(9) 4. மசலவக்³கோ³

1. பாணாதிபாதஸுத்தம்

81. ‘‘சதூஹி, பி⁴க்க²வே, த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் நிரயே. கதமேஹி சதூஹி? பாணாதிபாதீ ஹோதி, அதி³ன்னாதா³யீ ஹோதி, காமேஸுமிச்சா²சாரீ ஹோதி, முஸாவாதீ³ ஹோதி – இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் நிரயே.

‘‘சதூஹி, பி⁴க்க²வே, த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் ஸக்³கே³. கதமேஹி சதூஹி? பாணாதிபாதா படிவிரதோ ஹோதி, அதி³ன்னாதா³னா படிவிரதோ ஹோதி, காமேஸுமிச்சா²சாரா படிவிரதோ ஹோதி, முஸாவாதா³ படிவிரதோ ஹோதி – இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் ஸக்³கே³’’தி. பட²மம்.

2. முஸாவாத³ஸுத்தம்

82. ‘‘சதூஹி, பி⁴க்க²வே, த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் நிரயே. கதமேஹி சதூஹி? முஸாவாதீ³ ஹோதி, பிஸுணவாசோ ஹோதி, ப²ருஸவாசோ ஹோதி, ஸம்ப²ப்பலாபீ ஹோதி – இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் நிரயே.

‘‘சதூஹி, பி⁴க்க²வே, த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் ஸக்³கே³. கதமேஹி சதூஹி? முஸாவாதா³ படிவிரதோ ஹோதி, பிஸுணாய வாசாய படிவிரதோ ஹோதி, ப²ருஸாய வாசாய படிவிரதோ ஹோதி, ஸம்ப²ப்பலாபா படிவிரதோ ஹோதி – இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் ஸக்³கே³’’தி. து³தியம்.

3. அவண்ணாரஹஸுத்தம்

83. ‘‘சதூஹி, பி⁴க்க²வே, த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் நிரயே. கதமேஹி சதூஹி? அனனுவிச்ச அபரியோகா³ஹேத்வா அவண்ணாரஹஸ்ஸ வண்ணம் பா⁴ஸதி, அனனுவிச்ச அபரியோகா³ஹேத்வா வண்ணாரஹஸ்ஸ அவண்ணம் பா⁴ஸதி, அனனுவிச்ச அபரியோகா³ஹேத்வா அப்பஸாத³னீயே டா²னே பஸாத³ம் உபத³ம்ஸேதி, அனனுவிச்ச அபரியோகா³ஹேத்வா பஸாத³னீயே டா²னே அப்பஸாத³ம் உபத³ம்ஸேதி – இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் நிரயே.

‘‘சதூஹி, பி⁴க்க²வே, த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் ஸக்³கே³. கதமேஹி சதூஹி? அனுவிச்ச பரியோகா³ஹேத்வா அவண்ணாரஹஸ்ஸ அவண்ணம் பா⁴ஸதி, அனுவிச்ச பரியோகா³ஹேத்வா வண்ணாரஹஸ்ஸ வண்ணம் பா⁴ஸதி, அனுவிச்ச பரியோகா³ஹேத்வா அப்பஸாத³னீயே டா²னே அப்பஸாத³ம் உபத³ம்ஸேதி அனுவிச்ச பரியோகா³ஹேத்வா பஸாத³னீயே டா²னே பஸாத³ம் உபத³ம்ஸேதி – இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் ஸக்³கே³’’தி. ததியம்.

4. கோத⁴க³ருஸுத்தம்

84. ‘‘சதூஹி, பி⁴க்க²வே, த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் நிரயே. கதமேஹி சதூஹி? கோத⁴க³ரு ஹோதி ந ஸத்³த⁴ம்மக³ரு, மக்க²க³ரு ஹோதி ந ஸத்³த⁴ம்மக³ரு, லாப⁴க³ரு ஹோதி ந ஸத்³த⁴ம்மக³ரு, ஸக்காரக³ரு ஹோதி ந ஸத்³த⁴ம்மக³ரு – இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் நிரயே.

