4. ப³ஹுகாரஸுத்தம்

24. ‘‘தயோமே, பி⁴க்க²வே, புக்³க³லா புக்³க³லஸ்ஸ ப³ஹுகாரா. கதமே தயோ? யம், பி⁴க்க²வே, புக்³க³லம் ஆக³ம்ம புக்³க³லோ பு³த்³த⁴ம் ஸரணம் க³தோ ஹோதி, த⁴ம்மம் ஸரணம் க³தோ ஹோதி, ஸங்க⁴ம் ஸரணம் க³தோ ஹோதி; அயம், பி⁴க்க²வே, புக்³க³லோ இமஸ்ஸ புக்³க³லஸ்ஸ ப³ஹுகாரோ.

‘‘புன சபரம், பி⁴க்க²வே, யம் புக்³க³லம் ஆக³ம்ம புக்³க³லோ ‘இத³ம் து³க்க²’ந்தி யதா²பூ⁴தம் பஜானாதி, ‘அயம் து³க்க²ஸமுத³யோ’தி யதா²பூ⁴தம் பஜானாதி, ‘அயம் து³க்க²னிரோதோ⁴’தி யதா²பூ⁴தம் பஜானாதி, ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானாதி; அயம், பி⁴க்க²வே, புக்³க³லோ இமஸ்ஸ புக்³க³லஸ்ஸ ப³ஹுகாரோ.

‘‘புன சபரம், பி⁴க்க²வே, யம் புக்³க³லம் ஆக³ம்ம புக்³க³லோ ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி; அயம், பி⁴க்க²வே, புக்³க³லோ இமஸ்ஸ புக்³க³லஸ்ஸ ப³ஹுகாரோ. இமே கோ², பி⁴க்க²வே, தயோ புக்³க³லா புக்³க³லஸ்ஸ ப³ஹுகாரா.

‘‘இமேஹி ச பன, பி⁴க்க²வே, தீஹி புக்³க³லேஹி இமஸ்ஸ புக்³க³லஸ்ஸ நத்த²ஞ்ஞோ புக்³க³லோ ப³ஹுகாரோதி வதா³மி. இமேஸம் பன, பி⁴க்க²வே, திண்ணம் புக்³க³லானம் இமினா புக்³க³லேன ந ஸுப்பதிகாரம் வதா³மி, யதி³த³ம் அபி⁴வாத³னபச்சுட்டா²னஅஞ்ஜலிகம்மஸாமீசிகம்மசீவரபிண்ட³பாதஸேனாஸன-கி³லானபச்சயபே⁴ஸஜ்ஜபரிக்கா²ரானுப்பதா³னேனா’’தி. சதுத்த²ம்.