8. பப்³ப³ஜிதஅபி⁴ண்ஹஸுத்தம்

48. ‘‘த³ஸயிமே, பி⁴க்க²வே, த⁴ம்மா பப்³ப³ஜிதேன அபி⁴ண்ஹம் பச்சவேக்கி²தப்³பா³. கதமே த³ஸ? ‘வேவண்ணியம்ஹி அஜ்ஜு²பக³தோ’தி பப்³ப³ஜிதேன அபி⁴ண்ஹம் பச்சவேக்கி²தப்³ப³ம்; ‘பரபடிப³த்³தா⁴ மே ஜீவிகா’தி பப்³ப³ஜிதேன அபி⁴ண்ஹம் பச்சவேக்கி²தப்³ப³ம்; ‘அஞ்ஞோ மே ஆகப்போ கரணீயோ’தி பப்³ப³ஜிதேன அபி⁴ண்ஹம் பச்சவேக்கி²தப்³ப³ம்; ‘கச்சி நு கோ² மே அத்தா ஸீலதோ ந உபவத³தீ’தி பப்³ப³ஜிதேன அபி⁴ண்ஹம் பச்சவேக்கி²தப்³ப³ம்; ‘கச்சி நு கோ² மம் அனுவிச்ச விஞ்ஞூ ஸப்³ரஹ்மசாரீ ஸீலதோ ந உபவத³ந்தீ’தி பப்³ப³ஜிதேன அபி⁴ண்ஹம் பச்சவேக்கி²தப்³ப³ம்; ‘ஸப்³பே³ஹி மே பியேஹி மனாபேஹி நானாபா⁴வோ வினாபா⁴வோ’தி பப்³ப³ஜிதேன அபி⁴ண்ஹம் பச்சவேக்கி²தப்³ப³ம்; ‘கம்மஸ்ஸகோம்ஹி கம்மதா³யாதோ³ கம்மயோனி கம்மப³ந்து⁴ கம்மபடிஸரணோ, யம் கம்மம் கரிஸ்ஸாமி கல்யாணம் வா பாபகம் வா தஸ்ஸ தா³யாதோ³ ப⁴விஸ்ஸாமீ’தி பப்³ப³ஜிதேன அபி⁴ண்ஹம் பச்சவேக்கி²தப்³ப³ம்; ‘கத²ம்பூ⁴தஸ்ஸ மே ரத்திந்தி³வா வீதிவத்தந்தீ’தி பப்³ப³ஜிதேன அபி⁴ண்ஹம் பச்சவேக்கி²தப்³ப³ம்; ‘கச்சி நு கோ² அஹம் ஸுஞ்ஞாகா³ரே அபி⁴ரமாமீ’தி பப்³ப³ஜிதேன அபி⁴ண்ஹம் பச்சவேக்கி²தப்³ப³ம்; ‘அத்தி² நு கோ² மே உத்தரி மனுஸ்ஸத⁴ம்மோ அலமரியஞாணத³ஸ்ஸனவிஸேஸோ அதி⁴க³தோ, யேனாஹம் [யோஹம் (ஸீ. பீ. க.), ஸோஹம் (ஸ்யா.)] பச்சி²மே காலே ஸப்³ரஹ்மசாரீஹி புட்டோ² ந மங்கு ப⁴விஸ்ஸாமீ’தி பப்³ப³ஜிதேன அபி⁴ண்ஹம் பச்சவேக்கி²தப்³ப³ம். இமே கோ², பி⁴க்க²வே, த³ஸ த⁴ம்மா பப்³ப³ஜிதேன அபி⁴ண்ஹம் பச்சவேக்கி²தப்³பா³’’தி. அட்ட²மம்.