5. நிவேஸகஸுத்தம்

76. அத² கோ² ஆயஸ்மா ஆனந்தோ³ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² ஆயஸ்மந்தம் ஆனந்த³ம் ப⁴க³வா ஏதத³வோச –

‘‘யே, ஆனந்த³, அனுகம்பேய்யாத² யே ச ஸோதப்³ப³ம் மஞ்ஞேய்யும் மித்தா வா அமச்சா வா ஞாதீ வா ஸாலோஹிதா வா தே வோ, ஆனந்த³, தீஸு டா²னேஸு ஸமாத³பேதப்³பா³ [ஸமாதா³பேதப்³பா³ (?)] நிவேஸேதப்³பா³ பதிட்டா²பேதப்³பா³. கதமேஸு தீஸு? பு³த்³தே⁴ அவேச்சப்பஸாதே³ ஸமாத³பேதப்³பா³ நிவேஸேதப்³பா³ பதிட்டா²பேதப்³பா³ – ‘இதிபி ஸோ ப⁴க³வா அரஹம் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி²; ஸத்தா² தே³வமனுஸ்ஸானம், பு³த்³தோ⁴ ப⁴க³வா’தி, த⁴ம்மே அவேச்சப்பஸாதே³ ஸமாத³பேதப்³பா³ நிவேஸேதப்³பா³ பதிட்டா²பேதப்³பா³ – ‘ஸ்வாக்கா²தோ ப⁴க³வதா த⁴ம்மோ ஸந்தி³ட்டி²கோ அகாலிகோ ஏஹிபஸ்ஸிகோ ஓபனேய்யிகோ பச்சத்தம் வேதி³தப்³போ³ விஞ்ஞூஹீ’தி, ஸங்கே⁴ அவேச்சப்பஸாதே³ ஸமாத³பேதப்³பா³ நிவேஸேதப்³பா³ பதிட்டா²பேதப்³பா³ – ‘ஸுப்படிபன்னோ ப⁴க³வதோ ஸாவகஸங்கோ⁴ உஜுப்படிபன்னோ ப⁴க³வதோ ஸாவகஸங்கோ⁴ ஞாயப்படிபன்னோ ப⁴க³வதோ ஸாவகஸங்கோ⁴ ஸாமீசிப்படிபன்னோ ப⁴க³வதோ ஸாவகஸங்கோ⁴, யதி³த³ம் சத்தாரி புரிஸயுகா³னி அட்ட² புரிஸபுக்³க³லா ஏஸ ப⁴க³வதோ ஸாவகஸங்கோ⁴ ஆஹுனேய்யோ பாஹுனேய்யோ த³க்கி²ணேய்யோ அஞ்ஜலிகரணீயோ அனுத்தரம் புஞ்ஞக்கே²த்தம் லோகஸ்ஸா’’’தி.

‘‘ஸியா, ஆனந்த³, சதுன்னம் மஹாபூ⁴தானம் அஞ்ஞத²த்தம் – பத²வீதா⁴துயா ஆபோதா⁴துயா தேஜோதா⁴துயா வாயோதா⁴துயா, ந த்வேவ பு³த்³தே⁴ அவேச்சப்பஸாதே³ன ஸமன்னாக³தஸ்ஸ அரியஸாவகஸ்ஸ ஸியா அஞ்ஞத²த்தம் தத்ரித³ம் அஞ்ஞத²த்தம். ஸோ வதானந்த³, பு³த்³தே⁴ அவேச்சப்பஸாதே³ன ஸமன்னாக³தோ அரியஸாவகோ நிரயம் வா திரச்சா²னயோனிம் வா பேத்திவிஸயம் வா உபபஜ்ஜிஸ்ஸதீதி நேதம் டா²னம் விஜ்ஜதி.

‘‘ஸியா, ஆனந்த³, சதுன்னம் மஹாபூ⁴தானம் அஞ்ஞத²த்தம் – பத²வீதா⁴துயா ஆபோதா⁴துயா தேஜோதா⁴துயா வாயோதா⁴துயா, ந த்வேவ த⁴ம்மே…பே… ந த்வேவ ஸங்கே⁴ அவேச்சப்பஸாதே³ன ஸமன்னாக³தஸ்ஸ அரியஸாவகஸ்ஸ ஸியா அஞ்ஞத²த்தம் தத்ரித³ம் அஞ்ஞத²த்தம். ஸோ வதானந்த³, ஸங்கே⁴ அவேச்சப்பஸாதே³ன ஸமன்னாக³தோ அரியஸாவகோ நிரயம் வா திரச்சா²னயோனிம் வா பேத்திவிஸயம் வா உபபஜ்ஜிஸ்ஸதீதி நேதம் டா²னம் விஜ்ஜதி.

‘‘யே, ஆனந்த³, அனுகம்பேய்யாத² யே ச ஸோதப்³ப³ம் மஞ்ஞேய்யும் மித்தா வா அமச்சா வா ஞாதீ வா ஸாலோஹிதா வா தே வோ, ஆனந்த³, இமேஸு தீஸு டா²னேஸு ஸமாத³பேதப்³பா³ நிவேஸேதப்³பா³ பதிட்டா²பேதப்³பா³’’தி. பஞ்சமம்.