8. கம்மனிதா³னஸுத்தம்

174. ‘‘பாணாதிபாதம்பாஹம், பி⁴க்க²வே, திவித⁴ம் வதா³மி – லோப⁴ஹேதுகம்பி, தோ³ஸஹேதுகம்பி, மோஹஹேதுகம்பி.

‘‘அதி³ன்னாதா³னம்பாஹம், பி⁴க்க²வே, திவித⁴ம் வதா³மி – லோப⁴ஹேதுகம்பி, தோ³ஸஹேதுகம்பி, மோஹஹேதுகம்பி.

‘‘காமேஸுமிச்சா²சாரம்பாஹம், பி⁴க்க²வே, திவித⁴ம் வதா³மி – லோப⁴ஹேதுகம்பி, தோ³ஸஹேதுகம்பி, மோஹஹேதுகம்பி.

‘‘முஸாவாத³ம்பாஹம், பி⁴க்க²வே, திவித⁴ம் வதா³மி – லோப⁴ஹேதுகம்பி, தோ³ஸஹேதுகம்பி, மோஹஹேதுகம்பி.

‘‘பிஸுணவாசம்பாஹம், பி⁴க்க²வே, திவித⁴ம் வதா³மி – லோப⁴ஹேதுகம்பி, தோ³ஸஹேதுகம்பி, மோஹஹேதுகம்பி.

‘‘ப²ருஸவாசம்பாஹம், பி⁴க்க²வே, திவித⁴ம் வதா³மி – லோப⁴ஹேதுகம்பி, தோ³ஸஹேதுகம்பி, மோஹஹேதுகம்பி.

‘‘ஸம்ப²ப்பலாபம்பாஹம், பி⁴க்க²வே, திவித⁴ம் வதா³மி – லோப⁴ஹேதுகம்பி, தோ³ஸஹேதுகம்பி, மோஹஹேதுகம்பி.

‘‘அபி⁴ஜ்ஜ²ம்பாஹம், பி⁴க்க²வே, திவித⁴ம் வதா³மி – லோப⁴ஹேதுகம்பி, தோ³ஸஹேதுகம்பி, மோஹஹேதுகம்பி.

‘‘ப்³யாபாத³ம்பாஹம், பி⁴க்க²வே, திவித⁴ம் வதா³மி – லோப⁴ஹேதுகம்பி, தோ³ஸஹேதுகம்பி, மோஹஹேதுகம்பி.

‘‘மிச்சா²தி³ட்டி²ம்பாஹம், பி⁴க்க²வே, திவித⁴ம் வதா³மி – லோப⁴ஹேதுகம்பி, தோ³ஸஹேதுகம்பி, மோஹஹேதுகம்பி. இதி கோ², பி⁴க்க²வே, லோபோ⁴ கம்மனிதா³னஸம்ப⁴வோ, தோ³ஸோ கம்மனிதா³னஸம்ப⁴வோ, மோஹோ கம்மனிதா³னஸம்ப⁴வோ. லோப⁴க்க²யா கம்மனிதா³னஸங்க²யோ, தோ³ஸக்க²யா கம்மனிதா³னஸங்க²யோ, மோஹக்க²யா கம்மனிதா³னஸங்க²யோ’’தி. அட்ட²மம்.