‘‘சதூஹி, பி⁴க்க²வே, த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் ஸக்³கே³. கதமேஹி சதூஹி? ஸத்³த⁴ம்மக³ரு ஹோதி ந கோத⁴க³ரு, ஸத்³த⁴ம்மக³ரு ஹோதி ந மக்க²க³ரு, ஸத்³த⁴ம்மக³ரு ஹோதி ந லாப⁴க³ரு, ஸத்³த⁴ம்மக³ரு ஹோதி ந ஸக்காரக³ரு – இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் ஸக்³கே³’’தி. சதுத்த²ம்.

5. தமோதமஸுத்தம்

85. ‘‘சத்தாரோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? தமோ தமபராயணோ [… பராயனோ (ஸ்யா. கம். பீ.) பு. ப. 168; ஸம். நி. 1.132], தமோ ஜோதிபராயணோ, ஜோதி தமபராயணோ, ஜோதி ஜோதிபராயணோ.

‘‘கத²ஞ்ச, பி⁴க்க²வே, புக்³க³லோ தமோ ஹோதி தமபராயணோ? இத⁴, பி⁴க்க²வே, ஏகச்சோ புக்³க³லோ நீசே குலே பச்சாஜாதோ ஹோதி – சண்டா³லகுலே வா வேனகுலே வா நேஸாத³குலே வா ரத²காரகுலே வா புக்குஸகுலே வா த³லித்³தே³ அப்பன்னபானபோ⁴ஜனே கஸிரவுத்திகே, யத்த² கஸிரேன கா⁴ஸச்சா²தோ³ லப்³ப⁴தி. ஸோ ச ஹோதி து³ப்³ப³ண்ணோ து³த்³த³ஸிகோ ஓகோடிமகோ ப³வ்ஹாபா³தோ⁴ காணோ வா குணீ வா க²ஞ்ஜோ வா பக்க²ஹதோ வா, ந லாபீ⁴ அன்னஸ்ஸ பானஸ்ஸ வத்த²ஸ்ஸ யானஸ்ஸ மாலாக³ந்த⁴விலேபனஸ்ஸ ஸேய்யாவஸத²பதீ³பேய்யஸ்ஸ. ஸோ காயேன து³ச்சரிதம் சரதி, வாசாய து³ச்சரிதம் சரதி, மனஸா து³ச்சரிதம் சரதி. ஸோ காயேன து³ச்சரிதம் சரித்வா, வாசாய து³ச்சரிதம் சரித்வா, மனஸா து³ச்சரிதம் சரித்வா காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி. ஏவம் கோ², பி⁴க்க²வே, புக்³க³லோ தமோ ஹோதி தமபராயணோ.

‘‘கத²ஞ்ச, பி⁴க்க²வே, புக்³க³லோ தமோ ஹோதி ஜோதிபராயணோ? இத⁴, பி⁴க்க²வே, ஏகச்சோ புக்³க³லோ நீசே குலே பச்சாஜாதோ ஹோதி – சண்டா³லகுலே வா வேனகுலே வா நேஸாத³குலே வா ரத²காரகுலே வா புக்குஸகுலே வா த³லித்³தே³ அப்பன்னபானபோ⁴ஜனே கஸிரவுத்திகே, யத்த² கஸிரேன கா⁴ஸச்சா²தோ³ லப்³ப⁴தி; ஸோ ச ஹோதி து³ப்³ப³ண்ணோ து³த்³த³ஸிகோ ஓகோடிமகோ ப³வ்ஹாபா³தோ⁴ காணோ வா குணீ வா க²ஞ்ஜோ வா பக்க²ஹதோ வா ந லாபீ⁴ அன்னஸ்ஸ பானஸ்ஸ வத்த²ஸ்ஸ யானஸ்ஸ மாலாக³ந்த⁴விலேபனஸ்ஸ ஸேய்யாவஸத²பதீ³பேய்யஸ்ஸ. ஸோ காயேன ஸுசரிதம் சரதி, வாசாய ஸுசரிதம் சரதி, மனஸா ஸுசரிதம் சரதி. ஸோ காயேன ஸுசரிதம் சரித்வா, வாசாய ஸுசரிதம் சரித்வா, மனஸா ஸுசரிதம் சரித்வா காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதி. ஏவம் கோ², பி⁴க்க²வே, புக்³க³லோ தமோ ஹோதி ஜோதிபராயணோ.

