5. சூளவக்³கோ³

1. ஸம்முகீ²பா⁴வஸுத்தம்

41. ‘‘திண்ணம், பி⁴க்க²வே, ஸம்முகீ²பா⁴வா ஸத்³தோ⁴ குலபுத்தோ ப³ஹும் புஞ்ஞம் பஸவதி. கதமேஸம் திண்ணம்? ஸத்³தா⁴ய, பி⁴க்க²வே, ஸம்முகீ²பா⁴வா ஸத்³தோ⁴ குலபுத்தோ ப³ஹும் புஞ்ஞம் பஸவதி. தே³ய்யத⁴ம்மஸ்ஸ, பி⁴க்க²வே, ஸம்முகீ²பா⁴வா ஸத்³தோ⁴ குலபுத்தோ ப³ஹும் புஞ்ஞம் பஸவதி. த³க்கி²ணேய்யானம், பி⁴க்க²வே, ஸம்முகீ²பா⁴வா ஸத்³தோ⁴ குலபுத்தோ ப³ஹும் புஞ்ஞம் பஸவதி. இமேஸம் கோ², பி⁴க்க²வே, திண்ணம் ஸம்முகீ²பா⁴வா ஸத்³தோ⁴ குலபுத்தோ ப³ஹும் புஞ்ஞம் பஸவதீ’’தி. பட²மம்.

2. திடா²னஸுத்தம்

42. ‘‘தீஹி, பி⁴க்க²வே, டா²னேஹி ஸத்³தோ⁴ பஸன்னோ வேதி³தப்³போ³. கதமேஹி தீஹி? ஸீலவந்தானம் த³ஸ்ஸனகாமோ ஹோதி, ஸத்³த⁴ம்மம் ஸோதுகாமோ ஹோதி, விக³தமலமச்சே²ரேன சேதஸா அகா³ரம் அஜ்ஜா²வஸதி முத்தசாகோ³ பயதபாணி வோஸ்ஸக்³க³ரதோ யாசயோகோ³ தா³னஸம்விபா⁴க³ரதோ. இமேஹி கோ², பி⁴க்க²வே, தீஹி டா²னேஹி ஸத்³தோ⁴ பஸன்னோ வேதி³தப்³போ³’’.

‘‘த³ஸ்ஸனகாமோ ஸீலவதம், ஸத்³த⁴ம்மம் ஸோதுமிச்ச²தி;

வினயே மச்சே²ரமலம், ஸ வே ஸத்³தோ⁴தி வுச்சதீ’’தி. து³தியம்;

3. அத்த²வஸஸுத்தம்

43. ‘‘தயோ, பி⁴க்க²வே, அத்த²வஸே ஸம்பஸ்ஸமானேன அலமேவ பரேஸம் த⁴ம்மம் தே³ஸேதும். கதமே தயோ? யோ த⁴ம்மம் தே³ஸேதி ஸோ அத்த²ப்படிஸம்வேதீ³ ச ஹோதி த⁴ம்மப்படிஸம்வேதீ³ ச. யோ த⁴ம்மம் ஸுணாதி ஸோ அத்த²ப்படிஸம்வேதீ³ ச ஹோதி த⁴ம்மப்படிஸம்வேதீ³ ச. யோ சேவ த⁴ம்மம் தே³ஸேதி யோ ச த⁴ம்மம் ஸுணாதி உபோ⁴ அத்த²ப்படிஸம்வேதி³னோ ச ஹோந்தி த⁴ம்மப்படிஸம்வேதி³னோ ச. இமே கோ², பி⁴க்க²வே, தயோ அத்த²வஸே ஸம்பஸ்ஸமானேன அலமேவ பரேஸம் த⁴ம்மம் தே³ஸேது’’ந்தி. ததியம்.

