(10) 5. அஸுரவக்³கோ³

1. அஸுரஸுத்தம்

91. ‘‘சத்தாரோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? அஸுரோ அஸுரபரிவாரோ, அஸுரோ தே³வபரிவாரோ, தே³வோ அஸுரபரிவாரோ, தே³வோ தே³வபரிவாரோ.

‘‘கத²ஞ்ச, பி⁴க்க²வே, புக்³க³லோ அஸுரோ ஹோதி அஸுரபரிவாரோ? இத⁴, பி⁴க்க²வே, ஏகச்சோ புக்³க³லோ து³ஸ்ஸீலோ ஹோதி பாபத⁴ம்மோ, பரிஸாபிஸ்ஸ ஹோதி து³ஸ்ஸீலா பாபத⁴ம்மா. ஏவம் கோ², பி⁴க்க²வே, புக்³க³லோ அஸுரோ ஹோதி அஸுரபரிவாரோ.

‘‘கத²ஞ்ச, பி⁴க்க²வே, புக்³க³லோ அஸுரோ ஹோதி தே³வபரிவாரோ? இத⁴, பி⁴க்க²வே, ஏகச்சோ புக்³க³லோ து³ஸ்ஸீலோ ஹோதி பாபத⁴ம்மோ, பரிஸா ச க்²வஸ்ஸ ஹோதி ஸீலவதீ கல்யாணத⁴ம்மா. ஏவம் கோ², பி⁴க்க²வே, புக்³க³லோ அஸுரோ ஹோதி தே³வபரிவாரோ.

‘‘கத²ஞ்ச, பி⁴க்க²வே, புக்³க³லோ தே³வோ ஹோதி அஸுரபரிவாரோ? இத⁴, பி⁴க்க²வே, ஏகச்சோ புக்³க³லோ ஸீலவா ஹோதி கல்யாணத⁴ம்மோ, பரிஸா ச க்²வஸ்ஸ ஹோதி து³ஸ்ஸீலா பாபத⁴ம்மா. ஏவம் கோ², பி⁴க்க²வே, புக்³க³லோ தே³வோ ஹோதி அஸுரபரிவாரோ.

‘‘கத²ஞ்ச, பி⁴க்க²வே, புக்³க³லோ தே³வோ ஹோதி தே³வபரிவாரோ? இத⁴, பி⁴க்க²வே, ஏகச்சோ புக்³க³லோ ஸீலவா ஹோதி கல்யாணத⁴ம்மோ, பரிஸாபிஸ்ஸ ஹோதி ஸீலவதீ கல்யாணத⁴ம்மா. ஏவம் கோ², பி⁴க்க²வே, புக்³க³லோ தே³வோ ஹோதி, தே³வபரிவாரோ. இமே கோ², பி⁴க்க²வே, சத்தாரோ புக்³க³லா ஸந்தோ ஸம்விஜ்ஜமானா லோகஸ்மி’’ந்தி. பட²மம்.

2. பட²மஸமாதி⁴ஸுத்தம்

92. ‘‘சத்தாரோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? இத⁴, பி⁴க்க²வே, ஏகச்சோ புக்³க³லோ லாபீ⁴ ஹோதி அஜ்ஜ²த்தம் சேதோஸமத²ஸ்ஸ, ந லாபீ⁴ அதி⁴பஞ்ஞாத⁴ம்மவிபஸ்ஸனாய. இத⁴ பன, பி⁴க்க²வே, ஏகச்சோ புக்³க³லோ லாபீ⁴ ஹோதி அதி⁴பஞ்ஞாத⁴ம்மவிபஸ்ஸனாய, ந லாபீ⁴ அஜ்ஜ²த்தம் சேதோஸமத²ஸ்ஸ. இத⁴ பன, பி⁴க்க²வே, ஏகச்சோ புக்³க³லோ ந சேவ லாபீ⁴ ஹோதி அஜ்ஜ²த்தம் சேதோஸமத²ஸ்ஸ ந ச லாபீ⁴ அதி⁴பஞ்ஞாத⁴ம்மவிபஸ்ஸனாய. இத⁴ பன, பி⁴க்க²வே, ஏகச்சோ புக்³க³லோ லாபீ⁴ சேவ ஹோதி அஜ்ஜ²த்தம் சேதோஸமத²ஸ்ஸ லாபீ⁴ ச அதி⁴பஞ்ஞாத⁴ம்மவிபஸ்ஸனாய. இமே கோ², பி⁴க்க²வே, சத்தாரோ புக்³க³லா ஸந்தோ ஸம்விஜ்ஜமானா லோகஸ்மி’’ந்தி. து³தியம்.

3. து³தியஸமாதி⁴ஸுத்தம்

93. ‘‘சத்தாரோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? இத⁴, பி⁴க்க²வே, ஏகச்சோ புக்³க³லோ லாபீ⁴ ஹோதி அஜ்ஜ²த்தம் சேதோஸமத²ஸ்ஸ, ந லாபீ⁴ அதி⁴பஞ்ஞாத⁴ம்மவிபஸ்ஸனாய. இத⁴ பன, பி⁴க்க²வே, ஏகச்சோ புக்³க³லோ லாபீ⁴ ஹோதி அதி⁴பஞ்ஞாத⁴ம்மவிபஸ்ஸனாய, ந லாபீ⁴ அஜ்ஜ²த்தம் சேதோஸமத²ஸ்ஸ. இத⁴ பன, பி⁴க்க²வே, ஏகச்சோ புக்³க³லோ ந சேவ லாபீ⁴ ஹோதி அஜ்ஜ²த்தம் சேதோஸமத²ஸ்ஸ ந ச லாபீ⁴ அதி⁴பஞ்ஞாத⁴ம்மவிபஸ்ஸனாய. இத⁴ பன, பி⁴க்க²வே, ஏகச்சோ புக்³க³லோ லாபீ⁴ சேவ ஹோதி அஜ்ஜ²த்தம் சேதோஸமத²ஸ்ஸ லாபீ⁴ ச அதி⁴பஞ்ஞாத⁴ம்மவிபஸ்ஸனாய.

