1. ஆகங்க²ஸுத்தம்

71. [அ. நி. 4.12; இதிவு. 111] ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘ஸம்பன்னஸீலா, பி⁴க்க²வே, விஹரத² ஸம்பன்னபாதிமோக்கா², பாதிமோக்க²ஸம்வரஸம்வுதா விஹரத² ஆசாரகோ³சரஸம்பன்னா அணுமத்தேஸு வஜ்ஜேஸு ப⁴யத³ஸ்ஸாவினோ, ஸமாதா³ய ஸிக்க²த² ஸிக்கா²பதே³ஸு.

‘‘ஆகங்கே²ய்ய சே, பி⁴க்க²வே, பி⁴க்கு² ‘ஸப்³ரஹ்மசாரீனம் பியோ சஸ்ஸம் மனாபோ ச க³ரு ச பா⁴வனீயோ சா’தி, ஸீலேஸ்வேவஸ்ஸ பரிபூரகாரீ அஜ்ஜ²த்தம் சேதோஸமத²மனுயுத்தோ அனிராகதஜ்ஜா²னோ விபஸ்ஸனாய ஸமன்னாக³தோ ப்³ரூஹேதா ஸுஞ்ஞாகா³ரானம்.

‘‘ஆகங்கே²ய்ய சே, பி⁴க்க²வே, பி⁴க்கு² ‘லாபீ⁴ அஸ்ஸம் சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரான’ந்தி, ஸீலேஸ்வேவஸ்ஸ பரிபூரகாரீ அஜ்ஜ²த்தம் சேதோஸமத²மனுயுத்தோ அனிராகதஜ்ஜா²னோ விபஸ்ஸனாய ஸமன்னாக³தோ ப்³ரூஹேதா ஸுஞ்ஞாகா³ரானம்.

‘‘ஆகங்கே²ய்ய சே, பி⁴க்க²வே, பி⁴க்கு² ‘யேஸாஹம் பரிபு⁴ஞ்ஜாமி சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரானம் தேஸம் தே காரா மஹப்ப²லா அஸ்ஸு மஹானிஸம்ஸா’தி, ஸீலேஸ்வேவஸ்ஸ…பே… ப்³ரூஹேதா ஸுஞ்ஞாகா³ரானம்.

‘‘ஆகங்கே²ய்ய சே, பி⁴க்க²வே, பி⁴க்கு² ‘யே மே [யே மம் (ம. நி. 1.65)] பேதா ஞாதீ ஸாலோஹிதா காலங்கதா [காலகதா (ஸீ. ஸ்யா. கம். பீ.)] பஸன்னசித்தா அனுஸ்ஸரந்தி தேஸம் தம் மஹப்ப²லம் அஸ்ஸ மஹானிஸம்ஸ’ந்தி, ஸீலேஸ்வேவஸ்ஸ…பே… ப்³ரூஹேதா ஸுஞ்ஞாகா³ரானம்.

‘‘ஆகங்கே²ய்ய சே, பி⁴க்க²வே, பி⁴க்கு² ‘ஸந்துட்டோ² அஸ்ஸம் இதரீதரசீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரேனா’தி, ஸீலேஸ்வேவஸ்ஸ…பே… ப்³ரூஹேதா ஸுஞ்ஞாகா³ரானம்.

‘‘ஆகங்கே²ய்ய சே, பி⁴க்க²வே, பி⁴க்கு² ‘க²மோ அஸ்ஸம் ஸீதஸ்ஸ உண்ஹஸ்ஸ ஜிக⁴ச்சா²ய பிபாஸாய ட³ம்ஸமகஸவாதாதபஸரீஸபஸம்ப²ஸ்ஸானம், து³ருத்தானம் து³ராக³தானம் வசனபதா²னம் உப்பன்னானம் ஸாரீரிகானம் வேத³னானம் து³க்கா²னம் திப்³பா³னம் [திப்பானம் (ஸீ. ஸ்யா. கம். பீ.)] க²ரானம் கடுகானம் அஸாதானம் அமனாபானம் பாணஹரானம் அதி⁴வாஸகஜாதிகோ அஸ்ஸ’ந்தி, ஸீலேஸ்வேவஸ்ஸ…பே… ப்³ரூஹேதா ஸுஞ்ஞாகா³ரானம்.

‘‘ஆகங்கே²ய்ய சே, பி⁴க்க²வே, பி⁴க்கு² ‘அரதிரதிஸஹோ அஸ்ஸம், ந ச மம் அரதிரதி ஸஹேய்ய, உப்பன்னம் அரதிரதிம் அபி⁴பு⁴ய்ய அபி⁴பு⁴ய்ய விஹரேய்ய’ந்தி, ஸீலேஸ்வேவஸ்ஸ…பே… ப்³ரூஹேதா ஸுஞ்ஞாகா³ரானம்.

‘‘ஆகங்கே²ய்ய சே, பி⁴க்க²வே, பி⁴க்கு² ‘ப⁴யபே⁴ரவஸஹோ அஸ்ஸம், ந ச மம் ப⁴யபே⁴ரவோ ஸஹேய்ய, உப்பன்னம் ப⁴யபே⁴ரவம் அபி⁴பு⁴ய்ய அபி⁴பு⁴ய்ய விஹரேய்ய’ந்தி, ஸீலேஸ்வேவஸ்ஸ…பே… ப்³ரூஹேதா ஸுஞ்ஞாகா³ரானம்.

‘‘ஆகங்கே²ய்ய சே, பி⁴க்க²வே, பி⁴க்கு² ‘சதுன்னம் ஜா²னானம் ஆபி⁴சேதஸிகானம் தி³ட்ட²த⁴ம்மஸுக²விஹாரானம் நிகாமலாபீ⁴ அஸ்ஸம் அகிச்ச²லாபீ⁴ அகஸிரலாபீ⁴’தி, ஸீலேஸ்வேவஸ்ஸ…பே… ப்³ரூஹேதா ஸுஞ்ஞாகா³ரானம்.

‘‘ஆகங்கே²ய்ய சே, பி⁴க்க²வே, பி⁴க்கு² ‘ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரேய்ய’ந்தி, ஸீலேஸ்வேவஸ்ஸ பரிபூரகாரீ அஜ்ஜ²த்தம் சேதோஸமத²மனுயுத்தோ அனிராகதஜ்ஜா²னோ விபஸ்ஸனாய ஸமன்னாக³தோ ப்³ரூஹேதா ஸுஞ்ஞாகா³ரானம்.

‘‘‘ஸம்பன்னஸீலா, பி⁴க்க²வே, விஹரத² ஸம்பன்னபாதிமோக்கா², பாதிமோக்க²ஸம்வரஸம்வுதா விஹரத² ஆசாரகோ³சரஸம்பன்னா அணுமத்தேஸு வஜ்ஜேஸு ப⁴யத³ஸ்ஸாவினோ, ஸமாதா³ய ஸிக்க²த² ஸிக்கா²பதே³ஸூ’தி, இதி யம் தம் வுத்தம், இத³மேதம் படிச்ச வுத்த’’ந்தி. பட²மம்.