6. ஸக்கஸுத்தம்

46. ஏகம் ஸமயம் ப⁴க³வா ஸக்கேஸு விஹரதி கபிலவத்து²ஸ்மிம் நிக்³ரோதா⁴ராமே. அத² கோ² ஸம்ப³ஹுலா ஸக்கா உபாஸகா தத³ஹுபோஸதே² யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னே கோ² ஸக்கே உபாஸகே ப⁴க³வா ஏதத³வோச – ‘‘அபி நு தும்ஹே, ஸக்கா, அட்ட²ங்க³ஸமன்னாக³தம் உபோஸத²ம் உபவஸதா²’’தி? ‘‘அப்பேகதா³ மயம், ப⁴ந்தே, அட்ட²ங்க³ஸமன்னாக³தம் உபோஸத²ம் உபவஸாம, அப்பேகதா³ ந உபவஸாமா’’தி. ‘‘தேஸம் வோ, ஸக்கா, அலாபா⁴ தேஸம் து³ல்லத்³த⁴ம், யே தும்ஹே ஏவம் ஸோகஸப⁴யே ஜீவிதே மரணஸப⁴யே ஜீவிதே அப்பேகதா³ அட்ட²ங்க³ஸமன்னாக³தம் உபோஸத²ம் உபவஸத², அப்பேகதா³ ந உபவஸத².

‘‘தம் கிம் மஞ்ஞத², ஸக்கா, இத⁴ புரிஸோ யேன கேனசி கம்மட்டா²னேன அனாபஜ்ஜ அகுஸலம் தி³வஸம் அட்³ட⁴கஹாபணம் நிப்³பி³ஸேய்ய. த³க்கோ² புரிஸோ உட்டா²னஸம்பன்னோதி அலம் வசனாயா’’தி? ‘‘ஏவம், ப⁴ந்தே’’.

‘‘தம் கிம் மஞ்ஞத², ஸக்கா, இத⁴ புரிஸோ யேன கேனசி கம்மட்டா²னேன அனாபஜ்ஜ அகுஸலம் தி³வஸம் கஹாபணம் நிப்³பி³ஸேய்ய. த³க்கோ² புரிஸோ உட்டா²னஸம்பன்னோதி அலம் வசனாயா’’தி? ‘‘ஏவம், ப⁴ந்தே’’.

‘‘தம் கிம், மஞ்ஞத², ஸக்கா, இத⁴ புரிஸோ யேன கேனசி கம்மட்டா²னேன அனாபஜ்ஜ அகுஸலம் தி³வஸம் த்³வே கஹாபணே நிப்³பி³ஸேய்ய … தயோ கஹாபணே நிப்³பி³ஸேய்ய… சத்தாரோ கஹாபணே நிப்³பி³ஸேய்ய… பஞ்ச கஹாபணே நிப்³பி³ஸேய்ய… ச² கஹாபணே நிப்³பி³ஸேய்ய… ஸத்த கஹாபணே நிப்³பி³ஸேய்ய… அட்ட² கஹாபணே நிப்³பி³ஸேய்ய… நவ கஹாபணே நிப்³பி³ஸேய்ய… த³ஸ கஹாபணே நிப்³பி³ஸேய்ய… வீஸ கஹாபணே நிப்³பி³ஸேய்ய… திம்ஸ கஹாபணே நிப்³பி³ஸேய்ய… சத்தாரீஸம் கஹாபணே நிப்³பி³ஸேய்ய… பஞ்ஞாஸம் கஹாபணே நிப்³பி³ஸேய்ய… கஹாபணஸதம் நிப்³பி³ஸேய்ய. த³க்கோ² புரிஸோ உட்டா²னஸம்பன்னோதி அலம் வசனாயா’’தி? ‘‘ஏவம், ப⁴ந்தே’’.

