5. வஜிரூபமஸுத்தம்

25. ‘‘தயோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே தயோ? அருகூபமசித்தோ புக்³க³லோ, விஜ்ஜூபமசித்தோ புக்³க³லோ, வஜிரூபமசித்தோ புக்³க³லோ. கதமோ ச, பி⁴க்க²வே, அருகூபமசித்தோ புக்³க³லோ? இத⁴, பி⁴க்க²வே, ஏகச்சோ புக்³க³லோ கோத⁴னோ ஹோதி உபாயாஸப³ஹுலோ அப்பம்பி வுத்தோ ஸமானோ அபி⁴ஸஜ்ஜதி குப்பதி ப்³யாபஜ்ஜதி பதித்தீ²யதி கோபஞ்ச தோ³ஸஞ்ச அப்பச்சயஞ்ச பாதுகரோதி. ஸேய்யதா²பி, பி⁴க்க²வே, து³ட்டா²ருகோ [து³ட்டா²ருகா (ஸீ.)] கட்டே²ன வா கட²லாய [கத²லாய (ஸ்யா. கம். க.), கட²லேன-கத²லேன (அட்ட²கதா²)] வா க⁴ட்டிதோ [க⁴ட்டிதா (ஸீ.)] பி⁴ய்யோஸோமத்தாய ஆஸவம் தே³தி [அஸ்ஸவனோதி (ஸீ.)]; ஏவமேவம் கோ², பி⁴க்க²வே, இதே⁴கச்சோ புக்³க³லோ கோத⁴னோ ஹோதி உபாயாஸப³ஹுலோ அப்பம்பி வுத்தோ ஸமானோ அபி⁴ஸஜ்ஜதி குப்பதி ப்³யாபஜ்ஜதி பதித்தீ²யதி கோபஞ்ச தோ³ஸஞ்ச அப்பச்சயஞ்ச பாதுகரோதி. அயம் வுச்சதி, பி⁴க்க²வே, அருகூபமசித்தோ புக்³க³லோ.

‘‘கதமோ ச, பி⁴க்க²வே, விஜ்ஜூபமசித்தோ புக்³க³லோ? இத⁴, பி⁴க்க²வே, ஏகச்சோ புக்³க³லோ ‘இத³ம் து³க்க²’ந்தி யதா²பூ⁴தம் பஜானாதி, ‘அயம் து³க்க²ஸமுத³யோ’தி யதா²பூ⁴தம் பஜானாதி, ‘அயம் து³க்க²னிரோதோ⁴’தி யதா²பூ⁴தம் பஜானாதி, ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானாதி. ஸேய்யதா²பி பி⁴க்க²வே, சக்கு²மா புரிஸோ ரத்தந்த⁴காரதிமிஸாயம் விஜ்ஜந்தரிகாய ரூபானி பஸ்ஸேய்ய; ஏவமேவம் கோ², பி⁴க்க²வே, இதே⁴கச்சோ புக்³க³லோ ‘இத³ம் து³க்க²’ந்தி யதா²பூ⁴தம் பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானாதி. அயம் வுச்சதி, பி⁴க்க²வே, விஜ்ஜூபமசித்தோ புக்³க³லோ.

‘‘கதமோ ச, பி⁴க்க²வே, வஜிரூபமசித்தோ புக்³க³லோ? இத⁴, பி⁴க்க²வே, ஏகச்சோ புக்³க³லோ ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. ஸேய்யதா²பி, பி⁴க்க²வே, வஜிரஸ்ஸ நத்தி² கிஞ்சி அபே⁴ஜ்ஜம் மணி வா பாஸாணோ வா; ஏவமேவம் கோ², பி⁴க்க²வே, இதே⁴கச்சோ புக்³க³லோ ஆஸவானம் க²யா…பே… உபஸம்பஜ்ஜ விஹரதி. அயம் வுச்சதி, பி⁴க்க²வே, வஜிரூபமசித்தோ புக்³க³லோ. ‘இமே கோ², பி⁴க்க²வே, தயோ புக்³க³லா ஸந்தோ ஸம்விஜ்ஜமானா லோகஸ்மி’’’ந்தி [பு. ப. 102]. பஞ்சமம்.