‘‘கத²ஞ்ச, பி⁴க்க²வே, புக்³க³லோ ஜோதி ஹோதி தமபராயணோ? இத⁴, பி⁴க்க²வே, ஏகச்சோ புக்³க³லோ உச்சே குலே பச்சாஜாதோ ஹோதி – க²த்தியமஹாஸாலகுலே வா ப்³ராஹ்மணமஹாஸாலகுலே வா க³ஹபதிமஹாஸாலகுலே வா அட்³டே⁴ மஹத்³த⁴னே மஹாபோ⁴கே³ பஹூதஜாதரூபரஜதே பஹூதவித்தூபகரணே பஹூதத⁴னத⁴ஞ்ஞே; ஸோ ச ஹோதி அபி⁴ரூபோ த³ஸ்ஸனீயோ பாஸாதி³கோ பரமாய வண்ணபோக்க²ரதாய ஸமன்னாக³தோ, லாபீ⁴ அன்னஸ்ஸ பானஸ்ஸ வத்த²ஸ்ஸ யானஸ்ஸ மாலாக³ந்த⁴விலேபனஸ்ஸ ஸேய்யாவஸத²பதீ³பேய்யஸ்ஸ. ஸோ காயேன து³ச்சரிதம் சரதி, வாசாய து³ச்சரிதம் சரதி, மனஸா து³ச்சரிதம் சரதி. ஸோ காயேன து³ச்சரிதம் சரித்வா, வாசாய து³ச்சரிதம் சரித்வா, மனஸா து³ச்சரிதம் சரித்வா காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி. ஏவம் கோ², பி⁴க்க²வே, புக்³க³லோ ஜோதி ஹோதி தமபராயணோ.

‘‘கத²ஞ்ச, பி⁴க்க²வே, புக்³க³லோ ஜோதி ஹோதி ஜோதிபராயணோ? இத⁴, பி⁴க்க²வே, ஏகச்சோ புக்³க³லோ உச்சே குலே பச்சாஜாதோ ஹோதி – க²த்தியமஹாஸாலகுலே வா ப்³ராஹ்மணமஹாஸாலகுலே வா க³ஹபதிமஹாஸாலகுலே வா அட்³டே⁴ மஹத்³த⁴னே மஹாபோ⁴கே³ பஹூதஜாதரூபரஜதே பஹூதவித்தூபகரணே பஹூதத⁴னத⁴ஞ்ஞே; ஸோ ச ஹோதி அபி⁴ரூபோ த³ஸ்ஸனீயோ பாஸாதி³கோ பரமாய வண்ணபோக்க²ரதாய ஸமன்னாக³தோ, லாபீ⁴ அன்னஸ்ஸ பானஸ்ஸ வத்த²ஸ்ஸ யானஸ்ஸ மாலாக³ந்த⁴விலேபனஸ்ஸ ஸேய்யாவஸத²பதீ³பேய்யஸ்ஸ. ஸோ காயேன ஸுசரிதம் சரதி, வாசாய ஸுசரிதம் சரதி, மனஸா ஸுசரிதம் சரதி. ஸோ காயேன ஸுசரிதம் சரித்வா, வாசாய ஸுசரிதம் சரித்வா, மனஸா ஸுசரிதம் சரித்வா காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதி. ஏவம் கோ², பி⁴க்க²வே, புக்³க³லோ ஜோதி ஹோதி ஜோதிபராயணோ. இமே கோ², பி⁴க்க²வே, சத்தாரோ புக்³க³லா ஸந்தோ ஸம்விஜ்ஜமானா லோகஸ்மி’’ந்தி. பஞ்சமம்.

