1. ஸமித்³த⁴ஸுத்தம்

21. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² ஆயஸ்மா ச ஸமித்³தோ⁴ [ஸவிட்டோ² (ஸீ. ஸ்யா. கம். பீ.)] ஆயஸ்மா ச மஹாகோட்டி²கோ [மஹாகோட்டி²தோ (ஸீ. ஸ்யா. கம். பீ.)] யேனாயஸ்மா ஸாரிபுத்தோ தேனுபஸங்கமிம்ஸு; உபஸங்கமித்வா ஆயஸ்மதா ஸாரிபுத்தேன ஸத்³தி⁴ம் ஸம்மோதி³ம்ஸு. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³ம்ஸு. ஏகமந்தம் நிஸின்னம் கோ² ஆயஸ்மந்தம் ஸமித்³த⁴ம் ஆயஸ்மா ஸாரிபுத்தோ ஏதத³வோச –

‘‘தயோமே, ஆவுஸோ ஸமித்³த⁴, புக்³க³லா ஸந்தோ ஸம்விஜ்ஜமானா லோகஸ்மிம். கதமே தயோ? காயஸக்கீ², தி³ட்டி²ப்பத்தோ [தி³ட்ட²ப்பத்தோ (க.)], ஸத்³தா⁴விமுத்தோ. இமே கோ², ஆவுஸோ, தயோ புக்³க³லா ஸந்தோ ஸம்விஜ்ஜமானா லோகஸ்மிம். இமேஸம், ஆவுஸோ, திண்ணம் புக்³க³லானம் கதமோ தே புக்³க³லோ க²மதி அபி⁴க்கந்ததரோ ச பணீததரோ சா’’தி?

‘‘தயோமே, ஆவுஸோ ஸாரிபுத்த, புக்³க³லா ஸந்தோ ஸம்விஜ்ஜமானா லோகஸ்மிம். கதமே தயோ? காயஸக்கீ², தி³ட்டி²ப்பத்தோ, ஸத்³தா⁴விமுத்தோ. இமே கோ², ஆவுஸோ, தயோ புக்³க³லா ஸந்தோ ஸம்விஜ்ஜமானா லோகஸ்மிம். இமேஸம், ஆவுஸோ, திண்ணம் புக்³க³லானம் ய்வாயம் [யோயம் (க.)] புக்³க³லோ ஸத்³தா⁴விமுத்தோ, அயம் மே புக்³க³லோ க²மதி இமேஸம் திண்ணம் புக்³க³லானம் அபி⁴க்கந்ததரோ ச பணீததரோ ச. தம் கிஸ்ஸ ஹேது? இமஸ்ஸ, ஆவுஸோ, புக்³க³லஸ்ஸ ஸத்³தி⁴ந்த்³ரியம் அதி⁴மத்த’’ந்தி.

அத² கோ² ஆயஸ்மா ஸாரிபுத்தோ ஆயஸ்மந்தம் மஹாகோட்டி²கம் ஏதத³வோச – ‘‘தயோமே, ஆவுஸோ கோட்டி²க, புக்³க³லா ஸந்தோ ஸம்விஜ்ஜமானா லோகஸ்மிம். கதமே தயோ? காயஸக்கீ², தி³ட்டி²ப்பத்தோ, ஸத்³தா⁴விமுத்தோ. இமே கோ², ஆவுஸோ, தயோ புக்³க³லா ஸந்தோ ஸம்விஜ்ஜமானா லோகஸ்மிம். இமேஸம், ஆவுஸோ, திண்ணம் புக்³க³லானம் கதமோ தே புக்³க³லோ க²மதி அபி⁴க்கந்ததரோ ச பணீததரோ சா’’தி?

