5. கேஸகம்ப³லஸுத்தம்

138. ‘‘ஸேய்யதா²பி, பி⁴க்க²வே, யானி கானிசி தந்தாவுதானம் வத்தா²னம், கேஸகம்ப³லோ தேஸம் படிகிட்டோ² அக்கா²யதி. கேஸகம்ப³லோ, பி⁴க்க²வே, ஸீதே ஸீதோ, உண்ஹே உண்ஹோ, து³ப்³ப³ண்ணோ, து³க்³க³ந்தோ⁴, து³க்க²ஸம்ப²ஸ்ஸோ. ஏவமேவம் கோ², பி⁴க்க²வே, யானி கானிசி புது²ஸமணப்³ராஹ்மணவாதா³னம் [ஸமணப்பவாதா³னம் (ஸீ. ஸ்யா. கம். பீ.)] மக்க²லிவாதோ³ தேஸம் படிகிட்டோ² அக்கா²யதி.

‘‘மக்க²லி, பி⁴க்க²வே, மோக⁴புரிஸோ ஏவம்வாதீ³ ஏவம்தி³ட்டி² – ‘நத்தி² கம்மம், நத்தி² கிரியம், நத்தி² வீரிய’ந்தி. யேபி தே, பி⁴க்க²வே, அஹேஸும் அதீதமத்³தா⁴னம் அரஹந்தோ ஸம்மாஸம்பு³த்³தா⁴, தேபி ப⁴க³வந்தோ கம்மவாதா³ சேவ அஹேஸும் கிரியவாதா³ ச வீரியவாதா³ ச. தேபி, பி⁴க்க²வே, மக்க²லி மோக⁴புரிஸோ படிபா³ஹதி – ‘நத்தி² கம்மம், நத்தி² கிரியம், நத்தி² வீரிய’ந்தி. யேபி தே, பி⁴க்க²வே, ப⁴விஸ்ஸந்தி அனாக³தமத்³தா⁴னம் அரஹந்தோ ஸம்மாஸம்பு³த்³தா⁴, தேபி ப⁴க³வந்தோ கம்மவாதா³ சேவ ப⁴விஸ்ஸந்தி கிரியவாதா³ ச வீரியவாதா³ ச. தேபி, பி⁴க்க²வே, மக்க²லி மோக⁴புரிஸோ படிபா³ஹதி – ‘நத்தி² கம்மம், நத்தி² கிரியம், நத்தி² வீரிய’ந்தி. அஹம்பி, பி⁴க்க²வே, ஏதரஹி அரஹம் ஸம்மாஸம்பு³த்³தோ⁴ கம்மவாதோ³ சேவ கிரியவாதோ³ ச வீரியவாதோ³ ச. மம்பி, பி⁴க்க²வே, மக்க²லி மோக⁴புரிஸோ படிபா³ஹதி – ‘நத்தி² கம்மம், நத்தி² கிரியம், நத்தி² வீரிய’’’ந்தி.

‘‘ஸேய்யதா²பி, பி⁴க்க²வே, நதீ³முகே² கி²ப்பம் உட்³டே³ய்ய [ஓட்³டே³ய்ய (ஸீ.)] ப³ஹூனம் [ப³ஹுன்னம் (ஸீ. ஸ்யா. கம். பீ.)] மச்சா²னம் அஹிதாய து³க்கா²ய அனயாய ப்³யஸனாய; ஏவமேவம் கோ², பி⁴க்க²வே, மக்க²லி மோக⁴புரிஸோ மனுஸ்ஸகி²ப்பம் மஞ்ஞே லோகே உப்பன்னோ ப³ஹூனம் ஸத்தானம் அஹிதாய து³க்கா²ய அனயாய ப்³யஸனாயா’’தி. பஞ்சமம்.