4. கதா²பவத்திஸுத்தம்

44. ‘‘தீஹி, பி⁴க்க²வே, டா²னேஹி கதா² பவத்தினீ ஹோதி. கதமேஹி தீஹி? யோ த⁴ம்மம் தே³ஸேதி ஸோ அத்த²ப்படிஸம்வேதீ³ ச ஹோதி த⁴ம்மப்படிஸம்வேதீ³ ச. யோ த⁴ம்மம் ஸுணாதி ஸோ அத்த²ப்படிஸம்வேதீ³ ச ஹோதி த⁴ம்மப்படிஸம்வேதீ³ ச. யோ சேவ த⁴ம்மம் தே³ஸேதி யோ ச த⁴ம்மம் ஸுணாதி உபோ⁴ அத்த²ப்படிஸம்வேதி³னோ ச ஹோந்தி த⁴ம்மப்படிஸம்வேதி³னோ ச. இமேஹி கோ², பி⁴க்க²வே, தீஹி டா²னேஹி கதா² பவத்தினீ ஹோதீ’’தி. சதுத்த²ம்.

5. பண்டி³தஸுத்தம்

45. ‘‘தீணிமானி, பி⁴க்க²வே, பண்டி³தபஞ்ஞத்தானி ஸப்புரிஸபஞ்ஞத்தானி. கதமானி தீணி? தா³னம், பி⁴க்க²வே, பண்டி³தபஞ்ஞத்தம் ஸப்புரிஸபஞ்ஞத்தம். பப்³ப³ஜ்ஜா, பி⁴க்க²வே, பண்டி³தபஞ்ஞத்தா ஸப்புரிஸபஞ்ஞத்தா. மாதாபிதூனம், பி⁴க்க²வே, உபட்டா²னம் பண்டி³தபஞ்ஞத்தம் ஸப்புரிஸபஞ்ஞத்தம். இமானி கோ², பி⁴க்க²வே, தீணி பண்டி³தபஞ்ஞத்தானி ஸப்புரிஸபஞ்ஞத்தானீ’’தி.

‘‘ஸப்³பி⁴ தா³னம் உபஞ்ஞத்தம், அஹிம்ஸா ஸம்யமோ த³மோ;

மாதாபிது உபட்டா²னம், ஸந்தானம் ப்³ரஹ்மசாரினம்.

‘‘ஸதம் ஏதானி டா²னானி, யானி ஸேவேத² பண்டி³தோ;

அரியோ த³ஸ்ஸனஸம்பன்னோ, ஸ லோகம் ப⁴ஜதே ஸிவ’’ந்தி. பஞ்சமம்;

6. ஸீலவந்தஸுத்தம்

46. ‘‘யம், பி⁴க்க²வே, ஸீலவந்தோ பப்³ப³ஜிதா கா³மம் வா நிக³மம் வா உபனிஸ்ஸாய விஹரந்தி. தத்த² மனுஸ்ஸா தீஹி டா²னேஹி ப³ஹும் புஞ்ஞம் பஸவந்தி. கதமேஹி தீஹி? காயேன, வாசாய, மனஸா. யம், பி⁴க்க²வே, ஸீலவந்தோ பப்³ப³ஜிதா கா³மம் வா நிக³மம் வா உபனிஸ்ஸாய விஹரந்தி. தத்த² மனுஸ்ஸா இமேஹி தீஹி டா²னேஹி ப³ஹும் புஞ்ஞம் பஸவந்தீ’’தி. ச²ட்ட²ம்.

7. ஸங்க²தலக்க²ணஸுத்தம்

47. ‘‘தீணிமானி, பி⁴க்க²வே, ஸங்க²தஸ்ஸ ஸங்க²தலக்க²ணானி. கதமானி தீணி? உப்பாதோ³ பஞ்ஞாயதி, வயோ பஞ்ஞாயதி, டி²தஸ்ஸ அஞ்ஞத²த்தம் பஞ்ஞாயதி. இமானி கோ², பி⁴க்க²வே, தீணி ஸங்க²தஸ்ஸ ஸங்க²தலக்க²ணானீ’’தி. ஸத்தமம்.

