(11) 1. வலாஹகவக்³கோ³

1. பட²மவலாஹகஸுத்தம்

101. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘சத்தாரோமே, பி⁴க்க²வே, வலாஹகா. கதமே சத்தாரோ? க³ஜ்ஜிதா நோ வஸ்ஸிதா, வஸ்ஸிதா நோ க³ஜ்ஜிதா, நேவ க³ஜ்ஜிதா நோ வஸ்ஸிதா, க³ஜ்ஜிதா ச வஸ்ஸிதா ச. இமே கோ², பி⁴க்க²வே, சத்தாரோ வலாஹகா. ஏவமேவம் கோ², பி⁴க்க²வே, சத்தாரோ வலாஹகூபமா [பு. ப. 157] புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? க³ஜ்ஜிதா நோ வஸ்ஸிதா, வஸ்ஸிதா நோ க³ஜ்ஜிதா, நேவ க³ஜ்ஜிதா நோ வஸ்ஸிதா, க³ஜ்ஜிதா ச வஸ்ஸிதா ச.

‘‘கத²ஞ்ச, பி⁴க்க²வே, புக்³க³லோ க³ஜ்ஜிதா ஹோதி நோ வஸ்ஸிதா? இத⁴, பி⁴க்க²வே, ஏகச்சோ புக்³க³லோ பா⁴ஸிதா ஹோதி, நோ கத்தா. ஏவம் கோ², பி⁴க்க²வே, புக்³க³லோ க³ஜ்ஜிதா ஹோதி, நோ வஸ்ஸிதா. ஸேய்யதா²பி ஸோ, பி⁴க்க²வே, வலாஹகோ க³ஜ்ஜிதா, நோ வஸ்ஸிதா; ததூ²பமாஹம், பி⁴க்க²வே, இமம் புக்³க³லம் வதா³மி.

‘‘கத²ஞ்ச, பி⁴க்க²வே, புக்³க³லோ வஸ்ஸிதா ஹோதி, நோ க³ஜ்ஜிதா? இத⁴, பி⁴க்க²வே, ஏகச்சோ புக்³க³லோ கத்தா ஹோதி, நோ பா⁴ஸிதா. ஏவம் கோ², பி⁴க்க²வே, புக்³க³லோ வஸ்ஸிதா ஹோதி, நோ க³ஜ்ஜிதா. ஸேய்யதா²பி ஸோ, பி⁴க்க²வே, வலாஹகோ வஸ்ஸிதா, நோ க³ஜ்ஜிதா; ததூ²பமாஹம், பி⁴க்க²வே, இமம் புக்³க³லம் வதா³மி.

‘‘கத²ஞ்ச, பி⁴க்க²வே, புக்³க³லோ நேவ க³ஜ்ஜிதா ஹோதி, நோ வஸ்ஸிதா? இத⁴, பி⁴க்க²வே, ஏகச்சோ புக்³க³லோ நேவ பா⁴ஸிதா ஹோதி, நோ கத்தா. ஏவம் கோ², பி⁴க்க²வே, புக்³க³லோ நேவ க³ஜ்ஜிதா ஹோதி, நோ வஸ்ஸிதா. ஸேய்யதா²பி ஸோ, பி⁴க்க²வே, வலாஹகோ நேவ க³ஜ்ஜிதா [நேவ க³ஜ்ஜிதா ஹோதி (க.)], நோ வஸ்ஸிதா; ததூ²பமாஹம், பி⁴க்க²வே, இமம் புக்³க³லம் வதா³மி.

‘‘கத²ஞ்ச, பி⁴க்க²வே, புக்³க³லோ க³ஜ்ஜிதா ச ஹோதி வஸ்ஸிதா ச? இத⁴, பி⁴க்க²வே, ஏகச்சோ புக்³க³லோ பா⁴ஸிதா ச ஹோதி கத்தா ச. ஏவம் கோ², பி⁴க்க²வே, புக்³க³லோ க³ஜ்ஜிதா ச ஹோதி வஸ்ஸிதா ச. ஸேய்யதா²பி ஸோ, பி⁴க்க²வே, வலாஹகோ க³ஜ்ஜிதா ச [க³ஜ்ஜிதா ச ஹோதி (க.)] வஸ்ஸிதா ச; ததூ²பமாஹம், பி⁴க்க²வே, இமம் புக்³க³லம் வதா³மி. இமே கோ², பி⁴க்க²வே, சத்தாரோ வலாஹகூபமா புக்³க³லா ஸந்தோ ஸம்விஜ்ஜமானா லோகஸ்மி’’ந்தி. பட²மம்.

2. து³தியவலாஹகஸுத்தம்

102. ‘‘சத்தாரோமே, பி⁴க்க²வே, வலாஹகா. கதமே சத்தாரோ? க³ஜ்ஜிதா நோ வஸ்ஸிதா, வஸ்ஸிதா நோ க³ஜ்ஜிதா, நேவ க³ஜ்ஜிதா நோ வஸ்ஸிதா க³ஜ்ஜிதா ச வஸ்ஸிதா ச. இமே கோ², பி⁴க்க²வே, சத்தாரோ வலாஹகா. ஏவமேவம் கோ², பி⁴க்க²வே, சத்தாரோ வலாஹகூபமா புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? க³ஜ்ஜிதா நோ வஸ்ஸிதா, வஸ்ஸிதா நோ க³ஜ்ஜிதா, நேவ க³ஜ்ஜிதா நோ வஸ்ஸிதா, க³ஜ்ஜிதா ச வஸ்ஸிதா ச.

