4. தே³வதூ³தவக்³கோ³

1.ஸப்³ரஹ்மகஸுத்தம்

31. ‘‘ஸப்³ரஹ்மகானி, பி⁴க்க²வே, தானி குலானி யேஸம் புத்தானம் மாதாபிதரோ அஜ்ஜா²கா³ரே பூஜிதா ஹோந்தி. ஸபுப்³பா³சரியகானி, பி⁴க்க²வே, தானி குலானி யேஸம் புத்தானம் மாதாபிதரோ அஜ்ஜா²கா³ரே பூஜிதா ஹோந்தி. ஸாஹுனேய்யானி, பி⁴க்க²வே, தானி குலானி யேஸம் புத்தானம் மாதாபிதரோ அஜ்ஜா²கா³ரே பூஜிதா ஹோந்தி. ‘ப்³ரஹ்மா’தி, பி⁴க்க²வே, மாதாபிதூனம் ஏதம் அதி⁴வசனம். ‘புப்³பா³சரியா’தி, பி⁴க்க²வே, மாதாபிதூனம் ஏதம் அதி⁴வசனம். ‘ஆஹுனேய்யா’தி, பி⁴க்க²வே, மாதாபிதூனம் ஏதம் அதி⁴வசனம். தம் கிஸ்ஸ ஹேது? ப³ஹுகாரா, பி⁴க்க²வே, மாதாபிதரோ புத்தானம், ஆபாத³கா போஸகா, இமஸ்ஸ லோகஸ்ஸ த³ஸ்ஸேதாரோதி.

‘‘ப்³ரஹ்மாதி மாதாபிதரோ, புப்³பா³சரியாதி வுச்சரே;

ஆஹுனேய்யா ச புத்தானம், பஜாய அனுகம்பகா.

‘‘தஸ்மா ஹி நே நமஸ்ஸேய்ய, ஸக்கரேய்ய ச பண்டி³தோ;

அன்னேன அத² பானேன, வத்தே²ன ஸயனேன ச;

உச்சா²த³னேன ந்ஹாபனேன [நஹாபனேன (ஸீ.)], பாதா³னம் தோ⁴வனேன ச.

‘‘தாய நம் பாரிசரியாய, மாதாபிதூஸு பண்டி³தா;

இதே⁴வ [இத⁴ சேவ (ஸீ.)] நம் பஸம்ஸந்தி, பேச்ச ஸக்³கே³ பமோத³தீ’’தி [ஸக்³கே³ ச மோத³தீதி (ஸீ.) இதிவு. 106 இதிவுத்தகே]. பட²மம்;

2. ஆனந்த³ஸுத்தம்

32. அத² கோ² ஆயஸ்மா ஆனந்தோ³ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா ஆனந்தோ³ ப⁴க³வந்தம் ஏதத³வோச –

‘‘ஸியா நு கோ², ப⁴ந்தே, பி⁴க்கு²னோ ததா²ரூபோ ஸமாதி⁴படிலாபோ⁴ யதா² இமஸ்மிஞ்ச ஸவிஞ்ஞாணகே காயே அஹங்காரமமங்காரமானானுஸயா நாஸ்ஸு, ப³ஹித்³தா⁴ ச ஸப்³ப³னிமித்தேஸு அஹங்காரமமங்காரமானானுஸயா நாஸ்ஸு; யஞ்ச சேதோவிமுத்திம் பஞ்ஞாவிமுத்திம் உபஸம்பஜ்ஜ விஹரதோ அஹங்காரமமங்காரமானானுஸயா ந ஹோந்தி தஞ்ச சேதோவிமுத்திம் பஞ்ஞாவிமுத்திம் உபஸம்பஜ்ஜ விஹரேய்யா’’தி? ‘‘ஸியா, ஆனந்த³, பி⁴க்கு²னோ ததா²ரூபோ ஸமாதி⁴படிலாபோ⁴ யதா² இமஸ்மிஞ்ச ஸவிஞ்ஞாணகே காயே அஹங்காரமமங்காரமானானுஸயா நாஸ்ஸு, ப³ஹித்³தா⁴ ச ஸப்³ப³னிமித்தேஸு அஹங்காரமமங்காரமானானுஸயா நாஸ்ஸு; யஞ்ச சேதோவிமுத்திம் பஞ்ஞாவிமுத்திம் உபஸம்பஜ்ஜ விஹரதோ அஹங்காரமமங்காரமானானுஸயா ந ஹோந்தி தஞ்ச சேதோவிமுத்திம் பஞ்ஞாவிமுத்திம் உபஸம்பஜ்ஜ விஹரேய்யா’’தி.

‘‘யதா² கத²ம் பன, ப⁴ந்தே, ஸியா பி⁴க்கு²னோ ததா²ரூபோ ஸமாதி⁴படிலாபோ⁴ யதா² இமஸ்மிஞ்ச ஸவிஞ்ஞாணகே காயே அஹங்காரமமங்காரமானானுஸயா நாஸ்ஸு, ப³ஹித்³தா⁴ ச ஸப்³ப³னிமித்தேஸு அஹங்காரமமங்காரமானானுஸயா நாஸ்ஸு; யஞ்ச சேதோவிமுத்திம் பஞ்ஞாவிமுத்திம் உபஸம்பஜ்ஜ விஹரதோ அஹங்காரமமங்காரமானானுஸயா ந ஹோந்தி தஞ்ச சேதோவிமுத்திம் பஞ்ஞாவிமுத்திம் உபஸம்பஜ்ஜ விஹரேய்யா’’தி?

‘‘இதா⁴னந்த³, பி⁴க்கு²னோ ஏவம் ஹோதி – ‘ஏதம் ஸந்தம் ஏதம் பணீதம் யதி³த³ம் ஸப்³ப³ஸங்கா²ரஸமதோ² ஸப்³பூ³பதி⁴படினிஸ்ஸக்³கோ³ தண்ஹாக்க²யோ விராகோ³ நிரோதோ⁴ நிப்³பா³ன’ந்தி. ஏவம் கோ², ஆனந்த³, ஸியா பி⁴க்கு²னோ ததா²ரூபோ ஸமாதி⁴படிலாபோ⁴ யதா² இமஸ்மிஞ்ச ஸவிஞ்ஞாணகே காயே அஹங்காரமமங்காரமானானுஸயா நாஸ்ஸு, ப³ஹித்³தா⁴ ச ஸப்³ப³னிமித்தேஸு அஹங்காரமமங்காரமானானுஸயா நாஸ்ஸு; யஞ்ச சேதோவிமுத்திம் பஞ்ஞாவிமுத்திம் உபஸம்பஜ்ஜ விஹரதோ அஹங்காரமமங்காரமானானுஸயா ந ஹோந்தி தஞ்ச சேதோவிமுத்திம் பஞ்ஞாவிமுத்திம் உபஸம்பஜ்ஜ விஹரேய்யா’’தி.

‘‘இத³ஞ்ச பன மேதம், ஆனந்த³, ஸந்தா⁴ய பா⁴ஸிதம் பாராயனே புண்ணகபஞ்ஹே –

‘‘ஸங்கா²ய லோகஸ்மிம் பரோபரானி [பரோவரானி (ஸீ. பீ.) ஸு. நி. 1054; சூளனி. புண்ணகமாணவபுச்சா² 73],

யஸ்ஸிஞ்ஜிதம் நத்தி² குஹிஞ்சி லோகே;

ஸந்தோ விதூ⁴மோ அனீகோ⁴ [அனிகோ⁴ (ஸீ. ஸ்யா. கம். பீ.), அனகோ⁴ (?)] நிராஸோ,

அதாரி ஸோ ஜாதிஜரந்தி ப்³ரூமீ’’தி. து³தியம்;

3. ஸாரிபுத்தஸுத்தம்

33. அத² கோ² ஆயஸ்மா ஸாரிபுத்தோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² ஆயஸ்மந்தம் ஸாரிபுத்தம் ப⁴க³வா ஏதத³வோச – ‘‘ஸம்கி²த்தேனபி கோ² அஹம், ஸாரிபுத்த, த⁴ம்மம் தே³ஸேய்யம்; வித்தா²ரேனபி கோ² அஹம், ஸாரிபுத்த, த⁴ம்மம் தே³ஸேய்யம்; ஸம்கி²த்தவித்தா²ரேனபி கோ² அஹம், ஸாரிபுத்த, த⁴ம்மம் தே³ஸேய்யம்; அஞ்ஞாதாரோ ச து³ல்லபா⁴’’தி. ‘‘ஏதஸ்ஸ, ப⁴க³வா, காலோ, ஏதஸ்ஸ, ஸுக³த, காலோ யம் ப⁴க³வா ஸம்கி²த்தேனபி த⁴ம்மம் தே³ஸேய்ய, வித்தா²ரேனபி த⁴ம்மம் தே³ஸேய்ய, ஸம்கி²த்தவித்தா²ரேனபி த⁴ம்மம் தே³ஸேய்ய. ப⁴விஸ்ஸந்தி த⁴ம்மஸ்ஸ அஞ்ஞாதாரோ’’தி.

‘‘தஸ்மாதிஹ, ஸாரிபுத்த, ஏவம் ஸிக்கி²தப்³ப³ம் – ‘இமஸ்மிஞ்ச ஸவிஞ்ஞாணகே காயே அஹங்காரமமங்காரமானானுஸயா ந ப⁴விஸ்ஸந்தி, ப³ஹித்³தா⁴ ச ஸப்³ப³னிமித்தேஸு அஹங்காரமமங்காரமானானுஸயா ந ப⁴விஸ்ஸந்தி, யஞ்ச சேதோவிமுத்திம் பஞ்ஞாவிமுத்திம் உபஸம்பஜ்ஜ விஹரதோ அஹங்காரமமங்காரமானானுஸயா ந ஹோந்தி தஞ்ச சேதோவிமுத்திம் பஞ்ஞாவிமுத்திம் உபஸம்பஜ்ஜ விஹரிஸ்ஸாமா’தி. ஏவஞ்ஹி கோ², ஸாரிபுத்த, ஸிக்கி²தப்³ப³ம்.

