10. சக்கவத்திஅச்ச²ரியஸுத்தம்

130. ‘‘சத்தாரோமே, பி⁴க்க²வே, அச்ச²ரியா அப்³பு⁴தா த⁴ம்மா ரஞ்ஞே சக்கவத்திம்ஹி. கதமே சத்தாரோ? ஸசே, பி⁴க்க²வே, க²த்தியபரிஸா ராஜானம் சக்கவத்திம் த³ஸ்ஸனாய உபஸங்கமதி, த³ஸ்ஸனேனபி ஸா அத்தமனா ஹோதி. தத்ர சே ராஜா சக்கவத்தீ பா⁴ஸதி, பா⁴ஸிதேனபி ஸா அத்தமனா ஹோதி. அதித்தாவ, பி⁴க்க²வே, க²த்தியபரிஸா ஹோதி, அத² ராஜா சக்கவத்தீ துண்ஹீ ப⁴வதி.

‘‘ஸசே, பி⁴க்க²வே, ப்³ராஹ்மணபரிஸா ராஜானம் சக்கவத்திம் த³ஸ்ஸனாய உபஸங்கமதி, த³ஸ்ஸனேனபி ஸா அத்தமனா ஹோதி. தத்ர சே ராஜா சக்கவத்தீ பா⁴ஸதி, பா⁴ஸிதேனபி ஸா அத்தமனா ஹோதி. அதித்தாவ, பி⁴க்க²வே, ப்³ராஹ்மணபரிஸா ஹோதி, அத² ராஜா சக்கவத்தீ துண்ஹீ ப⁴வதி.

‘‘ஸசே, பி⁴க்க²வே, க³ஹபதிபரிஸா ராஜானம் சக்கவத்திம் த³ஸ்ஸனாய உபஸங்கமதி, த³ஸ்ஸனேனபி ஸா அத்தமனா ஹோதி. தத்ர சே ராஜா சக்கவத்தீ பா⁴ஸதி, பா⁴ஸிதேனபி ஸா அத்தமனா ஹோதி. அதித்தாவ, பி⁴க்க²வே, க³ஹபதிபரிஸா ஹோதி, அத² ராஜா சக்கவத்தீ துண்ஹீ ப⁴வதி.

‘‘ஸசே, பி⁴க்க²வே, ஸமணபரிஸா ராஜானம் சக்கவத்திம் த³ஸ்ஸனாய உபஸங்கமதி, த³ஸ்ஸனேனபி ஸா அத்தமனா ஹோதி. தத்ர சே ராஜா சக்கவத்தீ பா⁴ஸதி, பா⁴ஸிதேனபி ஸா அத்தமனா ஹோதி. அதித்தாவ, பி⁴க்க²வே, ஸமணபரிஸா ஹோதி, அத² ராஜா சக்கவத்தீ துண்ஹீ ப⁴வதி. இமே கோ², பி⁴க்க²வே, சத்தாரோ அச்ச²ரியா அப்³பு⁴தா த⁴ம்மா ரஞ்ஞே சக்கவத்திம்ஹி.

‘‘ஏவமேவம் கோ², பி⁴க்க²வே, சத்தாரோ [சத்தாரோமே (க.)] அச்ச²ரியா அப்³பு⁴தா த⁴ம்மா ஆனந்தே³. கதமே சத்தாரோ? ஸசே, பி⁴க்க²வே, பி⁴க்கு²பரிஸா ஆனந்த³ம் த³ஸ்ஸனாய உபஸங்கமதி, த³ஸ்ஸனேனபி ஸா அத்தமனா ஹோதி. தத்ர சே ஆனந்தோ³ த⁴ம்மம் பா⁴ஸதி, பா⁴ஸிதேனபி ஸா அத்தமனா ஹோதி. அதித்தாவ, பி⁴க்க²வே, பி⁴க்கு²பரிஸா ஹோதி, அத² ஆனந்தோ³ துண்ஹீ ப⁴வதி.

‘‘ஸசே, பி⁴க்க²வே, பி⁴க்கு²னிபரிஸா…பே… ஸசே, பி⁴க்க²வே, உபாஸகபரிஸா…பே… ஸசே, பி⁴க்க²வே, உபாஸிகாபரிஸா ஆனந்த³ம் த³ஸ்ஸனாய உபஸங்கமதி, த³ஸ்ஸனேனபி ஸா அத்தமனா ஹோதி. தத்ர சே ஆனந்தோ³ த⁴ம்மம் பா⁴ஸதி, பா⁴ஸிதேனபி ஸா அத்தமனா ஹோதி. அதித்தாவ, பி⁴க்க²வே, உபாஸிகாபரிஸா ஹோதி, அத² ஆனந்தோ³ துண்ஹீ ப⁴வதி. இமே கோ², பி⁴க்க²வே, சத்தாரோ அச்ச²ரியா அப்³பு⁴தா த⁴ம்மா ஆனந்தே³’’தி. த³ஸமம்.

ப⁴யவக்³கோ³ ததியோ.