8. அஸங்க²தலக்க²ணஸுத்தம்

48. ‘‘தீணிமானி, பி⁴க்க²வே, அஸங்க²தஸ்ஸ அஸங்க²தலக்க²ணானி. கதமானி தீணி? ந உப்பாதோ³ பஞ்ஞாயதி, ந வயோ பஞ்ஞாயதி, ந டி²தஸ்ஸ அஞ்ஞத²த்தம் பஞ்ஞாயதி. இமானி கோ², பி⁴க்க²வே, தீணி அஸங்க²தஸ்ஸ அஸங்க²தலக்க²ணானீ’’தி. அட்ட²மம்.

9. பப்³ப³தராஜஸுத்தம்

49. ‘‘ஹிமவந்தம், பி⁴க்க²வே, பப்³ப³தராஜம் நிஸ்ஸாய மஹாஸாலா தீஹி வட்³டீ⁴ஹி வட்³ட⁴ந்தி. கதமாஹி தீஹி? ஸாகா²பத்தபலாஸேன வட்³ட⁴ந்தி, தசபபடிகாய வட்³ட⁴ந்தி, பே²க்³கு³ஸாரேன வட்³ட⁴ந்தி. ஹிமவந்தம், பி⁴க்க²வே, பப்³ப³தராஜம் நிஸ்ஸாய மஹாஸாலா இமாஹி தீஹி வட்³டீ⁴ஹி வட்³ட⁴ந்தி.

‘‘ஏவமேவம் கோ², பி⁴க்க²வே, ஸத்³த⁴ம் குலபதிம் நிஸ்ஸாய அந்தோ ஜனோ தீஹி வட்³டீ⁴ஹி வட்³ட⁴தி. கதமாஹி தீஹி? ஸத்³தா⁴ய வட்³ட⁴தி, ஸீலேன வட்³ட⁴தி, பஞ்ஞாய வட்³ட⁴தி. ஸத்³த⁴ம், பி⁴க்க²வே, குலபதிம் நிஸ்ஸாய அந்தோ ஜனோ இமாஹி தீஹி வட்³டீ⁴ஹி வட்³ட⁴தீ’’தி.

‘‘யதா²பி பப்³ப³தோ ஸேலோ, அரஞ்ஞஸ்மிம் ப்³ரஹாவனே;

தம் ருக்கா² உபனிஸ்ஸாய, வட்³ட⁴ந்தே தே வனப்பதீ.

‘‘ததே²வ ஸீலஸம்பன்னம், ஸத்³த⁴ம் குலபதிம் இத⁴;

உபனிஸ்ஸாய வட்³ட⁴ந்தி, புத்ததா³ரா ச ப³ந்த⁴வா;

அமச்சா ஞாதிஸங்கா⁴ ச, யே சஸ்ஸ அனுஜீவினோ.

‘‘த்யாஸ்ஸ ஸீலவதோ ஸீலம், சாக³ம் ஸுசரிதானி ச;

பஸ்ஸமானானுகுப்³ப³ந்தி, அத்தமத்த²ம் [யே ப⁴வந்தி (ஸீ. ஸ்யா. கம். பீ.)] விசக்க²ணா.

‘‘இத⁴ த⁴ம்மம் சரித்வான, மக்³க³ம் ஸுக³திகா³மினம்;

நந்தி³னோ தே³வலோகஸ்மிம், மோத³ந்தி காமகாமினோ’’தி. நவமம்;

10. ஆதப்பகரணீயஸுத்தம்

50. ‘‘தீஹி, பி⁴க்க²வே, டா²னேஹி ஆதப்பம் கரணீயம். கதமேஹி தீஹி? அனுப்பன்னானம் பாபகானம் அகுஸலானம் த⁴ம்மானம் அனுப்பாதா³ய ஆதப்பம் கரணீயம், அனுப்பன்னானம் குஸலானம் த⁴ம்மானம் உப்பாதா³ய ஆதப்பம் கரணீயம், உப்பன்னானம் ஸாரீரிகானம் வேத³னானம் து³க்கா²னம் திப்³பா³னம் க²ரானம் கடுகானம் அஸாதானம் அமனாபானம் பாணஹரானம் அதி⁴வாஸனாய ஆதப்பம் கரணீயம். இமேஹி தீஹி, பி⁴க்க²வே, டா²னேஹி ஆதப்பம் கரணீயம்.