‘‘கத²ஞ்ச, பி⁴க்க²வே, புக்³க³லோ க³ஜ்ஜிதா ஹோதி, நோ வஸ்ஸிதா? இத⁴, பி⁴க்க²வே, ஏகச்சோ புக்³க³லோ த⁴ம்மம் பரியாபுணாதி – ஸுத்தம், கே³ய்யம், வேய்யாகரணம், கா³த²ம், உதா³னம், இதிவுத்தகம், ஜாதகம், அப்³பு⁴தத⁴ம்மம், வேத³ல்லம். ஸோ ‘இத³ம் து³க்க²’ந்தி யதா²பூ⁴தம் நப்பஜானாதி, ‘அயம் து³க்க²ஸமுத³யோ’தி யதா²பூ⁴தம் நப்பஜானாதி, ‘அயம் து³க்க²னிரோதோ⁴’தி யதா²பூ⁴தம் நப்பஜானாதி, ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் நப்பஜானாதி. ஏவம் கோ², பி⁴க்க²வே, புக்³க³லோ க³ஜ்ஜிதா ஹோதி, நோ வஸ்ஸிதா. ஸேய்யதா²பி ஸோ, பி⁴க்க²வே, வலாஹகோ க³ஜ்ஜிதா, நோ வஸ்ஸிதா; ததூ²பமாஹம், பி⁴க்க²வே, இமம் புக்³க³லம் வதா³மி.

‘‘கத²ஞ்ச, பி⁴க்க²வே, புக்³க³லோ வஸ்ஸிதா ஹோதி, நோ க³ஜ்ஜிதா? இத⁴, பி⁴க்க²வே, ஏகச்சோ புக்³க³லோ த⁴ம்மம் ந பரியாபுணாதி – ஸுத்தம், கே³ய்யம், வேய்யாகரணம், கா³த²ம், உதா³னம், இதிவுத்தகம், ஜாதகம், அப்³பு⁴தத⁴ம்மம், வேத³ல்லம். ஸோ ‘இத³ம் து³க்க²’ந்தி யதா²பூ⁴தம் பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானாதி. ஏவம் கோ², பி⁴க்க²வே, புக்³க³லோ வஸ்ஸிதா ஹோதி, நோ க³ஜ்ஜிதா. ஸேய்யதா²பி ஸோ, பி⁴க்க²வே, வலாஹகோ வஸ்ஸிதா, நோ க³ஜ்ஜிதா; ததூ²பமாஹம், பி⁴க்க²வே, இமம் புக்³க³லம் வதா³மி.

‘‘கத²ஞ்ச, பி⁴க்க²வே, புக்³க³லோ நேவ க³ஜ்ஜிதா ஹோதி, நோ வஸ்ஸிதா? இத⁴, பி⁴க்க²வே, ஏகச்சோ புக்³க³லோ நேவ த⁴ம்மம் பரியாபுணாதி – ஸுத்தம், கே³ய்யம், வேய்யாகரணம், கா³த²ம், உதா³னம், இதிவுத்தகம், ஜாதகம், அப்³பு⁴தத⁴ம்மம், வேத³ல்லம். ஸோ ‘இத³ம் து³க்க²’ந்தி யதா²பூ⁴தம் நப்பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் நப்பஜானாதி. ஏவம் கோ², பி⁴க்க²வே, புக்³க³லோ நேவ க³ஜ்ஜிதா ஹோதி, நோ வஸ்ஸிதா. ஸேய்யதா²பி ஸோ, பி⁴க்க²வே, வலாஹகோ நேவ க³ஜ்ஜிதா, நோ வஸ்ஸிதா; ததூ²பமாஹம், பி⁴க்க²வே, இமம் புக்³க³லம் வதா³மி.

‘‘கத²ஞ்ச, பி⁴க்க²வே, புக்³க³லோ க³ஜ்ஜிதா ச ஹோதி வஸ்ஸிதா ச? இத⁴, பி⁴க்க²வே, ஏகச்சோ புக்³க³லோ த⁴ம்மம் பரியாபுணாதி – ஸுத்தம், கே³ய்யம், வேய்யாகரணம், கா³த²ம், உதா³னம், இதிவுத்தகம், ஜாதகம், அப்³பு⁴தத⁴ம்மம், வேத³ல்லம். ஸோ ‘இத³ம் து³க்க²’ந்தி யதா²பூ⁴தம் பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானாதி. ஏவம் கோ², பி⁴க்க²வே, புக்³க³லோ க³ஜ்ஜிதா ச ஹோதி வஸ்ஸிதா ச. ஸேய்யதா²பி ஸோ, பி⁴க்க²வே, வலாஹகோ க³ஜ்ஜிதா ச வஸ்ஸிதா ச; ததூ²பமாஹம், பி⁴க்க²வே, இமம் புக்³க³லம் வதா³மி. இமே கோ², பி⁴க்க²வே, சத்தாரோ வலாஹகூபமா புக்³க³லா ஸந்தோ ஸம்விஜ்ஜமானா லோகஸ்மி’’ந்தி. து³தியம்.

3. கும்ப⁴ஸுத்தம்

103. ‘‘சத்தாரோமே, பி⁴க்க²வே, கும்பா⁴. கதமே சத்தாரோ? துச்சோ² பிஹிதோ, பூரோ விவடோ, துச்சோ² விவடோ, பூரோ பிஹிதோ – இமே கோ², பி⁴க்க²வே, சத்தாரோ கும்பா⁴. ஏவமேவம் கோ², பி⁴க்க²வே, சத்தாரோ கும்பூ⁴பமா [பு. ப. 160] புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? துச்சோ² பிஹிதோ, பூரோ விவடோ, துச்சோ² விவடோ, பூரோ பிஹிதோ.

‘‘கத²ஞ்ச, பி⁴க்க²வே, புக்³க³லோ துச்சோ² ஹோதி பிஹிதோ? இத⁴, பி⁴க்க²வே, ஏகச்சஸ்ஸ புக்³க³லஸ்ஸ பாஸாதி³கம் ஹோதி அபி⁴க்கந்தம் படிக்கந்தம் ஆலோகிதம் விலோகிதம் ஸமிஞ்ஜிதம் பஸாரிதம் ஸங்கா⁴டிபத்தசீவரதா⁴ரணம். ஸோ ‘இத³ம் து³க்க²’ந்தி யதா²பூ⁴தம் நப்பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் நப்பஜானாதி. ஏவம் கோ², பி⁴க்க²வே, புக்³க³லோ துச்சோ² ஹோதி பிஹிதோ. ஸேய்யதா²பி ஸோ, பி⁴க்க²வே, கும்போ⁴ துச்சோ² பிஹிதோ; ததூ²பமாஹம், பி⁴க்க²வே, இமம் புக்³க³லம் வதா³மி.

