1. ச²ன்னஸுத்தம்

72. ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² ச²ன்னோ பரிப்³பா³ஜகோ யேனாயஸ்மா ஆனந்தோ³ தேனுபஸங்கமி; உபஸங்கமித்வா ஆயஸ்மதா ஆனந்தே³ன ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னோ கோ² ச²ன்னோ பரிப்³பா³ஜகோ ஆயஸ்மந்தம் ஆனந்த³ம் ஏதத³வோச – ‘‘தும்ஹேபி, ஆவுஸோ ஆனந்த³, ராக³ஸ்ஸ பஹானம் பஞ்ஞாபேத², தோ³ஸஸ்ஸ பஹானம் பஞ்ஞாபேத², மோஹஸ்ஸ பஹானம் பஞ்ஞாபேதா²தி. மயம் கோ², ஆவுஸோ, ராக³ஸ்ஸ பஹானம் பஞ்ஞாபேம, தோ³ஸஸ்ஸ பஹானம் பஞ்ஞாபேம, மோஹஸ்ஸ பஹானம் பஞ்ஞபேமா’’தி.

‘‘கிம் பன தும்ஹே, ஆவுஸோ, ராகே³ ஆதீ³னவம் தி³ஸ்வா ராக³ஸ்ஸ பஹானம் பஞ்ஞாபேத², கிம் தோ³ஸே ஆதீ³னவம் தி³ஸ்வா தோ³ஸஸ்ஸ பஹானம் பஞ்ஞாபேத², கிம் மோஹே ஆதீ³னவம் தி³ஸ்வா மோஹஸ்ஸ பஹானம் பஞ்ஞாபேதா²’’தி?

‘‘ரத்தோ கோ², ஆவுஸோ, ராகே³ன அபி⁴பூ⁴தோ பரியாதி³ன்னசித்தோ அத்தப்³யாபா³தா⁴யபி சேதேதி, பரப்³யாபா³தா⁴யபி சேதேதி, உப⁴யப்³யாபா³தா⁴யபி சேதேதி, சேதஸிகம்பி து³க்க²ம் தோ³மனஸ்ஸம் படிஸம்வேதே³தி; ராகே³ பஹீனே நேவத்தப்³யாபா³தா⁴யபி சேதேதி, ந பரப்³யாபா³தா⁴யபி சேதேதி, ந உப⁴யப்³யாபா³தா⁴யபி சேதேதி, ந சேதஸிகம் து³க்க²ம் தோ³மனஸ்ஸம் படிஸம்வேதே³தி. ரத்தோ கோ², ஆவுஸோ, ராகே³ன அபி⁴பூ⁴தோ பரியாதி³ன்னசித்தோ காயேன து³ச்சரிதம் சரதி, வாசாய து³ச்சரிதம் சரதி, மனஸா து³ச்சரிதம் சரதி; ராகே³ பஹீனே நேவ காயேன து³ச்சரிதம் சரதி, ந வாசாய து³ச்சரிதம் சரதி, ந மனஸா து³ச்சரிதம் சரதி. ரத்தோ கோ², ஆவுஸோ, ராகே³ன அபி⁴பூ⁴தோ பரியாதி³ன்னசித்தோ அத்தத்த²ம்பி யதா²பூ⁴தம் நப்பஜானாதி, பரத்த²ம்பி யதா²பூ⁴தம் நப்பஜானாதி, உப⁴யத்த²ம்பி யதா²பூ⁴தம் நப்பஜானாதி; ராகே³ பஹீனே அத்தத்த²ம்பி யதா²பூ⁴தம் பஜானாதி, பரத்த²ம்பி யதா²பூ⁴தம் பஜானாதி, உப⁴யத்த²ம்பி யதா²பூ⁴தம் பஜானாதி. ராகோ³ கோ², ஆவுஸோ, அந்த⁴கரணோ அசக்கு²கரணோ அஞ்ஞாணகரணோ பஞ்ஞானிரோதி⁴கோ விகா⁴தபக்கி²கோ அனிப்³பா³னஸம்வத்தனிகோ.