‘‘தத்ர, பி⁴க்க²வே, ய்வாயம் புக்³க³லோ லாபீ⁴ ஹோதி அஜ்ஜ²த்தம் சேதோஸமத²ஸ்ஸ ந லாபீ⁴ அதி⁴பஞ்ஞாத⁴ம்மவிபஸ்ஸனாய, தேன, பி⁴க்க²வே, புக்³க³லேன அஜ்ஜ²த்தம் சேதோஸமதே² பதிட்டா²ய அதி⁴பஞ்ஞாத⁴ம்மவிபஸ்ஸனாய யோகோ³ கரணீயோ. ஸோ அபரேன ஸமயேன லாபீ⁴ சேவ ஹோதி அஜ்ஜ²த்தம் சேதோஸமத²ஸ்ஸ லாபீ⁴ ச அதி⁴பஞ்ஞாத⁴ம்மவிபஸ்ஸனாய.

‘‘தத்ர, பி⁴க்க²வே, ய்வாயம் புக்³க³லோ லாபீ⁴ அதி⁴பஞ்ஞாத⁴ம்மவிபஸ்ஸனாய ந லாபீ⁴ அஜ்ஜ²த்தம் சேதோஸமத²ஸ்ஸ, தேன, பி⁴க்க²வே, புக்³க³லேன அதி⁴பஞ்ஞாத⁴ம்மவிபஸ்ஸனாய பதிட்டா²ய அஜ்ஜ²த்தம் சேதோஸமதே² யோகோ³ கரணீயோ. ஸோ அபரேன ஸமயேன லாபீ⁴ சேவ ஹோதி அதி⁴பஞ்ஞாத⁴ம்மவிபஸ்ஸனாய லாபீ⁴ ச அஜ்ஜ²த்தம் சேதோஸமத²ஸ்ஸ.

‘‘தத்ர, பி⁴க்க²வே, ய்வாயம் புக்³க³லோ ந சேவ லாபீ⁴ அஜ்ஜ²த்தம் சேதோஸமத²ஸ்ஸ ந ச லாபீ⁴ அதி⁴பஞ்ஞாத⁴ம்மவிபஸ்ஸனாய, தேன, பி⁴க்க²வே, புக்³க³லேன தேஸம்யேவ குஸலானம் த⁴ம்மானம் படிலாபா⁴ய அதி⁴மத்தோ ச²ந்தோ³ ச வாயாமோ ச உஸ்ஸாஹோ ச உஸ்ஸோள்ஹீ ச அப்படிவானீ ச ஸதி ச ஸம்பஜஞ்ஞஞ்ச கரணீயம். ஸேய்யதா²பி, பி⁴க்க²வே, ஆதி³த்தசேலோ வா ஆதி³த்தஸீஸோ வா தஸ்ஸேவ [தஸ்ஸ தஸ்ஸேவ (ஸீ. ஸ்யா. கம்.)] சேலஸ்ஸ வா ஸீஸஸ்ஸ வா நிப்³பா³பனாய அதி⁴மத்தம் ச²ந்த³ஞ்ச வாயாமஞ்ச உஸ்ஸாஹஞ்ச உஸ்ஸோள்ஹிஞ்ச அப்படிவானிஞ்ச ஸதிஞ்ச ஸம்பஜஞ்ஞஞ்ச கரேய்ய; ஏவமேவம் கோ², பி⁴க்க²வே, தேன புக்³க³லேன தேஸம்யேவ குஸலானம் த⁴ம்மானம் படிலாபா⁴ய அதி⁴மத்தோ ச²ந்தோ³ ச வாயாமோ ச உஸ்ஸாஹோ ச உஸ்ஸோள்ஹீ ச அப்படிவானீ ச ஸதி ச ஸம்பஜஞ்ஞஞ்ச கரணீயம். ஸோ அபரேன ஸமயேன லாபீ⁴ சேவ ஹோதி அஜ்ஜ²த்தம் சேதோஸமத²ஸ்ஸ லாபீ⁴ ச அதி⁴பஞ்ஞாத⁴ம்மவிபஸ்ஸனாய.

‘‘தத்ர, பி⁴க்க²வே, ய்வாயம் புக்³க³லோ லாபீ⁴ சேவ ஹோதி அஜ்ஜ²த்தம் சேதோஸமத²ஸ்ஸ லாபீ⁴ ச அதி⁴பஞ்ஞாத⁴ம்மவிபஸ்ஸனாய, தேன, பி⁴க்க²வே, புக்³க³லேன தேஸுயேவ குஸலேஸு த⁴ம்மேஸு பதிட்டா²ய உத்தரி [உத்தரிம் (ஸீ. ஸ்யா. கம். பீ.)] ஆஸவானம் க²யாய யோகோ³ கரணீயோ. இமே கோ², பி⁴க்க²வே, சத்தாரோ புக்³க³லா ஸந்தோ ஸம்விஜ்ஜமானா லோகஸ்மி’’ந்தி. ததியம்.

4. ததியஸமாதி⁴ஸுத்தம்

94. ‘‘சத்தாரோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? இத⁴, பி⁴க்க²வே, ஏகச்சோ புக்³க³லோ லாபீ⁴ ஹோதி அஜ்ஜ²த்தம் சேதோஸமத²ஸ்ஸ, ந லாபீ⁴ அதி⁴பஞ்ஞாத⁴ம்மவிபஸ்ஸனாய. இத⁴ பன, பி⁴க்க²வே, ஏகச்சோ புக்³க³லோ லாபீ⁴ ஹோதி அதி⁴பஞ்ஞாத⁴ம்மவிபஸ்ஸனாய, ந லாபீ⁴ அஜ்ஜ²த்தம் சேதோஸமத²ஸ்ஸ. இத⁴ பன, பி⁴க்க²வே, ஏகச்சோ புக்³க³லோ ந சேவ லாபீ⁴ ஹோதி அஜ்ஜ²த்தம் சேதோஸமத²ஸ்ஸ ந ச லாபீ⁴ அதி⁴பஞ்ஞாத⁴ம்மவிபஸ்ஸனாய. இத⁴ பன, பி⁴க்க²வே, ஏகச்சோ புக்³க³லோ லாபீ⁴ சேவ ஹோதி அஜ்ஜ²த்தம் சேதோஸமத²ஸ்ஸ லாபீ⁴ ச அதி⁴பஞ்ஞாத⁴ம்மவிபஸ்ஸனாய.