‘‘கத²ஞ்ச, பி⁴க்க²வே, புக்³க³லோ பூரோ ஹோதி விவடோ? இத⁴, பி⁴க்க²வே, ஏகச்சஸ்ஸ புக்³க³லஸ்ஸ ந பாஸாதி³கம் ஹோதி அபி⁴க்கந்தம் படிக்கந்தம் ஆலோகிதம் விலோகிதம் ஸமிஞ்ஜிதம் பஸாரிதம் ஸங்கா⁴டிபத்தசீவரதா⁴ரணம். ஸோ ‘இத³ம் து³க்க²’ந்தி யதா²பூ⁴தம் பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானாதி. ஏவம் கோ², பி⁴க்க²வே, புக்³க³லோ பூரோ ஹோதி விவடோ. ஸேய்யதா²பி ஸோ, பி⁴க்க²வே, கும்போ⁴ பூரோ விவடோ; ததூ²பமாஹம், பி⁴க்க²வே, இமம் புக்³க³லம் வதா³மி.

‘‘கத²ஞ்ச, பி⁴க்க²வே, புக்³க³லோ துச்சோ² ஹோதி விவடோ? இத⁴, பி⁴க்க²வே, ஏகச்சஸ்ஸ புக்³க³லஸ்ஸ ந பாஸாதி³கம் ஹோதி அபி⁴க்கந்தம் படிக்கந்தம் ஆலோகிதம் விலோகிதம் ஸமிஞ்ஜிதம் பஸாரிதம் ஸங்கா⁴டிபத்தசீவரதா⁴ரணம். ஸோ ‘இத³ம் து³க்க²’ந்தி யதா²பூ⁴தம் நப்பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் நப்பஜானாதி. ஏவம் கோ², பி⁴க்க²வே, புக்³க³லோ துச்சோ² ஹோதி விவடோ. ஸேய்யதா²பி ஸோ, பி⁴க்க²வே, கும்போ⁴ துச்சோ² விவடோ; ததூ²பமாஹம், பி⁴க்க²வே, இமம் புக்³க³லம் வதா³மி.

‘‘கத²ஞ்ச, பி⁴க்க²வே, புக்³க³லோ பூரோ ஹோதி பிஹிதோ? இத⁴, பி⁴க்க²வே, ஏகச்சஸ்ஸ புக்³க³லஸ்ஸ பாஸாதி³கம் ஹோதி அபி⁴க்கந்தம் படிக்கந்தம் ஆலோகிதம் விலோகிதம் ஸமிஞ்ஜிதம் பஸாரிதம் ஸங்கா⁴டிபத்தசீவரதா⁴ரணம். ஸோ ‘இத³ம் து³க்க²’ந்தி யதா²பூ⁴தம் பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானாதி. ஏவம் கோ², பி⁴க்க²வே, புக்³க³லோ பூரோ ஹோதி பிஹிதோ. ஸேய்யதா²பி ஸோ, பி⁴க்க²வே, கும்போ⁴ பூரோ பிஹிதோ; ததூ²பமாஹம், பி⁴க்க²வே, இமம் புக்³க³லம் வதா³மி. இமே கோ², பி⁴க்க²வே, சத்தாரோ கும்பூ⁴பமா புக்³க³லா ஸந்தோ ஸம்விஜ்ஜமானா லோகஸ்மி’’ந்தி. ததியம்.

4. உத³கரஹத³ஸுத்தம்

104. ‘‘சத்தாரோமே, பி⁴க்க²வே, உத³கரஹதா³. கதமே சத்தாரோ? உத்தானோ க³ம்பீ⁴ரோபா⁴ஸோ, க³ம்பீ⁴ரோ உத்தானோபா⁴ஸோ, உத்தானோ உத்தானோபா⁴ஸோ, க³ம்பீ⁴ரோ க³ம்பீ⁴ரோபா⁴ஸோ – இமே கோ², பி⁴க்க²வே, சத்தாரோ உத³கரஹதா³. ஏவமேவம் கோ², பி⁴க்க²வே, சத்தாரோ உத³கரஹதூ³பமா [பு. ப. 161] புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? உத்தானோ க³ம்பீ⁴ரோபா⁴ஸோ, க³ம்பீ⁴ரோ உத்தானோபா⁴ஸோ, உத்தானோ உத்தானோபா⁴ஸோ, க³ம்பீ⁴ரோ க³ம்பீ⁴ரோபா⁴ஸோ.

‘‘கத²ஞ்ச, பி⁴க்க²வே, புக்³க³லோ உத்தானோ ஹோதி க³ம்பீ⁴ரோபா⁴ஸோ? இத⁴, பி⁴க்க²வே, ஏகச்சஸ்ஸ புக்³க³லஸ்ஸ பாஸாதி³கம் ஹோதி அபி⁴க்கந்தம் படிக்கந்தம் ஆலோகிதம் விலோகிதம் ஸமிஞ்ஜிதம் பஸாரிதம் ஸங்கா⁴டிபத்தசீவரதா⁴ரணம். ஸோ ‘இத³ம் து³க்க²’ந்தி யதா²பூ⁴தம் நப்பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் நப்பஜானாதி. ஏவம் கோ², பி⁴க்க²வே, புக்³க³லோ உத்தானோ ஹோதி க³ம்பீ⁴ரோபா⁴ஸோ. ஸேய்யதா²பி ஸோ, பி⁴க்க²வே, உத³கரஹதோ³ உத்தானோ க³ம்பீ⁴ரோபா⁴ஸோ; ததூ²பமாஹம், பி⁴க்க²வே, இமம் புக்³க³லம் வதா³மி.