6. ஓணதோணதஸுத்தம்

86. ‘‘சத்தாரோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? ஓணதோணதோ, ஓணதுண்ணதோ, உண்ணதோணதோ, உண்ணதுண்ணதோ. இமே கோ², பி⁴க்க²வே, சத்தாரோ புக்³க³லா ஸந்தோ ஸம்விஜ்ஜமானா லோகஸ்மி’’ந்தி [பு. ப. 169]. ச²ட்ட²ம்.

7. புத்தஸுத்தம்

87. ‘‘சத்தாரோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? ஸமணமசலோ, ஸமணபுண்ட³ரீகோ, ஸமணபது³மோ, ஸமணேஸு ஸமணஸுகு²மாலோ.

‘‘கத²ஞ்ச, பி⁴க்க²வே, புக்³க³லோ ஸமணமசலோ ஹோதி? இத⁴, பி⁴க்க²வே, பி⁴க்கு² ஸேகோ² ஹோதி பாடிபதோ³ [படிபதோ³ (ஸ்யா. கம். பீ.) ம. நி. 2 ஸேக²ஸுத்தவண்ணனா ஓலோகேதப்³பா³]; அனுத்தரம் யோக³க்கே²மம் பத்த²யமானோ விஹரதி. ஸேய்யதா²பி, பி⁴க்க²வே, ரஞ்ஞோ க²த்தியஸ்ஸ முத்³தா⁴வஸித்தஸ்ஸ ஜேட்டோ² புத்தோ ஆபி⁴ஸேகோ அனபி⁴ஸித்தோ மசலப்பத்தோ; ஏவமேவம் கோ², பி⁴க்க²வே, பி⁴க்கு² ஸேகோ² ஹோதி பாடிபதோ³, அனுத்தரம் யோக³க்கே²மம் பத்த²யமானோ விஹரதி. ஏவம் கோ², பி⁴க்க²வே, புக்³க³லோ ஸமணமசலோ ஹோதி.

‘‘கத²ஞ்ச, பி⁴க்க²வே, புக்³க³லோ ஸமணபுண்ட³ரீகோ ஹோதி? இத⁴, பி⁴க்க²வே, பி⁴க்கு² ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி, நோ ச கோ² அட்ட² விமோக்கே² காயேன பு²ஸித்வா விஹரதி [ப²ஸ்ஸித்வா (ஸீ. பீ.)]. ஏவம் கோ², பி⁴க்க²வே, புக்³க³லோ ஸமணபுண்ட³ரீகோ ஹோதி.

‘‘கத²ஞ்ச, பி⁴க்க²வே, புக்³க³லோ ஸமணபது³மோ ஹோதி? இத⁴, பி⁴க்க²வே, பி⁴க்கு² ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி, அட்ட² ச விமோக்கே² காயேன பு²ஸித்வா விஹரதி. ஏவம் கோ², பி⁴க்க²வே, புக்³க³லோ ஸமணபது³மோ ஹோதி.