‘‘யதோ ச கோ², ஸாரிபுத்த, பி⁴க்கு²னோ இமஸ்மிஞ்ச ஸவிஞ்ஞாணகே காயே அஹங்காரமமங்காரமானானுஸயா ந ஹோந்தி, ப³ஹித்³தா⁴ ச ஸப்³ப³னிமித்தேஸு அஹங்காரமமங்காரமானானுஸயா ந ஹோந்தி, யஞ்ச சேதோவிமுத்திம் பஞ்ஞாவிமுத்திம் உபஸம்பஜ்ஜ விஹரதோ அஹங்காரமமங்காரமானானுஸயா ந ஹோந்தி தஞ்ச சேதோவிமுத்திம் பஞ்ஞாவிமுத்திம் உபஸம்பஜ்ஜ விஹரதி; அயம் வுச்சதி, ஸாரிபுத்த – ‘பி⁴க்கு² அச்சே²ச்சி² [அச்சே²ஜ்ஜி (ஸ்யா. கம். க.)] தண்ஹம், விவத்தயி [வாவத்தயி (ஸீ. பீ.)] ஸம்யோஜனம், ஸம்மா மானாபி⁴ஸமயா அந்தமகாஸி து³க்க²ஸ்ஸ’. இத³ஞ்ச பன மேதம், ஸாரிபுத்த, ஸந்தா⁴ய பா⁴ஸிதம் பாராயனே [பாராயணே (ஸீ.)] உத³யபஞ்ஹே –

‘‘பஹானம் காமஸஞ்ஞானம், தோ³மனஸ்ஸான சூப⁴யம்;

தி²னஸ்ஸ ச பனூத³னம், குக்குச்சானம் நிவாரணம்.

‘‘உபேக்கா²ஸதிஸம்ஸுத்³த⁴ம், த⁴ம்மதக்கபுரேஜவம்;

அஞ்ஞாவிமோக்க²ம் பப்³ரூமி, அவிஜ்ஜாய பபே⁴த³ன’’ந்தி [ஸு. நி. 1112; சூளனி. உத³யமாணவபுச்சா² 131]. ததியம்;

4. நிதா³னஸுத்தம்

34. ‘‘தீணிமானி, பி⁴க்க²வே, நிதா³னானி கம்மானம் ஸமுத³யாய. கதமானி தீணி? லோபோ⁴ நிதா³னம் கம்மானம் ஸமுத³யாய, தோ³ஸோ நிதா³னம் கம்மானம் ஸமுத³யாய, மோஹோ நிதா³னம் கம்மானம் ஸமுத³யாய.

‘‘யம், பி⁴க்க²வே, லோப⁴பகதம் கம்மம் லோப⁴ஜம் லோப⁴னிதா³னம் லோப⁴ஸமுத³யம், யத்த²ஸ்ஸ அத்தபா⁴வோ நிப்³ப³த்ததி தத்த² தம் கம்மம் விபச்சதி. யத்த² தம் கம்மம் விபச்சதி தத்த² தஸ்ஸ கம்மஸ்ஸ விபாகம் படிஸம்வேதே³தி, தி³ட்டே² வா த⁴ம்மே உபபஜ்ஜ வா [உபபஜ்ஜே வா (ஸீ. ஸ்யா. கம்.) உபபஜ்ஜித்வாதி ம. நி. 3.303 பாளியா ஸம்வண்ணனா] அபரே வா [அபராபரே வா (க.)] பரியாயே.

‘‘யம், பி⁴க்க²வே, தோ³ஸபகதம் கம்மம் தோ³ஸஜம் தோ³ஸனிதா³னம் தோ³ஸஸமுத³யம், யத்த²ஸ்ஸ அத்தபா⁴வோ நிப்³ப³த்ததி தத்த² தம் கம்மம் விபச்சதி. யத்த² தம் கம்மம் விபச்சதி தத்த² தஸ்ஸ கம்மஸ்ஸ விபாகம் படிஸம்வேதே³தி, தி³ட்டே² வா த⁴ம்மே உபபஜ்ஜ வா அபரே வா பரியாயே.

‘‘யம், பி⁴க்க²வே, மோஹபகதம் கம்மம் மோஹஜம் மோஹனிதா³னம் மோஹஸமுத³யம், யத்த²ஸ்ஸ அத்தபா⁴வோ நிப்³ப³த்ததி தத்த² தம் கம்மம் விபச்சதி. யத்த² தம் கம்மம் விபச்சதி தத்த² தஸ்ஸ கம்மஸ்ஸ விபாகம் படிஸம்வேதே³தி, தி³ட்டே² வா த⁴ம்மே உபபஜ்ஜ வா அபரே வா பரியாயே.

‘‘ஸேய்யதா²பி, பி⁴க்க²வே, பீ³ஜானி அக²ண்டா³னி அபூதீனி அவாதாதபஹதானி ஸாராதா³னி ஸுக²ஸயிதானி ஸுகே²த்தே ஸுபரிகம்மகதாய பூ⁴மியா நிக்கி²த்தானி. தே³வோ ச ஸம்மாதா⁴ரம் அனுப்பவேச்சே²ய்ய. ஏவஸ்ஸு தானி, பி⁴க்க²வே, பீ³ஜானி வுத்³தி⁴ம் விருள்ஹிம் வேபுல்லம் ஆபஜ்ஜேய்யும். ஏவமேவம் கோ², பி⁴க்க²வே, யம் லோப⁴பகதம் கம்மம் லோப⁴ஜம் லோப⁴னிதா³னம் லோப⁴ஸமுத³யம், யத்த²ஸ்ஸ அத்தபா⁴வோ நிப்³ப³த்ததி தத்த² தம் கம்மம் விபச்சதி. யத்த² தம் கம்மம் விபச்சதி தத்த² தஸ்ஸ கம்மஸ்ஸ விபாகம் படிஸம்வேதே³தி, தி³ட்டே² வா த⁴ம்மே உபபஜ்ஜ வா அபரே வா பரியாயே.

‘‘யம் தோ³ஸபகதம் கம்மம்…பே… யம் மோஹபகதம் கம்மம் மோஹஜம் மோஹனிதா³னம் மோஹஸமுத³யம், யத்த²ஸ்ஸ அத்தபா⁴வோ நிப்³ப³த்ததி தத்த² தம் கம்மம் விபச்சதி. யத்த² தம் கம்மம் விபச்சதி தத்த² தஸ்ஸ கம்மஸ்ஸ விபாகம் படிஸம்வேதே³தி, தி³ட்டே² வா த⁴ம்மே உபபஜ்ஜ வா அபரே வா பரியாயே. இமானி கோ², பி⁴க்க²வே, தீணி நிதா³னானி கம்மானம் ஸமுத³யாய.

‘‘தீணிமானி, பி⁴க்க²வே, நிதா³னானி கம்மானம் ஸமுத³யாய. கதமானி தீணி? அலோபோ⁴ நிதா³னம் கம்மானம் ஸமுத³யாய, அதோ³ஸோ நிதா³னம் கம்மானம் ஸமுத³யாய, அமோஹோ நிதா³னம் கம்மானம் ஸமுத³யாய.

‘‘யம், பி⁴க்க²வே, அலோப⁴பகதம் கம்மம் அலோப⁴ஜம் அலோப⁴னிதா³னம் அலோப⁴ஸமுத³யம், லோபே⁴ விக³தே ஏவம் தம் கம்மம் பஹீனம் ஹோதி உச்சி²ன்னமூலம் தாலாவத்து²கதம் அனபா⁴வங்கதம் ஆயதிம் அனுப்பாத³த⁴ம்மம்.

‘‘யம், பி⁴க்க²வே, அதோ³ஸபகதம் கம்மம் அதோ³ஸஜம் அதோ³ஸனிதா³னம் அதோ³ஸஸமுத³யம், தோ³ஸே விக³தே ஏவம் தம் கம்மம் பஹீனம் ஹோதி உச்சி²ன்னமூலம் தாலாவத்து²கதம் அனபா⁴வங்கதம் ஆயதிம் அனுப்பாத³த⁴ம்மம்.

‘‘யம், பி⁴க்க²வே, அமோஹபகதம் கம்மம் அமோஹஜம் அமோஹனிதா³னம் அமோஹஸமுத³யம், மோஹே விக³தே ஏவம் தம் கம்மம் பஹீனம் ஹோதி உச்சி²ன்னமூலம் தாலாவத்து²கதம் அனபா⁴வங்கதம் ஆயதிம் அனுப்பாத³த⁴ம்மம்.

‘‘ஸேய்யதா²பி, பி⁴க்க²வே, பீ³ஜானி அக²ண்டா³னி அபூதீனி அவாதாதபஹதானி ஸாராதா³னி ஸுக²ஸயிதானி. தானி புரிஸோ அக்³கி³னா ட³ஹேய்ய. அக்³கி³னா ட³ஹித்வா மஸிம் கரேய்ய. மஸிம் கரித்வா மஹாவாதே வா ஓபு²ணேய்ய [ஓபுனேய்ய (ஸீ. பீ.)] நதி³யா வா ஸீக⁴ஸோதாய பவாஹேய்ய. ஏவஸ்ஸு தானி, பி⁴க்க²வே, பீ³ஜானி உச்சி²ன்னமூலானி தாலாவத்து²கதானி அனபா⁴வங்கதானி [அனபா⁴வகதானி (ஸீ. பீ.)] ஆயதிம் அனுப்பாத³த⁴ம்மானி. ஏவமேவம் கோ², பி⁴க்க²வே, யம் அலோப⁴பகதம் கம்மம் அலோப⁴ஜம் அலோப⁴னிதா³னம் அலோப⁴ஸமுத³யம், லோபே⁴ விக³தே ஏவம் தம் கம்மம் பஹீனம் ஹோதி உச்சி²ன்னமூலம் தாலாவத்து²கதம் அனபா⁴வங்கதம் ஆயதிம் அனுப்பாத³த⁴ம்மம்.