‘‘கத²ஞ்ச, பி⁴க்க²வே, புக்³க³லோ க³ம்பீ⁴ரோ ஹோதி உத்தானோபா⁴ஸோ? இத⁴, பி⁴க்க²வே, ஏகச்சஸ்ஸ புக்³க³லஸ்ஸ ந பாஸாதி³கம் ஹோதி அபி⁴க்கந்தம் படிக்கந்தம் ஆலோகிதம் விலோகிதம் ஸமிஞ்ஜிதம் பஸாரிதம் ஸங்கா⁴டிபத்தசீவரதா⁴ரணம். ஸோ ‘இத³ம் து³க்க²’ந்தி யதா²பூ⁴தம் பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானாதி. ஏவம் கோ², பி⁴க்க²வே, புக்³க³லோ க³ம்பீ⁴ரோ ஹோதி உத்தானோபா⁴ஸோ. ஸேய்யதா²பி ஸோ, பி⁴க்க²வே, உத³கரஹதோ³ க³ம்பீ⁴ரோ உத்தானோபா⁴ஸோ; ததூ²பமாஹம், பி⁴க்க²வே, இமம் புக்³க³லம் வதா³மி.

‘‘கத²ஞ்ச, பி⁴க்க²வே, புக்³க³லோ உத்தானோ ஹோதி உத்தானோபா⁴ஸோ? இத⁴, பி⁴க்க²வே, ஏகச்சஸ்ஸ புக்³க³லஸ்ஸ ந பாஸாதி³கம் ஹோதி அபி⁴க்கந்தம் படிக்கந்தம் ஆலோகிதம் விலோகிதம் ஸமிஞ்ஜிதம் பஸாரிதம் ஸங்கா⁴டிபத்தசீவரதா⁴ரணம். ஸோ ‘இத³ம் து³க்க²’ந்தி யதா²பூ⁴தம் நப்பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் நப்பஜானாதி. ஏவம் கோ², பி⁴க்க²வே, புக்³க³லோ உத்தானோ ஹோதி உத்தானோபா⁴ஸோ. ஸேய்யதா²பி ஸோ, பி⁴க்க²வே, உத³கரஹதோ³ உத்தானோ உத்தானோபா⁴ஸோ; ததூ²பமாஹம், பி⁴க்க²வே, இமம் புக்³க³லம் வதா³மி.

‘‘கத²ஞ்ச, பி⁴க்க²வே, புக்³க³லோ க³ம்பீ⁴ரோ ஹோதி க³ம்பீ⁴ரோபா⁴ஸோ? இத⁴, பி⁴க்க²வே, ஏகச்சஸ்ஸ புக்³க³லஸ்ஸ பாஸாதி³கம் ஹோதி அபி⁴க்கந்தம் படிக்கந்தம் ஆலோகிதம் விலோகிதம் ஸமிஞ்ஜிதம் பஸாரிதம் ஸங்கா⁴டிபத்தசீவரதா⁴ரணம். ஸோ ‘இத³ம் து³க்க²’ந்தி யதா²பூ⁴தம் பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானாதி. ஏவம் கோ², பி⁴க்க²வே, புக்³க³லோ க³ம்பீ⁴ரோ ஹோதி க³ம்பீ⁴ரோபா⁴ஸோ. ஸேய்யதா²பி ஸோ, பி⁴க்க²வே, உத³கரஹதோ³ க³ம்பீ⁴ரோ க³ம்பீ⁴ரோபா⁴ஸோ; ததூ²பமாஹம், பி⁴க்க²வே, இமம் புக்³க³லம் வதா³மி. இமே கோ², பி⁴க்க²வே, சத்தாரோ உத³கரஹதூ³பமா புக்³க³லா ஸந்தோ ஸம்விஜ்ஜமானா லோகஸ்மி’’ந்தி. சதுத்த²ம்.

5. அம்ப³ஸுத்தம்

105. ‘‘சத்தாரிமானி, பி⁴க்க²வே, அம்பா³னி. கதமானி சத்தாரி? ஆமம் பக்கவண்ணி [பக்கவண்ணீ (பு. ப. 159)], பக்கம் ஆமவண்ணி [ஆமவண்ணீ (ஸீ. ஸ்யா. கம். பீ.)], ஆமம் ஆமவண்ணி, பக்கம் பக்கவண்ணி – இமானி கோ², பி⁴க்க²வே, சத்தாரி அம்பா³னி. ஏவமேவம் கோ², பி⁴க்க²வே, சத்தாரோ அம்பூ³பமா [பக்கவண்ணீ (பு. ப. 159)] புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? ஆமோ பக்கவண்ணீ, பக்கோ ஆமவண்ணீ, ஆமோ ஆமவண்ணீ, பக்கோ பக்கவண்ணீ.

‘‘கத²ஞ்ச, பி⁴க்க²வே, புக்³க³லோ ஆமோ ஹோதி பக்கவண்ணீ? இத⁴, பி⁴க்க²வே, ஏகச்சஸ்ஸ புக்³க³லஸ்ஸ பாஸாதி³கம் ஹோதி அபி⁴க்கந்தம் படிக்கந்தம் ஆலோகிதம் விலோகிதம் ஸமிஞ்ஜிதம் பஸாரிதம் ஸங்கா⁴டிபத்தசீவரதா⁴ரணம். ஸோ ‘இத³ம் து³க்க²’ந்தி யதா²பூ⁴தம் நப்பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் நப்பஜானாதி. ஏவம் கோ², பி⁴க்க²வே, புக்³க³லோ ஆமோ ஹோதி பக்கவண்ணீ. ஸேய்யதா²பி தம், பி⁴க்க²வே, அம்ப³ம் ஆமம் பக்கவண்ணி; ததூ²பமாஹம், பி⁴க்க²வே, இமம் புக்³க³லம் வதா³மி.

