10. து³தியபாபணிகஸுத்தம்

20. ‘‘தீஹி, பி⁴க்க²வே, அங்கே³ஹி ஸமன்னாக³தோ பாபணிகோ நசிரஸ்ஸேவ மஹத்தம் வேபுல்லத்தம் [மஹந்தத்தம் வா வேபுல்லத்தம் வா (பீ. க.)] பாபுணாதி போ⁴கே³ஸு. கதமேஹி தீஹி? இத⁴, பி⁴க்க²வே, பாபணிகோ சக்கு²மா ச ஹோதி விது⁴ரோ ச நிஸ்ஸயஸம்பன்னோ ச. கத²ஞ்ச, பி⁴க்க²வே, பாபணிகோ சக்கு²மா ஹோதி? இத⁴, பி⁴க்க²வே, பாபணிகோ பணியம் ஜானாதி – ‘இத³ம் பணியம் ஏவம் கீதம், ஏவம் விக்கயமானம் [விக்கீயமானம் (?)], ஏத்தகம் மூலம் ப⁴விஸ்ஸதி, ஏத்தகோ உத³யோ’தி [உத்³த³யோதி (ஸீ.)]. ஏவம் கோ², பி⁴க்க²வே, பாபணிகோ சக்கு²மா ஹோதி.

‘‘கத²ஞ்ச, பி⁴க்க²வே, பாபணிகோ விது⁴ரோ ஹோதி? இத⁴, பி⁴க்க²வே, பாபணிகோ குஸலோ ஹோதி பணியம் கேதுஞ்ச விக்கேதுஞ்ச. ஏவம் கோ², பி⁴க்க²வே, பாபணிகோ விது⁴ரோ ஹோதி.

‘‘கத²ஞ்ச, பி⁴க்க²வே, பாபணிகோ நிஸ்ஸயஸம்பன்னோ ஹோதி? இத⁴ பி⁴க்க²வே, பாபணிகம் யே தே க³ஹபதீ வா க³ஹபதிபுத்தா வா அட்³டா⁴ மஹத்³த⁴னா மஹாபோ⁴கா³ தே ஏவம் ஜானந்தி – ‘அயம் கோ² ப⁴வம் பாபணிகோ சக்கு²மா விது⁴ரோ ச படிப³லோ புத்ததா³ரஞ்ச போஸேதும், அம்ஹாகஞ்ச காலேன காலம் அனுப்பதா³து’ந்தி. தே நம் போ⁴கே³ஹி நிபதந்தி – ‘இதோ, ஸம்ம பாபணிக, போ⁴கே³ கரித்வா [ஹரித்வா (ஸீ. ஸ்யா. கம்.)] புத்ததா³ரஞ்ச போஸேஹி, அம்ஹாகஞ்ச காலேன காலம் அனுப்பதே³ஹீ’தி. ஏவம் கோ², பி⁴க்க²வே, பாபணிகோ நிஸ்ஸயஸம்பன்னோ ஹோதி. இமேஹி கோ², பி⁴க்க²வே, தீஹி அங்கே³ஹி ஸமன்னாக³தோ பாபணிகோ நசிரஸ்ஸேவ மஹத்தம் வேபுல்லத்தம் பாபுணாதி போ⁴கே³ஸு.

‘‘ஏவமேவம் கோ², பி⁴க்க²வே, தீஹி த⁴ம்மேஹி ஸமன்னாக³தோ பி⁴க்கு² நசிரஸ்ஸேவ மஹத்தம் வேபுல்லத்தம் பாபுணாதி குஸலேஸு த⁴ம்மேஸு. கதமேஹி தீஹி? இத⁴, பி⁴க்க²வே, பி⁴க்கு² சக்கு²மா ச ஹோதி விது⁴ரோ ச நிஸ்ஸயஸம்பன்னோ ச. கத²ஞ்ச, பி⁴க்க²வே, பி⁴க்கு² சக்கு²மா ஹோதி? இத⁴, பி⁴க்க²வே, பி⁴க்கு² ‘இத³ம் து³க்க²’ந்தி யதா²பூ⁴தம் பஜானாதி, ‘அயம் து³க்க²ஸமுத³யோ’தி யதா²பூ⁴தம் பஜானாதி, ‘அயம் து³க்க²னிரோதோ⁴’தி யதா²பூ⁴தம் பஜானாதி, ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானாதி. ஏவம் கோ², பி⁴க்க²வே, பி⁴க்கு² சக்கு²மா ஹோதி.

‘‘கத²ஞ்ச, பி⁴க்க²வே, பி⁴க்கு² விது⁴ரோ ஹோதி? இத⁴, பி⁴க்க²வே, பி⁴க்கு² ஆரத்³த⁴வீரியோ விஹரதி அகுஸலானம் த⁴ம்மானம் பஹானாய, குஸலானம் த⁴ம்மானம் உபஸம்பதா³ய, தா²மவா த³ள்ஹபரக்கமோ அனிக்கி²த்தது⁴ரோ குஸலேஸு த⁴ம்மேஸு. ஏவம் கோ², பி⁴க்க²வே, பி⁴க்கு² விது⁴ரோ ஹோதி.

‘‘கத²ஞ்ச, பி⁴க்க²வே, பி⁴க்கு² நிஸ்ஸயஸம்பன்னோ ஹோதி? இத⁴, பி⁴க்க²வே, பி⁴க்கு² யே தே பி⁴க்கூ² ப³ஹுஸ்ஸுதா ஆக³தாக³மா த⁴ம்மத⁴ரா வினயத⁴ரா மாதிகாத⁴ரா தே காலேன காலம் உபஸங்கமித்வா பரிபுச்ச²தி பரிபஞ்ஹதி – ‘இத³ம், ப⁴ந்தே, கத²ம், இமஸ்ஸ கோ அத்தோ²’தி? தஸ்ஸ தே ஆயஸ்மந்தோ அவிவடஞ்சேவ விவரந்தி, அனுத்தானீகதஞ்ச உத்தானீகரோந்தி, அனேகவிஹிதேஸு ச கங்கா²டா²னியேஸு த⁴ம்மேஸு கங்க²ம் படிவினோதே³ந்தி. ஏவம் கோ², பி⁴க்க²வே, பி⁴க்கு² நிஸ்ஸயஸம்பன்னோ ஹோதி. இமேஹி கோ², பி⁴க்க²வே, தீஹி த⁴ம்மேஹி ஸமன்னாக³தோ பி⁴க்கு² நசிரஸ்ஸேவ மஹத்தம் வேபுல்லத்தம் பாபுணாதி குஸலேஸு த⁴ம்மேஸூ’’தி. த³ஸமம்.

ரத²காரவக்³கோ³ து³தியோ.