்பஹீனானி? ஸகதா³கா³மிஸ்ஸ. இமஸ்ஸ கோ², பி⁴க்க²வே, புக்³க³லஸ்ஸ ஓரம்பா⁴கி³யானி ஸம்யோஜனானி அப்பஹீனானி, உபபத்திபடிலாபி⁴யானி ஸம்யோஜனானி அப்பஹீனானி, ப⁴வபடிலாபி⁴யானி ஸம்யோஜனானி அப்பஹீனானி.

‘‘கதமஸ்ஸ, பி⁴க்க²வே, புக்³க³லஸ்ஸ ஓரம்பா⁴கி³யானி ஸம்யோஜனானி பஹீனானி, உபபத்திபடிலாபி⁴யானி ஸம்யோஜனானி அப்பஹீனானி, ப⁴வபடிலாபி⁴யானி ஸம்யோஜனானி அப்பஹீனானி? உத்³த⁴ம்ஸோதஸ்ஸ அகனிட்ட²கா³மினோ. இமஸ்ஸ கோ², பி⁴க்க²வே, புக்³க³லஸ்ஸ ஓரம்பா⁴கி³யானி ஸம்யோஜனானி பஹீனானி, உபபத்திபடிலாபி⁴யானி ஸம்யோஜனானி அப்பஹீனானி, ப⁴வபடிலாபி⁴யானி ஸம்யோஜனானி அப்பஹீனானி.

‘‘கதமஸ்ஸ, பி⁴க்க²வே, புக்³க³லஸ்ஸ ஓரம்பா⁴கி³யானி ஸம்யோஜனானி பஹீனானி, உபபத்திபடிலாபி⁴யானி ஸம்யோஜனானி பஹீனானி, ப⁴வபடிலாபி⁴யானி ஸம்யோஜனானி அப்பஹீனானி? அந்தராபரினிப்³பா³யிஸ்ஸ. இமஸ்ஸ கோ², பி⁴க்க²வே, புக்³க³லஸ்ஸ ஓரம்பா⁴கி³யானி ஸம்யோஜனானி பஹீனானி, உபபத்திபடிலாபி⁴யானி ஸம்யோஜனானி பஹீனானி, ப⁴வபடிலாபி⁴யானி ஸம்யோஜனானி அப்பஹீனானி.

‘‘கதமஸ்ஸ, பி⁴க்க²வே, புக்³க³லஸ்ஸ ஓரம்பா⁴கி³யானி ஸம்யோஜனானி பஹீனானி, உபபத்திபடிலாபி⁴யானி ஸம்யோஜனானி பஹீனானி, ப⁴வபடிலாபி⁴யானி ஸம்யோஜனானி பஹீனானி? அரஹதோ. இமஸ்ஸ கோ², பி⁴க்க²வே, புக்³க³லஸ்ஸ ஓரம்பா⁴கி³யானி ஸம்யோஜனானி பஹீனானி, உபபத்திபடிலாபி⁴யானி ஸம்யோஜனானி பஹீனானி, ப⁴வபடிலாபி⁴யானி ஸம்யோஜனானி பஹீனானி. இமே கோ², பி⁴க்க²வே, சத்தாரோ புக்³க³லா ஸந்தோ ஸம்விஜ்ஜமானா லோகஸ்மி’’ந்தி. பட²மம்.

2. படிபா⁴னஸுத்தம்

132. ‘‘சத்தாரோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? யுத்தப்படிபா⁴னோ, நோ முத்தப்படிபா⁴னோ; முத்தப்படிபா⁴னோ, நோ யுத்தப்படிபா⁴னோ; யுத்தப்படிபா⁴னோ ச முத்தப்படிபா⁴னோ ச; நேவ யுத்தப்படிபா⁴னோ ந முத்தப்படிபா⁴னோ – இமே கோ², பி⁴க்க²வே, சத்தாரோ புக்³க³லா ஸந்தோ ஸம்விஜ்ஜமானா லோகஸ்மி’’ந்தி [பு. ப. 152 ஆத³யோ]. து³தியம்.

