9. பட²மபாபணிகஸுத்தம்

19. ‘‘தீஹி, பி⁴க்க²வே, அங்கே³ஹி ஸமன்னாக³தோ பாபணிகோ அப⁴ப்³போ³ அனதி⁴க³தம் வா போ⁴க³ம் அதி⁴க³ந்தும், அதி⁴க³தம் வா போ⁴க³ம் பா²திம் காதும். கதமேஹி தீஹி? இத⁴, பி⁴க்க²வே, பாபணிகோ புப்³ப³ண்ஹஸமயம் [மஜ்ஜ²ந்திகஸமயம் (ஸீ. ஸ்யா. கம். பீ.)] ந ஸக்கச்சம் கம்மந்தம் அதி⁴ட்டா²தி, மஜ்ஜ²ன்ஹிகஸமயம் ந ஸக்கச்சம் கம்மந்தம் அதி⁴ட்டா²தி, ஸாயன்ஹஸமயம் ந ஸக்கச்சம் கம்மந்தம் அதி⁴ட்டா²தி. இமேஹி கோ², பி⁴க்க²வே, தீஹி அங்கே³ஹி ஸமன்னாக³தோ பாபணிகோ அப⁴ப்³போ³ அனதி⁴க³தம் வா போ⁴க³ம் அதி⁴க³ந்தும், அதி⁴க³தம் வா போ⁴க³ம் பா²திம் காதும் [பா²திகத்தும் (ஸீ.), பா²திகாதும் (ஸ்யா. கம். பீ.)].

‘‘ஏவமேவம் கோ², பி⁴க்க²வே, தீஹி த⁴ம்மேஹி ஸமன்னாக³தோ பி⁴க்கு² அப⁴ப்³போ³ அனதி⁴க³தம் வா குஸலம் த⁴ம்மம் அதி⁴க³ந்தும், அதி⁴க³தம் வா குஸலம் த⁴ம்மம் பா²திம் காதும். கதமேஹி தீஹி? இத⁴, பி⁴க்க²வே, பி⁴க்கு² புப்³ப³ண்ஹஸமயம் ந ஸக்கச்சம் ஸமாதி⁴னிமித்தம் அதி⁴ட்டா²தி, மஜ்ஜ²ன்ஹிகஸமயம் ந ஸக்கச்சம் ஸமாதி⁴னிமித்தம் அதி⁴ட்டா²தி, ஸாயன்ஹஸமயம் ந ஸக்கச்சம் ஸமாதி⁴னிமித்தம் அதி⁴ட்டா²தி. இமேஹி கோ², பி⁴க்க²வே, தீஹி த⁴ம்மேஹி ஸமன்னாக³தோ பி⁴க்கு² அப⁴ப்³போ³ அனதி⁴க³தம் வா குஸலம் த⁴ம்மம் அதி⁴க³ந்தும், அதி⁴க³தம் வா குஸலம் த⁴ம்மம் பா²திம் காதும்.

‘‘தீஹி, பி⁴க்க²வே, அங்கே³ஹி ஸமன்னாக³தோ பாபணிகோ ப⁴ப்³போ³ அனதி⁴க³தம் வா போ⁴க³ம் அதி⁴க³ந்தும், அதி⁴க³தம் வா போ⁴க³ம் பா²திம் காதும். கதமேஹி தீஹி? இத⁴, பி⁴க்க²வே, பாபணிகோ புப்³ப³ண்ஹஸமயம் ஸக்கச்சம் கம்மந்தம் அதி⁴ட்டா²தி, மஜ்ஜ²ன்ஹிகஸமயம்…பே… ஸாயன்ஹஸமயம் ஸக்கச்சம் கம்மந்தம் அதி⁴ட்டா²தி. இமேஹி கோ², பி⁴க்க²வே, தீஹி அங்கே³ஹி ஸமன்னாக³தோ பாபணிகோ ப⁴ப்³போ³ அனதி⁴க³தம் வா போ⁴க³ம் அதி⁴க³ந்தும், அதி⁴க³தம் வா போ⁴க³ம் பா²திம் காதும்.

‘‘ஏவமேவம் கோ², பி⁴க்க²வே, தீஹி த⁴ம்மேஹி ஸமன்னாக³தோ பி⁴க்கு² ப⁴ப்³போ³ அனதி⁴க³தம் வா குஸலம் த⁴ம்மம் அதி⁴க³ந்தும், அதி⁴க³தம் வா குஸலம் த⁴ம்மம் பா²திம் காதும். கதமேஹி தீஹி? இத⁴, பி⁴க்க²வே, பி⁴க்கு² புப்³ப³ண்ஹஸமயம் ஸக்கச்சம் ஸமாதி⁴னிமித்தம் அதி⁴ட்டா²தி, மஜ்ஜ²ன்ஹிகஸமயம்…பே… ஸாயன்ஹஸமயம் ஸக்கச்சம் ஸமாதி⁴னிமித்தம் அதி⁴ட்டா²தி. இமேஹி கோ², பி⁴க்க²வே, தீஹி த⁴ம்மேஹி ஸமன்னாக³தோ பி⁴க்கு² ப⁴ப்³போ³ அனதி⁴க³தம் வா குஸலம் த⁴ம்மம் அதி⁴க³ந்தும், அதி⁴க³தம் வா குஸலம் த⁴ம்மம் பா²திம் காது’’ந்தி. நவமம்.