‘‘கத²ஞ்ச, பி⁴க்க²வே, புக்³க³லோ ஸமணேஸு ஸமணஸுகு²மாலோ ஹோதி? இத⁴, பி⁴க்க²வே, பி⁴க்கு² யாசிதோவ ப³ஹுலம் சீவரம் பரிபு⁴ஞ்ஜதி, அப்பம் அயாசிதோ; யாசிதோவ ப³ஹுலம் பிண்ட³பாதம் பரிபு⁴ஞ்ஜதி, அப்பம் அயாசிதோ; யாசிதோவ ப³ஹுலம் ஸேனாஸனம் பரிபு⁴ஞ்ஜதி, அப்பம் அயாசிதோ; யாசிதோவ ப³ஹுலம் கி³லானப்பச்சயபே⁴ஸஜ்ஜபரிக்கா²ரம் பரிபு⁴ஞ்ஜதி, அப்பம் அயாசிதோ. யேஹி கோ² பன ஸப்³ரஹ்மசாரீஹி ஸத்³தி⁴ம் விஹரதி, த்யஸ்ஸ [த்யாஸ்ஸ (ஸீ.) அ. நி. 5.104] மனாபேனேவ ப³ஹுலம் காயகம்மேன ஸமுதா³சரந்தி, அப்பம் அமனாபேன; மனாபேனேவ ப³ஹுலம் வசீகம்மேன ஸமுதா³சரந்தி, அப்பம் அமனாபேன; மனாபேனேவ ப³ஹுலம் மனோகம்மேன ஸமுதா³சரந்தி, அப்பம் அமனாபேன; மனாபம்யேவ ப³ஹுலம் உபஹாரம் உபஹரந்தி, அப்பம் அமனாபம். யானி கோ² பன தானி வேத³யிதானி பித்தஸமுட்டா²னானி வா ஸேம்ஹஸமுட்டா²னானி வா வாதஸமுட்டா²னானி வா ஸன்னிபாதிகானி வா உதுபரிணாமஜானி வா விஸமபரிஹாரஜானி வா ஓபக்கமிகானி வா கம்மவிபாகஜானி வா, தானி பனஸ்ஸ ந ப³ஹுதே³வ உப்பஜ்ஜந்தி. அப்பாபா³தோ⁴ ஹோதி. சதுன்னம் ஜா²னானம் ஆபி⁴சேதஸிகானம் தி³ட்ட²த⁴ம்மஸுக²விஹாரானம் நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴, ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. ஏவம் கோ², பி⁴க்க²வே, புக்³க³லோ ஸமணேஸு ஸமணஸுகு²மாலோ ஹோதி.

‘‘யஞ்ஹி தம், பி⁴க்க²வே, ஸம்மா வத³மானோ வதே³ய்ய ஸமணேஸு ஸமணஸுகு²மாலோதி, மமேவ தம், பி⁴க்க²வே, ஸம்மா வத³மானோ வதே³ய்ய ஸமணேஸு ஸமணஸுகு²மாலோதி. அஹஞ்ஹி, பி⁴க்க²வே, யாசிதோவ ப³ஹுலம் சீவரம் பரிபு⁴ஞ்ஜாமி, அப்பம் அயாசிதோ; யாசிதோவ ப³ஹுலம் பிண்ட³பாதம் பரிபு⁴ஞ்ஜாமி, அப்பம் அயாசிதோ; யாசிதோவ ப³ஹுலம் ஸேனாஸனம் பரிபு⁴ஞ்ஜாமி, அப்பம் அயாசிதோ; யாசிதோவ ப³ஹுலம் கி³லானப்பச்சயபே⁴ஸஜ்ஜபரிக்கா²ரம் பரிபு⁴ஞ்ஜாமி, அப்பம் அயாசிதோ. யேஹி கோ² பன பி⁴க்கூ²ஹி ஸத்³தி⁴ம் விஹராமி தே மே மனாபேனேவ ப³ஹுலம் காயகம்மேன ஸமுதா³சரந்தி, அப்பம் அமனாபேன; மனாபேனேவ ப³ஹுலம் வசீகம்மேன ஸமுதா³சரந்தி, அப்பம் அமனாபேன; மனாபேனேவ ப³ஹுலம் மனோகம்மேன ஸமுதா³சரந்தி, அப்பம் அமனாபேன; மனாபம்யேவ ப³ஹுலம் உபஹாரம் உபஹரந்தி, அப்பம் அமனாபம். யானி கோ² பன தானி வேத³யிதானி பித்தஸமுட்டா²னானி வா ஸேம்ஹஸமுட்டா²னானி வா வாதஸமுட்டா²னானி வா ஸன்னிபாதிகானி வா உதுபரிணாமஜானி வா விஸமபரிஹாரஜானி வா ஓபக்கமிகானி வா கம்மவிபாகஜானி வா, தானி மே ந ப³ஹுதே³வ உப்பஜ்ஜந்தி. அப்பாபா³தோ⁴ஹமஸ்மி. சதுன்னம் கோ² பனஸ்மி ஜா²னானம் ஆபி⁴சேதஸிகானம் தி³ட்ட²த⁴ம்மஸுக²விஹாரானம் நிகாமலாபீ⁴ அகிச்ச²லாபீ⁴ அகஸிரலாபீ⁴, ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹராமி.