‘‘கத²ஞ்ச, பி⁴க்க²வே, புக்³க³லோ பக்கோ ஹோதி ஆமவண்ணீ? இத⁴, பி⁴க்க²வே, ஏகச்சஸ்ஸ புக்³க³லஸ்ஸ ந பாஸாதி³கம் ஹோதி அபி⁴க்கந்தம் படிக்கந்தம் ஆலோகிதம் விலோகிதம் ஸமிஞ்ஜிதம் பஸாரிதம் ஸங்கா⁴டிபத்தசீவரதா⁴ரணம். ஸோ ‘இத³ம் து³க்க²’ந்தி யதா²பூ⁴தம் பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானாதி. ஏவம் கோ², பி⁴க்க²வே, புக்³க³லோ பக்கோ ஹோதி ஆமவண்ணீ. ஸேய்யதா²பி தம், பி⁴க்க²வே, அம்ப³ம் பக்கம் ஆமவண்ணி; ததூ²பமாஹம், பி⁴க்க²வே, இமம் புக்³க³லம் வதா³மி.

‘‘கத²ஞ்ச, பி⁴க்க²வே, புக்³க³லோ ஆமோ ஹோதி ஆமவண்ணீ? இத⁴, பி⁴க்க²வே, ஏகச்சஸ்ஸ புக்³க³லஸ்ஸ ந பாஸாதி³கம் ஹோதி அபி⁴க்கந்தம் படிக்கந்தம் ஆலோகிதம் விலோகிதம் ஸமிஞ்ஜிதம் பஸாரிதம் ஸங்கா⁴டிபத்தசீவரதா⁴ரணம். ஸோ ‘இத³ம் து³க்க²’ந்தி யதா²பூ⁴தம் நப்பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் நப்பஜானாதி. ஏவம் கோ², பி⁴க்க²வே, புக்³க³லோ ஆமோ ஹோதி ஆமவண்ணீ. ஸேய்யதா²பி தம், பி⁴க்க²வே, அம்ப³ம் ஆமம் ஆமவண்ணி; ததூ²பமாஹம், பி⁴க்க²வே, இமம் புக்³க³லம் வதா³மி.

‘‘கத²ஞ்ச, பி⁴க்க²வே, புக்³க³லோ பக்கோ ஹோதி பக்கவண்ணீ? இத⁴, பி⁴க்க²வே, ஏகச்சஸ்ஸ புக்³க³லஸ்ஸ பாஸாதி³கம் ஹோதி அபி⁴க்கந்தம் படிக்கந்தம் ஆலோகிதம் விலோகிதம் ஸமிஞ்ஜிதம் பஸாரிதம் ஸங்கா⁴டிபத்தசீவரதா⁴ரணம். ஸோ ‘இத³ம் து³க்க²’ந்தி யதா²பூ⁴தம் பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானாதி. ஏவம் கோ², பி⁴க்க²வே, புக்³க³லோ பக்கோ ஹோதி பக்கவண்ணீ. ஸேய்யதா²பி தம், பி⁴க்க²வே, அம்ப³ம் பக்கம் பக்கவண்ணி; ததூ²பமாஹம், பி⁴க்க²வே, இமம் புக்³க³லம் வதா³மி. இமே கோ², பி⁴க்க²வே, சத்தாரோ அம்பூ³பமா புக்³க³லா ஸந்தோ ஸம்விஜ்ஜமானா லோகஸ்மி’’ந்தி. பஞ்சமம்.

6. து³தியஅம்ப³ஸுத்தம்

(ச²ட்ட²ம் உத்தானத்த²மேவாதி அட்ட²கதா²யம் த³ஸ்ஸிதம், பாளிபோத்த²கேஸு பன கத்த²சிபி ந தி³ஸ்ஸதி.) [( ) ‘‘ச²ட்ட²ம் உக்கானத்த²மேவா’’தி அட்ட²கதா²யம் த³ஸ்ஸிதம், பாளிபோத்த²கேஸு பன கத்த²சிபி ந தி³ஸ்ஸதி. ‘‘… ஆமம் பக்கோபா⁴ஸம், பக்கம் ஆமோபா⁴ஸ’’ந்திஆதி³னா பாடோ² ப⁴வேய்ய]

7. மூஸிகஸுத்தம்

107. ‘‘சதஸ்ஸோ இமா, பி⁴க்க²வே, மூஸிகா. கதமா சதஸ்ஸோ? கா³த⁴ம் கத்தா நோ வஸிதா, வஸிதா நோ கா³த⁴ம் கத்தா, நேவ கா³த⁴ம் கத்தா நோ வஸிதா, கா³த⁴ம் கத்தா ச வஸிதா ச – இமா கோ², பி⁴க்க²வே, சதஸ்ஸோ மூஸிகா. ஏவமேவம் கோ², பி⁴க்க²வே, சத்தாரோ மூஸிகூபமா புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? கா³த⁴ம் கத்தா நோ வஸிதா, வஸிதா நோ கா³த⁴ம் கத்தா, நேவ கா³த⁴ம் கத்தா நோ வஸிதா, கா³த⁴ம் கத்தா ச வஸிதா ச.

‘‘கத²ஞ்ச, பி⁴க்க²வே, புக்³க³லோ கா³த⁴ம் கத்தா ஹோதி நோ வஸிதா? இத⁴, பி⁴க்க²வே, ஏகச்சோ புக்³க³லோ த⁴ம்மம் பரியாபுணாதி – ஸுத்தம், கே³ய்யம், வேய்யாகரணம், கா³த²ம், உதா³னம், இதிவுத்தகம், ஜாதகம், அப்³பு⁴தத⁴ம்மம், வேத³ல்லம். ஸோ ‘இத³ம் து³க்க²’ந்தி யதா²பூ⁴தம் நப்பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் நப்பஜானாதி. ஏவம் கோ², பி⁴க்க²வே, புக்³க³லோ கா³த⁴ம் கத்தா ஹோதி, நோ வஸிதா. ஸேய்யதா²பி ஸா, பி⁴க்க²வே, மூஸிகா கா³த⁴ம் கத்தா, நோ வஸிதா; ததூ²பமாஹம், பி⁴க்க²வே, இமம் புக்³க³லம் வதா³மி.

