4. අසාධාරණාදි

338. වීසං ද්වෙ සතානි භික්ඛූනං සික්ඛාපදානි;

උද්දෙසං ආගච්ඡන්ති උපොසථෙසු;

තීණි සතානි චත්තාරි භික්ඛුනීනං සික්ඛාපදානි;

උද්දෙසං ආගච්ඡන්ති උපොසථෙසු.

ඡචත්තාරීසා භික්ඛූනං, භික්ඛුනීහි අසාධාරණා;

සතං තිංසා ච භික්ඛුනීනං, භික්ඛූහි අසාධාරණා.

සතං සත්තති ඡච්චෙව, උභින්නං අසාධාරණා;

සතං සත්තති චත්තාරි, උභින්නං සමසික්ඛතා.

වීසං ද්වෙ සතානි භික්ඛූනං සික්ඛාපදානි;

උද්දෙසං ආගච්ඡන්ති උපොසථෙසු;

තෙ සුණොහි යථාතථං.

පාරාජිකානි චත්තාරි, සඞ්ඝාදිසෙසානි භවන්ති තෙරස;

අනියතා ද්වෙ හොන්ති.

නිස්සග්ගියානි තිංසෙව, ද්වෙනවුති ච ඛුද්දකා;

චත්තාරො පාටිදෙසනීයා, පඤ්චසත්තති සෙඛියා.

වීසං ද්වෙ සතානි චිමෙ හොන්ති භික්ඛූනං සික්ඛාපදානි;

උද්දෙසං ආගච්ඡන්ති උපොසථෙසු.

තීණි සතානි චත්තාරි, භික්ඛුනීනං සික්ඛාපදානි;

උද්දෙසං ආගච්ඡන්ති උපොසථෙසු, තෙ සුණොහි යථාතථං.

පාරාජිකානි අට්ඨ, සඞ්ඝාදිසෙසානි භවන්ති සත්තරස;

නිස්සග්ගියානි තිංසෙව, සතං සට්ඨි ඡ චෙව ඛුද්දකානි පවුච්චන්ති.

අට්ඨ පාටිදෙසනීයා, පඤ්චසත්තති සෙඛියා;

තීණි සතානි චත්තාරි චිමෙ හොන්ති භික්ඛුනීනං සික්ඛාපදානි;

උද්දෙසං ආගච්ඡන්ති උපොසථෙසු.

ඡචත්තාරීසා භික්ඛූනං, භික්ඛුනීහි අසාධාරණා;

තෙ සුණොහි යථාතථං.

සඞ්ඝාදිසෙසා, ද්වෙ අනියතෙහි අට්ඨ;

නිස්සග්ගියානි ද්වාදස, තෙහි තෙ හොන්ති වීසති.

ද්වෙවීසති ඛුද්දකා, චතුරො පාටිදෙසනීයා;

ඡචත්තාරීසා චිමෙ හොන්ති, භික්ඛූනං භික්ඛුනීහි අසාධාරණා.

සතං තිංසා ච භික්ඛුනීනං, භික්ඛූහි අසාධාරණා;

තෙ සුණොහි යථාතථං.

පාරාජිකානි චත්තාරි, සඞ්ඝම්හා දස නිස්සරෙ;

නිස්සග්ගියානි ද්වාදස, ඡන්නවුති ච ඛුද්දකා;

අට්ඨ පාටිදෙසනීයා.

සතං තිංසා චිමෙ හොන්ති භික්ඛුනීනං, භික්ඛූහි අසාධාරණා;

සතං සත්තති ඡච්චෙව, උභින්නං අසාධාරණා;

තෙ සුණොහි යථාතථං.

පාරාජිකානි චත්තාරි, සඞ්ඝාදිසෙසානි භවන්ති සොළස;

අනියතා ද්වෙ හොන්ති, නිස්සග්ගියානි චතුවීසති;

සතං අට්ඨාරසා චෙව, ඛුද්දකානි පවුච්චන්ති;

ද්වාදස පාටිදෙසනීයා.

සතං සත්තති ඡච්චෙවිමෙ හොන්ති, උභින්නං අසාධාරණා;

සතං සත්තති චත්තාරි, උභින්නං සමසික්ඛතා;

තෙ සුණොහි යථාතථං.

පාරාජිකානි චත්තාරි, සඞ්ඝාදිසෙසානි භවන්ති සත්ත;

නිස්සග්ගියානි අට්ඨාරස, සමසත්තති ඛුද්දකා;

පඤ්චසත්තති සෙඛියානි.

සතං සත්තති චත්තාරි චිමෙ හොන්ති, උභින්නං සමසික්ඛතා;

අට්ඨෙ පාරාජිකා යෙ දුරාසදා, තාලවත්ථුසමූපමා.

පණ්ඩුපලාසො පුථුසිලා, සීසච්ඡින්නොව සො නරො;

තාලොව මත්ථකච්ඡින්නො, අවිරුළ්හී භවන්ති තෙ.

තෙවීසති සඞ්ඝාදිසෙසා, ද්වෙ අනියතා;

ද්වෙ චත්තාරීස නිස්සග්ගියා;

අට්ඨාසීතිසතං පාචිත්තියා, ද්වාදස පාටිදෙසනීයා.

පඤ්චසත්තති සෙඛියා, තීහි සමථෙහි සම්මන්ති;

සම්මුඛා ච පටිඤ්ඤාය, තිණවත්ථාරකෙන ච.

ද්වෙ උපොසථා ද්වෙ පවාරණා;

චත්තාරි කම්මානි ජිනෙන දෙසිතා;

පඤ්චෙව උද්දෙසා චතුරො භවන්ති;

අනඤ්ඤථා ආපත්තික්ඛන්ධා ච භවන්ති සත්ත.

අධිකරණානි චත්තාරි සත්තහි සමථෙහි සම්මන්ති;

ද්වීහි චතූහි තීහි කිච්චං එකෙන සම්මති.