‘‘தத்ர, பி⁴க்க²வே, ய்வாயம் புக்³க³லோ லாபீ⁴ அஜ்ஜ²த்தம் சேதோஸமத²ஸ்ஸ ந லாபீ⁴ அதி⁴பஞ்ஞாத⁴ம்மவிபஸ்ஸனாய, தேன, பி⁴க்க²வே, புக்³க³லேன ய்வாயம் புக்³க³லோ லாபீ⁴ அதி⁴பஞ்ஞாத⁴ம்மவிபஸ்ஸனாய ஸோ உபஸங்கமித்வா ஏவமஸ்ஸ வசனீயோ – ‘கத²ம் நு கோ², ஆவுஸோ, ஸங்கா²ரா த³ட்ட²ப்³பா³? கத²ம் ஸங்கா²ரா ஸம்மஸிதப்³பா³? கத²ம் ஸங்கா²ரா விபஸ்ஸிதப்³பா³’ [பஸ்ஸிதப்³பா³ (க.)] தி? தஸ்ஸ ஸோ யதா²தி³ட்ட²ம் யதா²விதி³தம் ப்³யாகரோதி – ‘ஏவம் கோ², ஆவுஸோ, ஸங்கா²ரா த³ட்ட²ப்³பா³, ஏவம் ஸங்கா²ரா ஸம்மஸிதப்³பா³, ஏவம் ஸங்கா²ரா விபஸ்ஸிதப்³பா³’தி. ஸோ அபரேன ஸமயேன லாபீ⁴ சேவ ஹோதி அஜ்ஜ²த்தம் சேதோஸமத²ஸ்ஸ லாபீ⁴ ச அதி⁴பஞ்ஞாத⁴ம்மவிபஸ்ஸனாய.

‘‘தத்ர, பி⁴க்க²வே, ய்வாயம் புக்³க³லோ லாபீ⁴ அதி⁴பஞ்ஞாத⁴ம்மவிபஸ்ஸனாய ந லாபீ⁴ அஜ்ஜ²த்தம் சேதோஸமத²ஸ்ஸ, தேன, பி⁴க்க²வே, புக்³க³லேன ய்வாயம் புக்³க³லோ லாபீ⁴ அஜ்ஜ²த்தம் சேதோஸமத²ஸ்ஸ ஸோ உபஸங்கமித்வா ஏவமஸ்ஸ வசனீயோ – ‘கத²ம் நு கோ², ஆவுஸோ, சித்தம் ஸண்ட²பேதப்³ப³ம்? கத²ம் சித்தம் ஸன்னிஸாதே³தப்³ப³ம்? கத²ம் சித்தம் ஏகோதி³ காதப்³ப³ம்? கத²ம் சித்தம் ஸமாத³ஹாதப்³ப³’ந்தி? தஸ்ஸ ஸோ யதா²தி³ட்ட²ம் யதா²விதி³தம் ப்³யாகரோதி – ‘ஏவம் கோ², ஆவுஸோ, சித்தம் ஸண்ட²பேதப்³ப³ம், ஏவம் சித்தம் ஸன்னிஸாதே³தப்³ப³ம், ஏவம் சித்தம் ஏகோதி³ காதப்³ப³ம் [ஏகோதி³ கத்தப்³ப³ம் (பீ.)], ஏவம் சித்தம் ஸமாத³ஹாதப்³ப³’ந்தி. ஸோ அபரேன ஸமயே லாபீ⁴ சேவ ஹோதி அதி⁴பஞ்ஞாத⁴ம்மவிபஸ்ஸனாய லாபீ⁴ ச அஜ்ஜ²த்தம் சேதோஸமத²ஸ்ஸ.

‘‘தத்ர, பி⁴க்க²வே, ய்வாயம் புக்³க³லோ ந சேவ லாபீ⁴ அஜ்ஜ²த்தம் சேதோஸமத²ஸ்ஸ ந ச லாபீ⁴ அதி⁴பஞ்ஞாத⁴ம்மவிபஸ்ஸனாய, தேன, பி⁴க்க²வே, புக்³க³லேன ய்வாயம் புக்³க³லோ லாபீ⁴ சேவ அஜ்ஜ²த்தம் சேதோஸமத²ஸ்ஸ லாபீ⁴ ச அதி⁴பஞ்ஞாத⁴ம்மவிபஸ்ஸனாய ஸோ உபஸங்கமித்வா ஏவமஸ்ஸ வசனீயோ – ‘கத²ம் நு கோ², ஆவுஸோ, சித்தம் ஸண்ட²பேதப்³ப³ம்? கத²ம் சித்தம் ஸன்னிஸாதே³தப்³ப³ம்? கத²ம் சித்தம் ஏகோதி³ காதப்³ப³ம்? கத²ம் சித்தம் ஸமாத³ஹாதப்³ப³ம்? கத²ம் ஸங்கா²ரா த³ட்ட²ப்³பா³? கத²ம் ஸங்கா²ரா ஸம்மஸிதப்³பா³? கத²ம் ஸங்கா²ரா விபஸ்ஸிதப்³பா³’தி? தஸ்ஸ ஸோ யதா²தி³ட்ட²ம் யதா²விதி³தம் ப்³யாகரோதி – ‘ஏவம் கோ², ஆவுஸோ, சித்தம் ஸண்ட²பேதப்³ப³ம், ஏவம் சித்தம் ஸன்னிஸாதே³தப்³ப³ம், ஏவம் சித்தம் ஏகோதி³ காதப்³ப³ம், ஏவம் சித்தம் ஸமாத³ஹாதப்³ப³ம், ஏவம் ஸங்கா²ரா த³ட்ட²ப்³பா³, ஏவம் ஸங்கா²ரா ஸம்மஸிதப்³பா³, ஏவம் ஸங்கா²ரா விபஸ்ஸிதப்³பா³’தி. ஸோ அபரேன ஸமயேன லாபீ⁴ சேவ ஹோதி அஜ்ஜ²த்தம் சேதோஸமத²ஸ்ஸ லாபீ⁴ ச அதி⁴பஞ்ஞாத⁴ம்மவிபஸ்ஸனாய.