3. உக்³க⁴டிதஞ்ஞூஸுத்தம்

133. ‘‘சத்தாரோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? உக்³க⁴டிதஞ்ஞூ, விபஞ்சிதஞ்ஞூ, நேய்யோ, பத³பரமோ – இமே கோ², பி⁴க்க²வே, சத்தாரோ புக்³க³லா ஸந்தோ ஸம்விஜ்ஜமானா லோகஸ்மி’’ந்தி [பு. ப. 152 ஆத³யோ]. ததியம்.

4. உட்டா²னப²லஸுத்தம்

134. ‘‘சத்தாரோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? உட்டா²னப²லூபஜீவீ ந கம்மப²லூபஜீவீ, கம்மப²லூபஜீவீ ந உட்டா²னப²லூபஜீவீ, உட்டா²னப²லூபஜீவீ சேவ கம்மப²லூபஜீவீ ச, நேவ உட்டா²னப²லூபஜீவீ ந கம்மப²லூபஜீவீ – இமே கோ², பி⁴க்க²வே, சத்தாரோ புக்³க³லா ஸந்தோ ஸம்விஜ்ஜமானா லோகஸ்மி’’ந்தி [பு. ப. 167]. சதுத்த²ம்.

5. ஸாவஜ்ஜஸுத்தம்

135. ‘‘சத்தாரோமே, பி⁴க்க²வே, புக்³க³லா [பு. ப. 144 ஆத³யோ] ஸந்தோ ஸம்விஜ்ஜமானா லோகஸ்மிம். கதமே சத்தாரோ? ஸாவஜ்ஜோ, வஜ்ஜப³ஹுலோ, அப்பவஜ்ஜோ, அனவஜ்ஜோ.

‘‘கத²ஞ்ச, பி⁴க்க²வே, புக்³க³லோ ஸாவஜ்ஜோ ஹோதி? இத⁴, பி⁴க்க²வே, ஏகச்சோ புக்³க³லோ ஸாவஜ்ஜேன காயகம்மேன ஸமன்னாக³தோ ஹோதி, ஸாவஜ்ஜேன வசீகம்மேன ஸமன்னாக³தோ ஹோதி, ஸாவஜ்ஜேன மனோகம்மேன ஸமன்னாக³தோ ஹோதி. ஏவம் கோ², பி⁴க்க²வே, புக்³க³லோ ஸாவஜ்ஜோ ஹோதி.

‘‘கத²ஞ்ச, பி⁴க்க²வே, புக்³க³லோ வஜ்ஜப³ஹுலோ ஹோதி? இத⁴, பி⁴க்க²வே, ஏகச்சோ புக்³க³லோ ஸாவஜ்ஜேன ப³ஹுலம் காயகம்மேன ஸமன்னாக³தோ ஹோதி, அப்பம் அனவஜ்ஜேன; ஸாவஜ்ஜேன ப³ஹுலம் வசீகம்மேன ஸமன்னாக³தோ ஹோதி, அப்பம் அனவஜ்ஜேன; ஸாவஜ்ஜேன ப³ஹுலம் மனோகம்மேன ஸமன்னாக³தோ ஹோதி, அப்பம் அனவஜ்ஜேன. ஏவம் கோ², பி⁴க்க²வே, புக்³க³லோ வஜ்ஜப³ஹுலோ ஹோதி.

‘‘கத²ஞ்ச, பி⁴க்க²வே, புக்³க³லோ அப்பவஜ்ஜோ ஹோதி? இத⁴, பி⁴க்க²வே, ஏகச்சோ புக்³க³லோ அனவஜ்ஜேன ப³ஹுலம் காயகம்மேன ஸமன்னாக³தோ ஹோதி, அப்பம் ஸாவஜ்ஜேன; அனவஜ்ஜேன ப³ஹுலம் வசீகம்மேன ஸமன்னாக³தோ ஹோதி, அப்பம் ஸாவஜ்ஜேன; அனவஜ்ஜேன ப³ஹுலம் மனோகம்மேன ஸமன்னாக³தோ ஹோதி, அப்பம் ஸாவஜ்ஜேன. ஏவம் கோ², பி⁴க்க²வே, புக்³க³லோ அப்பவஜ்ஜோ ஹோதி.

