7. து³தியப⁴வஸுத்தம்

78. அத² கோ² ஆயஸ்மா ஆனந்தோ³ யேன ப⁴க³வா தேனுபஸங்கமி…பே… ஆயஸ்மா ஆனந்தோ³ ப⁴க³வந்தம் ஏதத³வோச – ‘‘ப⁴வோ, ப⁴வோதி, ப⁴ந்தே, வுச்சதி. கித்தாவதா நு கோ², ப⁴ந்தே, ப⁴வோ ஹோதீ’’தி?

‘‘காமதா⁴துவேபக்கஞ்ச, ஆனந்த³, கம்மம் நாப⁴விஸ்ஸ, அபி நு கோ² காமப⁴வோ பஞ்ஞாயேதா²’’தி? ‘‘நோ ஹேதம் ப⁴ந்தே’’. ‘‘இதி கோ², ஆனந்த³, கம்மம் கே²த்தம், விஞ்ஞாணம் பீ³ஜம், தண்ஹா ஸ்னேஹோ. அவிஜ்ஜானீவரணானம் ஸத்தானம் தண்ஹாஸம்யோஜனானம் ஹீனாய தா⁴துயா சேதனா பதிட்டி²தா பத்த²னா பதிட்டி²தா ஏவம் ஆயதிம் புனப்³ப⁴வாபி⁴னிப்³ப³த்தி ஹோதி’’.

‘‘ரூபதா⁴துவேபக்கஞ்ச, ஆனந்த³, கம்மம் நாப⁴விஸ்ஸ, அபி நு கோ² ரூபப⁴வோ பஞ்ஞாயேதா²’’தி? ‘‘நோ ஹேதம், ப⁴ந்தே’’. ‘‘இதி கோ², ஆனந்த³, கம்மம் கே²த்தம், விஞ்ஞாணம் பீ³ஜம், தண்ஹா ஸ்னேஹோ. அவிஜ்ஜானீவரணானம் ஸத்தானம் தண்ஹாஸம்யோஜனானம் மஜ்ஜி²மாய தா⁴துயா சேதனா பதிட்டி²தா பத்த²னா பதிட்டி²தா ஏவம் ஆயதிம் புனப்³ப⁴வாபி⁴னிப்³ப³த்தி ஹோதி’’.

‘‘அரூபதா⁴துவேபக்கஞ்ச, ஆனந்த³, கம்மம் நாப⁴விஸ்ஸ, அபி நு கோ² அரூபப⁴வோ பஞ்ஞாயேதா²’’தி? ‘‘நோ ஹேதம், ப⁴ந்தே’’. ‘‘இதி கோ², ஆனந்த³, கம்மம் கே²த்தம், விஞ்ஞாணம் பீ³ஜம், தண்ஹா ஸ்னேஹோ. அவிஜ்ஜானீவரணானம் ஸத்தானம் தண்ஹாஸம்யோஜனானம் பணீதாய தா⁴துயா சேதனா பதிட்டி²தா பத்த²னா பதிட்டி²தா ஏவம் ஆயதிம் புனப்³ப⁴வாபி⁴னிப்³ப³த்தி ஹோதி. ஏவம் கோ², ஆனந்த³, ப⁴வோ ஹோதீ’’தி. ஸத்தமம்.