‘‘து³ட்டோ² கோ², ஆவுஸோ, தோ³ஸேன…பே… மூள்ஹோ கோ², ஆவுஸோ, மோஹேன அபி⁴பூ⁴தோ பரியாதி³ன்னசித்தோ அத்தப்³யாபா³தா⁴யபி சேதேதி, பரப்³யாபா³தா⁴யபி சேதேதி, உப⁴யப்³யாபா³தா⁴யபி சேதேதி, சேதஸிகம்பி து³க்க²ம் தோ³மனஸ்ஸம் படிஸம்வேதே³தி; மோஹே பஹீனே நேவத்தப்³யாபா³தா⁴யபி சேதேதி, ந பரப்³யாபா³தா⁴யபி சேதேதி, ந உப⁴யப்³யாபா³தா⁴யபி சேதேதி, ந சேதஸிகம் து³க்க²ம் தோ³மனஸ்ஸம் படிஸம்வேதே³தி. மூள்ஹோ கோ², ஆவுஸோ, மோஹேன அபி⁴பூ⁴தோ பரியாதி³ன்னசித்தோ காயேன து³ச்சரிதம் சரதி, வாசாய து³ச்சரிதம் சரதி, மனஸா து³ச்சரிதம் சரதி; மோஹே பஹீனே நேவ காயேன து³ச்சரிதம் சரதி, ந வாசாய து³ச்சரிதம் சரதி, ந மனஸா து³ச்சரிதம் சரதி. மூள்ஹோ கோ², ஆவுஸோ, மோஹேன அபி⁴பூ⁴தோ பரியாதி³ன்னசித்தோ அத்தத்த²ம்பி யதா²பூ⁴தம் நப்பஜானாதி, பரத்த²ம்பி யதா²பூ⁴தம் நப்பஜானாதி, உப⁴யத்த²ம்பி யதா²பூ⁴தம் நப்பஜானாதி; மோஹே பஹீனே அத்தத்த²ம்பி யதா²பூ⁴தம் பஜானாதி, பரத்த²ம்பி யதா²பூ⁴தம் பஜானாதி, உப⁴யத்த²ம்பி யதா²பூ⁴தம் பஜானாதி. மோஹோ கோ², ஆவுஸோ, அந்த⁴கரணோ அசக்கு²கரணோ அஞ்ஞாணகரணோ பஞ்ஞானிரோதி⁴கோ விகா⁴தபக்கி²கோ அனிப்³பா³னஸம்வத்தனிகோ. இத³ம் கோ² மயம், ஆவுஸோ, ராகே³ ஆதீ³னவம் தி³ஸ்வா ராக³ஸ்ஸ பஹானம் பஞ்ஞாபேம. இத³ம் தோ³ஸே ஆதீ³னவம் தி³ஸ்வா தோ³ஸஸ்ஸ பஹானம் பஞ்ஞாபேம. இத³ம் மோஹே ஆதீ³னவம் தி³ஸ்வா மோஹஸ்ஸ பஹானம் பஞ்ஞாபேமா’’தி.

‘‘அத்தி² பனாவுஸோ, மக்³கோ³ அத்தி² படிபதா³ ஏதஸ்ஸ ராக³ஸ்ஸ தோ³ஸஸ்ஸ மோஹஸ்ஸ பஹானாயா’’தி? ‘‘அத்தா²வுஸோ, மக்³கோ³ அத்தி² படிபதா³ ஏதஸ்ஸ ராக³ஸ்ஸ தோ³ஸஸ்ஸ மோஹஸ்ஸ பஹானாயா’’தி. ‘‘கதமோ பனாவுஸோ, மக்³கோ³ கதமா படிபதா³ ஏதஸ்ஸ ராக³ஸ்ஸ தோ³ஸஸ்ஸ மோஹஸ்ஸ பஹானாயா’’தி? ‘‘அயமேவ அரியோ அட்ட²ங்கி³கோ மக்³கோ³, ஸேய்யதி²த³ம் – ஸம்மாதி³ட்டி²…பே… ஸம்மாஸமாதி⁴. அயம் கோ², ஆவுஸோ, மக்³கோ³ அயம் படிபதா³ ஏதஸ்ஸ ராக³ஸ்ஸ தோ³ஸஸ்ஸ மோஹஸ்ஸ பஹானாயா’’தி. ‘‘ப⁴த்³த³கோ கோ², ஆவுஸோ, மக்³கோ³ ப⁴த்³தி³கா படிபதா³ ஏதஸ்ஸ ராக³ஸ்ஸ தோ³ஸஸ்ஸ மோஹஸ்ஸ பஹானாய. அலஞ்ச பனாவுஸோ ஆனந்த³, அப்பமாதா³யா’’தி. பட²மம்.