‘‘தத்ர, பி⁴க்க²வே, ய்வாயம் புக்³க³லோ லாபீ⁴ சேவ ஹோதி அஜ்ஜ²த்தம் சேதோஸமத²ஸ்ஸ லாபீ⁴ அதி⁴பஞ்ஞாத⁴ம்மவிபஸ்ஸனாய, தேன, பி⁴க்க²வே, புக்³க³லேன தேஸு சேவ குஸலேஸு த⁴ம்மேஸு பதிட்டா²ய உத்தரி ஆஸவானம் க²யாய யோகோ³ கரணீயோ. இமே கோ², பி⁴க்க²வே, சத்தாரோ புக்³க³லா ஸந்தோ ஸம்விஜ்ஜமானா லோகஸ்மி’’ந்தி. சதுத்த²ம்.

5. ச²வாலாதஸுத்தம்

95. ‘‘சத்தாரோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? நேவத்தஹிதாய படிபன்னோ நோ பரஹிதாய, பரஹிதாய படிபன்னோ நோ அத்தஹிதாய, அத்தஹிதாய படிபன்னோ நோ பரஹிதாய, அத்தஹிதாய சேவ [அத்தஹிதாய ச (ஸீ. ஸ்யா. கம். பீ.)] படிபன்னோ பரஹிதாய ச.

‘‘ஸேய்யதா²பி, பி⁴க்க²வே, ச²வாலாதம் உப⁴தோ பதி³த்தம் [ஆதி³த்தம் (க.)], மஜ்ஜே² கூ³த²க³தம், நேவ கா³மே கட்ட²த்த²ம் ப²ரதி ந அரஞ்ஞே ( ) [(கட்ட²த்த²ம் ப²ரதி) கத்த²சி]; ததூ²பமாஹம், பி⁴க்க²வே, இமம் புக்³க³லம் வதா³மி ய்வாயம் புக்³க³லோ நேவத்தஹிதாய படிபன்னோ நோ பரஹிதாய.

‘‘தத்ர, பி⁴க்க²வே, ய்வாயம் புக்³க³லோ பரஹிதாய படிபன்னோ நோ அத்தஹிதாய, அயம் இமேஸம் த்³வின்னம் புக்³க³லானம் அபி⁴க்கந்ததரோ ச பணீததரோ ச. தத்ர, பி⁴க்க²வே, ய்வாயம் புக்³க³லோ அத்தஹிதாய படிபன்னோ நோ பரஹிதாய, அயம் இமேஸம் திண்ணம் புக்³க³லானம் அபி⁴க்கந்ததரோ ச பணீததரோ ச. தத்ர, பி⁴க்க²வே, ய்வாயம் புக்³க³லோ அத்தஹிதாய சேவ படிபன்னோ பரஹிதாய ச, அயம் இமேஸம் சதுன்னம் புக்³க³லானம் அக்³கோ³ ச ஸேட்டோ² ச பாமோக்கோ² [மோக்கோ² (பீ.) ஸம். நி. 3.662-663; அ. நி. 5.181] ச உத்தமோ ச பவரோ ச.

‘‘ஸேய்யதா²பி, பி⁴க்க²வே, க³வா கீ²ரம், கீ²ரம்ஹா த³தி⁴, த³தி⁴ம்ஹா நவனீதம், நவனீதம்ஹா ஸப்பி, ஸப்பிம்ஹா ஸப்பிமண்டோ³, ஸப்பிமண்டோ³ [ஸப்பிம்ஹா ஸப்பிமண்டோ³ (க.)] தத்த² [தத்ர (ஸம். நி. 3.662-662)] அக்³க³மக்கா²யதி; ஏவமேவம் கோ², பி⁴க்க²வே, ய்வாயம் புக்³க³லோ அத்தஹிதாய சேவ படிபன்னோ பரஹிதாய ச, அயம் இமேஸம் சதுன்னம் புக்³க³லானம் அக்³கோ³ ச ஸேட்டோ² ச பாமோக்கோ² ச உத்தமோ ச பவரோ ச. இமே கோ², பி⁴க்க²வே, சத்தாரோ புக்³க³லா ஸந்தோ ஸம்விஜ்ஜமானா லோகஸ்மி’’ந்தி. பஞ்சமம்.

6. ராக³வினயஸுத்தம்

96. ‘‘சத்தாரோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? அத்தஹிதாய படிபன்னோ நோ பரஹிதாய, பரஹிதாய படிபன்னோ நோ அத்தஹிதாய, நேவத்தஹிதாய படிபன்னோ நோ பரஹிதாய, அத்தஹிதாய சேவ படிபன்னோ பரஹிதாய ச.

‘‘கத²ஞ்ச, பி⁴க்க²வே, புக்³க³லோ அத்தஹிதாய படிபன்னோ ஹோதி நோ பரஹிதாய? இத⁴, பி⁴க்க²வே, ஏகச்சோ புக்³க³லோ அத்தனா ராக³வினயாய படிபன்னோ ஹோதி, நோ பரம் ராக³வினயாய ஸமாத³பேதி; அத்தனா தோ³ஸவினயாய படிபன்னோ ஹோதி, நோ பரம் தோ³ஸவினயாய ஸமாத³பேதி; அத்தனா மோஹவினயாய படிபன்னோ ஹோதி, நோ பரம் மோஹவினயாய ஸமாத³பேதி. ஏவம் கோ², பி⁴க்க²வே, புக்³க³லோ அத்தஹிதாய படிபன்னோ ஹோதி, நோ பரஹிதாய.