‘‘தயோமே, ஆவுஸோ ஸாரிபுத்த, புக்³க³லா ஸந்தோ ஸம்விஜ்ஜமானா லோகஸ்மிம். கதமே தயோ? காயஸக்கீ², தி³ட்டி²ப்பத்தோ, ஸத்³தா⁴விமுத்தோ. இமே கோ², ஆவுஸோ, தயோ புக்³க³லா ஸந்தோ ஸம்விஜ்ஜமானா லோகஸ்மிம். இமேஸம், ஆவுஸோ, திண்ணம் புக்³க³லானம் ய்வாயம் புக்³க³லோ காயஸக்கீ², அயம் மே புக்³க³லோ க²மதி இமேஸம் திண்ணம் புக்³க³லானம் அபி⁴க்கந்ததரோ ச பணீததரோ ச. தம் கிஸ்ஸ ஹேது? இமஸ்ஸ, ஆவுஸோ, புக்³க³லஸ்ஸ ஸமாதி⁴ந்த்³ரியம் அதி⁴மத்த’’ந்தி.

அத² கோ² ஆயஸ்மா மஹாகோட்டி²கோ ஆயஸ்மந்தம் ஸாரிபுத்தம் ஏதத³வோச – ‘‘தயோமே, ஆவுஸோ ஸாரிபுத்த, புக்³க³லா ஸந்தோ ஸம்விஜ்ஜமானா லோகஸ்மிம். கதமே தயோ? காயஸக்கீ², தி³ட்டி²ப்பத்தோ, ஸத்³தா⁴விமுத்தோ. இமே கோ², ஆவுஸோ, தயோ புக்³க³லா ஸந்தோ ஸம்விஜ்ஜமானா லோகஸ்மிம். இமேஸம், ஆவுஸோ, திண்ணம் புக்³க³லானம் கதமோ தே புக்³க³லோ க²மதி அபி⁴க்கந்ததரோ ச பணீததரோ சா’’தி?

‘‘தயோமே, ஆவுஸோ கோட்டி²க, புக்³க³லா ஸந்தோ ஸம்விஜ்ஜமானா லோகஸ்மிம். கதமே தயோ? காயஸக்கீ², தி³ட்டி²ப்பத்தோ, ஸத்³தா⁴விமுத்தோ. இமே கோ², ஆவுஸோ, தயோ புக்³க³லா ஸந்தோ ஸம்விஜ்ஜமானா லோகஸ்மிம். இமேஸம், ஆவுஸோ, திண்ணம் புக்³க³லானம் ய்வாயம் புக்³க³லோ தி³ட்டி²ப்பத்தோ, அயம் மே புக்³க³லோ க²மதி இமேஸம் திண்ணம் புக்³க³லானம் அபி⁴க்கந்ததரோ ச பணீததரோ ச. தம் கிஸ்ஸ ஹேது? இமஸ்ஸ, ஆவுஸோ, புக்³க³லஸ்ஸ பஞ்ஞிந்த்³ரியம் அதி⁴மத்த’’ந்தி.

அத² கோ² ஆயஸ்மா ஸாரிபுத்தோ ஆயஸ்மந்தஞ்ச ஸமித்³த⁴ம் ஆயஸ்மந்தஞ்ச மஹாகோட்டி²கம் ஏதத³வோச – ‘‘ப்³யாகதம் கோ², ஆவுஸோ, அம்ஹேஹி ஸப்³பே³ஹேவ யதா²ஸகம் படிபா⁴னம். ஆயாமாவுஸோ, யேன ப⁴க³வா தேனுபஸங்கமிஸ்ஸாம; உபஸங்கமித்வா ப⁴க³வதோ ஏதமத்த²ம் ஆரோசேஸ்ஸாம. யதா² நோ ப⁴க³வா ப்³யாகரிஸ்ஸதி ததா² நம் தா⁴ரேஸ்ஸாமா’’தி. ‘‘ஏவமாவுஸோ’’தி கோ² ஆயஸ்மா ச ஸமித்³தோ⁴ ஆயஸ்மா ச மஹாகோட்டி²கோ ஆயஸ்மதோ ஸாரிபுத்தஸ்ஸ பச்சஸ்ஸோஸும். அத² கோ² ஆயஸ்மா ச ஸாரிபுத்தோ ஆயஸ்மா ச ஸமித்³தோ⁴ ஆயஸ்மா ச மஹாகோட்டி²கோ யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னோ கோ² ஆயஸ்மா ஸாரிபுத்தோ யாவதகோ அஹோஸி ஆயஸ்மதா ச ஸமித்³தே⁴ன ஆயஸ்மதா ச மஹாகோட்டி²கேன ஸத்³தி⁴ம் கதா²ஸல்லாபோ தம் ஸப்³ப³ம் ப⁴க³வதோ ஆரோசேஸி.