‘‘தம் கிம் மஞ்ஞத², ஸக்கா, அபி நு ஸோ புரிஸோ தி³வஸே தி³வஸே கஹாபணஸதம் கஹாபணஸஹஸ்ஸம் நிப்³பி³ஸமானோ லத்³த⁴ம் லத்³த⁴ம் நிக்கி²பந்தோ வஸ்ஸஸதாயுகோ வஸ்ஸஸதஜீவீ மஹந்தம் போ⁴க³க்க²ந்த⁴ம் அதி⁴க³ச்சே²ய்யா’’தி? ‘‘ஏவம், ப⁴ந்தே’’.

‘‘தம் கிம் மஞ்ஞத², ஸக்கா, அபி நு ஸோ புரிஸோ போ⁴க³ஹேது போ⁴க³னிதா³னம் போ⁴கா³தி⁴கரணம் ஏகம் வா ரத்திம் ஏகம் வா தி³வஸம் உபட்³ட⁴ம் வா ரத்திம் உபட்³ட⁴ம் வா தி³வஸம் ஏகந்தஸுக²ப்படிஸம்வேதீ³ விஹரேய்யா’’தி? ‘‘நோ ஹேதம், ப⁴ந்தே’’. ‘‘தம் கிஸ்ஸ ஹேது’’? ‘‘காமா ஹி, ப⁴ந்தே, அனிச்சா துச்சா² முஸா மோஸத⁴ம்மா’’தி.

‘‘இத⁴ பன வோ, ஸக்கா, மம ஸாவகோ த³ஸ வஸ்ஸானி அப்பமத்தோ ஆதாபீ பஹிதத்தோ விஹரந்தோ யதா² மயானுஸிட்ட²ம் ததா² படிபஜ்ஜமானோ ஸதம்பி வஸ்ஸானி ஸதம்பி வஸ்ஸஸதானி ஸதம்பி வஸ்ஸஸஹஸ்ஸானி ஏகந்தஸுக²ப்படிஸம்வேதீ³ விஹரேய்ய. ஸோ ச க்²வஸ்ஸ ஸகதா³கா³மீ வா அனாகா³மீ வா அபண்ணகம் வா ஸோதாபன்னோ. திட்ட²ந்து, ஸக்கா, த³ஸ வஸ்ஸானி.

இத⁴ மம ஸாவகோ நவ வஸ்ஸானி… அட்ட² வஸ்ஸானி… ஸத்த வஸ்ஸானி… ச² வஸ்ஸானி… பஞ்ச வஸ்ஸானி சத்தாரி வஸ்ஸானி… தீணி வஸ்ஸானி… த்³வே வஸ்ஸானி… ஏகம் வஸ்ஸம் அப்பமத்தோ ஆதாபீ பஹிதத்தோ விஹரந்தோ யதா² மயானுஸிட்ட²ம் ததா² படிபஜ்ஜமானோ ஸதம்பி வஸ்ஸானி ஸதம்பி வஸ்ஸஸதானி ஸதம்பி வஸ்ஸஸஹஸ்ஸானி ஏகந்தஸுக²ப்படிஸம்வேதீ³ விஹரேய்ய, ஸோ ச க்²வஸ்ஸ ஸகதா³கா³மீ வா அனாகா³மீ வா அபண்ணகம் வா ஸோதாபன்னோ. திட்ட²து, ஸக்கா, ஏகம் வஸ்ஸம்.

இத⁴ மம ஸாவகோ த³ஸ மாஸே அப்பமத்தோ ஆதாபீ பஹிதத்தோ விஹரந்தோ யதா² மயானுஸிட்ட²ம் ததா² படிபஜ்ஜமானோ ஸதம்பி வஸ்ஸானி ஸதம்பி வஸ்ஸஸதானி ஸதம்பி வஸ்ஸஸஹஸ்ஸானி ஏகந்தஸுக²ப்படிஸம்வேதீ³ விஹரேய்ய, ஸோ ச க்²வஸ்ஸ ஸகதா³கா³மீ வா அனாகா³மீ வா அபண்ணகம் வா ஸோதாபன்னோ. திட்ட²ந்து, ஸக்கா, த³ஸ மாஸா.