‘‘கத²ஞ்ச, பி⁴க்க²வே, புக்³க³லோ பரஹிதாய படிபன்னோ ஹோதி, நோ அத்தஹிதாய? இத⁴, பி⁴க்க²வே, ஏகச்சோ புக்³க³லோ அத்தனா ந ராக³வினயாய படிபன்னோ ஹோதி, பரம் ராக³வினயாய ஸமாத³பேதி; அத்தனா ந தோ³ஸவினயாய படிபன்னோ ஹோதி, பரம் தோ³ஸவினயாய ஸமாத³பேதி; அத்தனா ந மோஹவினயாய படிபன்னோ ஹோதி, பரம் மோஹவினயாய ஸமாத³பேதி. ஏவம் கோ², பி⁴க்க²வே, புக்³க³லோ பரஹிதாய படிபன்னோ ஹோதி, நோ அத்தஹிதாய.

‘‘கத²ஞ்ச, பி⁴க்க²வே, புக்³க³லோ நேவத்தஹிதாய படிபன்னோ ஹோதி, நோ பரஹிதாய? இத⁴, பி⁴க்க²வே, ஏகச்சோ புக்³க³லோ அத்தனா ந ராக³வினயாய படிபன்னோ ஹோதி, நோ பரம் ராக³வினயாய ஸமாத³பேதி; அத்தனா ந தோ³ஸவினயாய படிபன்னோ ஹோதி, நோ பரம் தோ³ஸவினயாய ஸமாத³பேதி; அத்தனா ந மோஹவினயாய படிபன்னோ ஹோதி, நோ பரம் மோஹவினயாய ஸமாத³பேதி. ஏவம் கோ², பி⁴க்க²வே, புக்³க³லோ நேவத்தஹிதாய படிபன்னோ ஹோதி, நோ பரஹிதாய.

‘‘கத²ஞ்ச, பி⁴க்க²வே, புக்³க³லோ அத்தஹிதாய சேவ படிபன்னோ ஹோதி பரஹிதாய ச? இத⁴, பி⁴க்க²வே, ஏகச்சோ புக்³க³லோ அத்தனா ச ராக³வினயாய படிபன்னோ ஹோதி, பரஞ்ச ராக³வினயாய ஸமாத³பேதி; அத்தனா ச தோ³ஸவினயாய படிபன்னோ ஹோதி, பரஞ்ச தோ³ஸவினயாய ஸமாத³பேதி; அத்தனா ச மோஹவினயாய படிபன்னோ ஹோதி, பரஞ்ச மோஹவினயாய ஸமாத³பேதி. ஏவம் கோ², பி⁴க்க²வே, புக்³க³லோ அத்தஹிதாய சேவ படிபன்னோ ஹோதி பரஹிதாய ச. இமே கோ², பி⁴க்க²வே, சத்தாரோ புக்³க³லா ஸந்தோ ஸம்விஜ்ஜமானா லோகஸ்மி’’ந்தி. ச²ட்ட²ம்.

7. கி²ப்பனிஸந்திஸுத்தம்

97. ‘‘சத்தாரோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? அத்தஹிதாய படிபன்னோ நோ பரஹிதாய, பரஹிதாய படிபன்னோ நோ அத்தஹிதாய, நேவத்தஹிதாய படிபன்னோ நோ பரஹிதாய, அத்தஹிதாய சேவ படிபன்னோ பரஹிதாய ச.

‘‘கத²ஞ்ச, பி⁴க்க²வே, புக்³க³லோ அத்தஹிதாய படிபன்னோ ஹோதி, நோ பரஹிதாய? இத⁴, பி⁴க்க²வே, ஏகச்சோ புக்³க³லோ கி²ப்பனிஸந்தீ ச ஹோதி குஸலேஸு த⁴ம்மேஸு, ஸுதானஞ்ச த⁴ம்மானம் தா⁴ரகஜாதிகோ [தா⁴ரணஜாதிகோ (க.)] ஹோதி, தா⁴தானஞ்ச [த⁴தானஞ்ச (ஸீ. ஸ்யா. கம். பீ.)] த⁴ம்மானம் அத்தூ²பபரிக்கீ² ஹோதி அத்த²மஞ்ஞாய த⁴ம்மமஞ்ஞாய, த⁴ம்மானுத⁴ம்மப்படிபன்னோ ஹோதி; நோ ச கல்யாணவாசோ ஹோதி கல்யாணவாக்கரணோ போரியா வாசாய ஸமன்னாக³தோ விஸ்ஸட்டா²ய அனேலக³லாய அத்த²ஸ்ஸ விஞ்ஞாபனியா, நோ ச ஸந்த³ஸ்ஸகோ ஹோதி ஸமாத³பகோ [ஸமாதா³பகோ (?)] ஸமுத்தேஜகோ ஸம்பஹம்ஸகோ ஸப்³ரஹ்மசாரீனம். ஏவம் கோ², பி⁴க்க²வே, புக்³க³லோ அத்தஹிதாய படிபன்னோ ஹோதி, நோ பரஹிதாய.

‘‘கத²ஞ்ச, பி⁴க்க²வே, புக்³க³லோ பரஹிதாய படிபன்னோ ஹோதி, நோ அத்தஹிதாய? இத⁴, பி⁴க்க²வே, ஏகச்சோ புக்³க³லோ ந ஹேவ கோ² கி²ப்பனிஸந்தீ ஹோதி குஸலேஸு த⁴ம்மேஸு, நோ ச ஸுதானம் த⁴ம்மானம் தா⁴ரகஜாதிகோ ஹோதி, நோ ச தா⁴தானம் த⁴ம்மானம் அத்தூ²பபரிக்கீ² ஹோதி, நோ ச அத்த²மஞ்ஞாய த⁴ம்மமஞ்ஞாய த⁴ம்மானுத⁴ம்மப்படிபன்னோ ஹோதி; கல்யாணவாசோ ச ஹோதி கல்யாணவாக்கரணோ போரியா வாசாய ஸமன்னாக³தோ விஸ்ஸட்டா²ய அனேலக³லாய அத்த²ஸ்ஸ விஞ்ஞாபனியா, ஸந்த³ஸ்ஸகோ ச ஹோதி ஸமாத³பகோ ஸமுத்தேஜகோ ஸம்பஹம்ஸகோ ஸப்³ரஹ்மசாரீனம். ஏவம் கோ², பி⁴க்க²வே, புக்³க³லோ பரஹிதாய படிபன்னோ ஹோதி, நோ அத்தஹிதாய.

