(16) 6. அசேலகவக்³கோ³

157-163. ‘‘திஸ்ஸோ இமா, பி⁴க்க²வே, படிபதா³. கதமா திஸ்ஸோ? ஆகா³ள்ஹா படிபதா³, நிஜ்ஜா²மா படிபதா³, மஜ்ஜி²மா படிபதா³. கதமா ச, பி⁴க்க²வே, ஆகா³ள்ஹா படிபதா³? இத⁴, பி⁴க்க²வே, ஏகச்சோ ஏவம்வாதீ³ ஹோதி ஏவம்தி³ட்டி² – ‘நத்தி² காமேஸு தோ³ஸோ’தி. ஸோ காமேஸு பாதப்³யதம் ஆபஜ்ஜதி. அயம் வுச்சதி, பி⁴க்க²வே, ஆகா³ள்ஹா படிபதா³.

‘‘கதமா ச, பி⁴க்க²வே, நிஜ்ஜா²மா படிபதா³? இத⁴, பி⁴க்க²வே, ஏகச்சோ அசேலகோ ஹோதி முத்தாசாரோ, ஹத்தா²பலேக²னோ [ஹத்தா²வலேக²னோ (ஸ்யா. கம்.) தீ³. நி. 1.394; ம. நி. 1.155 பஸ்ஸிதப்³ப³ம்], ந ஏஹிப⁴த³ந்திகோ, ந திட்ட²ப⁴த³ந்திகோ, நாபி⁴ஹடம் ந உத்³தி³ஸ்ஸகதம் ந நிமந்தனம் ஸாதி³யதி. ஸோ ந கும்பி⁴முகா² படிக்³க³ண்ஹாதி, ந களோபிமுகா² [க²ளோபிமுகா² (ஸீ. ஸ்யா. கம்.)] படிக்³க³ண்ஹாதி ந ஏளகமந்தரம் ந த³ண்ட³மந்தரம் ந முஸலமந்தரம் ந த்³வின்னம் பு⁴ஞ்ஜமானானம் ந க³ப்³பி⁴னியா ந பாயமானாய ந புரிஸந்தரக³தாய ந ஸங்கித்தீஸு ந யத்த² ஸா உபட்டி²தோ ஹோதி ந யத்த² மக்கி²கா ஸண்ட³ஸண்ட³சாரினீ ந மச்ச²ம் ந மம்ஸம் ந ஸுரம் ந மேரயம், ந து²ஸோத³கம் பிவதி. ஸோ ஏகாகா³ரிகோ வா ஹோதி ஏகாலோபிகோ, த்³வாகா³ரிகோ வா ஹோதி த்³வாலோபிகோ… ஸத்தாகா³ரிகோ வா ஹோதி ஸத்தாலோபிகோ; ஏகிஸ்ஸாபி த³த்தியா யாபேதி, த்³வீஹிபி த³த்தீஹி யாபேதி… ஸத்தஹிபி த³த்தீஹி யாபேதி; ஏகாஹிகம்பி ஆஹாரம் ஆஹாரேதி, த்³வாஹிகம்பி ஆஹாரம் ஆஹாரேதி… ஸத்தாஹிகம்பி ஆஹாரம் ஆஹாரேதி – இதி ஏவரூபம் அத்³த⁴மாஸிகம்பி பரியாயப⁴த்தபோ⁴ஜனானுயோக³மனுயுத்தோ விஹரதி.

ஸோ ஸாகப⁴க்கோ²பி ஹோதி, ஸாமாகப⁴க்கோ²பி ஹோதி, நீவாரப⁴க்கோ²பி ஹோதி, த³த்³து³லப⁴க்கோ²பி ஹோதி, ஹடப⁴க்கோ²பி ஹோதி, கண்ஹப⁴க்கோ²பி ஹோதி, ஆசாமப⁴க்கோ²பி ஹோதி, பிஞ்ஞாகப⁴க்கோ²பி ஹோதி, திணப⁴க்கோ²பி ஹோதி, கோ³மயப⁴க்கோ²பி ஹோதி, வனமூலப²லாஹாரோ யாபேதி பவத்தப²லபோ⁴ஜீ.

ஸோ ஸாணானிபி தா⁴ரேதி, மஸாணானிபி தா⁴ரேதி, ச²வது³ஸ்ஸானிபி தா⁴ரேதி, பம்ஸுகூலானிபி தா⁴ரேதி, திரீடானிபி தா⁴ரேதி, அஜினம்பி தா⁴ரேதி, அஜினக்கி²பம்பி தா⁴ரேதி, குஸசீரம்பி தா⁴ரேதி, வாகசீரம்பி தா⁴ரேதி, ப²லகசீரம்பி தா⁴ரேதி, கேஸகம்ப³லம்பி தா⁴ரேதி, வாளகம்ப³லம்பி தா⁴ரேதி, உலூகபக்கி²கம்பி தா⁴ரேதி, கேஸமஸ்ஸுலோசகோபி ஹோதி கேஸமஸ்ஸுலோசனானுயோக³மனுயுத்தோ, உப்³ப⁴ட்ட²கோபி ஹோதி ஆஸனபடிக்கி²த்தோ, உக்குடிகோபி ஹோதி உக்குடிகப்பதா⁴னமனுயுத்தோ, கண்டகாபஸ்ஸயிகோபி ஹோதி கண்டகாபஸ்ஸயே ஸேய்யம் கப்பேதி, ஸாயததியகம்பி உத³கோரோஹனானுயோக³மனுயுத்தோ விஹரதி – இதி ஏவரூபம் அனேகவிஹிதம் காயஸ்ஸ ஆதாபனபரிதாபனானுயோக³மனுயுத்தோ விஹரதி. அயம் வுச்சதி, பி⁴க்க²வே, நிஜ்ஜா²மா படிபதா³.