‘‘யம் அதோ³ஸபகதம் கம்மம்…பே… யம் அமோஹபகதம் கம்மம் அமோஹஜம் அமோஹனிதா³னம் அமோஹஸமுத³யம், மோஹே விக³தே ஏவம் தம் கம்மம் பஹீனம் ஹோதி…பே… ஆயதிம் அனுப்பாத³த⁴ம்மம். இமானி கோ², பி⁴க்க²வே, தீணி நிதா³னானி கம்மானம் ஸமுத³யாயா’’தி.

‘‘லோப⁴ஜம் தோ³ஸஜஞ்சேவ [தோ³ஸஜம் கம்மம் (க.)], மோஹஜஞ்சாபவித்³த³ஸு;

யம் தேன பகதம் கம்மம், அப்பம் வா யதி³ வா ப³ஹும்;

இதே⁴வ தம் வேத³னியம், வத்து² அஞ்ஞம் ந விஜ்ஜதி.

‘‘தஸ்மா லோப⁴ஞ்ச தோ³ஸஞ்ச, மோஹஜஞ்சாபி வித்³த³ஸு;

விஜ்ஜம் உப்பாத³யம் பி⁴க்கு², ஸப்³பா³ து³க்³க³தியோ ஜஹே’’தி. சதுத்த²ம்;

5. ஹத்த²கஸுத்தம்

35. ஏவம் மே ஸுதம் – ஏகம் ஸமயம் ப⁴க³வா ஆளவியம் விஹரதி கோ³மக்³கே³ ஸிம்ஸபாவனே பண்ணஸந்த²ரே. அத² கோ² ஹத்த²கோ ஆளவகோ ஜங்கா⁴விஹாரம் அனுசங்கமமானோ அனுவிசரமானோ அத்³த³ஸ ப⁴க³வந்தம் கோ³மக்³கே³ ஸிம்ஸபாவனே பண்ணஸந்த²ரே நிஸின்னம். தி³ஸ்வா யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஹத்த²கோ ஆளவகோ ப⁴க³வந்தம் ஏதத³வோச – ‘‘கச்சி, ப⁴ந்தே, ப⁴க³வா ஸுக²மஸயித்தா²’’தி? ‘‘ஏவம், குமார, ஸுக²மஸயித்த²ம். யே ச பன லோகே ஸுக²ம் ஸேந்தி, அஹம் தேஸம் அஞ்ஞதரோ’’தி.

‘‘ஸீதா, ப⁴ந்தே, ஹேமந்திகா ரத்தி, அந்தரட்ட²கோ ஹிமபாதஸமயோ, க²ரா கோ³கண்டகஹதா பூ⁴மி, தனுகோ பண்ணஸந்த²ரோ, விரளானி ருக்க²ஸ்ஸ பத்தானி, ஸீதானி காஸாயானி வத்தா²னி, ஸீதோ ச வேரம்போ⁴ வாதோ வாயதி. அத² ச பன ப⁴க³வா ஏவமாஹ – ‘ஏவம், குமார, ஸுக²மஸயித்த²ம். யே ச பன லோகே ஸுக²ம் ஸேந்தி, அஹம் தேஸம் அஞ்ஞதரோ’’’தி.

‘‘தேன ஹி, குமார, தஞ்ஞேவேத்த² படிபுச்சி²ஸ்ஸாமி. யதா² தே க²மேய்ய ததா² நம் ப்³யாகரேய்யாஸி. தம் கிம் மஞ்ஞஸி, குமார, இத⁴ஸ்ஸ க³ஹபதிஸ்ஸ வா க³ஹபதிபுத்தஸ்ஸ வா கூடாகா³ரம் உல்லித்தாவலித்தம் நிவாதம் பு²ஸிதக்³க³ளம் பிஹிதவாதபானம். தத்ரஸ்ஸ பல்லங்கோ கோ³னகத்த²தோ படிகத்த²தோ படலிகத்த²தோ கத³லிமிக³பவரபச்சத்த²ரணோ [காத³லிமிக³பவரபச்சத்த²ரணோ (ஸீ.)] ஸஉத்தரச்ச²தோ³ உப⁴தோ லோஹிதகூபதா⁴னோ; தேலப்பதீ³போ சேத்த² ஜா²யேய்ய [ஜாலேய்ய (க.)]; சதஸ்ஸோ ச [தஸ்ஸேவ (க.)] பஜாபதியோ மனாபாமனாபேன பச்சுபட்டி²தா அஸ்ஸு. தம் கிம் மஞ்ஞஸி, குமார, ஸுக²ம் வா ஸோ ஸயேய்ய நோ வா? கத²ம் வா தே ஏத்த² ஹோதீ’’தி? ‘‘ஸுக²ம் ஸோ, ப⁴ந்தே, ஸயேய்ய. யே ச பன லோகே ஸுக²ம் ஸேந்தி, ஸோ தேஸம் அஞ்ஞதரோ’’தி.

‘‘தம் கிம் மஞ்ஞஸி, குமார, அபி நு தஸ்ஸ க³ஹபதிஸ்ஸ வா க³ஹபதிபுத்தஸ்ஸ வா உப்பஜ்ஜேய்யும் ராக³ஜா பரிளாஹா காயிகா வா சேதஸிகா வா யேஹி ஸோ ராக³ஜேஹி பரிளாஹேஹி பரிட³ய்ஹமானோ து³க்க²ம் ஸயேய்யா’’தி? ‘‘ஏவம், ப⁴ந்தே’’தி.

‘‘யேஹி கோ² ஸோ, குமார, க³ஹபதி வா க³ஹபதிபுத்தோ வா ராக³ஜேஹி பரிளாஹேஹி பரிட³ய்ஹமானோ து³க்க²ம் ஸயேய்ய, ஸோ ராகோ³ ததா²க³தஸ்ஸ பஹீனோ உச்சி²ன்னமூலோ தாலாவத்து²கதோ அனபா⁴வங்கதோ ஆயதிம் அனுப்பாத³த⁴ம்மோ. தஸ்மாஹம் ஸுக²மஸயித்த²ம்.

‘‘தம் கிம் மஞ்ஞஸி, குமார, அபி நு தஸ்ஸ க³ஹபதிஸ்ஸ வா க³ஹபதிபுத்தஸ்ஸ வா உப்பஜ்ஜேய்யும் தோ³ஸஜா பரிளாஹா…பே… மோஹஜா பரிளாஹா காயிகா வா சேதஸிகா வா யேஹி ஸோ மோஹஜேஹி பரிளாஹேஹி பரிட³ய்ஹமானோ து³க்க²ம் ஸயேய்யா’’தி? ‘‘ஏவம், ப⁴ந்தே’’தி.

‘‘யே ஹி கோ² ஸோ, குமார, க³ஹபதி வா க³ஹபதிபுத்தோ வா மோஹஜேஹி பரிளாஹேஹி பரிட³ய்ஹமானோ து³க்க²ம் ஸயேய்ய, ஸோ மோஹோ ததா²க³தஸ்ஸ பஹீனோ உச்சி²ன்னமூலோ தாலாவத்து²கதோ அனபா⁴வங்கதோ ஆயதிம் அனுப்பாத³த⁴ம்மோ. தஸ்மாஹம் ஸுக²மஸயித்த²’’ந்தி.

[சூளவ. 305; ஸம். நி. 1.242] ‘‘ஸப்³ப³தா³ வே ஸுக²ம் ஸேதி, ப்³ராஹ்மணோ பரினிப்³பு³தோ;

யோ ந லிம்பதி [லிப்பதி (ஸீ. ஸ்யா. கம். க.)] காமேஸு, ஸீதிபூ⁴தோ நிரூபதி⁴.

‘‘ஸப்³பா³ ஆஸத்தியோ சே²த்வா, வினேய்ய ஹத³யே த³ரம்;

உபஸந்தோ ஸுக²ம் ஸேதி, ஸந்திம் பப்புய்ய சேதஸோ’’தி. பஞ்சமம்;

6. தே³வதூ³தஸுத்தம்

36. ‘‘தீணிமானி, பி⁴க்க²வே, தே³வதூ³தானி. கதமானி தீணி? இத⁴, பி⁴க்க²வே, ஏகச்சோ காயேன து³ச்சரிதம் சரதி, வாசாய து³ச்சரிதம் சரதி, மனஸா து³ச்சரிதம் சரதி. ஸோ காயேன து³ச்சரிதம் சரித்வா, வாசாய து³ச்சரிதம் சரித்வா, மனஸா து³ச்சரிதம் சரித்வா காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி. தமேனம், பி⁴க்க²வே, நிரயபாலா நானாபா³ஹாஸு க³ஹேத்வா யமஸ்ஸ ரஞ்ஞோ த³ஸ்ஸேந்தி – ‘அயம், தே³வ, புரிஸோ அமத்தேய்யோ அபேத்தேய்யோ அஸாமஞ்ஞோ அப்³ரஹ்மஞ்ஞோ, ந குலே ஜேட்டா²பசாயீ. இமஸ்ஸ தே³வோ த³ண்ட³ம் பணேதூ’’’தி.