‘‘கத²ஞ்ச, பி⁴க்க²வே, புக்³க³லோ நேவத்தஹிதாய படிபன்னோ ஹோதி, நோ பரஹிதாய? இத⁴, பி⁴க்க²வே, ஏகச்சோ புக்³க³லோ ந ஹேவ கோ² கி²ப்பனிஸந்தீ ஹோதி குஸலேஸு த⁴ம்மேஸு, நோ ச ஸுதானம் த⁴ம்மானம் தா⁴ரகஜாதிகோ ஹோதி, நோ ச தா⁴தானம் த⁴ம்மானம் அத்தூ²பபரிக்கீ² ஹோதி, நோ ச அத்த²மஞ்ஞாய த⁴ம்மமஞ்ஞாய த⁴ம்மானுத⁴ம்மப்படிபன்னோ ஹோதி; நோ ச கல்யாணவாசோ ஹோதி கல்யாணவாக்கரணோ போரியா வாசாய ஸமன்னாக³தோ விஸ்ஸட்டா²ய அனேலக³லாய அத்த²ஸ்ஸ விஞ்ஞாபனியா, நோ ச ஸந்த³ஸ்ஸகோ ஹோதி ஸமாத³பகோ ஸமுத்தேஜகோ ஸம்பஹம்ஸகோ ஸப்³ரஹ்மசாரீனம். ஏவம் கோ², பி⁴க்க²வே, புக்³க³லோ நேவத்தஹிதாய படிபன்னோ ஹோதி, நோ பரஹிதாய.

‘‘கத²ஞ்ச, பி⁴க்க²வே, புக்³க³லோ அத்தஹிதாய சேவ படிபன்னோ ஹோதி பரஹிதாய ச? இத⁴, பி⁴க்க²வே, ஏகச்சோ புக்³க³லோ கி²ப்பனிஸந்தீ ச ஹோதி குஸலேஸு த⁴ம்மேஸு, ஸுதானஞ்ச த⁴ம்மானம் தா⁴ரகஜாதிகோ ஹோதி, தா⁴தானஞ்ச த⁴ம்மானம் அத்தூ²பபரிக்கீ² ஹோதி அத்த²மஞ்ஞாய த⁴ம்மமஞ்ஞாய, த⁴ம்மானுத⁴ம்மப்படிபன்னோ ஹோதி; கல்யாணவாசோ ச ஹோதி கல்யாணவாக்கரணோ போரியா வாசாய ஸமன்னாக³தோ விஸ்ஸட்டா²ய அனேலக³லாய அத்த²ஸ்ஸ விஞ்ஞாபனியா, ஸந்த³ஸ்ஸகோ ச ஹோதி ஸமாத³பகோ ஸமுத்தேஜகோ ஸம்பஹம்ஸகோ ஸப்³ரஹ்மசாரீனம். ஏவம் கோ², பி⁴க்க²வே, புக்³க³லோ அத்தஹிதாய சேவ படிபன்னோ ஹோதி பரஹிதாய ச. இமே கோ², பி⁴க்க²வே, சத்தாரோ புக்³க³லா ஸந்தோ ஸம்விஜ்ஜமானா லோகஸ்மி’’ந்தி. ஸத்தமம்.

8. அத்தஹிதஸுத்தம்

98. ‘‘சத்தாரோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? அத்தஹிதாய படிபன்னோ நோ பரஹிதாய, பரஹிதாய படிபன்னோ நோ அத்தஹிதாய, நேவத்தஹிதாய படிபன்னோ நோ பரஹிதாய, அத்தஹிதாய சேவ படிபன்னோ பரஹிதாய ச. இமே கோ², பி⁴க்க²வே, சத்தாரோ புக்³க³லா ஸந்தோ ஸம்விஜ்ஜமானா லோகஸ்மி’’ந்தி. அட்ட²மம்.

9. ஸிக்கா²பத³ஸுத்தம்

99. ‘‘சத்தாரோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? அத்தஹிதாய படிபன்னோ நோ பரஹிதாய, பரஹிதாய படிபன்னோ நோ அத்தஹிதாய, நேவத்தஹிதாய படிபன்னோ நோ பரஹிதாய, அத்தஹிதாய சேவ படிபன்னோ பரஹிதாய ச.

‘‘கத²ஞ்ச, பி⁴க்க²வே, புக்³க³லோ அத்தஹிதாய படிபன்னோ ஹோதி, நோ பரஹிதாய? இத⁴, பி⁴க்க²வே, ஏகச்சோ புக்³க³லோ அத்தனா பாணாதிபாதா படிவிரதோ ஹோதி, நோ பரம் பாணாதிபாதா வேரமணியா ஸமாத³பேதி; அத்தனா அதி³ன்னாதா³னா படிவிரதோ ஹோதி, நோ பரம் அதி³ன்னாதா³னா வேரமணியா ஸமாத³பேதி; அத்தனா காமேஸுமிச்சா²சாரா படிவிரதோ ஹோதி, நோ பரம் காமேஸுமிச்சா²சாரா வேரமணியா ஸமாத³பேதி; அத்தனா முஸாவாதா³ படிவிரதோ ஹோதி, நோ பரம் முஸாவாதா³ வேரமணியா ஸமாத³பேதி; அத்தனா ஸுராமேரயமஜ்ஜபமாத³ட்டா²னா படிவிரதோ ஹோதி, நோ பரம் ஸுராமேரயமஜ்ஜபமாத³ட்டா²னா வேரமணியா ஸமாத³பேதி. ஏவம் கோ², பி⁴க்க²வே, புக்³க³லோ அத்தஹிதாய படிபன்னோ ஹோதி, நோ பரஹிதாய.