‘‘கத²ஞ்ச, பி⁴க்க²வே, புக்³க³லோ வஸிதா ஹோதி, நோ கா³த⁴ம் கத்தா? இத⁴, பி⁴க்க²வே, ஏகச்சோ புக்³க³லோ த⁴ம்மம் ந பரியாபுணாதி – ஸுத்தம், கே³ய்யம், வேய்யாகரணம், கா³த²ம், உதா³னம், இதிவுத்தகம், ஜாதகம், அப்³பு⁴தத⁴ம்மம், வேத³ல்லம். ஸோ ‘இத³ம் து³க்க²’ந்தி யதா²பூ⁴தம் பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானாதி. ஏவம் கோ², பி⁴க்க²வே, புக்³க³லோ வஸிதா ஹோதி, நோ கா³த⁴ம் கத்தா. ஸேய்யதா²பி ஸா, பி⁴க்க²வே, மூஸிகா வஸிதா ஹோதி, நோ கா³த⁴ம் கத்தா; ததூ²பமாஹம், பி⁴க்க²வே, இமம், புக்³க³லம் வதா³மி.

‘‘கத²ஞ்ச, பி⁴க்க²வே, புக்³க³லோ நேவ கா³த⁴ம் கத்தா ஹோதி நோ வஸிதா? இத⁴, பி⁴க்க²வே, ஏகச்சோ புக்³க³லோ த⁴ம்மம் ந பரியாபுணாதி – ஸுத்தம், கே³ய்யம், வேய்யாகரணம், கா³த²ம், உதா³னம், இதிவுத்தகம், ஜாதகம், அப்³பு⁴தத⁴ம்மம், வேத³ல்லம். ஸோ ‘இத³ம் து³க்க²’ந்தி யதா²பூ⁴தம் நப்பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் நப்பஜானாதி. ஏவம் கோ², பி⁴க்க²வே, புக்³க³லோ நேவ கா³த⁴ம் கத்தா ஹோதி, நோ வஸிதா. ஸேய்யதா²பி ஸா, பி⁴க்க²வே, மூஸிகா நேவ கா³த⁴ம் கத்தா ஹோதி, நோ வஸிதா; ததூ²பமாஹம், பி⁴க்க²வே, இமம் புக்³க³லம் வதா³மி.

‘‘கத²ஞ்ச, பி⁴க்க²வே, புக்³க³லோ கா³த⁴ம் கத்தா ச ஹோதி வஸிதா ச? இத⁴, பி⁴க்க²வே, ஏகச்சோ புக்³க³லோ த⁴ம்மம் பரியாபுணாதி – ஸுத்தம், கே³ய்யம், வேய்யாகரணம், கா³த²ம், உதா³னம், இதிவுத்தகம், ஜாதகம், அப்³பு⁴தத⁴ம்மம், வேத³ல்லம். ஸோ ‘இத³ம் து³க்க²’ந்தி யதா²பூ⁴தம் பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானாதி. ஏவம் கோ², பி⁴க்க²வே, புக்³க³லோ கா³த⁴ம் கத்தா ச ஹோதி வஸிதா ச. ஸேய்யதா²பி ஸா, பி⁴க்க²வே, மூஸிகா கா³த⁴ம் கத்தா ச ஹோதி வஸிதா ச; ததூ²பமாஹம், பி⁴க்க²வே, இமம் புக்³க³லம் வதா³மி. இமே கோ², பி⁴க்க²வே, சத்தாரோ மூஸிகூபமா புக்³க³லா ஸந்தோ ஸம்விஜ்ஜமானா லோகஸ்மி’’ந்தி. ஸத்தமம்.

8. ப³லீப³த்³த³ஸுத்தம்

108. ‘‘சத்தாரோமே, பி⁴க்க²வே, ப³லீப³த்³தா³ [ப³லிவத்³தா³ (ஸீ. ஸ்யா. கம். பீ.), ப³லிப³த்³தா⁴ (க.) பு. ப. 162]. கதமே சத்தாரோ? ஸக³வசண்டோ³ நோ பரக³வசண்டோ³, பரக³வசண்டோ³ நோ ஸக³வசண்டோ³, ஸக³வசண்டோ³ ச பரக³வசண்டோ³ ச, நேவ ஸக³வசண்டோ³ நோ பரக³வசண்டோ³ – இமே கோ², பி⁴க்க²வே, சத்தாரோ ப³லீப³த்³தா³. ஏவமேவம் கோ², பி⁴க்க²வே, சத்தாரோ ப³லீப³த்³தூ³பமா புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? ஸக³வசண்டோ³ நோ பரக³வசண்டோ³, பரக³வசண்டோ³ நோ ஸக³வசண்டோ³, ஸக³வசண்டோ³ ச பரக³வசண்டோ³ ச, நேவ ஸக³வசண்டோ³ நோ பரக³வசண்டோ³.

‘‘கத²ஞ்ச, பி⁴க்க²வே, புக்³க³லோ ஸக³வசண்டோ³ ஹோதி, நோ பரக³வசண்டோ³? இத⁴, பி⁴க்க²வே, ஏகச்சோ புக்³க³லோ ஸகபரிஸம் உப்³பே³ஜேதா ஹோதி, நோ பரபரிஸம். ஏவம் கோ², பி⁴க்க²வே, புக்³க³லோ ஸக³வசண்டோ³ ஹோதி, நோ பரக³வசண்டோ³. ஸேய்யதா²பி ஸோ, பி⁴க்க²வே, ப³லீப³த்³தோ³ ஸக³வசண்டோ³, நோ பரக³வசண்டோ³; ததூ²பமாஹம், பி⁴க்க²வே, இமம் புக்³க³லம் வதா³மி.

‘‘கத²ஞ்ச, பி⁴க்க²வே, புக்³க³லோ பரக³வசண்டோ³ ஹோதி, நோ ஸக³வசண்டோ³? இத⁴, பி⁴க்க²வே, ஏகச்சோ புக்³க³லோ பரபரிஸம் உப்³பே³ஜேதா ஹோதி, நோ ஸகபரிஸம். ஏவம் கோ², பி⁴க்க²வே, புக்³க³லோ பரக³வசண்டோ³ ஹோதி, நோ ஸக³வசண்டோ³. ஸேய்யதா²பி ஸோ, பி⁴க்க²வே, ப³லீப³த்³தோ³ பரக³வசண்டோ³, நோ ஸக³வசண்டோ³; ததூ²பமாஹம், பி⁴க்க²வே, இமம் புக்³க³லம் வதா³மி.