‘‘கதமா ச, பி⁴க்க²வே, மஜ்ஜி²மா படிபதா³? இத⁴, பி⁴க்க²வே, பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா வினேய்ய லோகே அபி⁴ஜ்ஜா²தோ³மனஸ்ஸம்; வேத³னாஸு…பே… சித்தே…பே… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா வினேய்ய லோகே அபி⁴ஜ்ஜா²தோ³மனஸ்ஸம். அயம் வுச்சதி, பி⁴க்க²வே, மஜ்ஜி²மா படிபதா³. இமா கோ², பி⁴க்க²வே, திஸ்ஸோ படிபதா³’’தி.

‘‘திஸ்ஸோ இமா, பி⁴க்க²வே, படிபதா³. கதமா திஸ்ஸோ? ஆகா³ள்ஹா படிபதா³, நிஜ்ஜா²மா படிபதா³, மஜ்ஜி²மா படிபதா³. கதமா ச, பி⁴க்க²வே, ஆகா³ள்ஹா படிபதா³…பே… அயம் வுச்சதி, பி⁴க்க²வே, ஆகா³ள்ஹா படிபதா³.

‘‘கதமா ச, பி⁴க்க²வே, நிஜ்ஜா²மா படிபதா³…பே… அயம் வுச்சதி, பி⁴க்க²வே, நிஜ்ஜா²மா படிபதா³.

‘‘கதமா ச, பி⁴க்க²வே, மஜ்ஜி²மா படிபதா³? இத⁴, பி⁴க்க²வே, பி⁴க்கு² அனுப்பன்னானம் பாபகானம் அகுஸலானம் த⁴ம்மானம் அனுப்பாதா³ய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி; உப்பன்னானம் பாபகானம் அகுஸலானம் த⁴ம்மானம் பஹானாய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி; அனுப்பன்னானம் குஸலானம் த⁴ம்மானம் உப்பாதா³ய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி; உப்பன்னானம் குஸலானம் த⁴ம்மானம் டி²தியா அஸம்மோஸாய பி⁴ய்யோபா⁴வாய வேபுல்லாய பா⁴வனாய பாரிபூரியா ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி….

‘‘ச²ந்த³ஸமாதி⁴பதா⁴னஸங்கா²ரஸமன்னாக³தம் இத்³தி⁴பாத³ம் பா⁴வேதி வீரியஸமாதி⁴…பே… சித்தஸமாதி⁴…பே… வீமம்ஸாஸமாதி⁴பதா⁴னஸங்கா²ரஸமன்னாக³தம் இத்³தி⁴பாத³ம் பா⁴வேதி…பே….

‘‘ஸத்³தி⁴ந்த்³ரியம் பா⁴வேதி… வீரியிந்த்³ரியம் பா⁴வேதி… ஸதிந்த்³ரியம் பா⁴வேதி… ஸமாதி⁴ந்த்³ரியம் பா⁴வேதி… பஞ்ஞிந்த்³ரியம் பா⁴வேதி….

‘‘ஸத்³தா⁴ப³லம் பா⁴வேதி… வீரியப³லம் பா⁴வேதி… ஸதிப³லம் பா⁴வேதி… ஸமாதி⁴ப³லம் பா⁴வேதி… பஞ்ஞாப³லம் பா⁴வேதி….

‘‘ஸதிஸம்போ³ஜ்ஜ²ங்க³ம் பா⁴வேதி… த⁴ம்மவிசயஸம்போ³ஜ்ஜ²ங்க³ம் பா⁴வேதி… வீரியஸம்போ³ஜ்ஜ²ங்க³ம் பா⁴வேதி… பீதிஸம்போ³ஜ்ஜ²ங்க³ம் பா⁴வேதி… பஸ்ஸத்³தி⁴ஸம்போ³ஜ்ஜ²ங்க³ம் பா⁴வேதி… ஸமாதி⁴ஸம்போ³ஜ்ஜ²ங்க³ம் பா⁴வேதி… உபேக்கா²ஸம்போ³ஜ்ஜ²ங்க³ம் பா⁴வேதி….

‘‘ஸம்மாதி³ட்டி²ம் பா⁴வேதி… ஸம்மாஸங்கப்பம் பா⁴வேதி… ஸம்மாவாசம் பா⁴வேதி… ஸம்மாகம்மந்தம் பா⁴வேதி … ஸம்மாஆஜீவம் பா⁴வேதி… ஸம்மாவாயாமம் பா⁴வேதி… ஸம்மாஸதிம் பா⁴வேதி… ஸம்மாஸமாதி⁴ம் பா⁴வேதி…. அயம் வுச்சதி, பி⁴க்க²வே, மஜ்ஜி²மா படிபதா³. இமா கோ², பி⁴க்க²வே, திஸ்ஸோ படிபதா³’’தி.

அசேலகவக்³கோ³ ச²ட்டோ².