5. டா²னஸுத்தம்

115. ‘‘சத்தாரிமானி, பி⁴க்க²வே, டா²னானி. கதமானி சத்தாரி? அத்தி², பி⁴க்க²வே, டா²னம் அமனாபம் காதும்; தஞ்ச கயிரமானம் அனத்தா²ய ஸம்வத்ததி. அத்தி², பி⁴க்க²வே, டா²னம் அமனாபம் காதும்; தஞ்ச கயிரமானம் அத்தா²ய ஸம்வத்ததி. அத்தி², பி⁴க்க²வே, டா²னம் மனாபம் காதும்; தஞ்ச கயிரமானம் அனத்தா²ய ஸம்வத்ததி. அத்தி², பி⁴க்க²வே, டா²னம் மனாபம் காதும்; தஞ்ச கயிரமானம் அத்தா²ய ஸம்வத்ததி.

‘‘தத்ர, பி⁴க்க²வே, யமித³ம் [யதி³த³ம் (ஸ்யா. கம். க.)] டா²னம் அமனாபம் காதும்; தஞ்ச கயிரமானம் அனத்தா²ய ஸம்வத்ததி – இத³ம், பி⁴க்க²வே, டா²னம் உப⁴யேனேவ ந கத்தப்³ப³ம் மஞ்ஞதி [பஞ்ஞாயதி (?)]. யம்பித³ம் [யதி³த³ம் (க.)] டா²னம் அமனாபம் காதும்; இமினாபி நம் [தம் (ஸீ. பீ.) ஸ்யாமபோத்த²கே நத்தி²] ந கத்தப்³ப³ம் மஞ்ஞதி. யம்பித³ம் டா²னம் கயிரமானம் அனத்தா²ய ஸம்வத்ததி; இமினாபி நம் [தம் (பீ.) ஸீ. ஸ்யா. போத்த²கேஸு நத்தி²] ந கத்தப்³ப³ம் மஞ்ஞதி. இத³ம், பி⁴க்க²வே, டா²னம் உப⁴யேனேவ ந கத்தப்³ப³ம் மஞ்ஞதி.

‘‘தத்ர, பி⁴க்க²வே, யமித³ம் டா²னம் அமனாபம் காதும்; தஞ்ச கயிரமானம் அத்தா²ய ஸம்வத்ததி – இமஸ்மிம், பி⁴க்க²வே, டா²னே பா³லோ ச பண்டி³தோ ச வேதி³தப்³போ³ புரிஸதா²மே புரிஸவீரியே புரிஸபரக்கமே. ந, பி⁴க்க²வே, பா³லோ இதி படிஸஞ்சிக்க²தி – ‘கிஞ்சாபி கோ² இத³ம் டா²னம் அமனாபம் காதும்; அத² சரஹித³ம் டா²னம் கயிரமானம் அத்தா²ய ஸம்வத்ததீ’தி. ஸோ தம் டா²னம் ந கரோதி. தஸ்ஸ தம் டா²னம் அகயிரமானம் அனத்தா²ய ஸம்வத்ததி. பண்டி³தோ ச கோ², பி⁴க்க²வே, இதி படிஸஞ்சிக்க²தி – ‘கிஞ்சாபி கோ² இத³ம் டா²னம் அமனாபம் காதும்; அத² சரஹித³ம் டா²னம் கயிரமானம் அத்தா²ய ஸம்வத்ததீ’தி. ஸோ தம் டா²னம் கரோதி. தஸ்ஸ தம் டா²னம் கயிரமானம் அத்தா²ய ஸம்வத்ததி.

‘‘தத்ர, பி⁴க்க²வே, யமித³ம் [யதி³த³ம் (ஸ்யா. கம்.)] டா²னம் மனாபம் காதும்; தஞ்ச கயிரமானம் அனத்தா²ய ஸம்வத்ததி – இமஸ்மிம்பி, பி⁴க்க²வே, டா²னே பா³லோ ச பண்டி³தோ ச வேதி³தப்³போ³ புரிஸதா²மே புரிஸவீரியே புரிஸபரக்கமே. ந, பி⁴க்க²வே, பா³லோ இதி படிஸஞ்சிக்க²தி – ‘கிஞ்சாபி கோ² இத³ம் டா²னம் மனாபம் காதும்; அத² சரஹித³ம் டா²னம் கயிரமானம் அனத்தா²ய ஸம்வத்ததீ’தி. ஸோ தம் டா²னம் கரோதி. தஸ்ஸ தம் டா²னம் கயிரமானம் அனத்தா²ய ஸம்வத்ததி. பண்டி³தோ ச கோ², பி⁴க்க²வே, இதி படிஸஞ்சிக்க²தி – ‘கிஞ்சாபி கோ² இத³ம் டா²னம் மனாபம் காதும்; அத² சரஹித³ம் டா²னம் கயிரமானம் அனத்தா²ய ஸம்வத்ததீ’தி. ஸோ தம் டா²னம் ந கரோதி. தஸ்ஸ தம் டா²னம் அகயிரமானம் அத்தா²ய ஸம்வத்ததி.

‘‘தத்ர, பி⁴க்க²வே, யமித³ம் டா²னம் மனாபம் காதும், தஞ்ச கயிரமானம் அத்தா²ய ஸம்வத்ததி – இத³ம், பி⁴க்க²வே, டா²னம் உப⁴யேனேவ கத்தப்³ப³ம் மஞ்ஞதி. யம்பித³ம் டா²னம் மனாபம் காதும், இமினாபி நம் கத்தப்³ப³ம் மஞ்ஞதி; யம்பித³ம் டா²னம் கயிரமானம் அத்தா²ய ஸம்வத்ததி, இமினாபி நம் கத்தப்³ப³ம் மஞ்ஞதி. இத³ம், பி⁴க்க²வே, டா²னம் உப⁴யேனேவ கத்தப்³ப³ம் மஞ்ஞதி. இமானி கோ², பி⁴க்க²வே, சத்தாரி டா²னானீ’’தி. பஞ்சமம்.