‘‘தமேனம், பி⁴க்க²வே, யமோ ராஜா பட²மம் தே³வதூ³தம் ஸமனுயுஞ்ஜதி ஸமனுகா³ஹதி ஸமனுபா⁴ஸதி – ‘அம்போ⁴, புரிஸ, ந த்வம் அத்³த³ஸ மனுஸ்ஸேஸு பட²மம் தே³வதூ³தம் பாதுபூ⁴த’ந்தி? ஸோ ஏவமாஹ – ‘நாத்³த³ஸம், ப⁴ந்தே’’’தி.

‘‘தமேனம், பி⁴க்க²வே, யமோ ராஜா ஏவமாஹ – ‘அம்போ⁴ புரிஸ, ந த்வம் அத்³த³ஸ மனுஸ்ஸேஸு இத்தி²ம் வா புரிஸம் வா ஆஸீதிகம் வா நாவுதிகம் வா வஸ்ஸஸதிகம் வா [பஸ்ஸ ம. நி. 3.263] ஜாதியா ஜிண்ணம் கோ³பானஸிவங்கம் போ⁴க்³க³ம் த³ண்ட³பராயணம் [த³ண்ட³பராயனம் (ஸ்யா. கம். பீ.)] பவேத⁴மானம் க³ச்ச²ந்தம் ஆதுரம் க³தயோப்³ப³னம் க²ண்ட³த³ந்தம் பலிதகேஸம் விலூனம் க²ல்லிதஸிரம் [க²லிதம் ஸிரோ (ஸீ. பீ.), க²லிதஸிரம் (ஸ்யா. கம்.) ம. நி. 3.263] வலிதம் திலகாஹதக³த்த’ந்தி? ஸோ ஏவமாஹ – ‘அத்³த³ஸம், ப⁴ந்தே’’’தி.

‘‘தமேனம், பி⁴க்க²வே, யமோ ராஜா ஏவமாஹ – ‘அம்போ⁴, புரிஸ, தஸ்ஸ தே விஞ்ஞுஸ்ஸ ஸதோ மஹல்லகஸ்ஸ ந ஏதத³ஹோஸி – அஹம்பி கோ²ம்ஹி ஜராத⁴ம்மோ ஜரம் அனதீதோ, ஹந்தா³ஹம் கல்யாணம் கரோமி, காயேன வாசாய மனஸா’தி? ஸோ ஏவமாஹ – ‘நாஸக்கி²ஸ்ஸம், ப⁴ந்தே. பமாத³ஸ்ஸம், ப⁴ந்தே’’’தி.

‘‘தமேனம், பி⁴க்க²வே, யமோ ராஜா ஏவமாஹ – ‘அம்போ⁴, புரிஸ, பமாத³தாய [பமாத³வதாய (ஸீ. ஸ்யா. கம். பீ.) ம. நி. 3.262] ந கல்யாணமகாஸி காயேன வாசாய மனஸா. தக்³க⁴ த்வம் [தம் (க.)], அம்போ⁴ புரிஸ, ததா² கரிஸ்ஸந்தி யதா² தம் [தே (க.)] பமத்தம். தம் கோ² பன தே ஏதம் [தம் கோ² பனேதம் (ஸீ. ஸ்யா. கம். பீ.)] பாபகம்மம் [பாபம் கம்மம் (ஸீ.)] நேவ மாதரா கதம், ந பிதரா கதம், ந பா⁴தரா கதம், ந ப⁴கி³னியா கதம், ந மித்தாமச்சேஹி கதம், ந ஞாதிஸாலோஹிதேஹி கதம், ந தே³வதாஹி கதம், ந ஸமணப்³ராஹ்மணேஹி கதம்; அத² கோ² தயாவேதம் பாபகம்மம் கதம், த்வஞ்ஞேவேதஸ்ஸ விபாகம் படிஸம்வேதி³ஸ்ஸஸீ’’’தி.

‘‘தமேனம், பி⁴க்க²வே, யமோ ராஜா பட²மம் தே³வதூ³தம் ஸமனுயுஞ்ஜித்வா ஸமனுகா³ஹித்வா ஸமனுபா⁴ஸித்வா, து³தியம் தே³வதூ³தம் ஸமனுயுஞ்ஜதி ஸமனுகா³ஹதி ஸமனுபா⁴ஸதி – ‘அம்போ⁴ புரிஸ, ந த்வம் அத்³த³ஸ மனுஸ்ஸேஸு து³தியம் தே³வதூ³தம் பாதுபூ⁴த’ந்தி? ஸோ ஏவமாஹ – ‘நாத்³த³ஸம், ப⁴ந்தே’தி. ‘‘தமேனம், பி⁴க்க²வே, யமோ ராஜா ஏவமாஹ – ‘அம்போ⁴ புரிஸ, ந த்வம் அத்³த³ஸ மனுஸ்ஸேஸு இத்தி²ம் வா புரிஸம் வா ஆபா³தி⁴கம் து³க்கி²தம் பா³ள்ஹகி³லானம், ஸகே முத்தகரீஸே பலிபன்னம் ஸேமானம், அஞ்ஞேஹி வுட்டா²பியமானம், அஞ்ஞேஹி ஸம்வேஸியமான’ந்தி? ஸோ ஏவமாஹ – ‘அத்³த³ஸம், ப⁴ந்தே’’’தி.

‘‘தமேனம், பி⁴க்க²வே, யமோ ராஜா ஏவமாஹ – ‘அம்போ⁴ புரிஸ, தஸ்ஸ தே விஞ்ஞுஸ்ஸ ஸதோ மஹல்லகஸ்ஸ ந ஏதத³ஹோஸி – அஹம்பி கோ²ம்ஹி ப்³யாதி⁴த⁴ம்மோ ப்³யாதி⁴ம் அனதீதோ, ஹந்தா³ஹம் கல்யாணம் கரோமி காயேன வாசாய மனஸா’தி? ஸோ ஏவமாஹ – ‘நாஸக்கி²ஸ்ஸம், ப⁴ந்தே. பமாத³ஸ்ஸம், ப⁴ந்தே’’’தி.

‘‘தமேனம், பி⁴க்க²வே, யமோ ராஜா ஏவமாஹ – ‘அம்போ⁴ புரிஸ, பமாத³தாய ந கல்யாணமகாஸி காயேன வாசாய மனஸா. தக்³க⁴ த்வம், அம்போ⁴ புரிஸ, ததா² கரிஸ்ஸந்தி யதா² தம் பமத்தம். தம் கோ² பன தே ஏதம் பாபகம்மம் நேவ மாதரா கதம், ந பிதரா கதம், ந பா⁴தரா கதம், ந ப⁴கி³னியா கதம், ந மித்தாமச்சேஹி கதம், ந ஞாதிஸாலோஹிதேஹி கதம், ந தே³வதாஹி கதம், ந ஸமணப்³ராஹ்மணேஹி கதம்; அத² கோ² தயாவேதம் பாபகம்மம் கதம். த்வஞ்ஞேவேதஸ்ஸ விபாகம் படிஸம்வேதி³ஸ்ஸஸீ’’’தி.

‘‘தமேனம், பி⁴க்க²வே, யமோ ராஜா து³தியம் தே³வதூ³தம் ஸமனுயுஞ்ஜித்வா ஸமனுகா³ஹித்வா ஸமனுபா⁴ஸித்வா, ததியம் தே³வதூ³தம் ஸமனுயுஞ்ஜதி ஸமனுகா³ஹதி ஸமனுபா⁴ஸதி – ‘அம்போ⁴ புரிஸ, ந த்வம் அத்³த³ஸ மனுஸ்ஸேஸு ததியம் தே³வதூ³தம் பாதுபூ⁴த’ந்தி? ஸோ ஏவமாஹ – ‘நாத்³த³ஸம், ப⁴ந்தே’’’தி.

‘‘தமேனம், பி⁴க்க²வே, யமோ ராஜா ஏவமாஹ – ‘அம்போ⁴ புரிஸ, ந த்வம் அத்³த³ஸ மனுஸ்ஸேஸு இத்தி²ம் வா புரிஸம் வா ஏகாஹமதம் வா த்³வீஹமதம் வா தீஹமதம் வா உத்³து⁴மாதகம் வினீலகம் விபுப்³ப³கஜாத’ந்தி? ஸோ ஏவமாஹ – ‘அத்³த³ஸம், ப⁴ந்தே’’’தி.

‘‘தமேனம், பி⁴க்க²வே, யமோ ராஜா ஏவமாஹ – ‘அம்போ⁴ புரிஸ, தஸ்ஸ தே விஞ்ஞுஸ்ஸ ஸதோ மஹல்லகஸ்ஸ ந ஏதத³ஹோஸி – அஹம்பி கோ²ம்ஹி மரணத⁴ம்மோ மரணம் அனதீதோ, ஹந்தா³ஹம் கல்யாணம் கரோமி காயேன வாசாய மனஸா’தி? ஸோ ஏவமாஹ – ‘நாஸக்கி²ஸ்ஸம், ப⁴ந்தே. பமாத³ஸ்ஸம், ப⁴ந்தே’’’தி.

‘‘தமேனம், பி⁴க்க²வே, யமோ ராஜா ஏவமாஹ – ‘அம்போ⁴ புரிஸ, பமாத³தாய ந கல்யாணமகாஸி காயேன வாசாய மனஸா. தக்³க⁴ த்வம், அம்போ⁴ புரிஸ, ததா² கரிஸ்ஸந்தி யதா² தம் பமத்தம். தம் கோ² பன தே ஏதம் பாபகம்மம் நேவ மாதரா கதம், ந பிதரா கதம், ந பா⁴தரா கதம், ந ப⁴கி³னியா கதம், ந மித்தாமச்சேஹி கதம், ந ஞாதிஸாலோஹிதேஹி கதம், ந தே³வதாஹி கதம், ந ஸமணப்³ராஹ்மணேஹி கதம்; அத² கோ² தயாவேதம் பாபகம்மம் கதம். த்வஞ்ஞேவேதஸ்ஸ விபாகம் படிஸம்வேதி³ஸ்ஸஸீ’’’தி.

