7. ஜிகு³ச்சி²தப்³ப³ஸுத்தம்

27. ‘‘தயோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே தயோ? அத்தி², பி⁴க்க²வே, புக்³க³லோ ஜிகு³ச்சி²தப்³போ³ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³. அத்தி², பி⁴க்க²வே, புக்³க³லோ அஜ்ஜு²பேக்கி²தப்³போ³ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³. அத்தி², பி⁴க்க²வே, புக்³க³லோ ஸேவிதப்³போ³ ப⁴ஜிதப்³போ³ பயிருபாஸிதப்³போ³. கதமோ ச, பி⁴க்க²வே, புக்³க³லோ ஜிகு³ச்சி²தப்³போ³ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³? இத⁴, பி⁴க்க²வே, ஏகச்சோ புக்³க³லோ து³ஸ்ஸீலோ ஹோதி பாபத⁴ம்மோ அஸுசி ஸங்கஸ்ஸரஸமாசாரோ படிச்ச²ன்னகம்மந்தோ, அஸ்ஸமணோ ஸமணபடிஞ்ஞோ, அப்³ரஹ்மசாரீ ப்³ரஹ்மசாரிபடிஞ்ஞோ, அந்தோபூதி அவஸ்ஸுதோ கஸம்பு³ஜாதோ. ஏவரூபோ, பி⁴க்க²வே, புக்³க³லோ ஜிகு³ச்சி²தப்³போ³ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³. தம் கிஸ்ஸ ஹேது? கிஞ்சாபி, பி⁴க்க²வே, ஏவரூபஸ்ஸ புக்³க³லஸ்ஸ ந தி³ட்டா²னுக³திம் ஆபஜ்ஜதி, அத² கோ² நம் பாபகோ கித்திஸத்³தோ³ அப்³பு⁴க்³க³ச்ச²தி – ‘பாபமித்தோ புரிஸபுக்³க³லோ பாபஸஹாயோ பாபஸம்பவங்கோ’தி. ஸேய்யதா²பி, பி⁴க்க²வே, அஹி கூ³த²க³தோ கிஞ்சாபி ந த³ம்ஸதி [ட³ம்ஸதி (ஸீ. ஸ்யா.), ட³ஸ்ஸதி (பீ.)], அத² கோ² நம் மக்கே²தி; ஏவமேவம் கோ², பி⁴க்க²வே, கிஞ்சாபி ஏவரூபஸ்ஸ புக்³க³லஸ்ஸ ந தி³ட்டா²னுக³திம் ஆபஜ்ஜதி, அத² கோ² நம் பாபகோ கித்திஸத்³தோ³ அப்³பு⁴க்³க³ச்ச²தி – ‘பாபமித்தோ புரிஸபுக்³க³லோ பாபஸஹாயோ பாபஸம்பவங்கோ’தி. தஸ்மா ஏவரூபோ புக்³க³லோ ஜிகு³ச்சி²தப்³போ³ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³.

‘‘கதமோ ச, பி⁴க்க²வே, புக்³க³லோ அஜ்ஜு²பேக்கி²தப்³போ³ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³? இத⁴, பி⁴க்க²வே, ஏகச்சோ புக்³க³லோ கோத⁴னோ ஹோதி உபாயாஸப³ஹுலோ, அப்பம்பி வுத்தோ ஸமானோ அபி⁴ஸஜ்ஜதி குப்பதி ப்³யாபஜ்ஜதி பதித்தீ²யதி, கோபஞ்ச தோ³ஸஞ்ச அப்பச்சயஞ்ச பாதுகரோதி. ஸேய்யதா²பி, பி⁴க்க²வே, து³ட்டா²ருகோ கட்டே²ன வா கட²லாய வா க⁴ட்டிதோ பி⁴ய்யோஸோமத்தாய ஆஸவம் தே³தி; ஏவமேவம் கோ², பி⁴க்க²வே…பே… ஸேய்யதா²பி, பி⁴க்க²வே, திந்து³காலாதம் கட்டே²ன வா கட²லாய வா க⁴ட்டிதம் பி⁴ய்யோஸோமத்தாய சிச்சிடாயதி சிடிசிடாயதி; ஏவமேவம் கோ² பி⁴க்க²வே…பே… ஸேய்யதா²பி, பி⁴க்க²வே, கூ³த²கூபோ கட்டே²ன வா கட²லாய வா க⁴ட்டிதோ பி⁴ய்யோஸோமத்தாய து³க்³க³ந்தோ⁴ ஹோதி; ஏவமேவம் கோ², பி⁴க்க²வே, இதே⁴கச்சோ புக்³க³லோ கோத⁴னோ ஹோதி உபாயாஸப³ஹுலோ, அப்பம்பி வுத்தோ ஸமானோ அபி⁴ஸஜ்ஜதி குப்பதி ப்³யாபஜ்ஜதி பதித்தீ²யதி, கோபஞ்ச தோ³ஸஞ்ச அப்பச்சயஞ்ச பாதுகரோதி. ஏவரூபோ, பி⁴க்க²வே, புக்³க³லோ அஜ்ஜு²பேக்கி²தப்³போ³ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³. தம் கிஸ்ஸ ஹேது? அக்கோஸேய்யபி மம் பரிபா⁴ஸேய்யபி மம் அனத்த²ம்பி மம் கரேய்யாதி. தஸ்மா ஏவரூபோ புக்³க³லோ அஜ்ஜு²பேக்கி²தப்³போ³ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³.

‘‘கதமோ ச, பி⁴க்க²வே, புக்³க³லோ ஸேவிதப்³போ³ ப⁴ஜிதப்³போ³ பயிருபாஸிதப்³போ³? இத⁴, பி⁴க்க²வே, ஏகச்சோ புக்³க³லோ ஸீலவா ஹோதி கல்யாணத⁴ம்மோ. ஏவரூபோ, பி⁴க்க²வே, புக்³க³லோ ஸேவிதப்³போ³ ப⁴ஜிதப்³போ³ பயிருபாஸிதப்³போ³. தம் கிஸ்ஸ ஹேது? கிஞ்சாபி, பி⁴க்க²வே, ஏவரூபஸ்ஸ புக்³க³லஸ்ஸ ந தி³ட்டா²னுக³திம் ஆபஜ்ஜதி, அத² கோ² நம் கல்யாணோ கித்திஸத்³தோ³ அப்³பு⁴க்³க³ச்ச²தி – ‘கல்யாணமித்தோ புரிஸபுக்³க³லோ கல்யாணஸஹாயோ கல்யாணஸம்பவங்கோ’தி. தஸ்மா ஏவரூபோ புக்³க³லோ ஸேவிதப்³போ³ ப⁴ஜிதப்³போ³ பயிருபாஸிதப்³போ³. ‘இமே கோ², பி⁴க்க²வே, தயோ புக்³க³லா ஸந்தோ ஸம்விஜ்ஜமானா லோகஸ்மி’’’ந்தி.

‘‘நிஹீயதி புரிஸோ நிஹீனஸேவீ,

ந ச ஹாயேத² கதா³சி துல்யஸேவீ;

ஸேட்ட²முபனமம் உதே³தி கி²ப்பம்,

தஸ்மா அத்தனோ உத்தரிம் ப⁴ஜேதா²’’தி. ஸத்தமம்;