9. த⁴ம்மபத³ஸுத்தம்

29. ‘‘சத்தாரிமானி, பி⁴க்க²வே, த⁴ம்மபதா³னி அக்³க³ஞ்ஞானி ரத்தஞ்ஞானி வம்ஸஞ்ஞானி போராணானி அஸம்கிண்ணானி அஸம்கிண்ணபுப்³பா³னி, ந ஸம்கீயந்தி ந ஸம்கீயிஸ்ஸந்தி, அப்படிகுட்டா²னி ஸமணேஹி ப்³ராஹ்மணேஹி விஞ்ஞூஹி. கதமானி சத்தாரி? அனபி⁴ஜ்ஜா², பி⁴க்க²வே, த⁴ம்மபத³ம் அக்³க³ஞ்ஞம் ரத்தஞ்ஞம் வம்ஸஞ்ஞம் போராணம் அஸம்கிண்ணம் அஸம்கிண்ணபுப்³ப³ம், ந ஸம்கீயதி ந ஸம்கீயிஸ்ஸதி, அப்படிகுட்ட²ம் ஸமணேஹி ப்³ராஹ்மணேஹி விஞ்ஞூஹி.

‘‘அப்³யாபாதோ³, பி⁴க்க²வே, த⁴ம்மபத³ம் அக்³க³ஞ்ஞம் ரத்தஞ்ஞம் வம்ஸஞ்ஞம் போராணம் அஸம்கிண்ணம் அஸம்கிண்ணபுப்³ப³ம், ந ஸம்கீயதி ந ஸம்கீயிஸ்ஸதி, அப்படிகுட்ட²ம் ஸமணேஹி ப்³ராஹ்மணேஹி விஞ்ஞூஹி.

‘‘ஸம்மாஸதி, பி⁴க்க²வே, த⁴ம்மபத³ம் அக்³க³ஞ்ஞம் ரத்தஞ்ஞம் வம்ஸஞ்ஞம் போராணம் அஸம்கிண்ணம் அஸம்கிண்ணபுப்³ப³ம், ந ஸம்கீயதி ந ஸம்கீயிஸ்ஸதி, அப்படிகுட்ட²ம் ஸமணேஹி ப்³ராஹ்மணேஹி விஞ்ஞூஹி.

‘‘ஸம்மாஸமாதி⁴, பி⁴க்க²வே, த⁴ம்மபத³ம் அக்³க³ஞ்ஞம் ரத்தஞ்ஞம் வம்ஸஞ்ஞம் போராணம் அஸம்கிண்ணம் அஸம்கிண்ணபுப்³ப³ம், ந ஸம்கீயதி ந ஸம்கீயிஸ்ஸதி, அப்படிகுட்ட²ம் ஸமணேஹி ப்³ராஹ்மணேஹி விஞ்ஞூஹி. இமானி கோ², பி⁴க்க²வே, சத்தாரி த⁴ம்மபதா³னி அக்³க³ஞ்ஞானி ரத்தஞ்ஞானி வம்ஸஞ்ஞானி போராணானி அஸம்கிண்ணானி அஸம்கிண்ணபுப்³பா³னி, ந ஸம்கீயந்தி ந ஸம்கீயிஸ்ஸந்தி, அப்படிகுட்டா²னி ஸமணேஹி ப்³ராஹ்மணேஹி விஞ்ஞூஹீ’’தி.

‘‘அனபி⁴ஜ்ஜா²லு விஹரேய்ய, அப்³யாபன்னேன சேதஸா;

ஸதோ ஏகக்³க³சித்தஸ்ஸ [ஏகக்³க³சித்தாயம் (க.)], அஜ்ஜ²த்தம் ஸுஸமாஹிதோ’’தி. நவமம்;