‘‘ந க்²வேத்த², ஸாரிபுத்த, ஸுகரம் ஏகம்ஸேன ப்³யாகாதும் – ‘அயம் இமேஸம் திண்ணம் புக்³க³லானம் அபி⁴க்கந்ததரோ ச பணீததரோ சா’தி. டா²னஞ்ஹேதம், ஸாரிபுத்த, விஜ்ஜதி ய்வாயம் புக்³க³லோ ஸத்³தா⁴விமுத்தோ ஸ்வாஸ்ஸ [ஸ்வாயம் (ஸ்யா. கம். பீ.), ஸோயம் (க.)] அரஹத்தாய படிபன்னோ, ய்வாயம் புக்³க³லோ காயஸக்கீ² ஸ்வாஸ்ஸ ஸகதா³கா³மீ வா அனாகா³மீ வா, யோ சாயம் புக்³க³லோ தி³ட்டி²ப்பத்தோ ஸோபஸ்ஸ [ஸோயம் (க.)] ஸகதா³கா³மீ வா அனாகா³மீ வா.

‘‘ந க்²வேத்த², ஸாரிபுத்த, ஸுகரம் ஏகம்ஸேன ப்³யாகாதும் – ‘அயம் இமேஸம் திண்ணம் புக்³க³லானம் அபி⁴க்கந்ததரோ ச பணீததரோ சா’தி. டா²னஞ்ஹேதம், ஸாரிபுத்த, விஜ்ஜதி ய்வாயம் புக்³க³லோ காயஸக்கீ² ஸ்வாஸ்ஸ அரஹத்தாய படிபன்னோ, ய்வாயம் புக்³க³லோ ஸத்³தா⁴விமுத்தோ ஸ்வாஸ்ஸ ஸகதா³கா³மீ வா அனாகா³மீ வா, யோ சாயம் புக்³க³லோ தி³ட்டி²ப்பத்தோ ஸோபஸ்ஸ ஸகதா³கா³மீ வா அனாகா³மீ வா.

‘‘ந க்²வேத்த², ஸாரிபுத்த, ஸுகரம் ஏகம்ஸேன ப்³யாகாதும் – ‘அயம் இமேஸம் திண்ணம் புக்³க³லானம் அபி⁴க்கந்ததரோ ச பணீததரோ சா’தி. டா²னஞ்ஹேதம், ஸாரிபுத்த, விஜ்ஜதி ய்வாயம் புக்³க³லோ தி³ட்டி²ப்பத்தோ ஸ்வாஸ்ஸ அரஹத்தாய படிபன்னோ, ய்வாயம் புக்³க³லோ ஸத்³தா⁴விமுத்தோ ஸ்வாஸ்ஸ ஸகதா³கா³மீ வா அனாகா³மீ வா, யோ சாயம் புக்³க³லோ காயஸக்கீ² ஸோபஸ்ஸ ஸகதா³கா³மீ வா அனாகா³மீ வா.

‘‘ந க்²வேத்த², ஸாரிபுத்த, ஸுகரம் ஏகம்ஸேன ப்³யாகாதும் – ‘அயம் இமேஸம் திண்ணம் புக்³க³லானம் அபி⁴க்கந்ததரோ ச பணீததரோ சா’’’தி. பட²மம்.