‘‘கத²ஞ்ச, பி⁴க்க²வே, புக்³க³லோ பரஹிதாய படிபன்னோ ஹோதி, நோ அத்தஹிதாய? இத⁴, பி⁴க்க²வே, ஏகச்சோ புக்³க³லோ அத்தனா பாணாதிபாதா அப்படிவிரதோ ஹோதி, பரம் பாணாதிபாதா வேரமணியா ஸமாத³பேதி; அத்தனா அதி³ன்னாதா³னா அப்படிவிரதோ ஹோதி, பரம் அதி³ன்னாதா³னா வேரமணியா ஸமாத³பேதி; அத்தனா காமேஸுமிச்சா²சாரா அப்படிவிரதோ ஹோதி, பரம் காமேஸுமிச்சா²சாரா வேரமணியா ஸமாத³பேதி; அத்தனா முஸாவாதா³ அப்படிவிரதோ ஹோதி, பரம் முஸாவாதா³ வேரமணியா ஸமாத³பேதி; அத்தனா ஸுராமேரயமஜ்ஜபமாத³ட்டா²னா அப்படிவிரதோ ஹோதி, பரம் ஸுராமேரயமஜ்ஜபமாத³ட்டா²னா வேரமணியா ஸமாத³பேதி. ஏவம் கோ², பி⁴க்க²வே, புக்³க³லோ பரஹிதாய படிபன்னோ ஹோதி, நோ அத்தஹிதாய.

‘‘கத²ஞ்ச, பி⁴க்க²வே, புக்³க³லோ நேவத்தஹிதாய படிபன்னோ ஹோதி நோ பரஹிதாய? இத⁴, பி⁴க்க²வே, ஏகச்சோ புக்³க³லோ அத்தனா பாணாதிபாதா அப்படிவிரதோ ஹோதி, நோ பரம் பாணாதிபாதா வேரமணியா ஸமாத³பேதி…பே… அத்தனா ஸுராமேரயமஜ்ஜபமாத³ட்டா²னா அப்படிவிரதோ ஹோதி, நோ பரம் ஸுராமேரயமஜ்ஜபமாத³ட்டா²னா வேரமணியா ஸமாத³பேதி. ஏவம் கோ², பி⁴க்க²வே, புக்³க³லோ நேவத்தஹிதாய படிபன்னோ ஹோதி, நோ பரஹிதாய.

‘‘கத²ஞ்ச, பி⁴க்க²வே, புக்³க³லோ அத்தஹிதாய சேவ படிபன்னோ ஹோதி பரஹிதாய ச? இத⁴, பி⁴க்க²வே, ஏகச்சோ புக்³க³லோ அத்தனா ச பாணாதிபாதா படிவிரதோ ஹோதி, பரஞ்ச பாணாதிபாதா வேரமணியா ஸமாத³பேதி…பே… அத்தனா ச ஸுராமேரயமஜ்ஜபமாத³ட்டா²னா படிவிரதோ ஹோதி, பரஞ்ச ஸுராமேரயமஜ்ஜபமாத³ட்டா²னா வேரமணியா ஸமாத³பேதி. ஏவம் கோ², பி⁴க்க²வே, புக்³க³லோ அத்தஹிதாய சேவ படிபன்னோ ஹோதி பரஹிதாய ச. இமே கோ², பி⁴க்க²வே, சத்தாரோ புக்³க³லா ஸந்தோ ஸம்விஜ்ஜமானா லோகஸ்மி’’ந்தி. நவமம்.

10. போதலியஸுத்தம்

100. அத² கோ² போதலியோ பரிப்³பா³ஜகோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னம் கோ² போதலியம் பரிப்³பா³ஜகம் ப⁴க³வா ஏதத³வோச –

‘‘சத்தாரோமே, போதலிய, புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? இத⁴, போதலிய, ஏகச்சோ புக்³க³லோ [பு. ப. 165] அவண்ணாரஹஸ்ஸ அவண்ணம் பா⁴ஸிதா ஹோதி பூ⁴தம் தச்ச²ம் காலேன, நோ ச கோ² வண்ணாரஹஸ்ஸ வண்ணம் பா⁴ஸிதா ஹோதி பூ⁴தம் தச்ச²ம் காலேன. இத⁴ பன, போதலிய, ஏகச்சோ புக்³க³லோ வண்ணாரஹஸ்ஸ வண்ணம் பா⁴ஸிதா ஹோதி பூ⁴தம் தச்ச²ம் காலேன, நோ ச கோ² அவண்ணாரஹஸ்ஸ அவண்ணம் பா⁴ஸிதா ஹோதி பூ⁴தம் தச்ச²ம் காலேன. இத⁴ பன, போதலிய, ஏகச்சோ புக்³க³லோ நேவ அவண்ணாரஹஸ்ஸ அவண்ணம் பா⁴ஸிதா ஹோதி பூ⁴தம் தச்ச²ம் காலேன, நோ ச வண்ணாரஹஸ்ஸ வண்ணம் பா⁴ஸிதா ஹோதி பூ⁴தம் தச்ச²ம் காலேன. இத⁴ பன, போதலிய, ஏகச்சோ புக்³க³லோ அவண்ணாரஹஸ்ஸ ச அவண்ணம் பா⁴ஸிதா ஹோதி பூ⁴தம் தச்ச²ம் காலேன, வண்ணாரஹஸ்ஸ ச வண்ணம் பா⁴ஸிதா ஹோதி பூ⁴தம் தச்ச²ம் காலேன. இமே கோ², போதலிய, சத்தாரோ புக்³க³லா ஸந்தோ ஸம்விஜ்ஜமானா லோகஸ்மிம். இமேஸம் கோ², போதலிய, சதுன்னம் புக்³க³லானம் கதமோ தே புக்³க³லோ க²மதி அபி⁴க்கந்ததரோ ச பணீததரோ சா’’தி?

