8. கூ³த²பா⁴ணீஸுத்தம்

28. ‘‘தயோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே தயோ? கூ³த²பா⁴ணீ, புப்ப²பா⁴ணீ, மது⁴பா⁴ணீ. கதமோ ச, பி⁴க்க²வே, புக்³க³லோ கூ³த²பா⁴ணீ? இத⁴, பி⁴க்க²வே, ஏகச்சோ புக்³க³லோ ஸப⁴க்³க³தோ வா பரிஸக்³க³தோ வா [ஸபா⁴க³தோ வா பரிஸாக³தோ வா (ஸ்யா. கம்.)] ஞாதிமஜ்ஜ²க³தோ வா பூக³மஜ்ஜ²க³தோ வா ராஜகுலமஜ்ஜ²க³தோ வா அபி⁴னீதோ ஸக்கி²புட்டோ² – ‘ஏஹம்போ⁴ புரிஸ, யம் ஜானாஸி தம் வதே³ஹீ’தி. ஸோ அஜானம் வா ஆஹ ‘ஜானாமீ’தி, ஜானம் வா ஆஹ ‘ந ஜானாமீ’தி, அபஸ்ஸம் வா ஆஹ ‘பஸ்ஸாமீ’தி, பஸ்ஸம் வா ஆஹ ‘ந பஸ்ஸாமீ’தி [ம. நி. 1.440; பு. ப. 91]; இதி அத்தஹேது வா பரஹேது வா ஆமிஸகிஞ்சிக்க²ஹேது வா ஸம்பஜானமுஸா பா⁴ஸிதா ஹோதி. அயம் வுச்சதி, பி⁴க்க²வே, புக்³க³லோ கூ³த²பா⁴ணீ.

‘‘கதமோ ச, பி⁴க்க²வே, புக்³க³லோ புப்ப²பா⁴ணீ? இத⁴, பி⁴க்க²வே, ஏகச்சோ புக்³க³லோ ஸப⁴க்³க³தோ வா பரிஸக்³க³தோ வா ஞாதிமஜ்ஜ²க³தோ வா பூக³மஜ்ஜ²க³தோ வா ராஜகுலமஜ்ஜ²க³தோ வா அபி⁴னீதோ ஸக்கி²புட்டோ² – ‘ஏஹம்போ⁴ புரிஸ, யம் பஜானாஸி தம் வதே³ஹீ’தி, ஸோ அஜானம் வா ஆஹ ‘ந ஜானாமீ’தி, ஜானம் வா ஆஹ ‘ஜானாமீ’தி, அபஸ்ஸம் வா ஆஹ ‘ந பஸ்ஸாமீ’தி, பஸ்ஸம் வா ஆஹ ‘பஸ்ஸாமீ’தி; இதி அத்தஹேது வா பரஹேது வா ஆமிஸகிஞ்சிக்க²ஹேது வா ந ஸம்பஜானமுஸா பா⁴ஸிதா ஹோதி. அயம் வுச்சதி, பி⁴க்க²வே, புக்³க³லோ புப்ப²பா⁴ணீ.

‘‘கதமோ ச, பி⁴க்க²வே, புக்³க³லோ மது⁴பா⁴ணீ? இத⁴, பி⁴க்க²வே, ஏகச்சோ புக்³க³லோ ப²ருஸம் வாசம் பஹாய ப²ருஸாய வாசாய படிவிரதோ ஹோதி; யா ஸா வாசா நேலா கண்ணஸுகா² பேமனீயா ஹத³யங்க³மா போரீ ப³ஹுஜனகந்தா ப³ஹுஜனமனாபா ததா²ரூபிம் வாசம் பா⁴ஸிதா ஹோதி. அயம் வுச்சதி, பி⁴க்க²வே, புக்³க³லோ மது⁴பா⁴ணீ. இமே கோ², பி⁴க்க²வே, தயோ புக்³க³லா ஸந்தோ ஸம்விஜ்ஜமானா லோகஸ்மி’’ந்தி. அட்ட²மம்.