7. மஹாலிஸுத்தம்

47. ஏகம் ஸமயம் ப⁴க³வா வேஸாலியம் விஹரதி மஹாவனே கூடாகா³ரஸாலாயம். அத² கோ² மஹாலி லிச்ச²வி யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² மஹாலி லிச்ச²வி ப⁴க³வந்தம் ஏதத³வோச – ‘‘கோ நு கோ², ப⁴ந்தே ஹேது, கோ பச்சயோ பாபஸ்ஸ கம்மஸ்ஸ கிரியாய பாபஸ்ஸ கம்மஸ்ஸ பவத்தியா’’தி? ‘‘லோபோ⁴ கோ², மஹாலி, ஹேது, லோபோ⁴ பச்சயோ பாபஸ்ஸ கம்மஸ்ஸ கிரியாய பாபஸ்ஸ கம்மஸ்ஸ பவத்தியா. தோ³ஸோ கோ², மஹாலி, ஹேது, தோ³ஸோ பச்சயோ பாபஸ்ஸ கம்மஸ்ஸ கிரியாய பாபஸ்ஸ கம்மஸ்ஸ பவத்தியா. மோஹோ கோ², மஹாலி, ஹேது, மோஹோ பச்சயோ பாபஸ்ஸ கம்மஸ்ஸ கிரியாய பாபஸ்ஸ கம்மஸ்ஸ பவத்தியா. அயோனிஸோ மனஸிகாரோ கோ², மஹாலி, ஹேது, அயோனிஸோ மனஸிகாரோ பச்சயோ பாபஸ்ஸ கம்மஸ்ஸ கிரியாய பாபஸ்ஸ கம்மஸ்ஸ பவத்தியா. மிச்சா²பணிஹிதம் கோ², மஹாலி, சித்தம் ஹேது, மிச்சா²பணிஹிதம் சித்தம் பச்சயோ பாபஸ்ஸ கம்மஸ்ஸ கிரியாய பாபஸ்ஸ கம்மஸ்ஸ பவத்தியாதி. அயம் கோ², மஹாலி, ஹேது, அயம் பச்சயோ பாபஸ்ஸ கம்மஸ்ஸ கிரியாய பாபஸ்ஸ கம்மஸ்ஸ பவத்தியா’’தி.

‘‘கோ பன, ப⁴ந்தே, ஹேது கோ பச்சயோ கல்யாணஸ்ஸ கம்மஸ்ஸ கிரியாய கல்யாணஸ்ஸ கம்மஸ்ஸ பவத்தியா’’தி? ‘‘அலோபோ⁴ கோ², மஹாலி, ஹேது, அலோபோ⁴ பச்சயோ கல்யாணஸ்ஸ கம்மஸ்ஸ கிரியாய கல்யாணஸ்ஸ கம்மஸ்ஸ பவத்தியா. அதோ³ஸோ கோ², மஹாலி, ஹேது, அதோ³ஸோ பச்சயோ கல்யாணஸ்ஸ கம்மஸ்ஸ கிரியாய கல்யாணஸ்ஸ கம்மஸ்ஸ பவத்தியா. அமோஹோ கோ², மஹாலி, ஹேது, அமோஹோ பச்சயோ கல்யாணஸ்ஸ கம்மஸ்ஸ கிரியாய கல்யாணஸ்ஸ கம்மஸ்ஸ பவத்தியா. யோனிஸோ மனஸிகாரோ கோ², மஹாலி, ஹேது, யோனிஸோ மனஸிகாரோ பச்சயோ கல்யாணஸ்ஸ கம்மஸ்ஸ கிரியாய கல்யாணஸ்ஸ கம்மஸ்ஸ பவத்தியா. ஸம்மாபணிஹிதம் கோ², மஹாலி, சித்தம் ஹேது, ஸம்மாபணிஹிதம் சித்தம் பச்சயோ கல்யாணஸ்ஸ கம்மஸ்ஸ கிரியாய கல்யாணஸ்ஸ கம்மஸ்ஸ பவத்தியா. அயம் கோ², மஹாலி, ஹேது, அயம் பச்சயோ கல்யாணஸ்ஸ கம்மஸ்ஸ கிரியாய கல்யாணஸ்ஸ கம்மஸ்ஸ பவத்தியா. இமே ச, மஹாலி, த³ஸ த⁴ம்மா லோகே ந ஸம்விஜ்ஜேய்யும், நயித⁴ பஞ்ஞாயேத² அத⁴ம்மசரியாவிஸமசரியாதி வா த⁴ம்மசரியாஸமசரியாதி வா. யஸ்மா ச கோ², மஹாலி, இமே த³ஸ த⁴ம்மா லோகே ஸம்விஜ்ஜந்தி, தஸ்மா பஞ்ஞாயதி அத⁴ம்மசரியாவிஸமசரியாதி வா த⁴ம்மசரியாஸமசரியாதி வா’’தி. ஸத்தமம்.