‘‘சத்தாரோமே, போ⁴ கோ³தம, புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? இத⁴, போ⁴ கோ³தம, ஏகச்சோ புக்³க³லோ அவண்ணாரஹஸ்ஸ அவண்ணம் பா⁴ஸிதா ஹோதி பூ⁴தம் தச்ச²ம் காலேன, நோ ச கோ² வண்ணாரஹஸ்ஸ வண்ணம் பா⁴ஸிதா ஹோதி பூ⁴தம் தச்ச²ம் காலேன. இத⁴ பன, போ⁴ கோ³தம, ஏகச்சோ புக்³க³லோ வண்ணாரஹஸ்ஸ வண்ணம் பா⁴ஸிதா ஹோதி பூ⁴தம் தச்ச²ம் காலேன, நோ ச கோ² அவண்ணாரஹஸ்ஸ அவண்ணம் பா⁴ஸிதா ஹோதி பூ⁴தம் தச்ச²ம் காலேன. இத⁴ பன, போ⁴ கோ³தம, ஏகச்சோ புக்³க³லோ நேவ அவண்ணாரஹஸ்ஸ அவண்ணம் பா⁴ஸிதா ஹோதி பூ⁴தம் தச்ச²ம் காலேன, நோ ச வண்ணாரஹஸ்ஸ வண்ணம் பா⁴ஸிதா ஹோதி பூ⁴தம் தச்ச²ம் காலேன. இத⁴ பன, போ⁴ கோ³தம, ஏகச்சோ புக்³க³லோ அவண்ணாரஹஸ்ஸ ச அவண்ணம் பா⁴ஸிதா ஹோதி பூ⁴தம் தச்ச²ம் காலேன, வண்ணாரஹஸ்ஸ ச வண்ணம் பா⁴ஸிதா ஹோதி பூ⁴தம் தச்ச²ம் காலேன. இமே கோ², போ⁴ கோ³தம, சத்தாரோ புக்³க³லா ஸந்தோ ஸம்விஜ்ஜமானா லோகஸ்மிம். இமேஸம், போ⁴ கோ³தம, சதுன்னம் புக்³க³லானம் ய்வாயம் புக்³க³லோ நேவ அவண்ணாரஹஸ்ஸ அவண்ணம் பா⁴ஸிதா ஹோதி பூ⁴தம் தச்ச²ம் காலேன, நோ ச வண்ணாரஹஸ்ஸ வண்ணம் பா⁴ஸிதா ஹோதி பூ⁴தம் தச்ச²ம் காலேன; அயம் மே புக்³க³லோ க²மதி இமேஸம் சதுன்னம் புக்³க³லானம் அபி⁴க்கந்ததரோ ச பணீததரோ ச. தம் கிஸ்ஸ ஹேது? அபி⁴க்கந்தா [அபி⁴க்கந்ததரா (க.)] ஹேஸா, போ⁴ கோ³தம, யதி³த³ம் உபேக்கா²’’தி.

‘‘சத்தாரோமே, போதலிய, புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ…பே… இமே கோ², போதலிய, சத்தாரோ புக்³க³லா ஸந்தோ ஸம்விஜ்ஜமானா லோகஸ்மிம். இமேஸம் கோ², போதலிய, சதுன்னம் புக்³க³லானம் ய்வாயம் புக்³க³லோ அவண்ணாரஹஸ்ஸ ச அவண்ணம் பா⁴ஸிதா ஹோதி பூ⁴தம் தச்ச²ம் காலேன, வண்ணாரஹஸ்ஸ ச வண்ணம் பா⁴ஸிதா ஹோதி பூ⁴தம் தச்ச²ம் காலேன; அயம் இமேஸம் சதுன்னம் புக்³க³லானம் அபி⁴க்கந்ததரோ ச பணீததரோ ச. தம் கிஸ்ஸ ஹேது? அபி⁴க்கந்தா ஹேஸா, போதலிய, யதி³த³ம் தத்த² தத்த² காலஞ்ஞுதா’’தி.

‘‘சத்தாரோமே, போ⁴ கோ³தம, புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ…பே… இமே கோ², போ⁴ கோ³தம, சத்தாரோ புக்³க³லா ஸந்தோ ஸம்விஜ்ஜமானா லோகஸ்மிம். இமேஸம், போ⁴ கோ³தம, சதுன்னம் புக்³க³லானம் ய்வாயம் புக்³க³லோ அவண்ணாரஹஸ்ஸ ச அவண்ணம் பா⁴ஸிதா பூ⁴தம் தச்ச²ம் காலேன, வண்ணாரஹஸ்ஸ ச வண்ணம் பா⁴ஸிதா பூ⁴தம் தச்ச²ம் காலேன; அயம் மே புக்³க³லோ க²மதி இமேஸம் சதுன்னம் புக்³க³லானம் அபி⁴க்கந்ததரோ ச பணீததரோ ச. தம் கிஸ்ஸ ஹேது? அபி⁴க்கந்தா ஹேஸா, போ⁴ கோ³தம, யதி³த³ம் தத்த² தத்த² காலஞ்ஞுதா.

‘‘அபி⁴க்கந்தம், போ⁴ கோ³தம, அபி⁴க்கந்தம், போ⁴ கோ³தம! ஸேய்யதா²பி, போ⁴ கோ³தம, நிக்குஜ்ஜிதம் வா உக்குஜ்ஜேய்ய, படிச்ச²ன்னம் வா விவரேய்ய, மூள்ஹஸ்ஸ வா மக்³க³ம் ஆசிக்கே²ய்ய, அந்த⁴காரே வா தேலபஜ்ஜோதம் தா⁴ரேய்ய – சக்கு²மந்தோ ரூபானி த³க்க²ந்தீதி, ஏவமேவம் போ⁴தா கோ³தமேன அனேகபரியாயேன த⁴ம்மோ பகாஸிதோ. ஏஸாஹம் ப⁴வந்தம் கோ³தமம் ஸரணம் க³ச்சா²மி த⁴ம்மஞ்ச பி⁴க்கு²ஸங்க⁴ஞ்ச. உபாஸகம் மம் ப⁴வம் கோ³தமோ தா⁴ரேது அஜ்ஜதக்³கே³ பாணுபேதம் ஸரணம் க³த’’ந்தி. த³ஸமம்.

அஸுரவக்³கோ³ பஞ்சமோ.