‘‘கத²ஞ்ச, பி⁴க்க²வே, புக்³க³லோ அனவஜ்ஜோ ஹோதி? இத⁴, பி⁴க்க²வே, ஏகச்சோ புக்³க³லோ அனவஜ்ஜேன காயகம்மேன ஸமன்னாக³தோ ஹோதி, அனவஜ்ஜேன வசீகம்மேன ஸமன்னாக³தோ ஹோதி, அனவஜ்ஜேன மனோகம்மேன ஸமன்னாக³தோ ஹோதி. ஏவம் கோ², பி⁴க்க²வே, புக்³க³லோ அனவஜ்ஜோ ஹோதி. இமே கோ², பி⁴க்க²வே, சத்தாரோ புக்³க³லா ஸந்தோ ஸம்விஜ்ஜமானா லோகஸ்மி’’ந்தி. பஞ்சமம்.

6. பட²மஸீலஸுத்தம்

136. ‘‘சத்தாரோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? இத⁴, பி⁴க்க²வே, ஏகச்சோ புக்³க³லோ ஸீலேஸு ந பரிபூரகாரீ ஹோதி, ஸமாதி⁴ஸ்மிம் ந பரிபூரகாரீ, பஞ்ஞாய ந பரிபூரகாரீ.

‘‘இத⁴ பன, பி⁴க்க²வே, ஏகச்சோ புக்³க³லோ ஸீலேஸு பரிபூரகாரீ ஹோதி, ஸமாதி⁴ஸ்மிம் ந பரிபூரகாரீ, பஞ்ஞாய ந பரிபூரகாரீ.

‘‘இத⁴ பன, பி⁴க்க²வே, ஏகச்சோ புக்³க³லோ ஸீலேஸு பரிபூரகாரீ ஹோதி, ஸமாதி⁴ஸ்மிம் பரிபூரகாரீ, பஞ்ஞாய ந பரிபூரகாரீ.

‘‘இத⁴ பன, பி⁴க்க²வே, ஏகச்சோ புக்³க³லோ ஸீலேஸு பரிபூரகாரீ ஹோதி, ஸமாதி⁴ஸ்மிம் பரிபூரகாரீ, பஞ்ஞாய பரிபூரகாரீ. இமே கோ², பி⁴க்க²வே, சத்தாரோ புக்³க³லா ஸந்தோ ஸம்விஜ்ஜமானா லோகஸ்மி’’ந்தி. ச²ட்ட²ம்.

7. து³தியஸீலஸுத்தம்

137. ‘‘சத்தாரோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? இத⁴, பி⁴க்க²வே, ஏகச்சோ புக்³க³லோ ந ஸீலக³ரு ஹோதி ந ஸீலாதி⁴பதேய்யோ, ந ஸமாதி⁴க³ரு ஹோதி ந ஸமாதா⁴தி⁴பதேய்யோ, ந பஞ்ஞாக³ரு ஹோதி ந பஞ்ஞாதி⁴பதேய்யோ.

‘‘இத⁴ பன, பி⁴க்க²வே, ஏகச்சோ புக்³க³லோ ஸீலக³ரு ஹோதி ஸீலாதி⁴பதேய்யோ, ந ஸமாதி⁴க³ரு ஹோதி ந ஸமாதா⁴தி⁴பதேய்யோ, ந பஞ்ஞாக³ரு ஹோதி ந பஞ்ஞாதி⁴பதேய்யோ.

‘‘இத⁴ பன, பி⁴க்க²வே, ஏகச்சோ புக்³க³லோ ஸீலக³ரு ஹோதி ஸீலாதி⁴பதேய்யோ, ஸமாதி⁴க³ரு ஹோதி ஸமாதா⁴தி⁴பதேய்யோ, ந பஞ்ஞாக³ரு ஹோதி ந பஞ்ஞாதி⁴பதேய்யோ.

‘‘இத⁴ பன, பி⁴க்க²வே, ஏகச்சோ புக்³க³லோ ஸீலக³ரு ஹோதி ஸீலாதி⁴பதேய்யோ, ஸமாதி⁴க³ரு ஹோதி ஸமாதா⁴தி⁴பதேய்யோ, பஞ்ஞாக³ரு ஹோதி பஞ்ஞாதி⁴பதேய்யோ. இமே கோ², பி⁴க்க²வே, சத்தாரோ புக்³க³லா ஸந்தோ ஸம்விஜ்ஜமானா லோகஸ்மி’’ந்தி. ஸத்தமம்.