‘‘யஞ்ஹி தம், பி⁴க்க²வே, ஸம்மா வத³மானோ வதே³ய்ய ஸமணேஸு ஸமணஸுகு²மாலோதி, மமேவ தம், பி⁴க்க²வே, ஸம்மா வத³மானோ வதே³ய்ய ஸமணேஸு ஸமணஸுகு²மாலோதி. இமே கோ², பி⁴க்க²வே, சத்தாரோ புக்³க³லா ஸந்தோ ஸம்விஜ்ஜமானா லோகஸ்மி’’ந்தி. ஸத்தமம்.

8. ஸம்யோஜனஸுத்தம்

88. ‘‘சத்தாரோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? ஸமணமசலோ, ஸமணபுண்ட³ரீகோ, ஸமணபது³மோ, ஸமணேஸு ஸமணஸுகு²மாலோ.

‘‘கத²ஞ்ச, பி⁴க்க²வே, புக்³க³லோ [பு. ப. 190 (தோ²கம் விஸதி³ஸம்)] ஸமணமசலோ ஹோதி? இத⁴, பி⁴க்க²வே, பி⁴க்கு² திண்ணம் ஸம்யோஜனானம் பரிக்க²யா ஸோதாபன்னோ ஹோதி அவினிபாதத⁴ம்மோ நியதோ ஸம்போ³தி⁴பராயணோ. ஏவம் கோ², பி⁴க்க²வே, புக்³க³லோ ஸமணமசலோ ஹோதி.

‘‘கத²ஞ்ச, பி⁴க்க²வே, புக்³க³லோ ஸமணபுண்ட³ரீகோ ஹோதி? இத⁴ பி⁴க்க²வே, பி⁴க்கு² திண்ணம் ஸம்யோஜனானம் பரிக்க²யா, ராக³தோ³ஸமோஹானம் தனுத்தா ஸகதா³கா³மீ ஹோதி, ஸகிதே³வ இமம் லோகம் ஆக³ந்த்வா து³க்க²ஸ்ஸந்தம் கரோதி. ஏவம் கோ², பி⁴க்க²வே, புக்³க³லோ ஸமணபுண்ட³ரீகோ ஹோதி.

‘‘கத²ஞ்ச, பி⁴க்க²வே, புக்³க³லோ ஸமணபது³மோ ஹோதி? இத⁴, பி⁴க்க²வே, பி⁴க்கு² பஞ்சன்னம் ஓரம்பா⁴கி³யானம் ஸம்யோஜனானம் பரிக்க²யா ஓபபாதிகோ ஹோதி தத்த² பரினிப்³பா³யீ அனாவத்தித⁴ம்மோ தஸ்மா லோகா. ஏவம் கோ², பி⁴க்க²வே, புக்³க³லோ ஸமணபது³மோ ஹோதி.

‘‘கத²ஞ்ச, பி⁴க்க²வே, புக்³க³லோ ஸமணேஸு ஸமணஸுகு²மாலோ ஹோதி? இத⁴, பி⁴க்க²வே, பி⁴க்கு² ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. ஏவம் கோ², பி⁴க்க²வே, புக்³க³லோ ஸமணேஸு ஸமணஸுகு²மாலோ ஹோதி. இமே கோ², பி⁴க்க²வே, சத்தாரோ புக்³க³லா ஸந்தோ ஸம்விஜ்ஜமானா லோகஸ்மி’’ந்தி. அட்ட²மம்.

