8. அரியவம்ஸஸுத்தம்

28. ‘‘சத்தாரோமே, பி⁴க்க²வே, அரியவம்ஸா அக்³க³ஞ்ஞா ரத்தஞ்ஞா வம்ஸஞ்ஞா போராணா அஸம்கிண்ணா அஸம்கிண்ணபுப்³பா³, ந ஸம்கீயந்தி ந ஸம்கீயிஸ்ஸந்தி, அப்படிகுட்டா² ஸமணேஹி ப்³ராஹ்மணேஹி விஞ்ஞூஹி. கதமே சத்தாரோ? இத⁴, பி⁴க்க²வே, பி⁴க்கு² ஸந்துட்டோ² ஹோதி இதரீதரேன சீவரேன, இதரீதரசீவரஸந்துட்டி²யா ச வண்ணவாதீ³, ந ச சீவரஹேது அனேஸனம் அப்பதிரூபம் ஆபஜ்ஜதி, அலத்³தா⁴ ச சீவரம் ந பரிதஸ்ஸதி, லத்³தா⁴ ச சீவரம் அக³தி⁴தோ [அக³தி²தோ (ஸீ. பீ.)] அமுச்சி²தோ அனஜ்ஜோ²ஸன்னோ ஆதீ³னவத³ஸ்ஸாவீ நிஸ்ஸரணபஞ்ஞோ பரிபு⁴ஞ்ஜதி; தாய ச பன இதரீதரசீவரஸந்துட்டி²யா நேவத்தானுக்கம்ஸேதி, நோ [ந (தீ³. நி. 3.309)] பரம் வம்பே⁴தி. யோ ஹி தத்த² த³க்கோ² அனலஸோ ஸம்பஜானோ பதிஸ்ஸதோ, அயம் வுச்சதி, பி⁴க்க²வே, பி⁴க்கு² போராணே அக்³க³ஞ்ஞே அரியவம்ஸே டி²தோ.

‘‘புன சபரம், பி⁴க்க²வே, பி⁴க்கு² ஸந்துட்டோ² ஹோதி இதரீதரேன பிண்ட³பாதேன, இதரீதரபிண்ட³பாதஸந்துட்டி²யா ச வண்ணவாதீ³, ந ச பிண்ட³பாதஹேது அனேஸனம் அப்பதிரூபம் ஆபஜ்ஜதி, அலத்³தா⁴ ச பிண்ட³பாதம் ந பரிதஸ்ஸதி, லத்³தா⁴ ச பிண்ட³பாதம் அக³தி⁴தோ அமுச்சி²தோ அனஜ்ஜோ²ஸன்னோ ஆதீ³னவத³ஸ்ஸாவீ நிஸ்ஸரணபஞ்ஞோ பரிபு⁴ஞ்ஜதி; தாய ச பன இதரீதரபிண்ட³பாதஸந்துட்டி²யா நேவத்தானுக்கம்ஸேதி, நோ பரம் வம்பே⁴தி. யோ ஹி தத்த² த³க்கோ² அனலஸோ ஸம்பஜானோ பதிஸ்ஸதோ, அயம் வுச்சதி, பி⁴க்க²வே, பி⁴க்கு² போராணே அக்³க³ஞ்ஞே அரியவம்ஸே டி²தோ.

‘‘புன சபரம், பி⁴க்க²வே, பி⁴க்கு² ஸந்துட்டோ² ஹோதி இதரீதரேன ஸேனாஸனேன, இதரீதரஸேனாஸனஸந்துட்டி²யா ச வண்ணவாதீ³, ந ச ஸேனாஸனஹேது அனேஸனம் அப்பதிரூபம் ஆபஜ்ஜதி, அலத்³தா⁴ ச ஸேனாஸனம் ந பரிதஸ்ஸதி, லத்³தா⁴ ச ஸேனாஸனம் அக³தி⁴தோ அமுச்சி²தோ அனஜ்ஜோ²ஸன்னோ ஆதீ³னவத³ஸ்ஸாவீ நிஸ்ஸரணபஞ்ஞோ பரிபு⁴ஞ்ஜதி; தாய ச பன இதரீதரஸேனாஸனஸந்துட்டி²யா நேவத்தானுக்கம்ஸேதி, நோ பரம் வம்பே⁴தி. யோ ஹி தத்த² த³க்கோ² அனலஸோ ஸம்பஜானோ பதிஸ்ஸதோ, அயம் வுச்சதி, பி⁴க்க²வே, பி⁴க்கு² போராணே அக்³க³ஞ்ஞே அரியவம்ஸே டி²தோ.

‘‘புன சபரம், பி⁴க்க²வே, பி⁴க்கு² பா⁴வனாராமோ ஹோதி பா⁴வனாரதோ, பஹானாராமோ ஹோதி பஹானரதோ; தாய ச பன பா⁴வனாராமதாய பா⁴வனாரதியா பஹானாராமதாய பஹானரதியா நேவத்தானுக்கம்ஸேதி, நோ பரம் வம்பே⁴தி. யோ ஹி தத்த² த³க்கோ² அனலஸோ ஸம்பஜானோ பதிஸ்ஸதோ, அயம் வுச்சதி, பி⁴க்க²வே, பி⁴க்கு² போராணே அக்³க³ஞ்ஞே அரியவம்ஸே டி²தோ. இமே கோ², பி⁴க்க²வே, சத்தாரோ அரியவம்ஸா அக்³க³ஞ்ஞா ரத்தஞ்ஞா வம்ஸஞ்ஞா போராணா அஸம்கிண்ணா அஸம்கிண்ணபுப்³பா³, ந ஸம்கீயந்தி ந ஸம்கீயிஸ்ஸந்தி, அப்படிகுட்டா² ஸமணேஹி ப்³ராஹ்மணேஹி விஞ்ஞூஹி.

‘‘இமேஹி ச பன, பி⁴க்க²வே, சதூஹி அரியவம்ஸேஹி ஸமன்னாக³தோ பி⁴க்கு² புரத்தி²மாய சேபி தி³ஸாய விஹரதி ஸ்வேவ அரதிம் ஸஹதி, ந தம் அரதி ஸஹதி; பச்சி²மாய சேபி தி³ஸாய விஹரதி ஸ்வேவ அரதிம் ஸஹதி, ந தம் அரதி ஸஹதி; உத்தராய சேபி தி³ஸாய விஹரதி ஸ்வேவ அரதிம் ஸஹதி, ந தம் அரதி ஸஹதி; த³க்கி²ணாய சேபி தி³ஸாய விஹரதி ஸ்வேவ அரதிம் ஸஹதி, ந தம் அரதி ஸஹதி. தம் கிஸ்ஸ ஹேது? அரதிரதிஸஹோ ஹி, பி⁴க்க²வே, தீ⁴ரோ’’தி.

‘‘நாரதி ஸஹதி தீ⁴ரம் [வீரம் (ஸீ.)], நாரதி தீ⁴ரம் ஸஹதி;

தீ⁴ரோவ அரதிம் ஸஹதி, தீ⁴ரோ ஹி அரதிஸ்ஸஹோ.

‘‘ஸப்³ப³கம்மவிஹாயீனம், பனுண்ணம் [பணுன்னம் (?)] கோ நிவாரயே;

நேக்க²ம் ஜம்போ³னத³ஸ்ஸேவ, கோ தம் நிந்தி³துமரஹதி;

தே³வாபி நம் பஸம்ஸந்தி, ப்³ரஹ்முனாபி பஸம்ஸிதோ’’தி. அட்ட²மம்;