‘‘தமேனம், பி⁴க்க²வே, யமோ ராஜா ததியம் தே³வதூ³தம் ஸமனுயுஞ்ஜித்வா ஸமனுகா³ஹித்வா ஸமனுபா⁴ஸித்வா துண்ஹீ ஹோதி. தமேனம், பி⁴க்க²வே, நிரயபாலா பஞ்சவித⁴ப³ந்த⁴னம் நாம காரணம் கரோந்தி. தத்தம் அயோகி²லம் ஹத்தே² க³மேந்தி. தத்தம் அயோகி²லம் து³தியஸ்மிம் ஹத்தே² க³மேந்தி. தத்தம் அயோகி²லம் பாதே³ க³மேந்தி. தத்தம் அயோகி²லம் து³தியஸ்மிம் பாதே³ க³மேந்தி. தத்தம் அயோகி²லம் மஜ்ஜே² உரஸ்மிம் க³மேந்தி. ஸோ தத்த² து³க்கா² திப்³பா³ [திப்பா (ஸீ.)] க²ரா கடுகா வேத³னா வேதி³யதி, ந ச தாவ காலங்கரோதி யாவ ந தம் பாபகம்மம் ப்³யந்தீஹோதி.

‘‘தமேனம், பி⁴க்க²வே, நிரயபாலா ஸம்வேஸேத்வா [ஸம்கட்³டி⁴த்வா (க.)] குதா⁴ரீஹி தச்ச²ந்தி. ஸோ தத்த² து³க்கா² திப்³பா³ க²ரா கடுகா வேத³னா வேதி³யதி, ந ச தாவ காலங்கரோதி யாவ ந தம் பாபகம்மம் ப்³யந்தீஹோதி.

‘‘தமேனம், பி⁴க்க²வே, நிரயபாலா உத்³த⁴ம்பாத³ம் அதோ⁴ஸிரம் க³ஹேத்வா வாஸீஹி தச்ச²ந்தி…பே… தமேனம், பி⁴க்க²வே, நிரயபாலா ரதே² யோஜேத்வா ஆதி³த்தாய பூ⁴மியா ஸம்பஜ்ஜலிதாய ஸஜோதிபூ⁴தாய [ஸஞ்ஜோதிபூ⁴தாய (ஸ்யா. கம்.)] ஸாரேந்திபி பச்சாஸாரேந்திபி…பே… தமேனம், பி⁴க்க²வே, நிரயபாலா மஹந்தம் அங்கா³ரபப்³ப³தம் ஆதி³த்தம் ஸம்பஜ்ஜலிதம் ஸஜோதிபூ⁴தம் ஆரோபேந்திபி ஓரோபேந்திபி…பே… தமேனம், பி⁴க்க²வே, நிரயபாலா உத்³த⁴ம்பாத³ம் அதோ⁴ஸிரம் க³ஹேத்வா தத்தாய லோஹகும்பி⁴யா பக்கி²பந்தி, ஆதி³த்தாய ஸம்பஜ்ஜலிதாய ஸஜோதிபூ⁴தாய. ஸோ தத்த² பே²ணுத்³தே³ஹகம் பச்சமானோ ஸகிம்பி உத்³த⁴ம் க³ச்ச²தி, ஸகிம்பி அதோ⁴ க³ச்ச²தி, ஸகிம்பி திரியம் க³ச்ச²தி. ஸோ தத்த² து³க்கா² திப்³பா³ க²ரா கடுகா வேத³னா வேதி³யதி, ந ச தாவ காலம் கரோதி யாவ ந தம் பாபகம்மம் ப்³யந்தீஹோதி. தமேனம், பி⁴க்க²வே, நிரயபாலா மஹானிரயே பக்கி²பந்தி. ஸோ கோ² பன, பி⁴க்க²வே, மஹானிரயோ –

‘‘சதுக்கண்ணோ சதுத்³வாரோ, விப⁴த்தோ பா⁴க³ஸோ மிதோ;

அயோபாகாரபரியந்தோ, அயஸா படிகுஜ்ஜிதோ.

‘‘தஸ்ஸ அயோமயா பூ⁴மி, ஜலிதா தேஜஸா யுதா;

ஸமந்தா யோஜனஸதம், ப²ரித்வா திட்ட²தி ஸப்³ப³தா³’’தி [பே. வ. 70-71, 240-241].

‘‘பூ⁴தபுப்³ப³ம், பி⁴க்க²வே, யமஸ்ஸ ரஞ்ஞோ ஏதத³ஹோஸி – ‘யே கிர, போ⁴, லோகே பாபகானி கம்மானி கரோந்தி தே ஏவரூபா விவிதா⁴ கம்மகாரணா கரீயந்தி. அஹோ வதாஹம் மனுஸ்ஸத்தம் லபே⁴ய்யம், ததா²க³தோ ச லோகே உப்பஜ்ஜேய்ய அரஹம் ஸம்மாஸம்பு³த்³தோ⁴, தஞ்சாஹம் ப⁴க³வந்தம் பயிருபாஸேய்யம். ஸோ ச மே ப⁴க³வா த⁴ம்மம் தே³ஸேய்ய, தஸ்ஸ சாஹம் ப⁴க³வதோ த⁴ம்மம் ஆஜானேய்ய’ந்தி. தம் கோ² பனாஹம், பி⁴க்க²வே, ந அஞ்ஞஸ்ஸ ஸமணஸ்ஸ வா ப்³ராஹ்மணஸ்ஸ வா ஸுத்வா ஏவம் வதா³மி, அபி ச கோ², பி⁴க்க²வே, யதே³வ மே ஸாமம் ஞாதம் ஸாமம் தி³ட்ட²ம் ஸாமம் விதி³தம் ததே³வாஹம் வதா³மீ’’தி.

‘‘சோதி³தா தே³வதூ³தேஹி, யே பமஜ்ஜந்தி மாணவா;

தே தீ³க⁴ரத்தம் ஸோசந்தி, ஹீனகாயூபகா³ நரா.

‘‘யே ச கோ² தே³வதூ³தேஹி, ஸந்தோ ஸப்புரிஸா இத⁴;

சோதி³தா நப்பமஜ்ஜந்தி, அரியத⁴ம்மே குதா³சனம்.

‘‘உபாதா³னே ப⁴யம் தி³ஸ்வா, ஜாதிமரணஸம்ப⁴வே;

அனுபாதா³ விமுச்சந்தி, ஜாதிமரணஸங்க²யே.

‘‘தே அப்பமத்தா [தே கோ²ப்பமத்தா (ஸீ.), தே கே²மப்பத்தா (ஸ்யா. கம். பீ.) ம. நி. 3.271] ஸுகி²னோ [ஸுகி²தா (ஸீ. ஸ்யா.)], தி³ட்ட²த⁴ம்மாபி⁴னிப்³பு³தா;

ஸப்³ப³வேரப⁴யாதீதா, ஸப்³ப³து³க்க²ம் உபச்சகு³’’ந்தி. ச²ட்ட²ம்;

7. சதுமஹாராஜஸுத்தம்

37. ‘‘அட்ட²மியம், பி⁴க்க²வே, பக்க²ஸ்ஸ சதுன்னம் மஹாராஜானம் அமச்சா பாரிஸஜ்ஜா இமம் லோகம் அனுவிசரந்தி – ‘கச்சி ப³ஹூ மனுஸ்ஸா மனுஸ்ஸேஸு மத்தேய்யா பேத்தேய்யா ஸாமஞ்ஞா ப்³ரஹ்மஞ்ஞா குலே ஜேட்டா²பசாயினோ உபோஸத²ம் உபவஸந்தி படிஜாக³ரோந்தி புஞ்ஞானி கரோந்தீ’தி. சாதுத்³த³ஸிம், பி⁴க்க²வே, பக்க²ஸ்ஸ சதுன்னம் மஹாராஜானம் புத்தா இமம் லோகம் அனுவிசரந்தி – ‘கச்சி ப³ஹூ மனுஸ்ஸா மனுஸ்ஸேஸு மத்தேய்யா பேத்தேய்யா ஸாமஞ்ஞா ப்³ரஹ்மஞ்ஞா குலே ஜேட்டா²பசாயினோ உபோஸத²ம் உபவஸந்தி படிஜாக³ரோந்தி புஞ்ஞானி கரோந்தீ’தி. தத³ஹு, பி⁴க்க²வே, உபோஸதே² பன்னரஸே சத்தாரோ மஹாராஜானோ ஸாமஞ்ஞேவ இமம் லோகம் அனுவிசரந்தி – ‘கச்சி ப³ஹூ மனுஸ்ஸா மனுஸ்ஸேஸு மத்தேய்யா பேத்தேய்யா ஸாமஞ்ஞா ப்³ரஹ்மஞ்ஞா குலே ஜேட்டா²பசாயினோ உபோஸத²ம் உபவஸந்தி படிஜாக³ரோந்தி புஞ்ஞானி கரோந்தீ’’’தி.

