2. கி³லானஸுத்தம்

22. [பு. ப. 94] ‘‘தயோமே, பி⁴க்க²வே, கி³லானா ஸந்தோ ஸம்விஜ்ஜமானா லோகஸ்மிம். கதமே தயோ? இத⁴, பி⁴க்க²வே, ஏகச்சோ கி³லானோ லப⁴ந்தோ வா ஸப்பாயானி போ⁴ஜனானி அலப⁴ந்தோ வா ஸப்பாயானி போ⁴ஜனானி, லப⁴ந்தோ வா ஸப்பாயானி பே⁴ஸஜ்ஜானி அலப⁴ந்தோ வா ஸப்பாயானி பே⁴ஸஜ்ஜானி, லப⁴ந்தோ வா பதிரூபம் உபட்டா²கம் அலப⁴ந்தோ வா பதிரூபம் உபட்டா²கம் நேவ வுட்டா²தி தம்ஹா ஆபா³தா⁴.

‘‘இத⁴ பன, பி⁴க்க²வே, ஏகச்சோ கி³லானோ லப⁴ந்தோ வா ஸப்பாயானி போ⁴ஜனானி அலப⁴ந்தோ வா ஸப்பாயானி போ⁴ஜனானி, லப⁴ந்தோ வா ஸப்பாயானி பே⁴ஸஜ்ஜானி அலப⁴ந்தோ வா ஸப்பாயானி பே⁴ஸஜ்ஜானி, லப⁴ந்தோ வா பதிரூபம் உபட்டா²கம் அலப⁴ந்தோ வா பதிரூபம் உபட்டா²கம் வுட்டா²தி தம்ஹா ஆபா³தா⁴.

‘‘இத⁴ பன, பி⁴க்க²வே, ஏகச்சோ கி³லானோ லப⁴ந்தோவ ஸப்பாயானி போ⁴ஜனானி நோ அலப⁴ந்தோ, லப⁴ந்தோவ ஸப்பாயானி பே⁴ஸஜ்ஜானி நோ அலப⁴ந்தோ, லப⁴ந்தோவ பதிரூபம் உபட்டா²கம் நோ அலப⁴ந்தோ வுட்டா²தி தம்ஹா ஆபா³தா⁴.

‘‘தத்ர, பி⁴க்க²வே, ய்வாயம் கி³லானோ லப⁴ந்தோவ ஸப்பாயானி போ⁴ஜனானி நோ அலப⁴ந்தோ, லப⁴ந்தோவ ஸப்பாயானி பே⁴ஸஜ்ஜானி நோ அலப⁴ந்தோ, லப⁴ந்தோவ பதிரூபம் உபட்டா²கம் நோ அலப⁴ந்தோ வுட்டா²தி தம்ஹா ஆபா³தா⁴, இமம் கோ², பி⁴க்க²வே, கி³லானம் படிச்ச கி³லானப⁴த்தம் அனுஞ்ஞாதம் கி³லானபே⁴ஸஜ்ஜம் அனுஞ்ஞாதம் கி³லானுபட்டா²கோ அனுஞ்ஞாதோ. இமஞ்ச பன, பி⁴க்க²வே, கி³லானம் படிச்ச அஞ்ஞேபி கி³லானா உபட்டா²தப்³பா³. இமே கோ², பி⁴க்க²வே, தயோ கி³லானா ஸந்தோ ஸம்விஜ்ஜமானா லோகஸ்மிம்.

‘‘ஏவமேவம் கோ², பி⁴க்க²வே, தயோமே கி³லானூபமா புக்³க³லா ஸந்தோ ஸம்விஜ்ஜமானா லோகஸ்மிம். கதமே தயோ? இத⁴, பி⁴க்க²வே, ஏகச்சோ புக்³க³லோ லப⁴ந்தோ வா ததா²க³தம் த³ஸ்ஸனாய அலப⁴ந்தோ வா ததா²க³தம் த³ஸ்ஸனாய, லப⁴ந்தோ வா ததா²க³தப்பவேதி³தம் த⁴ம்மவினயம் ஸவனாய அலப⁴ந்தோ வா ததா²க³தப்பவேதி³தம் த⁴ம்மவினயம் ஸவனாய நேவ ஓக்கமதி நியாமம் குஸலேஸு த⁴ம்மேஸு ஸம்மத்தம்.

‘‘இத⁴, பன, பி⁴க்க²வே, ஏகச்சோ புக்³க³லோ லப⁴ந்தோ வா ததா²க³தம் த³ஸ்ஸனாய அலப⁴ந்தோ வா ததா²க³தம் த³ஸ்ஸனாய, லப⁴ந்தோ வா ததா²க³தப்பவேதி³தம் த⁴ம்மவினயம் ஸவனாய அலப⁴ந்தோ வா ததா²க³தப்பவேதி³தம் த⁴ம்மவினயம் ஸவனாய ஓக்கமதி நியாமம் குஸலேஸு த⁴ம்மேஸு ஸம்மத்தம்.

‘‘இத⁴ பன, பி⁴க்க²வே, ஏகச்சோ புக்³க³லோ லப⁴ந்தோவ ததா²க³தம் த³ஸ்ஸனாய நோ அலப⁴ந்தோ, லப⁴ந்தோவ ததா²க³தப்பவேதி³தம் த⁴ம்மவினயம் ஸவனாய நோ அலப⁴ந்தோ ஓக்கமதி நியாமம் குஸலேஸு த⁴ம்மேஸு ஸம்மத்தம்.

‘‘தத்ர, பி⁴க்க²வே, ய்வாயம் புக்³க³லோ லப⁴ந்தோவ ததா²க³தம் த³ஸ்ஸனாய நோ அலப⁴ந்தோ, லப⁴ந்தோவ ததா²க³தப்பவேதி³தம் த⁴ம்மவினயம் ஸவனாய நோ அலப⁴ந்தோ ஓக்கமதி நியாமம் குஸலேஸு த⁴ம்மேஸு ஸம்மத்தம், இமம் கோ² பி⁴க்க²வே, புக்³க³லம் படிச்ச த⁴ம்மதே³ஸனா அனுஞ்ஞாதா. இமஞ்ச பன, பி⁴க்க²வே, புக்³க³லம் படிச்ச அஞ்ஞேஸம்பி த⁴ம்மோ தே³ஸேதப்³போ³. ‘‘இமே கோ², பி⁴க்க²வே, தயோ கி³லானூபமா புக்³க³லா ஸந்தோ ஸம்விஜ்ஜமானா லோகஸ்மி’’ந்தி. து³தியம்.