4. ப்³யாகரணஸுத்தம்

84. தத்ர கோ² ஆயஸ்மா மஹாமோக்³க³ல்லானோ பி⁴க்கூ² ஆமந்தேஸி – ‘‘ஆவுஸோ பி⁴க்க²வே’’தி. ‘‘ஆவுஸோ’’தி கோ² தே பி⁴க்கூ² ஆயஸ்மதோ மஹாமோக்³க³ல்லானஸ்ஸ பச்சஸ்ஸோஸும். ஆயஸ்மா மஹாமோக்³க³ல்லானோ ஏதத³வோச –

‘‘இதா⁴வுஸோ, பி⁴க்கு² அஞ்ஞம் ப்³யாகரோதி – ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயாதி பஜானாமீ’தி. தமேனம் ததா²க³தோ வா ததா²க³தஸாவகோ வா ஜா²யீ ஸமாபத்திகுஸலோ பரசித்தகுஸலோ பரசித்தபரியாயகுஸலோ ஸமனுயுஞ்ஜதி ஸமனுக்³கா³ஹதி ஸமனுபா⁴ஸதி. ஸோ ததா²க³தேன வா ததா²க³தஸாவகேன வா ஜா²யினா ஸமாபத்திகுஸலேன பரசித்தகுஸலேன பரசித்தபரியாயகுஸலேன ஸமனுயுஞ்ஜியமானோ ஸமனுக்³கா³ஹியமானோ ஸமனுபா⁴ஸியமானோ இரீணம் ஆபஜ்ஜதி விசினம் [விஸினம் (ஸீ. அட்ட².)] ஆபஜ்ஜதி அனயம் ஆபஜ்ஜதி ப்³யஸனம் ஆபஜ்ஜதி அனயப்³யஸனம் ஆபஜ்ஜதி.

‘‘தமேனம் ததா²க³தோ வா ததா²க³தஸாவகோ வா ஜா²யீ ஸமாபத்திகுஸலோ பரசித்தகுஸலோ பரசித்தபரியாயகுஸலோ ஏவம் சேதஸா சேதோ பரிச்ச மனஸி கரோதி – ‘கிம் நு கோ² அயமாயஸ்மா அஞ்ஞம் ப்³யாகரோதி – கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயாதி பஜானாமீ’தி?

‘‘தமேனம் ததா²க³தோ வா ததா²க³தஸாவகோ வா ஜா²யீ ஸமாபத்திகுஸலோ பரசித்தகுஸலோ பரசித்தபரியாயகுஸலோ ஏவம் சேதஸா சேதோ பரிச்ச பஜானாதி –

‘கோத⁴னோ கோ² அயமாயஸ்மா; கோத⁴பரியுட்டி²தேன சேதஸா ப³ஹுலம் விஹரதி. கோத⁴பரியுட்டா²னம் கோ² பன ததா²க³தப்பவேதி³தே த⁴ம்மவினயே பரிஹானமேதம்.

‘உபனாஹீ கோ² பன அயமாயஸ்மா; உபனாஹபரியுட்டி²தேன சேதஸா ப³ஹுலம் விஹரதி. உபனாஹபரியுட்டா²னம் கோ² பன ததா²க³தப்பவேதி³தே த⁴ம்மவினயே பரிஹானமேதம்.

‘மக்கீ² கோ² பன அயமாயஸ்மா; மக்க²பரியுட்டி²தேன சேதஸா ப³ஹுலம் விஹரதி. மக்க²பரியுட்டா²னம் கோ² பன ததா²க³தப்பவேதி³தே த⁴ம்மவினயே பரிஹானமேதம்.

‘பளாஸீ கோ² பன அயமாயஸ்மா; பளாஸபரியுட்டி²தேன சேதஸா ப³ஹுலம் விஹரதி. பளாஸபரியுட்டா²னம் கோ² பன ததா²க³தப்பவேதி³தே த⁴ம்மவினயே பரிஹானமேதம்.

‘இஸ்ஸுகீ கோ² பன அயமாயஸ்மா; இஸ்ஸாபரியுட்டி²தேன சேதஸா ப³ஹுலம் விஹரதி. இஸ்ஸாபரியுட்டா²னம் கோ² பன ததா²க³தப்பவேதி³தே த⁴ம்மவினயே பரிஹானமேதம்.

‘மச்ச²ரீ கோ² பன அயமாயஸ்மா; மச்சே²ரபரியுட்டி²தேன சேதஸா ப³ஹுலம் விஹரதி. மச்சே²ரபரியுட்டா²னம் கோ² பன ததா²க³தப்பவேதி³தே த⁴ம்மவினயே பரிஹானமேதம்.

‘ஸடோ² கோ² பன அயமாயஸ்மா; ஸாடே²ய்யபரியுட்டி²தேன சேதஸா ப³ஹுலம் விஹரதி. ஸாடே²ய்யபரியுட்டா²னம் கோ² பன ததா²க³தப்பவேதி³தே த⁴ம்மவினயே பரிஹானமேதம்.

‘மாயாவீ கோ² பன அயமாயஸ்மா; மாயாபரியுட்டி²தேன சேதஸா ப³ஹுலம் விஹரதி. மாயாபரியுட்டா²னம் கோ² பன ததா²க³தப்பவேதி³தே த⁴ம்மவினயே பரிஹானமேதம்.

‘பாபிச்சோ² கோ² பன அயமாயஸ்மா; இச்சா²பரியுட்டி²தேன சேதஸா ப³ஹுலம் விஹரதி. இச்சா²பரியுட்டா²னம் கோ² பன ததா²க³தப்பவேதி³தே த⁴ம்மவினயே பரிஹானமேதம்.

‘ஸதி [முட்ட²ஸ்ஸதி (ஸீ. ஸ்யா.)] கோ² பன அயமாயஸ்மா உத்தரி கரணீயே ஓரமத்தகேன விஸேஸாதி⁴க³மேன அந்தரா வோஸானம் ஆபன்னோ. அந்தரா வோஸானக³மனம் கோ² பன ததா²க³தப்பவேதி³தே த⁴ம்மவினயே பரிஹானமேதம்’.

‘‘ஸோ வதாவுஸோ, பி⁴க்கு² ‘இமே த³ஸ த⁴ம்மே அப்பஹாய இமஸ்மிம் த⁴ம்மவினயே வுத்³தி⁴ம் விரூள்ஹிம் வேபுல்லம் ஆபஜ்ஜிஸ்ஸதீ’தி நேதம் டா²னம் விஜ்ஜதி. ஸோ வதாவுஸோ, பி⁴க்கு² ‘இமே த³ஸ த⁴ம்மே பஹாய இமஸ்மிம் த⁴ம்மவினயே வுத்³தி⁴ம் விரூள்ஹிம் வேபுல்லம் ஆபஜ்ஜிஸ்ஸதீ’தி டா²னமேதம் விஜ்ஜதீ’’தி. சதுத்த²ம்.