‘‘கத²ஞ்ச, பி⁴க்க²வே, புக்³க³லோ ஸக³வசண்டோ³ ச ஹோதி பரக³வசண்டோ³ ச? இத⁴, பி⁴க்க²வே, ஏகச்சோ புக்³க³லோ ஸகபரிஸம் உப்³பே³ஜேதா ஹோதி பரபரிஸஞ்ச. ஏவம் கோ², பி⁴க்க²வே, புக்³க³லோ ஸக³வசண்டோ³ ச ஹோதி பரக³வசண்டோ³ ச. ஸேய்யதா²பி ஸோ, பி⁴க்க²வே, ப³லீப³த்³தோ³ ஸக³வசண்டோ³ ச பரக³வசண்டோ³ ச; ததூ²பமாஹம், பி⁴க்க²வே, இமம் புக்³க³லம் வதா³மி.

‘‘கத²ஞ்ச, பி⁴க்க²வே, புக்³க³லோ நேவ ஸக³வசண்டோ³ ஹோதி நோ பரக³வசண்டோ³? இத⁴, பி⁴க்க²வே, ஏகச்சோ புக்³க³லோ நேவ ஸகபரிஸம் உப்³பே³ஜேதா ஹோதி, நோ பரபரிஸஞ்ச. ஏவம் கோ², பி⁴க்க²வே, புக்³க³லோ நேவ ஸக³வசண்டோ³ ஹோதி, நோ பரக³வசண்டோ³. ஸேய்யதா²பி ஸோ, பி⁴க்க²வே, ப³லீப³த்³தோ³ நேவ ஸக³வசண்டோ³, நோ பரக³வசண்டோ³; ததூ²பமாஹம், பி⁴க்க²வே, இமம் புக்³க³லம் வதா³மி. இமே கோ², பி⁴க்க²வே, சத்தாரோ ப³லீப³த்³தூ³பமா புக்³க³லா ஸந்தோ ஸம்விஜ்ஜமானா லோகஸ்மி’’ந்தி. அட்ட²மம்.

9. ருக்க²ஸுத்தம்

109. ‘‘சத்தாரோமே, பி⁴க்க²வே, ருக்கா². கதமே சத்தாரோ? பே²க்³கு³ பே²க்³கு³பரிவாரோ, பே²க்³கு³ ஸாரபரிவாரோ, ஸாரோ பே²க்³கு³பரிவாரோ, ஸாரோ ஸாரபரிவாரோ – இமே கோ², பி⁴க்க²வே, சத்தாரோ ருக்கா². ஏவமேவம் கோ², பி⁴க்க²வே, சத்தாரோ ருக்கூ²பமா புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? பே²க்³கு³ பே²க்³கு³பரிவாரோ, பே²க்³கு³ ஸாரபரிவாரோ, ஸாரோ பே²க்³கு³பரிவாரோ, ஸாரோ ஸாரபரிவாரோ.

‘‘கத²ஞ்ச, பி⁴க்க²வே, புக்³க³லோ பே²க்³கு³ ஹோதி பே²க்³கு³பரிவாரோ? இத⁴, பி⁴க்க²வே, ஏகச்சோ புக்³க³லோ து³ஸ்ஸீலோ ஹோதி பாபத⁴ம்மோ; பரிஸாபிஸ்ஸ ஹோதி து³ஸ்ஸீலா பாபத⁴ம்மா. ஏவம் கோ², பி⁴க்க²வே, புக்³க³லோ பே²க்³கு³ ஹோதி பே²க்³கு³பரிவாரோ. ஸேய்யதா²பி ஸோ, பி⁴க்க²வே, ருக்கோ² பே²க்³கு³ பே²க்³கு³பரிவாரோ; ததூ²பமாஹம், பி⁴க்க²வே, இமம் புக்³க³லம் வதா³மி.

‘‘கத²ஞ்ச, பி⁴க்க²வே, புக்³க³லோ பே²க்³கு³ ஹோதி ஸாரபரிவாரோ? இத⁴, பி⁴க்க²வே, ஏகச்சோ புக்³க³லோ து³ஸ்ஸீலோ ஹோதி பாபத⁴ம்மோ; பரிஸா ச க்²வஸ்ஸ ஹோதி ஸீலவதீ கல்யாணத⁴ம்மா. ஏவம் கோ², பி⁴க்க²வே, புக்³க³லோ பே²க்³கு³ ஹோதி ஸாரபரிவாரோ. ஸேய்யதா²பி ஸோ, பி⁴க்க²வே, ருக்கோ² பே²க்³கு³ ஸாரபரிவாரோ; ததூ²பமாஹம், பி⁴க்க²வே, இமம் புக்³க³லம் வதா³மி.

‘‘கத²ஞ்ச, பி⁴க்க²வே, புக்³க³லோ ஸாரோ ஹோதி பே²க்³கு³பரிவாரோ? இத⁴, பி⁴க்க²வே, ஏகச்சோ புக்³க³லோ ஸீலவா ஹோதி கல்யாணத⁴ம்மோ; பரிஸா ச க்²வஸ்ஸ ஹோதி து³ஸ்ஸீலா பாபத⁴ம்மா. ஏவம் கோ², பி⁴க்க²வே, புக்³க³லோ ஸாரோ ஹோதி பே²க்³கு³பரிவாரோ. ஸேய்யதா²பி ஸோ, பி⁴க்க²வே, ருக்கோ² ஸாரோ பே²க்³கு³பரிவாரோ; ததூ²பமாஹம், பி⁴க்க²வே, இமம் புக்³க³லம் வதா³மி.