‘‘ஸசே, பி⁴க்க²வே, அப்பகா ஹோந்தி மனுஸ்ஸா மனுஸ்ஸேஸு மத்தேய்யா பேத்தேய்யா ஸாமஞ்ஞா ப்³ரஹ்மஞ்ஞா குலே ஜேட்டா²பசாயினோ உபோஸத²ம் உபவஸந்தி படிஜாக³ரோந்தி புஞ்ஞானி கரோந்தி. தமேனம், பி⁴க்க²வே, சத்தாரோ மஹாராஜானோ தே³வானம் தாவதிம்ஸானம் ஸுத⁴ம்மாய ஸபா⁴ய ஸன்னிஸின்னானம் ஸன்னிபதிதானம் ஆரோசேந்தி – ‘அப்பகா கோ², மாரிஸா, மனுஸ்ஸா மனுஸ்ஸேஸு மத்தேய்யா பேத்தேய்யா ஸாமஞ்ஞா ப்³ரஹ்மஞ்ஞா குலே ஜேட்டா²பசாயினோ உபோஸத²ம் உபவஸந்தி படிஜாக³ரோந்தி புஞ்ஞானி கரோந்தீ’தி. தேன கோ², பி⁴க்க²வே, தே³வா தாவதிம்ஸா அனத்தமனா ஹோந்தி – ‘தி³ப்³பா³ வத, போ⁴, காயா பரிஹாயிஸ்ஸந்தி, பரிபூரிஸ்ஸந்தி அஸுரகாயா’’’தி.

‘‘ஸசே பன, பி⁴க்க²வே, ப³ஹூ ஹோந்தி மனுஸ்ஸா மனுஸ்ஸேஸு மத்தேய்யா பேத்தேய்யா ஸாமஞ்ஞா ப்³ரஹ்மஞ்ஞா குலே ஜேட்டா²பசாயினோ உபோஸத²ம் உபவஸந்தி படிஜாக³ரோந்தி புஞ்ஞானி கரோந்தி. தமேனம், பி⁴க்க²வே, சத்தாரோ மஹாராஜானோ தே³வானம் தாவதிம்ஸானம் ஸுத⁴ம்மாய ஸபா⁴ய ஸன்னிஸின்னானம் ஸன்னிபதிதானம் ஆரோசேந்தி – ‘ப³ஹூ கோ², மாரிஸா, மனுஸ்ஸா மனுஸ்ஸேஸு மத்தேய்யா பேத்தேய்யா ஸாமஞ்ஞா ப்³ரஹ்மஞ்ஞா குலே ஜேட்டா²பசாயினோ உபோஸத²ம் உபவஸந்தி படிஜாக³ரோந்தி புஞ்ஞானி கரோந்தீ’தி. தேன, பி⁴க்க²வே, தே³வா தாவதிம்ஸா அத்தமனா ஹோந்தி – ‘தி³ப்³பா³ வத, போ⁴, காயா பரிபூரிஸ்ஸந்தி, பரிஹாயிஸ்ஸந்தி அஸுரகாயா’’’தி.

‘‘பூ⁴தபுப்³ப³ம், பி⁴க்க²வே, ஸக்கோ தே³வானமிந்தோ³ தே³வே தாவதிம்ஸே அனுனயமானோ தாயம் வேலாயம் இமம் கா³த²ம் அபா⁴ஸி –

‘‘சாதுத்³த³ஸிம் பஞ்சத³ஸிம், யா ச பக்க²ஸ்ஸ அட்ட²மீ;

பாடிஹாரியபக்க²ஞ்ச, அட்ட²ங்க³ஸுஸமாக³தம்;

உபோஸத²ம் உபவஸேய்ய, யோபிஸ்ஸ [யோபஸ்ஸ (ஸீ. ஸ்யா. கம். பீ.)] மாதி³ஸோ நரோ’’தி.

‘‘ஸா கோ² பனேஸா, பி⁴க்க²வே, ஸக்கேன தே³வானமிந்தே³ன கா³தா² து³க்³கீ³தா ந ஸுகீ³தா து³ப்³பா⁴ஸிதா ந ஸுபா⁴ஸிதா. தம் கிஸ்ஸ ஹேது? ஸக்கோ ஹி, பி⁴க்க²வே, தே³வானமிந்தோ³ அவீதராகோ³ அவீததோ³ஸோ அவீதமோஹோ.

‘‘யோ ச கோ² ஸோ, பி⁴க்க²வே, பி⁴க்கு² அரஹம் கீ²ணாஸவோ வுஸிதவா ப்³ரஹ்மசரியோ கதகரணீயோ ஓஹிதபா⁴ரோ அனுப்பத்தஸத³த்தோ² பரிக்கீ²ணப⁴வஸம்யோஜனோ ஸம்மத³ஞ்ஞா விமுத்தோ, தஸ்ஸ கோ² ஏதம், பி⁴க்க²வே, பி⁴க்கு²னோ [தஸ்ஸ கோ² ஏதம் பி⁴க்கு²னோ (ஸீ. ஸ்யா.), தஸ்ஸ கோ² ஏவம் பி⁴க்க²வே பி⁴க்கு²னோ (க.)] கல்லம் வசனாய –

‘‘சாதுத்³த³ஸிம் பஞ்சத³ஸிம், யா ச பக்க²ஸ்ஸ அட்ட²மீ;

பாடிஹாரியபக்க²ஞ்ச, அட்ட²ங்க³ஸுஸமாக³தம்;

உபோஸத²ம் உபவஸேய்ய, யோபிஸ்ஸ மாதி³ஸோ நரோ’’தி.

‘‘தம் கிஸ்ஸ ஹேது? ஸோ ஹி, பி⁴க்க²வே, பி⁴க்கு² வீதராகோ³ வீததோ³ஸோ வீதமோஹோ’’தி. ஸத்தமம்.

8. து³தியசதுமஹாராஜஸுத்தம்

38. ‘‘பூ⁴தபுப்³ப³ம், பி⁴க்க²வே, ஸக்கோ தே³வானமிந்தோ³ தே³வே தாவதிம்ஸே அனுனயமானோ தாயம் வேலாயம் இமம் கா³த²ம் அபா⁴ஸி –

‘‘சாதுத்³த³ஸிம் பஞ்சத³ஸிம், யா ச பக்க²ஸ்ஸ அட்ட²மீ;

பாடிஹாரியபக்க²ஞ்ச, அட்ட²ங்க³ஸுஸமாக³தம்;

உபோஸத²ம் உபவஸேய்ய, யோபிஸ்ஸ மாதி³ஸோ நரோ’’தி.

‘‘ஸா கோ² பனேஸா, பி⁴க்க²வே, ஸக்கேன தே³வானமிந்தே³ன கா³தா² து³க்³கீ³தா ந ஸுகீ³தா து³ப்³பா⁴ஸிதா ந ஸுபா⁴ஸிதா. தம் கிஸ்ஸ ஹேது? ஸக்கோ ஹி, பி⁴க்க²வே, தே³வானமிந்தோ³ அபரிமுத்தோ ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி, அபரிமுத்தோ து³க்க²ஸ்மாதி வதா³மி.

‘‘யோ ச கோ² ஸோ, பி⁴க்க²வே, பி⁴க்கு² அரஹம் கீ²ணாஸவோ வுஸிதவா கதகரணீயோ ஓஹிதபா⁴ரோ அனுப்பத்தஸத³த்தோ² பரிக்கீ²ணப⁴வஸம்யோஜனோ ஸம்மத³ஞ்ஞா விமுத்தோ, தஸ்ஸ கோ² ஏதம், பி⁴க்க²வே, பி⁴க்கு²னோ கல்லம் வசனாய –

‘‘சாதுத்³த³ஸிம் பஞ்சத³ஸிம், யா ச பக்க²ஸ்ஸ அட்ட²மீ;

பாடிஹாரியபக்க²ஞ்ச, அட்ட²ங்க³ஸுஸமாக³தம்;

உபோஸத²ம் உபவஸேய்ய, யோபிஸ்ஸ மாதி³ஸோ நரோ’’தி.

‘‘தம் கிஸ்ஸ ஹேது? ஸோ ஹி, பி⁴க்க²வே, பி⁴க்கு² பரிமுத்தோ ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி, பரிமுத்தோ து³க்க²ஸ்மாதி வதா³மீ’’தி. அட்ட²மம்.

9. ஸுகு²மாலஸுத்தம்

39. ‘‘ஸுகு²மாலோ அஹம், பி⁴க்க²வே, பரமஸுகு²மாலோ அச்சந்தஸுகு²மாலோ. மம ஸுத³ம், பி⁴க்க²வே, பிது நிவேஸனே போக்க²ரணியோ காரிதா ஹோந்தி. ஏகத்த² ஸுத³ம், பி⁴க்க²வே, உப்பலம் வப்பதி [புப்ப²தி (ஸீ. பீ.)], ஏகத்த² பது³மம், ஏகத்த² புண்ட³ரீகம், யாவதே³வ மமத்தா²ய. ந கோ² பனஸ்ஸாஹம், பி⁴க்க²வே, அகாஸிகம் சந்த³னம் தா⁴ரேமி [காஸிகம் சந்த³னம் தா⁴ரேமி (ஸ்யா. கம். க.), அகாஸிகம் தா⁴ரேமி (?)]. காஸிகம், பி⁴க்க²வே, ஸு மே தம் வேட²னம் ஹோதி, காஸிகா கஞ்சுகா, காஸிகம் நிவாஸனம், காஸிகோ உத்தராஸங்கோ³. ரத்திந்தி³வம் [ரத்திதி³வம் (க.)] கோ² பன மே ஸு தம், பி⁴க்க²வே, ஸேதச்ச²த்தம் தா⁴ரீயதி – ‘மா நம் பு²ஸி ஸீதம் வா உண்ஹம் வா திணம் வா ரஜோ வா உஸ்ஸாவோ வா’’’தி.

