7. ததியஅத⁴ம்மஸுத்தம்

173. ‘‘அத⁴ம்மோ ச, பி⁴க்க²வே, வேதி³தப்³போ³ த⁴ம்மோ ச; அனத்தோ² ச வேதி³தப்³போ³ அத்தோ² ச. அத⁴ம்மஞ்ச விதி³த்வா த⁴ம்மஞ்ச, அனத்த²ஞ்ச விதி³த்வா அத்த²ஞ்ச யதா² த⁴ம்மோ யதா² அத்தோ² ததா² படிபஜ்ஜிதப்³ப³ம்.

‘‘கதமோ ச, பி⁴க்க²வே, அத⁴ம்மோ, கதமோ ச த⁴ம்மோ; கதமோ ச அனத்தோ², கதமோ ச அத்தோ²? பாணாதிபாதோ, பி⁴க்க²வே, அத⁴ம்மோ; பாணாதிபாதா வேரமணீ த⁴ம்மோ; யே ச பாணாதிபாதபச்சயா அனேகே பாபகா அகுஸலா த⁴ம்மா ஸம்ப⁴வந்தி, அயம் அனத்தோ²; பாணாதிபாதா வேரமணிபச்சயா ச அனேகே குஸலா த⁴ம்மா பா⁴வனாபாரிபூரிம் க³ச்ச²ந்தி, அயம் அத்தோ².

‘‘அதி³ன்னாதா³னம், பி⁴க்க²வே, அத⁴ம்மோ; அதி³ன்னாதா³னா வேரமணீ த⁴ம்மோ… காமேஸுமிச்சா²சாரோ, பி⁴க்க²வே, அத⁴ம்மோ; காமேஸுமிச்சா²சாரா வேரமணீ த⁴ம்மோ… முஸாவாதோ³, பி⁴க்க²வே, அத⁴ம்மோ; முஸாவாதா³ வேரமணீ த⁴ம்மோ… பிஸுணா வாசா, பி⁴க்க²வே, அத⁴ம்மோ; பிஸுணாய வாசாய வேரமணீ த⁴ம்மோ… ப²ருஸா வாசா, பி⁴க்க²வே, அத⁴ம்மோ; ப²ருஸாய வாசாய வேரமணீ த⁴ம்மோ… ஸம்ப²ப்பலாபோ, பி⁴க்க²வே, அத⁴ம்மோ; ஸம்ப²ப்பலாபா வேரமணீ த⁴ம்மோ… அபி⁴ஜ்ஜா², பி⁴க்க²வே, அத⁴ம்மோ; அனபி⁴ஜ்ஜா² த⁴ம்மோ… ப்³யாபாதோ³, பி⁴க்க²வே, அத⁴ம்மோ; அப்³யாபாதோ³ த⁴ம்மோ….

‘‘மிச்சா²தி³ட்டி², பி⁴க்க²வே, அத⁴ம்மோ; ஸம்மாதி³ட்டி² த⁴ம்மோ; யே ச மிச்சா²தி³ட்டி²பச்சயா அனேகே பாபகா அகுஸலா த⁴ம்மா ஸம்ப⁴வந்தி, அயம் அனத்தோ²; ஸம்மாதி³ட்டி²பச்சயா ச அனேகே குஸலா த⁴ம்மா பா⁴வனாபாரிபூரிம் க³ச்ச²ந்தி, அயம் அத்தோ².

‘‘‘அத⁴ம்மோ ச, பி⁴க்க²வே, வேதி³தப்³போ³ த⁴ம்மோ ச; அனத்தோ² ச வேதி³தப்³போ³ அத்தோ² ச. அத⁴ம்மஞ்ச விதி³த்வா த⁴ம்மஞ்ச, அனத்த²ஞ்ச விதி³த்வா அத்த²ஞ்ச யதா² த⁴ம்மோ யதா² அத்தோ² ததா² படிபஜ்ஜிதப்³ப³’ந்தி, இதி யம் தம் வுத்தம், இத³மேதம் படிச்ச வுத்த’’ந்தி. ஸத்தமம்.