‘‘கத²ஞ்ச, பி⁴க்க²வே, புக்³க³லோ ஸாரோ ஹோதி ஸாரபரிவாரோ? இத⁴ பி⁴க்க²வே, ஏகச்சோ புக்³க³லோ ஸீலவா ஹோதி கல்யாணத⁴ம்மோ; பரிஸாபிஸ்ஸ ஹோதி ஸீலவதீ கல்யாணத⁴ம்மா. ஏவம் கோ², பி⁴க்க²வே, புக்³க³லோ ஸாரோ ஹோதி ஸாரபரிவாரோ. ஸேய்யதா²பி ஸோ, பி⁴க்க²வே, ருக்கோ² ஸாரோ ஸாரபரிவாரோ; ததூ²பமாஹம், பி⁴க்க²வே, இமம் புக்³க³லம் வதா³மி. இமே கோ², பி⁴க்க²வே, சத்தாரோ ருக்கூ²பமா புக்³க³லா ஸந்தோ ஸம்விஜ்ஜமானா லோகஸ்மி’’ந்தி [பு. ப. 170]. நவமம்.

10. ஆஸீவிஸஸுத்தம்

110. ‘‘சத்தாரோமே, பி⁴க்க²வே, ஆஸீவிஸா [ஆஸிவிஸா (க.) பு. ப. 163]. கதமே சத்தாரோ? ஆக³தவிஸோ ந கோ⁴ரவிஸோ, கோ⁴ரவிஸோ ந ஆக³தவிஸோ, ஆக³தவிஸோ ச கோ⁴ரவிஸோ ச, நேவாக³தவிஸோ ந கோ⁴ரவிஸோ – இமே கோ², பி⁴க்க²வே, சத்தாரோ ஆஸீவிஸா. ஏவமேவம் கோ², பி⁴க்க²வே, சத்தாரோ ஆஸீவிஸூபமா புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? ஆக³தவிஸோ ந கோ⁴ரவிஸோ, கோ⁴ரவிஸோ ந ஆக³தவிஸோ, ஆக³தவிஸோ ச கோ⁴ரவிஸோ ச, நேவாக³தவிஸோ ந கோ⁴ரவிஸோ.

‘‘கத²ஞ்ச, பி⁴க்க²வே, புக்³க³லோ ஆக³தவிஸோ ஹோதி, ந கோ⁴ரவிஸோ? இத⁴, பி⁴க்க²வே, ஏகச்சோ புக்³க³லோ அபி⁴ண்ஹம் குஜ்ஜ²தி. ஸோ ச க்²வஸ்ஸ கோதோ⁴ [கோபோ (க.) பு. ப. 163] ந தீ³க⁴ரத்தம் அனுஸேதி. ஏவம் கோ², பி⁴க்க²வே, புக்³க³லோ ஆக³தவிஸோ ஹோதி, ந கோ⁴ரவிஸோ. ஸேய்யதா²பி ஸோ, பி⁴க்க²வே, ஆஸீவிஸோ ஆக³தவிஸோ, ந கோ⁴ரவிஸோ; ததூ²பமாஹம், பி⁴க்க²வே, இமம் புக்³க³லம் வதா³மி.

‘‘கத²ஞ்ச, பி⁴க்க²வே, புக்³க³லோ கோ⁴ரவிஸோ ஹோதி, ந ஆக³தவிஸோ? இத⁴, பி⁴க்க²வே, ஏகச்சோ புக்³க³லோ ந ஹேவ கோ² அபி⁴ண்ஹம் குஜ்ஜ²தி. ஸோ ச க்²வஸ்ஸ கோதோ⁴ தீ³க⁴ரத்தம் அனுஸேதி. ஏவம் கோ², பி⁴க்க²வே, புக்³க³லோ கோ⁴ரவிஸோ ஹோதி, ந ஆக³தவிஸோ. ஸேய்யதா²பி ஸோ, பி⁴க்க²வே, ஆஸீவிஸோ கோ⁴ரவிஸோ, ந ஆக³தவிஸோ; ததூ²பமாஹம், பி⁴க்க²வே, இமம் புக்³க³லம் வதா³மி.

‘‘கத²ஞ்ச, பி⁴க்க²வே, புக்³க³லோ ஆக³தவிஸோ ச ஹோதி கோ⁴ரவிஸோ ச? இத⁴, பி⁴க்க²வே, ஏகச்சோ புக்³க³லோ அபி⁴ண்ஹம் குஜ்ஜ²தி. ஸோ ச க்²வஸ்ஸ கோதோ⁴ தீ³க⁴ரத்தம் அனுஸேதி. ஏவம் கோ², பி⁴க்க²வே, புக்³க³லோ ஆக³தவிஸோ ச ஹோதி கோ⁴ரவிஸோ ச. ஸேய்யதா²பி ஸோ, பி⁴க்க²வே, ஆஸீவிஸோ ஆக³தவிஸோ ச கோ⁴ரவிஸோ ச; ததூ²பமாஹம், பி⁴க்க²வே, இமம் புக்³க³லம் வதா³மி.

‘‘கத²ஞ்ச, பி⁴க்க²வே, புக்³க³லோ நேவாக³தவிஸோ ஹோதி ந கோ⁴ரவிஸோ? இத⁴, பி⁴க்க²வே, ஏகச்சோ புக்³க³லோ ந ஹேவ கோ² அபி⁴ண்ஹம் குஜ்ஜ²தி. ஸோ ச க்²வஸ்ஸ கோதோ⁴ ந தீ³க⁴ரத்தம் அனுஸேதி. ஏவம் கோ², பி⁴க்க²வே, புக்³க³லோ நேவாக³தவிஸோ ஹோதி, ந கோ⁴ரவிஸோ. ஸேய்யதா²பி ஸோ, பி⁴க்க²வே, ஆஸீவிஸோ நேவாக³தவிஸோ ந கோ⁴ரவிஸோ; ததூ²பமாஹம், பி⁴க்க²வே, இமம் புக்³க³லம் வதா³மி. இமே கோ², பி⁴க்க²வே, சத்தாரோ ஆஸீவிஸூபமா புக்³க³லா ஸந்தோ ஸம்விஜ்ஜமானா லோகஸ்மி’’ந்தி. த³ஸமம்.

வலாஹகவக்³கோ³ பட²மோ.