‘‘யதோ கோ², பி⁴க்க²வே, பி⁴க்கு² அனுப்பன்னானம் பாபகானம் அகுஸலானம் த⁴ம்மானம் அனுப்பாதா³ய ஆதப்பம் கரோதி, அனுப்பன்னானம் குஸலானம் த⁴ம்மானம் உப்பாதா³ய ஆதப்பம் கரோதி, உப்பன்னானம் ஸாரீரிகானம் வேத³னானம் து³க்கா²னம் திப்³பா³னம் க²ரானம் கடுகானம் அஸாதானம் அமனாபானம் பாணஹரானம் அதி⁴வாஸனாய ஆதப்பம் கரோதி. அயம் வுச்சதி, பி⁴க்க²வே, பி⁴க்கு² ஆதாபீ நிபகோ ஸதோ ஸம்மா து³க்க²ஸ்ஸ அந்தகிரியாயா’’தி. த³ஸமம்.

11. மஹாசோரஸுத்தம்

51. ‘‘தீஹி, பி⁴க்க²வே, அங்கே³ஹி ஸமன்னாக³தோ மஹாசோரோ ஸந்தி⁴ம்பி சி²ந்த³தி, நில்லோபம்பி ஹரதி, ஏகாகா³ரிகம்பி கரோதி, பரிபந்தே²பி திட்ட²தி. கதமேஹி தீஹி? இத⁴, பி⁴க்க²வே, மஹாசோரோ விஸமனிஸ்ஸிதோ ச ஹோதி, க³ஹனனிஸ்ஸிதோ ச ஹோதி, ப³லவனிஸ்ஸிதோ ச ஹோதி. கத²ஞ்ச, பி⁴க்க²வே, மஹாசோரோ விஸமனிஸ்ஸிதோ ஹோதி? இத⁴, பி⁴க்க²வே, மஹாசோரோ நதீ³விது³க்³க³ம் வா நிஸ்ஸிதோ ஹோதி பப்³ப³தவிஸமம் வா. ஏவம் கோ², பி⁴க்க²வே, மஹாசோரோ விஸமனிஸ்ஸிதோ ஹோதி.

‘‘கத²ஞ்ச, பி⁴க்க²வே, மஹாசோரோ க³ஹனனிஸ்ஸிதோ ஹோதி? இத⁴, பி⁴க்க²வே, மஹாசோரோ திணக³ஹனம் வா நிஸ்ஸிதோ ஹோதி, ருக்க²க³ஹனம் வா ரோத⁴ம் [கே³த⁴ம் (ஸீ. பீ.)] வா மஹாவனஸண்ட³ம் வா. ஏவம் கோ², பி⁴க்க²வே, மஹாசோரோ க³ஹனனிஸ்ஸிதோ ஹோதி.

‘‘கத²ஞ்ச, பி⁴க்க²வே, மஹாசோரோ ப³லவனிஸ்ஸிதோ ஹோதி? இத⁴, பி⁴க்க²வே, மஹாசோரோ ராஜானம் வா ராஜமஹாமத்தானம் வா நிஸ்ஸிதோ ஹோதி. தஸ்ஸ ஏவம் ஹோதி – ‘ஸசே மம் கோசி கிஞ்சி வக்க²தி, இமே மே ராஜானோ வா ராஜமஹாமத்தா வா பரியோதா⁴ய அத்த²ம் ப⁴ணிஸ்ஸந்தீ’தி. ஸசே நம் கோசி கிஞ்சி ஆஹ, த்யாஸ்ஸ ராஜானோ வா ராஜமஹாமத்தா வா பரியோதா⁴ய அத்த²ம் ப⁴ணந்தி. ஏவம் கோ², பி⁴க்க²வே, மஹாசோரோ ப³லவனிஸ்ஸிதோ ஹோதி. இமே கோ², பி⁴க்க²வே, தீஹி அங்கே³ஹி ஸமன்னாக³தோ மஹாசோரோ ஸந்தி⁴ம்பி சி²ந்த³தி, நில்லோபம்பி ஹரதி, ஏகாகா³ரிகம்பி கரோதி, பரிபந்தே²பி திட்ட²தி.