இத⁴ மம ஸாவகோ நவ மாஸே… அட்ட² மாஸே… ஸத்த மாஸே… ச² மாஸே… பஞ்ச மாஸே… சத்தாரோ மாஸே… தயோ மாஸே… த்³வே மாஸே… ஏகம் மாஸம்… அட்³ட⁴மாஸம் அப்பமத்தோ ஆதாபீ பஹிதத்தோ விஹரந்தோ யதா² மயானுஸிட்ட²ம் ததா² படிபஜ்ஜமானோ ஸதம்பி வஸ்ஸானி ஸதம்பி வஸ்ஸஸதானி ஸதம்பி வஸ்ஸஸஹஸ்ஸானி ஏகந்தஸுக²ப்படிஸம்வேதீ³ விஹரேய்ய, ஸோ ச க்²வஸ்ஸ ஸகதா³கா³மீ வா அனாகா³மீ வா அபண்ணகம் வா ஸோதாபன்னோ. திட்ட²து, ஸக்கா, அட்³ட⁴மாஸோ.

இத⁴ மம ஸாவகோ த³ஸ ரத்திந்தி³வே [ரத்திதி³வே (க.)] அப்பமத்தோ ஆதாபீ பஹிதத்தோ விஹரந்தோ யதா² மயானுஸிட்ட²ம் ததா² படிபஜ்ஜமானோ ஸதம்பி வஸ்ஸானி ஸதம்பி வஸ்ஸஸதானி ஸதம்பி வஸ்ஸஸஹஸ்ஸானி ஏகந்தஸுக²ப்படிஸம்வேதீ³ விஹரேய்ய, ஸோ ச க்²வஸ்ஸ ஸகதா³கா³மீ வா அனாகா³மீ வா அபண்ணகம் வா ஸோதாபன்னோ. திட்ட²ந்து, ஸக்கா, த³ஸ ரத்திந்தி³வா.

இத⁴ மம ஸாவகோ நவ ரத்திந்தி³வே… அட்ட² ரத்திந்தி³வே… ஸத்த ரத்திந்தி³வே… ச² ரத்திந்தி³வே… பஞ்ச ரத்திந்தி³வே… சத்தாரோ ரத்திந்தி³வே… தயோ ரத்திந்தி³வே… த்³வே ரத்திந்தி³வே… ஏகம் ரத்திந்தி³வம் அப்பமத்தோ ஆதாபீ பஹிதத்தோ விஹரந்தோ யதா² மயானுஸிட்ட²ம் ததா² படிபஜ்ஜமானோ ஸதம்பி வஸ்ஸானி ஸதம்பி வஸ்ஸஸதானி ஸதம்பி வஸ்ஸஸஹஸ்ஸானி ஏகந்தஸுக²ப்படிஸம்வேதீ³ விஹரேய்ய, ஸோ ச க்²வஸ்ஸ ஸகதா³கா³மீ வா அனாகா³மீ வா அபண்ணகம் வா ஸோதாபன்னோ. தேஸம் வோ, ஸக்கா, அலாபா⁴ தேஸம் து³ல்லத்³த⁴ம், யே தும்ஹே ஏவம் ஸோகஸப⁴யே ஜீவிதே மரணஸப⁴யே ஜீவிதே அப்பேகதா³ அட்ட²ங்க³ஸமன்னாக³தம் உபோஸத²ம் உபவஸத², அப்பேகதா³ ந உபவஸதா²’’தி. ‘‘ஏதே மயம், ப⁴ந்தே, அஜ்ஜதக்³கே³ அட்ட²ங்க³ஸமன்னாக³தம் உபோஸத²ம் உபவஸிஸ்ஸாமா’’தி. ச²ட்ட²ம்.