9. ஸம்மாதி³ட்டி²ஸுத்தம்

89. ‘‘சத்தாரோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? ஸமணமசலோ, ஸமணபுண்ட³ரீகோ, ஸமணபது³மோ, ஸமணேஸு ஸமணஸுகு²மாலோ.

‘‘கத²ஞ்ச, பி⁴க்க²வே, புக்³க³லோ ஸமணமசலோ ஹோதி? இத⁴, பி⁴க்க²வே, பி⁴க்கு² ஸம்மாதி³ட்டி²கோ ஹோதி, ஸம்மாஸங்கப்போ ஹோதி, ஸம்மாவாசோ ஹோதி, ஸம்மாகம்மந்தோ ஹோதி, ஸம்மாஆஜீவோ ஹோதி, ஸம்மாவாயாமோ ஹோதி, ஸம்மாஸதி [ஸம்மாஸதீ (ஸீ. க.)] ஹோதி, ஸம்மாஸமாதி⁴ [ஸம்மாஸமாதீ⁴ (ஸீ. க.)] ஹோதி. ஏவம் கோ², பி⁴க்க²வே, புக்³க³லோ ஸமணமசலோ ஹோதி.

‘‘கத²ஞ்ச, பி⁴க்க²வே, புக்³க³லோ ஸமணபுண்ட³ரீகோ ஹோதி? இத⁴, பி⁴க்க²வே, பி⁴க்கு² ஸம்மாதி³ட்டி²கோ ஹோதி, ஸம்மாஸங்கப்போ ஹோதி, ஸம்மாவாசோ ஹோதி, ஸம்மாகம்மந்தோ ஹோதி, ஸம்மாஆஜீவோ ஹோதி, ஸம்மாவாயாமோ ஹோதி, ஸம்மாஸதி ஹோதி, ஸம்மாஸமாதி⁴ ஹோதி, ஸம்மாஞாணீ ஹோதி, ஸம்மாவிமுத்தி [ஸம்மாவிமுத்தீ (ஸீ. க.)] ஹோதி, நோ ச கோ² அட்ட² விமோக்கே² காயேன பு²ஸித்வா விஹரதி. ஏவம் கோ², பி⁴க்க²வே, புக்³க³லோ ஸமணபுண்ட³ரீகோ ஹோதி.

‘‘கத²ஞ்ச, பி⁴க்க²வே, புக்³க³லோ ஸமணபது³மோ ஹோதி? இத⁴, பி⁴க்க²வே, பி⁴க்கு² ஸம்மாதி³ட்டி²கோ ஹோதி…பே… ஸம்மாவிமுத்தி ஹோதி, அட்ட² ச விமோக்கே² காயேன பு²ஸித்வா விஹரதி. ஏவம் கோ², பி⁴க்க²வே, புக்³க³லோ ஸமணபது³மோ ஹோதி.

‘‘கத²ஞ்ச, பி⁴க்க²வே, புக்³க³லோ ஸமணேஸு ஸமணஸுகு²மாலோ ஹோதி? இத⁴, பி⁴க்க²வே, பி⁴க்கு² யாசிதோவ ப³ஹுலம் சீவரம் பரிபு⁴ஞ்ஜதி, அப்பம் அயாசிதோ…பே… யஞ்ஹி தம், பி⁴க்க²வே, ஸம்மா வத³மானோ வதே³ய்ய ஸமணேஸு ஸமணஸுகு²மாலோதி, மமேவ தம், பி⁴க்க²வே, ஸம்மா வத³மானோ வதே³ய்ய ஸமணேஸு ஸமணஸுகு²மாலோதி. இமே கோ², பி⁴க்க²வே, சத்தாரோ புக்³க³லா ஸந்தோ ஸம்விஜ்ஜமானா லோகஸ்மி’’ந்தி. நவமம்.