‘‘தஸ்ஸ மய்ஹம், பி⁴க்க²வே, தயோ பாஸாதா³ அஹேஸும் – ஏகோ ஹேமந்திகோ, ஏகோ கி³ம்ஹிகோ, ஏகோ வஸ்ஸிகோ. ஸோ கோ² அஹம், பி⁴க்க²வே, வஸ்ஸிகே பாஸாதே³ வஸ்ஸிகே சத்தாரோ மாஸே நிப்புரிஸேஹி தூரியேஹி பரிசாரயமானோ [பரிசாரியமானோ (ஸ்யா. கம். பீ. க.)] ந ஹேட்டா²பாஸாத³ம் ஓரோஹாமி. யதா² கோ² பன, பி⁴க்க²வே, அஞ்ஞேஸம் நிவேஸனே தா³ஸகம்மகரபோரிஸஸ்ஸ கணாஜகம் போ⁴ஜனம் தீ³யதி பி³லங்க³து³தியம், ஏவமேவஸ்ஸு மே, பி⁴க்க²வே, பிது நிவேஸனே தா³ஸகம்மகரபோரிஸஸ்ஸ ஸாலிமம்ஸோத³னோ தீ³யதி.

‘‘தஸ்ஸ மய்ஹம், பி⁴க்க²வே, ஏவரூபாய இத்³தி⁴யா ஸமன்னாக³தஸ்ஸ ஏவரூபேன ச ஸுகு²மாலேன ஏதத³ஹோஸி – ‘அஸ்ஸுதவா கோ² புது²ஜ்ஜனோ அத்தனா ஜராத⁴ம்மோ ஸமானோ ஜரம் அனதீதோ பரம் ஜிண்ணம் தி³ஸ்வா அட்டீயதி ஹராயதி ஜிகு³ச்ச²தி அத்தானம்யேவ அதிஸித்வா, அஹம்பி கோ²ம்ஹி ஜராத⁴ம்மோ ஜரம் அனதீதோ. அஹஞ்சேவ [அஹஞ்சே (?)] கோ² பன ஜராத⁴ம்மோ ஸமானோ ஜரம் அனதீதோ பரம் ஜிண்ணம் தி³ஸ்வா அட்டீயேய்யம் ஹராயேய்யம் ஜிகு³ச்சே²ய்யம் ந மேதம் அஸ்ஸ பதிரூப’ந்தி. தஸ்ஸ மய்ஹம், பி⁴க்க²வே, இதி படிஸஞ்சிக்க²தோ யோ யோப்³ப³னே யோப்³ப³னமதோ³ ஸோ ஸப்³ப³ஸோ பஹீயி.

‘‘அஸ்ஸுதவா கோ² புது²ஜ்ஜனோ அத்தனா ப்³யாதி⁴த⁴ம்மோ ஸமானோ ப்³யாதி⁴ம் அனதீதோ பரம் ப்³யாதி⁴தம் தி³ஸ்வா அட்டீயதி ஹராயதி ஜிகு³ச்ச²தி அத்தானம்யேவ அதிஸித்வா – ‘அஹம்பி கோ²ம்ஹி ப்³யாதி⁴த⁴ம்மோ ப்³யாதி⁴ம் அனதீதோ, அஹஞ்சேவ கோ² பன ப்³யாதி⁴த⁴ம்மோ ஸமானோ ப்³யாதி⁴ம் அனதீதோ பரம் ப்³யாதி⁴கம் தி³ஸ்வா அட்டீயேய்யம் ஹராயேய்யம் ஜிகு³ச்சே²ய்யம், ந மேதம் அஸ்ஸ பதிரூப’ந்தி. தஸ்ஸ மய்ஹம், பி⁴க்க²வே, இதி படிஸஞ்சிக்க²தோ யோ ஆரோக்³யே ஆரோக்³யமதோ³ ஸோ ஸப்³ப³ஸோ பஹீயி.

‘‘அஸ்ஸுதவா கோ² புது²ஜ்ஜனோ அத்தனா மரணத⁴ம்மோ ஸமானோ மரணம் அனதீதோ பரம் மதம் தி³ஸ்வா அட்டீயதி ஹராயதி ஜிகு³ச்ச²தி அத்தானம்யேவ அதிஸித்வா – ‘அஹம்பி கோ²ம்ஹி மரணத⁴ம்மோ, மரணம் அனதீதோ, அஹம் சேவ கோ² பன மரணத⁴ம்மோ ஸமானோ மரணம் அனதீதோ பரம் மதம் தி³ஸ்வா அட்டீயேய்யம் ஹராயேய்யம் ஜிகு³ச்சே²ய்யம், ந மேதம் அஸ்ஸ பதிரூப’ந்தி. தஸ்ஸ மய்ஹம், பி⁴க்க²வே, இதி படிஸஞ்சிக்க²தோ யோ ஜீவிதே ஜீவிதமதோ³ ஸோ ஸப்³ப³ஸோ பஹீயீ’’தி.

‘‘தயோமே, பி⁴க்க²வே, மதா³. கதமே தயோ? யோப்³ப³னமதோ³, ஆரோக்³யமதோ³, ஜீவிதமதோ³. யோப்³ப³னமத³மத்தோ வா, பி⁴க்க²வே, அஸ்ஸுதவா புது²ஜ்ஜனோ காயேன து³ச்சரிதம் சரதி, வாசாய து³ச்சரிதம் சரதி, மனஸா து³ச்சரிதம் சரதி. ஸோ காயேன து³ச்சரிதம் சரித்வா, வாசாய து³ச்சரிதம் சரித்வா, மனஸா து³ச்சரிதம் சரித்வா காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி. ஆரோக்³யமத³மத்தோ வா, பி⁴க்க²வே, அஸ்ஸுதவா புது²ஜ்ஜனோ…பே… ஜீவிதமத³மத்தோ வா, பி⁴க்க²வே, அஸ்ஸுதவா புது²ஜ்ஜனோ காயேன து³ச்சரிதம் சரதி, வாசாய து³ச்சரிதம் சரதி, மனஸா து³ச்சரிதம் சரதி. ஸோ காயேன து³ச்சரிதம் சரித்வா, வாசாய து³ச்சரிதம் சரித்வா, மனஸா து³ச்சரிதம் சரித்வா காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி.

‘‘யோப்³ப³னமத³மத்தோ வா, பி⁴க்க²வே, பி⁴க்கு² ஸிக்க²ம் பச்சக்கா²ய ஹீனாயாவத்ததி. ஆரோக்³யமத³மத்தோ வா, பி⁴க்க²வே, பி⁴க்கு²…பே… ஜீவிதமத³மத்தோ வா, பி⁴க்க²வே, பி⁴க்கு² ஸிக்க²ம் பச்சக்கா²ய ஹீனாயாவத்ததீ’’தி.

‘‘ப்³யாதி⁴த⁴ம்மா ஜராத⁴ம்மா, அதோ² மரணத⁴ம்மினோ;

யதா²த⁴ம்மா [ப்³யாதி⁴த⁴ம்மோ ஜராத⁴ம்மோ, அதோ² மரணத⁴ம்மிகோ; யதா² த⁴ம்மோ (க.)] ததா²ஸந்தா, ஜிகு³ச்ச²ந்தி புது²ஜ்ஜனா.

‘‘அஹஞ்சே தம் ஜிகு³ச்சே²ய்யம், ஏவம்த⁴ம்மேஸு பாணிஸு;

ந மேதம் பதிரூபஸ்ஸ, மம ஏவம் விஹாரினோ.

‘‘ஸோஹம் ஏவம் விஹரந்தோ, ஞத்வா த⁴ம்மம் நிரூபதி⁴ம்;

ஆரோக்³யே யோப்³ப³னஸ்மிஞ்ச, ஜீவிதஸ்மிஞ்ச யே மதா³.

‘‘ஸப்³பே³ மதே³ அபி⁴போ⁴ஸ்மி [அதீதோஸ்மி (க.)], நேக்க²ம்மே த³ட்டு² கே²மதம்;

தஸ்ஸ மே அஹு உஸ்ஸாஹோ, நிப்³பா³னம் அபி⁴பஸ்ஸதோ.

‘‘நாஹம் ப⁴ப்³போ³ ஏதரஹி, காமானி படிஸேவிதும்;

அனிவத்தி ப⁴விஸ்ஸாமி, ப்³ரஹ்மசரியபராயணோ’’தி. நவமம்;

10. ஆதி⁴பதேய்யஸுத்தம்

40. ‘‘தீணிமானி, பி⁴க்க²வே, ஆதி⁴பதேய்யானி. கதமானி தீணி? அத்தாதி⁴பதேய்யம், லோகாதி⁴பதேய்யம், த⁴ம்மாதி⁴பதேய்யம். கதமஞ்ச, பி⁴க்க²வே, அத்தாதி⁴பதேய்யம்? இத⁴, பி⁴க்க²வே, பி⁴க்கு² அரஞ்ஞக³தோ வா ருக்க²மூலக³தோ வா ஸுஞ்ஞாகா³ரக³தோ வா இதி படிஸஞ்சிக்க²தி – ‘ந கோ² பனாஹம் சீவரஹேது அகா³ரஸ்மா அனகா³ரியம் பப்³ப³ஜிதோ. ந பிண்ட³பாதஹேது, ந ஸேனாஸனஹேது, ந இதிப⁴வாப⁴வஹேது அகா³ரஸ்மா அனகா³ரியம் பப்³ப³ஜிதோ. அபி ச கோ²ம்ஹி ஓதிண்ணோ ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி, து³க்கோ²திண்ணோ து³க்க²பரேதோ. அப்பேவ நாம இமஸ்ஸ கேவலஸ்ஸ து³க்க²க்க²ந்த⁴ஸ்ஸ அந்தகிரியா பஞ்ஞாயேதா²தி. அஹஞ்சேவ கோ² பன யாதி³ஸகே [யாதி³ஸகே வா (ஸீ. பீ. க.)] காமே ஓஹாய அகா³ரஸ்மா அனகா³ரியம் பப்³ப³ஜிதோ தாதி³ஸகே வா [ச (க.)] காமே பரியேஸேய்யம் ததோ வா [ச (க.)] பாபிட்ட²தரே, ந மேதம் பதிரூப’ந்தி. ஸோ இதி படிஸஞ்சிக்க²தி – ‘ஆரத்³த⁴ம் கோ² பன மே வீரியம் ப⁴விஸ்ஸதி அஸல்லீனம், உபட்டி²தா ஸதி அஸம்முட்டா², பஸ்ஸத்³தோ⁴ காயோ அஸாரத்³தோ⁴, ஸமாஹிதம் சித்தம் ஏகக்³க³’ந்தி. ஸோ அத்தானம்யேவ அதி⁴பதிம் கரித்வா அகுஸலம் பஜஹதி, குஸலம் பா⁴வேதி, ஸாவஜ்ஜம் பஜஹதி, அனவஜ்ஜம் பா⁴வேதி, ஸுத்³த⁴ம் அத்தானம் பரிஹரதி. இத³ம் வுச்சதி, பி⁴க்க²வே, அத்தாதி⁴பதேய்யம்.