8. நிகட்ட²ஸுத்தம்

138. ‘‘சத்தாரோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? நிகட்ட²காயோ அனிகட்ட²சித்தோ, அனிகட்ட²காயோ நிகட்ட²சித்தோ, அனிகட்ட²காயோ ச அனிகட்ட²சித்தோ ச, நிகட்ட²காயோ ச நிகட்ட²சித்தோ ச.

‘‘கத²ஞ்ச, பி⁴க்க²வே, புக்³க³லோ நிகட்ட²காயோ ஹோதி அனிகட்ட²சித்தோ? இத⁴, பி⁴க்க²வே, ஏகச்சோ புக்³க³லோ அரஞ்ஞவனபத்தா²னி [அரஞ்ஞே வனபத்தா²னி (ஸீ. பீ.)] பந்தானி ஸேனாஸனானி படிஸேவதி. ஸோ தத்த² காமவிதக்கம்பி விதக்கேதி ப்³யாபாத³விதக்கம்பி விதக்கேதி விஹிம்ஸாவிதக்கம்பி விதக்கேதி. ஏவம் கோ², பி⁴க்க²வே, புக்³க³லோ நிகட்ட²காயோ ஹோதி அனிகட்ட²சித்தோ.

‘‘கத²ஞ்ச, பி⁴க்க²வே, புக்³க³லோ அனிகட்ட²காயோ ஹோதி நிகட்ட²சித்தோ? இத⁴, பி⁴க்க²வே, ஏகச்சோ புக்³க³லோ நஹேவ கோ² அரஞ்ஞவனபத்தா²னி பந்தானி ஸேனாஸனானி படிஸேவதி. ஸோ தத்த² நேக்க²ம்மவிதக்கம்பி விதக்கேதி அப்³யாபாத³விதக்கம்பி விதக்கேதி அவிஹிம்ஸாவிதக்கம்பி விதக்கேதி. ஏவம் கோ², பி⁴க்க²வே, புக்³க³லோ அனிகட்ட²காயோ ஹோதி நிகட்ட²சித்தோ.

‘‘கத²ஞ்ச, பி⁴க்க²வே, புக்³க³லோ அனிகட்ட²காயோ ச ஹோதி அனிகட்ட²சித்தோ ச? இத⁴, பி⁴க்க²வே, ஏகச்சோ புக்³க³லோ நஹேவ கோ² அரஞ்ஞவனபத்தா²னி பந்தானி ஸேனாஸனானி படிஸேவதி. ஸோ தத்த² காமவிதக்கம்பி விதக்கேதி ப்³யாபாத³விதக்கம்பி விதக்கேதி விஹிம்ஸாவிதக்கம்பி விதக்கேதி. ஏவம் கோ², பி⁴க்க²வே, புக்³க³லோ அனிகட்ட²காயோ ச ஹோதி அனிகட்ட²சித்தோ ச.

‘‘கத²ஞ்ச, பி⁴க்க²வே, புக்³க³லோ நிகட்ட²காயோ ச ஹோதி நிகட்ட²சித்தோ ச? இத⁴, பி⁴க்க²வே, ஏகச்சோ புக்³க³லோ அரஞ்ஞவனபத்தா²னி பந்தானி ஸேனாஸனானி படிஸேவதி. ஸோ தத்த² நேக்க²ம்மவிதக்கம்பி விதக்கேதி அப்³யாபாத³விதக்கம்பி விதக்கேதி அவிஹிம்ஸாவிதக்கம்பி விதக்கேதி. ஏவம் கோ², பி⁴க்க²வே, புக்³க³லோ நிகட்ட²காயோ ச ஹோதி நிகட்ட²சித்தோ ச. இமே கோ², பி⁴க்க²வே, சத்தாரோ புக்³க³லா ஸந்தோ ஸம்விஜ்ஜமானா லோகஸ்மி’’ந்தி. அட்ட²மம்.