‘‘ஏவமேவம் கோ², பி⁴க்க²வே, தீஹி அங்கே³ஹி ஸமன்னாக³தோ பாபபி⁴க்கு² க²தம் உபஹதம் அத்தானம் பரிஹரதி, ஸாவஜ்ஜோ ச ஹோதி ஸானுவஜ்ஜோ ச விஞ்ஞூனம், ப³ஹுஞ்ச அபுஞ்ஞம் பஸவதி. கதமேஹி தீஹி? இத⁴, பி⁴க்க²வே, பாபபி⁴க்கு² விஸமனிஸ்ஸிதோ ச ஹோதி க³ஹனனிஸ்ஸிதோ ச ப³லவனிஸ்ஸிதோ ச.

‘‘கத²ஞ்ச, பி⁴க்க²வே, பாபபி⁴க்கு² விஸமனிஸ்ஸிதோ ஹோதி? இத⁴, பி⁴க்க²வே, பாபபி⁴க்கு² விஸமேன காயகம்மேன ஸமன்னாக³தோ ஹோதி, விஸமேன வசீகம்மேன ஸமன்னாக³தோ ஹோதி, விஸமேன மனோகம்மேன ஸமன்னாக³தோ ஹோதி. ஏவம் கோ², பி⁴க்க²வே, பாபபி⁴க்கு² விஸமனிஸ்ஸிதோ ஹோதி.

‘‘கத²ஞ்ச, பி⁴க்க²வே, பாபபி⁴க்கு² க³ஹனனிஸ்ஸிதோ ஹோதி? இத⁴, பி⁴க்க²வே, பாபபி⁴க்கு² மிச்சா²தி³ட்டி²கோ ஹோதி, அந்தக்³கா³ஹிகாய தி³ட்டி²யா ஸமன்னாக³தோ ஹோதி. ஏவம் கோ², பி⁴க்க²வே, பாபபி⁴க்கு² க³ஹனனிஸ்ஸிதோ ஹோதி.

‘‘கத²ஞ்ச, பி⁴க்க²வே, பாபபி⁴க்கு² ப³லவனிஸ்ஸிதோ ஹோதி? இத⁴, பி⁴க்க²வே, பாபபி⁴க்கு² ராஜானம் வா ராஜமஹாமத்தானம் வா நிஸ்ஸிதோ ஹோதி. தஸ்ஸ ஏவம் ஹோதி – ‘ஸசே மம் கோசி கிஞ்சி வக்க²தி, இமே மே ராஜானோ வா ராஜமஹாமத்தா வா பரியோதா⁴ய அத்த²ம் ப⁴ணிஸ்ஸந்தீ’தி. ஸசே நம் கோசி கிஞ்சி ஆஹ, த்யாஸ்ஸ ராஜானோ வா ராஜமஹாமத்தா வா பரியோதா⁴ய அத்த²ம் ப⁴ணந்தி. ஏவம் கோ², பி⁴க்க²வே, பாபபி⁴க்கு² ப³லவனிஸ்ஸிதோ ஹோதி. இமேஹி கோ², பி⁴க்க²வே, தீஹி த⁴ம்மேஹி ஸமன்னாக³தோ பாபபி⁴க்கு² க²தம் உபஹதம் அத்தானம் பரிஹரதி, ஸாவஜ்ஜோ ச ஹோதி ஸானுவஜ்ஜோ ச விஞ்ஞூனம், ப³ஹுஞ்ச அபுஞ்ஞம் பஸவதீ’’தி. ஏகாத³ஸமம்.

சூளவக்³கோ³ பஞ்சமோ.