10. உபக்கிலேஸஸுத்தம்

50. ‘‘சத்தாரோமே, பி⁴க்க²வே [சூளவ. 447], சந்தி³மஸூரியானம் உபக்கிலேஸா, யேஹி உபக்கிலேஸேஹி உபக்கிலிட்டா² சந்தி³மஸூரியா ந தபந்தி ந பா⁴ஸந்தி ந விரோசந்தி. கதமே சத்தாரோ? அப்³பா⁴, பி⁴க்க²வே, சந்தி³மஸூரியானம் உபக்கிலேஸா, யேன உபக்கிலேஸேன உபக்கிலிட்டா² சந்தி³மஸூரியா ந தபந்தி ந பா⁴ஸந்தி ந விரோசந்தி.

‘‘மஹிகா, பி⁴க்க²வே, சந்தி³மஸூரியானம் உபக்கிலேஸா, யேன உபக்கிலேஸேன உபக்கிலிட்டா² சந்தி³மஸூரியா ந தபந்தி ந பா⁴ஸந்தி ந விரோசந்தி.

‘‘தூ⁴மோ ரஜோ, பி⁴க்க²வே, சந்தி³மஸூரியானம் உபக்கிலேஸோ, யேன உபக்கிலேஸேன உபக்கிலிட்டா² சந்தி³மஸூரியா ந தபந்தி ந பா⁴ஸந்தி ந விரோசந்தி.

‘‘ராஹு, பி⁴க்க²வே, அஸுரிந்தோ³ சந்தி³மஸூரியானம் உபக்கிலேஸோ, யேன உபக்கிலேஸேன உபக்கிலிட்டா² சந்தி³மஸூரியா ந தபந்தி ந பா⁴ஸந்தி ந விரோசந்தி. இமே கோ², பி⁴க்க²வே, சத்தாரோ சந்தி³மஸூரியானம் உபக்கிலேஸா, யேஹி உபக்கிலேஸேஹி உபக்கிலிட்டா² சந்தி³மஸூரியா ந தபந்தி ந பா⁴ஸந்தி ந விரோசந்தி.

‘‘ஏவமேவம் கோ², பி⁴க்க²வே, சத்தாரோமே ஸமணப்³ராஹ்மணானம் உபக்கிலேஸா, யேஹி உபக்கிலேஸேஹி உபக்கிலிட்டா² ஏகே ஸமணப்³ராஹ்மணா ந தபந்தி ந பா⁴ஸந்தி ந விரோசந்தி. கதமே சத்தாரோ? ஸந்தி, பி⁴க்க²வே, ஏகே ஸமணப்³ராஹ்மணா ஸுரம் பிவந்தி மேரயம், ஸுராமேரயபானா அப்படிவிரதா. அயம், பி⁴க்க²வே, பட²மோ ஸமணப்³ராஹ்மணானம் உபக்கிலேஸோ, யேன உபக்கிலேஸேன உபக்கிலிட்டா² ஏகே ஸமணப்³ராஹ்மணா ந தபந்தி ந பா⁴ஸந்தி ந விரோசந்தி.

‘‘ஸந்தி, பி⁴க்க²வே, ஏகே ஸமணப்³ராஹ்மணா மேது²னம் த⁴ம்மம் படிஸேவந்தி, மேது²னஸ்மா த⁴ம்மா அப்படிவிரதா. அயம், பி⁴க்க²வே, து³தியோ ஸமணப்³ராஹ்மணானம் உபக்கிலேஸோ, யேன உபக்கிலேஸேன உபக்கிலிட்டா² ஏகே ஸமணப்³ராஹ்மணா ந தபந்தி ந பா⁴ஸந்தி ந விரோசந்தி.

‘‘ஸந்தி, பி⁴க்க²வே, ஏகே ஸமணப்³ராஹ்மணா ஜாதரூபரஜதம் ஸாதி³யந்தி, ஜாதரூபரஜதபடிக்³க³ஹணா அப்படிவிரதா. அயம், பி⁴க்க²வே, ததியோ ஸமணப்³ராஹ்மணானம் உபக்கிலேஸோ, யேன உபக்கிலேஸேன உபக்கிலிட்டா² ஏகே ஸமணப்³ராஹ்மணா ந தபந்தி ந பா⁴ஸந்தி ந விரோசந்தி.

‘‘ஸந்தி, பி⁴க்க²வே, ஏகே ஸமணப்³ராஹ்மணா மிச்சா²ஜீவேன ஜீவந்தி, மிச்சா²ஜீவா அப்படிவிரதா. அயம், பி⁴க்க²வே, சதுத்தோ² ஸமணப்³ராஹ்மணானம் உபக்கிலேஸோ, யேன உபக்கிலேஸேன உபக்கிலிட்டா² ஏகே ஸமணப்³ராஹ்மணா ந தபந்தி ந பா⁴ஸந்தி ந விரோசந்தி. இமே கோ², பி⁴க்க²வே, சத்தாரோ ஸமணப்³ராஹ்மணானம் உபக்கிலேஸா, யேஹி உபக்கிலேஸேஹி உபக்கிலிட்டா² ஏகே ஸமணப்³ராஹ்மணா ந தபந்தி ந பா⁴ஸந்தி ந விரோசந்தீ’’தி.

‘‘ராக³தோ³ஸபரிக்கிட்டா², ஏகே ஸமணப்³ராஹ்மணா;

அவிஜ்ஜானிவுதா போஸா, பியரூபாபி⁴னந்தி³னோ.

‘‘ஸுரம் பிவந்தி மேரயம், படிஸேவந்தி மேது²னம்;

ரஜதம் ஜாதரூபஞ்ச, ஸாதி³யந்தி அவித்³த³ஸூ;

மிச்சா²ஜீவேன ஜீவந்தி, ஏகே ஸமணப்³ராஹ்மணா.

‘‘ஏதே உபக்கிலேஸா வுத்தா, பு³த்³தே⁴னாதி³ச்சப³ந்து⁴னா;

யேஹி உபக்கிலேஸேஹி [உபக்கிலிட்டா² (ஸீ. பீ.)], ஏகே ஸமணப்³ராஹ்மணா;

ந தபந்தி ந பா⁴ஸந்தி, அஸுத்³தா⁴ ஸரஜா மகா³.

‘‘அந்த⁴காரேன ஓனத்³தா⁴, தண்ஹாதா³ஸா ஸனேத்திகா;

வட்³டே⁴ந்தி கடஸிம் கோ⁴ரம், ஆதி³யந்தி புனப்³ப⁴வ’’ந்தி. த³ஸமம்;

ரோஹிதஸ்ஸவக்³கோ³ பஞ்சமோ.