‘‘கதமஞ்ச, பி⁴க்க²வே, லோகாதி⁴பதேய்யம்? இத⁴, பி⁴க்க²வே, பி⁴க்கு² அரஞ்ஞக³தோ வா ருக்க²மூலக³தோ வா ஸுஞ்ஞாகா³ரக³தோ வா இதி படிஸஞ்சிக்க²தி – ‘ந கோ² பனாஹம் சீவரஹேது அகா³ரஸ்மா அனகா³ரியம் பப்³ப³ஜிதோ. ந பிண்ட³பாதஹேது, ந ஸேனாஸனஹேது, ந இதிப⁴வாப⁴வஹேது அகா³ரஸ்மா அனகா³ரியம் பப்³ப³ஜிதோ. அபி ச கோ²ம்ஹி ஓதிண்ணோ ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி, து³க்கோ²திண்ணோ து³க்க²பரேதோ. அப்பேவ நாம இமஸ்ஸ கேவலஸ்ஸ து³க்க²க்க²ந்த⁴ஸ்ஸ அந்தகிரியா பஞ்ஞாயேதா²’தி. அஹஞ்சேவ கோ² பன ஏவம் பப்³ப³ஜிதோ ஸமானோ காமவிதக்கம் வா விதக்கேய்யம், ப்³யாபாத³விதக்கம் வா விதக்கேய்யம், விஹிம்ஸாவிதக்கம் வா விதக்கேய்யம், மஹா கோ² பனாயம் லோகஸன்னிவாஸோ. மஹந்தஸ்மிம் கோ² பன லோகஸன்னிவாஸே ஸந்தி ஸமணப்³ராஹ்மணா இத்³தி⁴மந்தோ தி³ப்³ப³சக்கு²கா பரசித்தவிது³னோ. தே தூ³ரதோபி பஸ்ஸந்தி, ஆஸன்னாபி ந தி³ஸ்ஸந்தி, சேதஸாபி சித்தம் பஜானந்தி [ஜானந்தி (க.)]. தேபி மம் ஏவம் ஜானேய்யும் – ‘பஸ்ஸத², போ⁴, இமம் குலபுத்தம் ஸத்³தா⁴ அகா³ரஸ்மா அனகா³ரியம் பப்³ப³ஜிதோ ஸமானோ வோகிண்ணோ விஹரதி பாபகேஹி அகுஸலேஹி த⁴ம்மேஹீ’தி. தே³வதாபி கோ² ஸந்தி இத்³தி⁴மந்தினியோ தி³ப்³ப³சக்கு²கா பரசித்தவிது³னியோ. தா தூ³ரதோபி பஸ்ஸந்தி, ஆஸன்னாபி ந தி³ஸ்ஸந்தி, சேதஸாபி சித்தம் ஜானந்தி. தாபி மம் ஏவம் ஜானேய்யும் – ‘பஸ்ஸத², போ⁴, இமம் குலபுத்தம் ஸத்³தா⁴ அகா³ரஸ்மா அனகா³ரியம் பப்³ப³ஜிதோ ஸமானோ வோகிண்ணோ விஹரதி பாபகேஹி அகுஸலேஹி த⁴ம்மேஹீ’தி. ஸோ இதி படிஸஞ்சிக்க²தி – ‘ஆரத்³த⁴ம் கோ² பன மே வீரியம் ப⁴விஸ்ஸதி அஸல்லீனம், உபட்டி²தா ஸதி அஸம்முட்டா², பஸ்ஸத்³தோ⁴ காயோ அஸாரத்³தோ⁴, ஸமாஹிதம் சித்தம் ஏகக்³க³’ந்தி. ஸோ லோகம்யேவ அதி⁴பதிம் கரித்வா அகுஸலம் பஜஹதி, குஸலம் பா⁴வேதி, ஸாவஜ்ஜம் பஜஹதி, அனவஜ்ஜம் பா⁴வேதி, ஸுத்³த⁴ம் அத்தானம் பரிஹரதி. இத³ம் வுச்சதி, பி⁴க்க²வே, லோகாதி⁴பதேய்யம்.

‘‘கதமஞ்ச, பி⁴க்க²வே, த⁴ம்மாதி⁴பதேய்யம்? இத⁴, பி⁴க்க²வே, பி⁴க்கு² அரஞ்ஞக³தோ வா ருக்க²மூலக³தோ வா ஸுஞ்ஞாகா³ரக³தோ வா இதி படிஸஞ்சிக்க²தி – ‘ந கோ² பனாஹம் சீவரஹேது அகா³ரஸ்மா அனகா³ரியம் பப்³ப³ஜிதோ. ந பிண்ட³பாதஹேது, ந ஸேனாஸனஹேது, ந இதிப⁴வாப⁴வஹேது அகா³ரஸ்மா அனகா³ரியம் பப்³ப³ஜிதோ. அபி ச கோ²ம்ஹி ஓதிண்ணோ ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி, து³க்கோ²திண்ணோ து³க்க²பரேதோ. அப்பேவ நாம இமஸ்ஸ கேவலஸ்ஸ து³க்க²க்க²ந்த⁴ஸ்ஸ அந்தகிரியா பஞ்ஞாயேதா²தி. ஸ்வாக்கா²தோ ப⁴க³வதா த⁴ம்மோ ஸந்தி³ட்டி²கோ அகாலிகோ ஏஹிபஸ்ஸிகோ ஓபனேய்யிகோ பச்சத்தம் வேதி³தப்³போ³ விஞ்ஞூஹீதி. ஸந்தி கோ² பன மே ஸப்³ரஹ்மசாரீ ஜானம் பஸ்ஸம் விஹரந்தி. அஹஞ்சேவ கோ² பன ஏவம் ஸ்வாக்கா²தே த⁴ம்மவினயே பப்³ப³ஜிதோ ஸமானோ குஸீதோ விஹரேய்யம் பமத்தோ, ந மேதம் அஸ்ஸ பதிரூப’ந்தி. ஸோ இதி படிஸஞ்சிக்க²தி – ‘ஆரத்³த⁴ம் கோ² பன மே வீரியம் ப⁴விஸ்ஸதி அஸல்லீனம், உபட்டி²தா ஸதி அஸம்முட்டா², பஸ்ஸத்³தோ⁴ காயோ அஸாரத்³தோ⁴, ஸமாஹிதம் சித்தம் ஏகக்³க³’ந்தி. ஸோ த⁴ம்மம்யேவ அதி⁴பதிம் கரித்வா அகுஸலம் பஜஹதி, குஸலம் பா⁴வேதி, ஸாவஜ்ஜம் பஜஹதி, அனவஜ்ஜம் பா⁴வேதி, ஸுத்³த⁴ம் அத்தானம் பரிஹரதி. இத³ம் வுச்சதி, பி⁴க்க²வே, த⁴ம்மாதி⁴பதேய்யம். இமானி கோ², பி⁴க்க²வே, தீணி ஆதி⁴பதேய்யானீ’’தி.

‘‘நத்தி² லோகே ரஹோ நாம, பாபகம்மம் பகுப்³ப³தோ;

அத்தா தே புரிஸ ஜானாதி, ஸச்சம் வா யதி³ வா முஸா.

‘‘கல்யாணம் வத போ⁴ ஸக்கி², அத்தானம் அதிமஞ்ஞஸி;

யோ ஸந்தம் அத்தனி பாபம், அத்தானம் பரிகூ³ஹஸி.

‘‘பஸ்ஸந்தி தே³வா ச ததா²க³தா ச,

லோகஸ்மிம் பா³லம் விஸமம் சரந்தம்;

தஸ்மா ஹி அத்தாதி⁴பதேய்யகோ ச [அத்தாதி⁴பகோ ஸகோ சரே (ஸீ. ஸ்யா. கம். பீ.)],

லோகாதி⁴போ ச நிபகோ ச ஜா²யீ.

‘‘த⁴ம்மாதி⁴போ ச அனுத⁴ம்மசாரீ,

ந ஹீயதி ஸச்சபரக்கமோ முனி;

பஸய்ஹ மாரம் அபி⁴பு⁴ய்ய அந்தகம்,

யோ ச பு²ஸீ ஜாதிக்க²யம் பதா⁴னவா;

ஸோ தாதி³ஸோ லோகவிதூ³ ஸுமேதோ⁴,

ஸப்³பே³ஸு த⁴ம்மேஸு அதம்மயோ முனீ’’தி. த³ஸமம்;

தே³வதூ³தவக்³கோ³ சதுத்தோ².