5. ராஜந்தேபுரப்பவேஸனஸுத்தம்

45. [பாசி. 497] ‘‘த³ஸயிமே, பி⁴க்க²வே, ஆதீ³னவா ராஜந்தேபுரப்பவேஸனே. கதமே த³ஸ? இத⁴, பி⁴க்க²வே, ராஜா மஹேஸியா ஸத்³தி⁴ம் நிஸின்னோ ஹோதி. தத்ர பி⁴க்கு² பவிஸதி. மஹேஸீ வா பி⁴க்கு²ம் தி³ஸ்வா ஸிதம் பாதுகரோதி, பி⁴க்கு² வா மஹேஸிம் தி³ஸ்வா ஸிதம் பாதுகரோதி. தத்த² ரஞ்ஞோ ஏவம் ஹோதி – ‘அத்³தா⁴ இமேஸம் கதம் வா கரிஸ்ஸந்தி வா’தி! அயம், பி⁴க்க²வே, பட²மோ ஆதீ³னவோ ராஜந்தேபுரப்பவேஸனே.

‘‘புன சபரம், பி⁴க்க²வே, ராஜா ப³ஹுகிச்சோ ப³ஹுகரணீயோ அஞ்ஞதரம் இத்தி²ம் க³ந்த்வா ந ஸரதி – ‘ஸா தேன க³ப்³ப⁴ம் க³ண்ஹாதி’. தத்த² ரஞ்ஞோ ஏவம் ஹோதி – ‘ந கோ² இத⁴ அஞ்ஞோ கோசி பவிஸதி, அஞ்ஞத்ர பப்³ப³ஜிதேன. ஸியா நு கோ² பப்³ப³ஜிதஸ்ஸ கம்ம’ந்தி. அயம், பி⁴க்க²வே, து³தியோ ஆதீ³னவோ ராஜந்தேபுரப்பவேஸனே.

‘‘புன சபரம், பி⁴க்க²வே, ரஞ்ஞோ அந்தேபுரே அஞ்ஞதரம் ரதனம் நஸ்ஸதி. தத்த² ரஞ்ஞோ ஏவம் ஹோதி – ‘ந கோ² இத⁴ அஞ்ஞோ கோசி பவிஸதி, அஞ்ஞத்ர பப்³ப³ஜிதேன. ஸியா நு கோ² பப்³ப³ஜிதஸ்ஸ கம்ம’ந்தி. அயம், பி⁴க்க²வே, ததியோ ஆதீ³னவோ ராஜந்தேபுரப்பவேஸனே.

‘‘புன சபரம், பி⁴க்க²வே, ரஞ்ஞோ அந்தேபுரே அப்³ப⁴ந்தரா கு³ய்ஹமந்தா ப³ஹித்³தா⁴ ஸம்பே⁴த³ம் க³ச்ச²ந்தி. தத்த² ரஞ்ஞோ ஏவம் ஹோதி – ‘ந கோ² இத⁴ அஞ்ஞோ கோசி பவிஸதி, அஞ்ஞத்ர பப்³ப³ஜிதேன. ஸியா நு கோ² பப்³ப³ஜிதஸ்ஸ கம்ம’ந்தி. அயம், பி⁴க்க²வே, சதுத்தோ² ஆதீ³னவோ ராஜந்தேபுரப்பவேஸனே.

‘‘புன சபரம், பி⁴க்க²வே, ரஞ்ஞோ அந்தேபுரே பிதா வா புத்தம் பத்தே²தி புத்தோ வா பிதரம் பத்தே²தி. தேஸம் ஏவம் ஹோதி – ‘ந கோ² இத⁴ அஞ்ஞோ கோசி பவிஸதி, அஞ்ஞத்ர பப்³ப³ஜிதேன. ஸியா நு கோ² பப்³ப³ஜிதஸ்ஸ கம்ம’ந்தி. அயம், பி⁴க்க²வே, பஞ்சமோ ஆதீ³னவோ ராஜந்தேபுரப்பவேஸனே.

‘‘புன சபரம், பி⁴க்க²வே, ராஜா நீசட்டா²னியம் உச்சே டா²னே ட²பேதி. யேஸம் தம் அமனாபம் தேஸம் ஏவம் ஹோதி – ‘ராஜா கோ² பப்³ப³ஜிதேன ஸம்ஸட்டோ². ஸியா நு கோ² பப்³ப³ஜிதஸ்ஸ கம்ம’ந்தி. அயம், பி⁴க்க²வே, ச²ட்டோ² ஆதீ³னவோ ராஜந்தேபுரப்பவேஸனே.

‘‘புன சபரம், பி⁴க்க²வே, ராஜா உச்சட்டா²னியம் நீசே டா²னே ட²பேதி. யேஸம் தம் அமனாபம் தேஸம் ஏவம் ஹோதி – ‘ராஜா கோ² பப்³ப³ஜிதேன ஸம்ஸட்டோ². ஸியா நு கோ² பப்³ப³ஜிதஸ்ஸ கம்ம’ந்தி. அயம், பி⁴க்க²வே, ஸத்தமோ ஆதீ³னவோ ராஜந்தேபுரப்பவேஸனே.

‘‘புன சபரம், பி⁴க்க²வே, ராஜா அகாலே ஸேனம் உய்யோஜேதி. யேஸம் தம் அமனாபம் தேஸம் ஏவம் ஹோதி – ‘ராஜா கோ² பப்³ப³ஜிதேன ஸம்ஸட்டோ². ஸியா நு கோ² பப்³ப³ஜிதஸ்ஸ கம்ம’ந்தி. அயம், பி⁴க்க²வே, அட்ட²மோ ஆதீ³னவோ ராஜந்தேபுரப்பவேஸனே.

‘‘புன சபரம், பி⁴க்க²வே, ராஜா காலே ஸேனம் உய்யோஜேத்வா அந்தராமக்³க³தோ நிவத்தாபேதி. யேஸம் தம் அமனாபம் தேஸம் ஏவம் ஹோதி – ‘ராஜா கோ² பப்³ப³ஜிதேன ஸம்ஸட்டோ². ஸியா நு கோ² பப்³ப³ஜிதஸ்ஸ கம்ம’ந்தி. அயம், பி⁴க்க²வே, நவமோ ஆதீ³னவோ ராஜந்தேபுரப்பவேஸனே.

‘‘புன சபரம், பி⁴க்க²வே, ரஞ்ஞோ அந்தேபுரம் ஹத்தி²ஸம்மத்³த³ம் அஸ்ஸஸம்மத்³த³ம் ரத²ஸம்மத்³த³ம் ரஜனீயானி ரூபஸத்³த³க³ந்த⁴ரஸபோ²ட்ட²ப்³பா³னி, யானி ந பப்³ப³ஜிதஸ்ஸ ஸாருப்பானி. அயம், பி⁴க்க²வே, த³ஸமோ ஆதீ³னவோ ராஜந்தேபுரப்பவேஸனே. இமே கோ², பி⁴க்க²வே, த³ஸ ஆதீ³னவா ராஜந்தேபுரப்பவேஸனே’’தி. பஞ்சமம்.