10. க²ந்த⁴ஸுத்தம்

90. ‘‘சத்தாரோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? ஸமணமசலோ, ஸமணபுண்ட³ரீகோ, ஸமணபது³மோ, ஸமணேஸு ஸமணஸுகு²மாலோ.

‘‘கத²ஞ்ச, பி⁴க்க²வே, புக்³க³லோ ஸமணமசலோ ஹோதி? இத⁴, பி⁴க்க²வே, பி⁴க்கு² ஸேகோ² ஹோதி அப்பத்தமானஸோ, அனுத்தரம் யோக³க்கே²மம் பத்த²யமானோ விஹரதி. ஏவம் கோ², பி⁴க்க²வே, புக்³க³லோ ஸமணமசலோ ஹோதி.

‘‘கத²ஞ்ச, பி⁴க்க²வே, புக்³க³லோ ஸமணபுண்ட³ரீகோ ஹோதி? இத⁴, பி⁴க்க²வே, பி⁴க்கு² பஞ்சஸு உபாதா³னக்க²ந்தே⁴ஸு உத³யப்³ப³யானுபஸ்ஸீ விஹரதி – ‘இதி ரூபம், இதி ரூபஸ்ஸ ஸமுத³யோ, இதி ரூபஸ்ஸ அத்த²ங்க³மோ; இதி வேத³னா…பே… இதி ஸஞ்ஞா…பே… இதி ஸங்கா²ரா…பே… இதி விஞ்ஞாணம், இதி விஞ்ஞாணஸ்ஸ ஸமுத³யோ, இதி விஞ்ஞாணஸ்ஸ அத்த²ங்க³மோ’தி; நோ ச கோ² அட்ட² விமோக்கே² காயேன பு²ஸித்வா விஹரதி. ஏவம் கோ², பி⁴க்க²வே, புக்³க³லோ ஸமணபுண்ட³ரீகோ ஹோதி.

‘‘கத²ஞ்ச, பி⁴க்க²வே, புக்³க³லோ ஸமணபது³மோ ஹோதி? இத⁴, பி⁴க்க²வே, பி⁴க்கு² பஞ்சஸு உபாதா³னக்க²ந்தே⁴ஸு உத³யப்³ப³யானுபஸ்ஸீ விஹரதி – ‘இதி ரூபம், இதி ரூபஸ்ஸ ஸமுத³யோ, இதி ரூபஸ்ஸ அத்த²ங்க³மோ; இதி வேத³னா…பே… இதி ஸஞ்ஞா…பே… இதி ஸங்கா²ரா…பே… இதி விஞ்ஞாணம், இதி விஞ்ஞாணஸ்ஸ ஸமுத³யோ, இதி விஞ்ஞாணஸ்ஸ அத்த²ங்க³மோ’தி; அட்ட² ச விமோக்கே² காயேன பு²ஸித்வா விஹரதி. ஏவம் கோ², பி⁴க்க²வே, புக்³க³லோ ஸமணபது³மோ ஹோதி.

‘‘கத²ஞ்ச, பி⁴க்க²வே, புக்³க³லோ ஸமணேஸு ஸமணஸுகு²மாலோ ஹோதி? இத⁴, பி⁴க்க²வே, பி⁴க்கு² யாசிதோவ ப³ஹுலம் சீவரம் பரிபு⁴ஞ்ஜதி, அப்பம் அயாசிதோ…பே… மமேவ தம், பி⁴க்க²வே, ஸம்மா வத³மானோ வதே³ய்ய ஸமணேஸு ஸமணஸுகு²மாலோதி. இமே கோ², பி⁴க்க²வே, சத்தாரோ புக்³க³லா ஸந்தோ ஸம்விஜ்ஜமானா லோகஸ்மி’’ந்தி. த³ஸமம்.

மசலவக்³கோ³ சதுத்தோ².