9. த⁴ம்மகதி²கஸுத்தம்

139. ‘‘சத்தாரோமே, பி⁴க்க²வே, த⁴ம்மகதி²கா. கதமே சத்தாரோ? இத⁴, பி⁴க்க²வே, ஏகச்சோ த⁴ம்மகதி²கோ அப்பஞ்ச பா⁴ஸதி அஸஹிதஞ்ச; பரிஸா சஸ்ஸ [பரிஸா ச (ஸீ. ஸ்யா. கம். பீ.) பு. ப. 156] ந குஸலா ஹோதி ஸஹிதாஸஹிதஸ்ஸ. ஏவரூபோ, பி⁴க்க²வே, த⁴ம்மகதி²கோ ஏவரூபாய பரிஸாய த⁴ம்மகதி²கோத்வேவ ஸங்க²ம் க³ச்ச²தி.

‘‘இத⁴ பன, பி⁴க்க²வே, ஏகச்சோ த⁴ம்மகதி²கோ அப்பஞ்ச பா⁴ஸதி ஸஹிதஞ்ச; பரிஸா சஸ்ஸ குஸலா ஹோதி ஸஹிதாஸஹிதஸ்ஸ. ஏவரூபோ, பி⁴க்க²வே, த⁴ம்மகதி²கோ ஏவரூபாய பரிஸாய த⁴ம்மகதி²கோத்வேவ ஸங்க²ம் க³ச்ச²தி.

‘‘இத⁴ பன, பி⁴க்க²வே, ஏகச்சோ த⁴ம்மகதி²கோ ப³ஹுஞ்ச பா⁴ஸதி அஸஹிதஞ்ச; பரிஸா சஸ்ஸ ந குஸலா ஹோதி ஸஹிதாஸஹிதஸ்ஸ. ஏவரூபோ, பி⁴க்க²வே, த⁴ம்மகதி²கோ ஏவரூபாய பரிஸாய த⁴ம்மகதி²கோத்வேவ ஸங்க²ம் க³ச்ச²தி.

‘‘இத⁴ பன, பி⁴க்க²வே, ஏகச்சோ த⁴ம்மகதி²கோ ப³ஹுஞ்ச பா⁴ஸதி ஸஹிதஞ்ச; பரிஸா சஸ்ஸ குஸலா ஹோதி ஸஹிதாஸஹிதஸ்ஸ. ஏவரூபோ, பி⁴க்க²வே, த⁴ம்மகதி²கோ ஏவரூபாய பரிஸாய த⁴ம்மகதி²கோத்வேவ ஸங்க²ம் க³ச்ச²தி. இமே கோ², பி⁴க்க²வே, சத்தாரோ த⁴ம்மகதி²கா’’தி. நவமம்.

10. வாதீ³ஸுத்தம்

140. ‘‘சத்தாரோமே, பி⁴க்க²வே, வாதீ³. கதமே சத்தாரோ? அத்தி², பி⁴க்க²வே, வாதீ³ அத்த²தோ பரியாதா³னம் க³ச்ச²தி, நோ ப்³யஞ்ஜனதோ; அத்தி², பி⁴க்க²வே, வாதீ³ ப்³யஞ்ஜனதோ பரியாதா³னம் க³ச்ச²தி, நோ அத்த²தோ; அத்தி², பி⁴க்க²வே, வாதீ³ அத்த²தோ ச ப்³யஞ்ஜனதோ ச பரியாதா³னம் க³ச்ச²தி; அத்தி², பி⁴க்க²வே, வாதீ³ நேவத்த²தோ நோ ப்³யஞ்ஜனதோ பரியாதா³னம் க³ச்ச²தி. இமே கோ², பி⁴க்க²வே, சத்தாரோ வாதீ³. அட்டா²னமேதம், பி⁴க்க²வே, அனவகாஸோ யம் சதூஹி படிஸம்பி⁴தா³ஹி ஸமன்னாக³தோ [ஸமன்னாக³தோ பி⁴க்கு² (ஸீ. ஸ்யா. கம்.)] அத்த²தோ வா ப்³யஞ்ஜனதோ வா பரியாதா³னம் க³ச்சே²ய்யா’’தி. த³ஸமம்.

புக்³க³லவக்³கோ³ சதுத்தோ².